Dlulela kokuphakathi

Dlulela kuyi-menu yesibili

Dlulela ohlwini lokuphathi

OFakazi BakaJehova

IsiZulu

INcwadi Yonyaka YoFakazi BakaJehova Ka-2017

 IGEORGIA

Ubukuphi Sonke Lesi Sikhathi?

U-Artur Gerekhelia

Ubukuphi Sonke Lesi Sikhathi?
  • UNYAKA AZALWA NGAWO 1956

  • UNYAKA ABHAPATHIZWA NGAWO 1991

  • UMLANDO WAKHE OMFUSHANE Ngemva nje kwezinyanga ezingu-8 ebhapathiziwe, washiya umuzi nebhizinisi elalichuma ukuze ayokhonza lapho indingeko inkulu khona.

LAPHO ngisanda kubhapathizwa abadala bangibuza ukuthi ngingathanda yini ukwandisa inkonzo yami. Ngo-May 4, 1992, ngaya emhlanganweni okhethekile owawuhlelelwe ababekulungele ukuya lapho indingeko inkulu khona. Ngakusasa, mina nengangihamba naye enkonzweni yasensimini saya echwebeni laseBatumi, esifundeni sase-Ajaria.

Ngesikhathi ngiqala ukushumayela eBatumi, ngangethukile. Ngangizibuza ukuthi, ‘Ngizoqala kanjani nje?’ Yangimangaza indlela asabela ngayo owesifazane wokuqala engakhuluma naye, owavele wathi: “Ubukuphi sonke lesi sikhathi?” Wayefuna ukwazi kabanzi ngoFakazi kangangokuthi ngakusasa waqala ukufunda nathi iBhayibheli!

Ngaphambi kokuba siye eBatumi, sathola uhlu lwamakheli alabo ababenesifiso sokufunda iBhayibheli. Njengoba sasingalazi kahle idolobha laseBatumi, sasicela abantu ukuba basiyalele imigwaqo yakhona. Abaningi kubo babengakwazi ukusisiza  ngenxa yokuthi amagama emigwaqo yakhona ayesanda kushintshwa. Ngokushesha nje, sase siqhuba izifundo zeBhayibheli namaqembu abantu abangu-10 kuya ku-15.

Ngemva kwezinyanga ezine sifikile, abantu abangaphezu kuka-40 base beya njalo emihlanganweni yethu. Ngakho sazibuza ukuthi, ‘Ubani ozonakekela laba abasanda kufika?’ Ngenxa yokungaboni ngaso linye okwakuphakathi kwebutho lezempi laseGeorgia neqembu labantu elishisekela ukuhlukana e-Abkhazia, bonke esasinabo ebandleni engangikulo baya eBatumi. Kwamiswa ibandla elisha elalinabadala abangomakad’ ebona namaphayona ngosuku olulodwa nje!