“INHLIZIYO yami ichichima injabulo,” kusho udade othile ngesikhathi kunikezelwa igatsha laseMadagascar, ngoMgqibelo ngo-January 24, 2015. Yena nezinye izivakashi ezingu-583 bajabula kakhulu lapho bebona isakhiwo esisha sokuhlala esinamagumbi angu-19, kanye nendawo yokudlela enwetshiwe nekhishi elilungisiwe. Kwanwetshwa namahhovisi omnyango weNkonzo, weZimali nobizwa ngokuthi iLocal/Design Construction. Ngaphezu kwalokho, umnyango we-Audio/Video nowoLimi Lwezandla yathola izindawo ezintsha zokuqopha, kwavulwa nomnyango obizwa ngokuthi iBraille Transcription. Ngemva kokulalela umlando womsebenzi wokushumayela eMadagascar, izimenywa zajabulela inkulumo yokunikezela igatsha eyanikezwa uMark Sanderson weNdikimba Ebusayo.

Isakhiwo esisha esinamagumbi angu-19 egatsheni laseMadagascar

 Kwathi gidi kubantu bakaJehova eJakarta, e-Indonesia, ngesikhathi izikhukhula zikhawuka edolobheni ngesikhathi sokunikezelwa kwezakhiwo ezintsha zegatsha ngo-February 14, 2015. Igatsha lisesitezi esisodwa esakhiweni ezinezitezi ezingu-42, eminye iminyango yegatsha isezitezi ezingu-12 esakhiweni esiseduze kwalesi. Iminyango eminingana yaseBethel ikwezinye izakhiwo ezincane eziseduze. U-Anthony Morris weNdikimba Ebusayo wanikeza inkulumo yokunikezela, ngosuku olulandelayo, bangu-15 257 ababuthanela enkundleni yebhola ukuze bamlalele enikeza inkulumo enesihloko esithi “Qhubeka Ukhuthazela Emsebenzini Omuhle.” Bangu-11 189 abethamela isimiso besezindaweni ezingu-41 bexhunywe nge-video, okwenza kwaba umbuthano wabantu bakaJehova omkhulu kunayo yonke eyake yaba khona e-Indonesia. URonald Jacka, esinye sezithunywa zevangeli zokuqala ezaya e-Indonesia, wathi: “Lapho ngifika ngo-1951, babengu-26 kuphela abamemezeli kulo lonke leli zwe. Kodwa namuhla bangaphezu kuka-26 000 abathamele lesi simiso esikhethekile. UJehova ubabusisile ngempela abantu bakhe e-Indonesia!”