Dlulela kokuphakathi

Dlulela ohlwini lokuphathi

 ISIHLOKO ESIYINHLOKO

Lapho Kushona Othandekayo

Lapho Kushona Othandekayo

“Ungakhali . . . sisi. UNkulunkulu wazi kangcono.”

Lawo mazwi ashiwo kowesifazane ogama lakhe linguBebe. Wayesemngcwabeni kayise owayeshone engozini yemoto.

UBebe wayesondelene kakhulu noyise. Amazwi asekuqaleni ashiwo umngane womndeni owayenezinhloso ezinhle, kodwa kunokuba amduduze, amzwisa ubuhlungu uBebe. Wayelokhu ezitshela: “Ayikho nencane into enhle ngokufa kukababa.” Eminyakeni ethile kamuva, lapho uBebe elandisa ngokufa kukayise encwadini, kwaba sobala ukuthi wayesabuzwa ubuhlungu.

Njengoba kwenzeka kuBebe, kungathatha isikhathi eside ngomuntu ukuba anqobe usizi, ikakhulukazi uma oshonelwe ebesondelene kakhulu nomufi. EBhayibhelini ukufa kuchazwa kufanele “njengesitha sokugcina.” (1 Korinte 15:26) Kuyisitha esinamandla esiphazamisa ukuphila kwethu futhi ngokuvamile kufika singakulindele kusiphuce abathandekayo bethu. Akekho kithi ongabhekani nemiphumela yako. Ngakho kungokwemvelo ukukhungatheka lapho kufa othandekayo.

Mhlawumbe wake wazibuza: ‘Kuthatha isikhathi esingakanani ukunqoba usizi lokushonelwa?’ Umuntu angabhekana kanjani nosizi? Ngingabaduduza kanjani abashonelwe? Ingabe likhona ithemba ngabathandekayo bethu abashonile?