2 IziKronike 1:1-17
1 USolomoni indodana kaDavide waqhubeka eba namandla ebukhosini bakhe,+ uJehova uNkulunkulu wakhe enaye+ futhi elokhu emenza ukuba abe mkhulu ngokwedlulele.+
2 USolomoni wakhuluma izwi ku-Israyeli wonke, ezinduneni zezinkulungwane+ nezamakhulu+ nakubahluleli+ nakuzo zonke izikhulu zika-Israyeli wonke,+ izinhloko zezindlu zoyise.+
3 Khona-ke uSolomoni nalo lonke ibandla kanye naye baya endaweni ephakeme eyayiseGibheyoni;+ ngoba yilapho kwakukhona khona itende lokuhlangana+ likaNkulunkulu weqiniso uMose inceku+ kaJehova ayelenzile ehlane.
4 Nokho, umphongolo+ kaNkulunkulu weqiniso uDavide wayewukhuphulile eKiriyati-jeyarimi+ wawuletha endaweni uDavide ayewulungiselele yona,+ ngoba wayewugxumekele itende eJerusalema.+
5 Futhi i-altare+ lethusi uBhezaleli+ indodana ka-Uri indodana kaHure+ ayelenzile lalibekwe phambi kwetabernakele likaJehova; uSolomoni nebandla babebuza kulo njengokuvamile.
6 USolomoni wenza iminikelo lapho phambi kukaJehova phezu kwe-altare lethusi letende lokuhlangana, wanikela phezu kwalo iminikelo yokushiswa eyinkulungwane.+
7 Phakathi nalobo busuku uNkulunkulu wabonakala kuSolomoni wayesethi kuye: “Cela! Ngikupheni?”+
8 Khona-ke uSolomoni wathi kuNkulunkulu: “NguWe owabonisa umusa wothando omkhulu kuDavide ubaba+ futhi ongenzé inkosi esikhundleni sakhe.+
9 Manje, Jehova Nkulunkulu, isithembiso sakho kuDavide ubaba masibe esithembekile,+ ngoba wena ngokwakho ungenzé ngaba yinkosi+ phezu kwesizwe esinabantu abaningi ngangezinhlayiya zothuli lomhlaba.+
10 Manje nginike ukuhlakanipha nolwazi+ ukuze ngiphume futhi ngingene phambi kwalesi sizwe,+ ngoba ngubani ongahlulela lesi sizwe sakho esikhulu na?”+
11 Khona-ke uNkulunkulu wathi kuSolomoni: “Ngenxa yokuthi lokhu kuye kwathandeka enhliziyweni yakho+ futhi awuzange ucele umnotho, ingcebo nodumo noma umphefumulo walabo abakuzondayo, futhi awucelanga ngisho nezinsuku eziningi,+ kodwa uzicelele ukuhlakanipha nolwazi ukuze wahlulele isizwe sami engikubeke ukuba ube yinkosi phezu kwaso,+
12 unikwa lokho kuhlakanipha nolwazi;+ futhi ngizokunika umnotho nengcebo nodumo okungekho makhosi ayengaphambi kwakho ake aba nokunjengakho,+ futhi okungekho muntu ngemva kwakho oyoba nakho okunjengakho.”+
13 Ngakho uSolomoni wasuka endaweni ephakeme eyayiseGibheyoni,+ phambi kwetende lokuhlangana,+ weza eJerusalema waqhubeka ebusa phezu kuka-Israyeli.+
14 USolomoni wayelokhu ebutha izinqola namahhashi kangangokuba waba nezinqola eziyinkulungwane namakhulu amane namahhashi ayizinkulungwane eziyishumi nambili,+ wakugcina kumi emizini yezinqola+ naseduze kwenkosi eJerusalema.
15 Inkosi yenza isiliva negolide eJerusalema kwaba njengamatshe;+ ukhuni lomsedari yalwenza lwaba luningi njengemisikhamori+ eseShefela.+
16 USolomoni wayethunyelelwa amahhashi evela eGibhithe,+ futhi iqembu labathengisi benkosi lalithatha umhlambi wamahhashi ngemali.+
17 Futhi kwakuyinkambiso ukuba lilande inqola ethengwe eGibhithe ngezinhlamvu zesiliva ezingamakhulu ayisithupha nehhashi ngeziyikhulu namashumi amahlanu; kwakungaleyo ndlela nangawo wonke amakhosi amaHeti namakhosi aseSiriya.+ Kwakusetshenziswa lona ekuthengeni izinto kwamanye amazwe.
