Dlulela kokuphakathi

Dlulela kuyi-menu yesibili

Dlulela ohlwini lokuphathi

OFakazi BakaJehova

IsiZulu

Ungaba Umngane KaNkulunkulu!

 ISIFUNDO 18

Yiba Umngane KaNkulunkulu Kuze Phakade!

Yiba Umngane KaNkulunkulu Kuze Phakade!

Kudinga umzamo ukwakha ubungane; kudinga umzamo ukulondoloza umngane. Imizamo yakho yokuba umngane kaNkulunkulu nokuhlala unguye iyobusiswa ngokucebile. UJesu wathi kulabo ababekholwa nguye: “Iqiniso liyonikhulula.” (Johane 8:32) Kusho ukuthini lokho?

Ungathola inkululeko manje. Ungakhululeka ezimfundisweni zamanga nasemangeni asakazwe uSathane. Ungakhululeka ekuphelelweni ithemba okukhungethe izigidi zabantu abangamazi uJehova. (Roma 8:22) Abangane bakaNkulunkulu bakhululekile ngisho ‘nasekwesabeni ukufa.’—Heberu 2:14, 15.

Ungathola inkululeko ezweni elisha likaNkulunkulu. Yeka inkululeko emangalisayo ongayithola esikhathini esizayo! Emhlabeni oyiPharadesi, siyokhululeka empini, ekuguleni nasebugebengwini. Siyokhululeka ebuphofwini nasendlaleni. Sikhululeke ekugugeni nasekufeni. Sikhululeke ekwesabeni, ekucindezelweni nasekucwasweni. IBhayibheli lithi ngoNkulunkulu: “Uvula isandla sakho wanelise isifiso sayo yonke into ephilayo.”—IHubo 145:16.

 Abangane bakaNkulunkulu bayophila phakade. Ukuphila okumi phakade kuyisipho esiyigugu uNkulunkulu ayosinika bonke abafuna ukuba abangane bakhe. (Roma 6:23) Cabanga nje ukuthi ukuphila okungapheli kuyosho ukuthini ngawe!

Uyoba nesikhathi sokwenza izinto eziningi. Mhlawumbe uyothanda ukufunda ukudlala insimbi yomculo. Noma mhlawumbe ufuna ukufunda ukudweba izithombe noma ukuba umbazi. Ungase uthande ukufunda ngezilwane nezitshalo. Noma mhlawumbe ufuna ukuhamba ubone amazwe ahlukahlukene nabantu. Ukuba nokuphila okumi phakade kuyokwenza ukwazi ukwenza zonke lezi zinto!

Uyoba nesikhathi sokwakha abangane abaningi. Ukuphila phakade kuyovula ithuba lokuba wazi abanye abantu abaningi abaye baba abangane bakaNkulunkulu. Uyokwazi amakhono abo nezimfanelo zabo ezinhle, futhi nabo bayoba abangane bakho. Uyobathanda, nabo bakuthande. (1 Korinte 13:8) Ukuba nokuphila okungapheli kuyokunikeza isikhathi sokuba ube umngane wabo bonke abantu emhlabeni! Okuhle kunakho konke, ubungane bakho noJehova buyolokhu buqina njengoba iminyaka idlula. Kwangathi ungaba umngane kaNkulunkulu kuze kube phakade!