Genesise 21:1-34
21 UJehova wamnaka uSara njengoba nje ayeshilo, futhi uJehova wenza kuSara njengoba nje ayekhulumile.+
2 USara wakhulelwa+ wazalela u-Abrahama indodana ekugugeni kwakhe ngesikhathi esimisiwe uNkulunkulu ayekhulume ngaso kuye.+
3 Ngakho u-Abrahama waqamba indodana yakhe ayezalelwe yona, uSara ayemzalele yona, ngokuthi u-Isaka.+
4 U-Abrahama wabe esemsoka u-Isaka indodana yakhe lapho esenezinsuku eziyisishiyagalombili ubudala, njengoba nje uNkulunkulu ayemyalile.+
5 U-Abrahama wayeneminyaka eyikhulu ubudala lapho ezalelwa u-Isaka indodana yakhe.
6 Khona-ke uSara wathi: “UNkulunkulu ungilungiselele ukuhlekwa: wonke umuntu ozwa ngakho uzongihleka.”+
7 Wanezela: “Ubani obengathi ku-Abrahama, ‘Ngokuqinisekile uSara uzoncelisa abantwana,’ njengoba ngizele indodana ekugugeni kwakhe?”
8 Umntwana waqhubeka ekhula walunyulwa;+ u-Abrahama wabe eselungisa idili elikhulu ngosuku lokulunyulwa kuka-Isaka.
9 USara wayelokhu eqaphela indodana kaHagari umGibhithe,+ ayeyizalele u-Abrahama, igcona.+
10 Ngakho waqala ukuthi ku-Abrahama: “Xosha lesi sigqilakazi kanye nendodana yaso, ngoba indodana yalesi sigqilakazi ngeke ibe yindlalifa kanye nendodana yami, u-Isaka!”+
11 Kodwa le nto ayizange neze ithandeke ku-Abrahama ngendodana yakhe.+
12 Khona-ke uNkulunkulu wathi ku-Abrahama: “Ungavumeli lutho uSara alushoyo kuwe ngomfana nesigqilakazi sakho ukuba lube olungathandeki kuwe. Lalela izwi lakhe, ngoba lokho okuyobizwa ngokuthi yinzalo yakho kuyoba khona ngo-Isaka.+
13 Futhi ngokuqondene nendodana yesigqilakazi,+ nayo ngiyoyenza ibe yisizwe esikhulu, ngoba iyinzalo yakho.”+
14 Ngakho u-Abrahama wavuka ekuseni kakhulu wathatha isinkwa negabha lamanzi lesikhumba wakunika uHagari,+ ekubeka ehlombe lakhe, kanye nomntwana,+ wayesemmukisa. Wahamba wazulazula ehlane laseBheri-sheba.+
15 Ekugcineni amanzi aphela+ egabheni lesikhumba wayesephonsa+ umntwana ngaphansi kwesinye sezihlahla.
16 Wabe eseqhubeka yedwa ibanga elingaba elokucibishela umnsalo, wayesehlala phansi, ngoba wathi: “Mangingaboni lapho umntwana efa.”+ Ngakho wahlala phansi buqamama waqala ukuphakamisa izwi lakhe wakhala.+
17 UNkulunkulu wezwa izwi lomfana,+ ingelosi kaNkulunkulu yambiza uHagari isezulwini yathi kuye:+ “Kwenzé njani, Hagari? Ungesabi, ngoba uNkulunkulu ulilalele izwi lomfana laphaya lapho ekhona.
18 Sukuma uphakamise umfana umbambe ngesandla, ngoba ngizomenza isizwe esikhulu.”+
19 Khona-ke uNkulunkulu wavula amehlo akhe wabona umthombo wamanzi;+ waya wagcwalisa igabha lesikhumba ngamanzi waphuzisa umfana.
20 UNkulunkulu waqhubeka enaye umfana,+ futhi waqhubeka ekhula ehlala ehlane; waba umcibisheli.+
21 Wahlala ehlane lasePharanu,+ futhi unina wabe esemthathela umfazi ezweni laseGibhithe.
22 Ngaleso sikhathi u-Abhimeleki kanye noFikoli induna yebutho lakhe bathi ku-Abrahama: “UNkulunkulu unawe kukho konke okwenzayo.+
23 Ngakho manje funga uNkulunkulu+ kimi lapha ukuthi ngeke ungathembeki kimi nasenzalweni yami nasenzalweni yesizukulwane sami;+ ukuthi uzosebenzelana nami kanye nezwe obugogobele kulo,+ ngendlela engisebenzelane ngayo nawe ngothando oluthembekile.”+
24 Ngakho u-Abrahama wathi: “Ngizofunga.”+
25 Lapho u-Abrahama emsola kanzima u-Abhimeleki ngokuqondene nomthombo wamanzi izinceku zika-Abhimeleki ezaziwuthathe ngobudlova,+
26 u-Abhimeleki wathi: “Angazi ukuthi ubani owenze le nto, nawe ngokwakho awungitshelanga, nami bengingezwanga ngayo ngaphandle kwanamuhla.”+
27 Ngakho u-Abrahama wathatha izimvu nezinkomo wazinika u-Abhimeleki,+ bobabili benza isivumelwano.+
28 Lapho u-Abrahama ebeka amawundlu omhlambi ezinsikazi wodwa,
29 u-Abhimeleki wathi ku-Abrahama: “Asho ukuthini la mawundlu ezinsikazi ayisikhombisa owabeke wodwa?”
30 Khona-ke wathi: “Kumelwe uwamukele esandleni sami la mawundlu ezinsikazi ayisikhombisa, ukuze kube ubufakazi+ bami bokuthi yimi engiwumbile lo mthombo.”
31 Yingakho aqamba leyo ndawo ngokuthi iBheri-sheba,+ ngoba lapho bobabili babenzé isifungo.
32 Ngakho benza isivumelwano+ eBheri-sheba, okwathi ngemva kwalokho u-Abhimeleki wasuka kanye noFikoli induna yakhe yempi babuyela ezweni lamaFilisti.+
33 Ngemva kwalokho watshala umthamariske eBheri-sheba wabiza lapho egameni likaJehova+ uNkulunkulu ohlala kuze kube nini nanini.+
34 U-Abrahama waselula saba yizinsuku eziningi isikhathi sokuhlala kwakhe njengomfokazi ezweni lamaFilisti.+
