1 AmaKhosi 21:1-29
21 Ngemva kwalezi zinto kwenzeka ukuba kube nesivini okwakungesikaNabhoti umJizreyeli, esasiseJizreyeli,+ eceleni kwesigodlo sika-Ahabi inkosi yaseSamariya.
2 Ngakho u-Ahabi wakhuluma noNabhoti, wathi: “Nginike+ isivini sakho,+ ukuze sibe yingadi+ yami yemifino,+ ngoba siseduze kwendlu yami; mangikunike isivini esingcono kunaso esikhundleni saso. Noma uma kukuhle emehlweni akho,+ ngizokunika imali njengentengo yalesi.”
3 Kodwa uNabhoti wathi ku-Ahabi: “Kuyinto engacabangeki kimi,+ ngokombono kaJehova,+ ukuba ngikunike ifa lokhokho bami.”+
4 Ngenxa yalokho u-Ahabi wangena endlini yakhe, enyukubele futhi edangele ngenxa yezwi uNabhoti umJizreyeli ayelikhulumile kuye, lapho ethi: “Ngeke ngikunike ifa lokhokho bami.” Khona-ke walala phezu kokhukho lwakhe wagcina ubuso bakhe bufulathele,+ akazange asidle isinkwa.
5 Ekugcineni uJezebeli+ umkakhe weza kuye wakhuluma naye wathi: “Kungani umoya wakho udabukile+ futhi ungasidli isinkwa?”
6 Yena wathi: “Kungenxa yokuthi ngikhulume noNabhoti umJizreyeli ngathi kuye, ‘Nginike isivini sakho ngemali. Noma, uma uthanda, mangikunike esinye isivini esikhundleni saso.’ Kodwa uthé, ‘Ngeke ngikunike isivini sami.’”+
7 Khona-ke uJezebeli umkakhe wathi kuye: “Angithi nguwe ophethe ubukhosi kwa-Israyeli?+ Vuka, udle isinkwa, inhliziyo yakho yename. Mina ngokwami ngizokunika isivini sikaNabhoti umJizreyeli.”+
8 Ngalokho wabhala izincwadi+ egameni lika-Ahabi wazibeka uphawu ngophawu lwakhe,+ wathumela lezi zincwadi emadodeni amadala+ nasezicukuthwaneni ezazisemzini wakubo zihlala noNabhoti.
9 Kodwa wabhala kulezi zincwadi, ethi:+ “Memezelani ukuzila ukudla, nihlalise uNabhoti phambi kwabantu.
10 Nenze ukuba amadoda+ amabili, abafo abangelusizo lwalutho,+ bahlale phambi kwakhe, banikeze ubufakazi ngokumelene naye,+ bathi, ‘Wena uqalekisé uNkulunkulu nenkosi!’+ Bese nimkhipha nimkhande ngamatshe ukuze afe.”+
11 Ngakho amadoda omuzi wakubo, amadoda amadala nezicukuthwane ezazihlala emzini wakubo, enza njengoba nje uJezebeli ayethumele kuwo, njengoba nje kwakulotshiwe ezincwadini ayewathumelele zona.+
12 Amemezela ukuzila ukudla+ ahlalisa uNabhoti phambi kwabantu.
13 Khona-ke amabili kulawo madoda, abafo abangelusizo lwalutho, angena ahlala phansi phambi kwakhe; la madoda angelusizo lwalutho aqala ukufakaza ngokumelene naye, okungukuthi, uNabhoti, phambi kwabantu, ethi: “UNabhoti uqalekisé uNkulunkulu nenkosi!”+ Ngemva kwalokho amkhiphela emaphethelweni omuzi amkhanda ngamatshe, waze wafa.+
14 Khona-ke athumela kuJezebeli, athi: “UNabhoti ukhandwé ngamatshe wafa.”+
15 Kwathi nje lapho uJezebeli ezwa ukuthi uNabhoti ukhandwé ngamatshe wafa, masinyane uJezebeli wathi ku-Ahabi: “Vuka, uthathe isivini sikaNabhoti umJizreyeli,+ aye wenqaba ukukunika sona ngemali; ngoba uNabhoti akasaphili, kodwa ufile.”
16 Kwathi nje lapho u-Ahabi ezwa ukuthi uNabhoti ufile, khona manjalo u-Ahabi wavuka ukuze ehlele esivinini sikaNabhoti umJizreyeli, asithathe.+
17 Izwi likaJehova+ lafika ku-Eliya+ umThishibi, lithi:
18 “Suka, wehle uhlangabeze u-Ahabi inkosi yakwa-Israyeli, oseSamariya.+ Nanguya esivinini sikaNabhoti, lapho ehlelé khona ukuze asithathe.
19 Kumelwe ukhulume naye, uthi, ‘Yilokhu uJehova akushilo: “Ingabe uye wabulala+ futhi wathatha?”’+ Futhi kumelwe ukhulume naye, uthi, ‘Yilokhu uJehova akushilo: “Endaweni+ lapho izinja zikhothé khona igazi likaNabhoti, izinja ziyolikhotha igazi lakho, yebo elakho.”’”+
20 U-Ahabi wathi ku-Eliya: “O sitha sami, ungitholile?”+ yena wathi: “Ngikutholile. ‘Ngenxa yokuthi uzithengisile ukuze wenze okubi emehlweni kaJehova,+
21 bheka ngiletha inhlekelele phezu kwakho;+ futhi ngokuqinisekile ngizoshanelisisa ngemva kwakho+ nginqume ku-Ahabi noma ubani ochamela udonga+ nongakwazi ukuzisiza nongenanzuzo kwa-Israyeli.
22 Ngokuqinisekile ngizokwenza indlu yakho ibe njengendlu kaJerobowamu+ indodana kaNebhati nanjengendlu kaBhahasha+ indodana ka-Ahiya, ngenxa yesenzo sokucasula ongicasule ngaso wabe usubangela u-Israyeli ukuba one.’+
23 Futhi uJehova ukhulumile nangokuqondene noJezebeli, ethi, ‘Zona kanye izinja ziyomudla uJezebeli esiqintini saseJizreyeli.+
24 Noma ubani ongoka-Ahabi ofela emzini uyodliwa izinja; nanoma ubani ofela endle uyodliwa izinyoni zezulu.+
25 Akekho ngisho noyedwa vó owaba njengo-Ahabi,+ owazithengisa ukuba enze okubi emehlweni kaJehova, owayeshoshozelwa+ uJezebeli+ umkakhe.
26 Wenza ngendlela enengekayo kakhulu ngokulandela izithombe ezinjengendle,+ ngokufana nakho konke ama-Amori ayekwenzile, uJehova ayewaxoshé phambi kwabantwana bakwa-Israyeli.’”+
27 Kwathi nje lapho u-Ahabi ezwa la mazwi, waklebhula izingubo zakhe wembatha indwangu yesaka;+ wazila ukudla waqhubeka elele ngendwangu yesaka futhi ehamba edangele.+
28 Izwi likaJehova lafika ku-Eliya umThishibi, lithi:
29 “Ubonile yini ukuthi u-Ahabi uzithobé kanjani ngenxa yami?+ Ngenxa yokuthi uzithobile ngenxa yami, ngeke ngilethe le nhlekelele ezinsukwini zakhe.+ Ngiyoletha le nhlekelele phezu kwendlu yakhe ezinsukwini zendodana yakhe.”+
