Rabiguet

Goyee menú ni rarop lagary

Testigos xtuny Jehová

diitza

Graduación 138 de la Escuela Bíblica de Galaad

Graduación 138 de la Escuela Bíblica de Galaad

Dzú sábda 14 de beʼo marz íz 2015, herman ni goyee ló scuel 138 de la Escuela Bíblica de Galaad góc graduación xtunyibu ló Centro Educativo de la Watchtower, reunión reʼ gocni Patterson (Nueva York). Buñ ni bidxin lagarycu né ni bibiʼ láani ló video ló stipnés lagary gocyibu más de 14.000 buñ. Reunión reʼ gosalóni né música ni bireʼ ló tap cántico copy, ni bíilyibu después. *

Geoffrey Jackson, ni nac toibtica de Tidxó Buñ ni nap xiroʼ Galnann ni Rasanir nisló testigos xtuny Jehová, gosalóbu graduación reʼ. Órni láabu gosalóbu, bisetlabu que herman ni goyee ló scuel reʼ diti non gony xtunyibu guirá ni bisuidyibu, xalagary ngú non guiquiinyibu láani par gacnéyibu stipnés buñ (2 Timoteo 2:2).

Hermano Jackson bisetlabu mod buny Moisés. Por tidxó tiemp, yoʼ lairy xtuny Moisés biquiin guirá israelitas láani par ñony adoraryibu a Jehová. Per órni bilox goyaʼ yoʼ ro rac adorar Jehová ma ndeʼ goyoʼ xalagaryni. Ralooypani que Moisés diti cuaʼbu lagary ñoʼbu dada lainy yoʼ reʼ ro góc laa, Santísimo, portín nosi sumo sacerdote labúu goyoʼ lainyni. Ná scú gocni, la Biblia diti rasetlaa que Moisés bidzuitz. Xalagary ngú, gocnébu Aarón ló xchiin (Éxodo 33:7-11; 40:34, 35). ¿Xí rasuidyno de láabu? Hermano Jackson goniʼ: «Colguibiʼ dxiin ni napto portín nigolú rasacni, per diti gony xtunyto láani».

«¿Sadzuibyto por ni rasuchlaʼ guix la?». Scá góc laa xtiscurs hermano Kenneth Flodin, toibtica ni racné a Comité de Enseñanza de Tidxó Buñ ni nap xiroʼ Galnann. Láabu gochbu a guirá ni goyee scuel, que ló dzú ni sietra, sacalóyibu bisaʼ clas galnagan, o sasac naganyibu xchiinyibu. Per ór cú bisetlabu ni ná Levítico 26:36 ni ná que non guibiʼyibu galnagan xomod guixbich, diti non guibiʼyibu láani xomod galnagan ni diti labúu guicalóyibu. Ór cú bisetlabu ximod Pablo labúu cualóbu bisaʼ clas galnagan portín gopbu xiroʼ confianz lóo Jehová (2 Corintios 1:8, 10).

«¿Xí nainy lóoto?». Mark Sanderson, ni nac toibtica de Tidxó Buñ ni nap xiroʼ Galnann ni Rasanir nisló testigos xtuny Jehová, bituidy stoib discurs. Láabu goniʼbu diitz ni sieed ló Proverbios 13:12: «Órni diti radxin ni cabés buñ ndeʼ rony que galnabany raxoʼ». Nabanni, per xidal rasobladx gac buñ ric o guidziguiaʼ buñ layibu né rareʼganyibu órni diti racni scú.

Ló xtzú Jesús, goyoʼ buñ ni gadzé mod buny pensary ñac Juan ni Ragonis (Lucas 7:24-28). Goyoʼ buñ ni bisac que Juan ñac toib buñnan ni nasuidy layibu por cós nagan. Por ngú órni bidxin Juan diti bioladxyibu, portín Juan goniʼ por cós ni nigolú de Dios. Stipnés buñ buny pensary que Juan ñoc lairy ni rasac, per láabu godocbu lairy xomod buñ pobre. Per buñ ni golés a toib profeta bibaladx, portín Juan diti gócbu cualquiersi profeta; gócbu toib ni bixal néz par nadxin Jesús (Juan 1:29).

Hermano Sanderson bilitzbu guirá ni goyoʼ ló scuel reʼ que diti gapyibu clas pensary reʼ. Xalagary cuésyibu gonyxiroʼ buñ layibu o que herman diguny xigony layibu, guiquiinyibu ni bisuidyibu par gacnéyibu herman, guisuidyibu herman guirá ni bisuidyibu ló scuel de Galaad, gony nadipyibu fe xtuny herman né guislooyibu galnadxiʼ. Hermano Sanderson láaca goniʼ: «Colgac buñdxo par gacnéto herman, colgony xtem par gonyto ni ná Jehová né dipa sareʼganto».

«¿Sayaʼanto buñ ni calaʼn la?». Scá góc laa discurs ni bituidy James Cauthon toib mextra ni rony dxiin ló Departamento de Escuelas Teocráticas. Herman reʼ bisetlaa que guiráno raquiin tzoʼ ni gonladx né gaiby lóono que nigolú rasacno. Dada Jesús goniiny ñoʼ ni ñonladx láabu, dzú ni goyonisbu Jehová goniné láabu. Modreʼ Jehová bislooybu que nadxidotbu Jesús (Mateo 3:16, 17).

Jehová bisaʼtzay lóono par labúu gacnéno né gony nadipno stipnés herman né diitz ni ranino, né rabésbu que gonyno láani (Proverbios 3:27). Herman reʼ láaca goniʼ: «Colgony xtem por guibiʼto cós tzaay ni rony stipnés né colgaiby láani layibu». Pal lóono raibyno xhermanno que galán cayonybu dxiin, ngú sony que layibu guiduidyibu cuent que nigolú rasac xtem ni ronyibu.

«Colgony dada rutirigaʼlni lóoto.» Mark Noumair, toib ni racné a Comité de Enseñanza, bituidybu stoib discurs. Láabu bisetlabu ximod Pablo más goyoʼbu galrrasaʼ por stipnés que por láacabu, bisetlabu láani par gacnébu herman ni goyee ló scuel reʼ que non gonyibu dada rutirigaʼlni layibu. Pal ronyibu láani sioʼyibu goxt mod gosac apóstol Pablo (Filipenses 2:17, 18).

Pablo dipa bireʼgan ná cualóbu xiroʼ galnagan. Por ni bunybu dada rutirigaʼlni láabu dada dzú goitybu, labúu goniʼbu: «Ma bixoni dada bistubylagaya láani» (2 Timoteo 4:6, 7). Hermano Noumair gochbu a guirá ni goyee scuel que xomod goyodieʼ Pablo ló xchiin Dios, scúca non tzodieʼyibu ló xchiinyibu lagary ro tzeeyibu.

Experiencias. Michael Burnett, mextra de Escuela de Galaad láabu bituidybu stoib discurs, ro tipnés herman ni goyee scuel bislooy ximod gosacloyibu órni goniʼyibu xtiitz Dios dzú goyoʼyibu Patterson.

Ni goyee scuel reʼ galán goyeeni layibu portín diti bituidyibu oportunida ni gopyibu par guiniʼyibu xtiitz Dios né goyoʼyibu puext guiniʼyibu diitz sacró ló diitz ni raniʼ buñ. Toib de layibu gon que lagary ro tzeebu tzaniʼbu xtiitz Dios noʼ xidal buñ ni raniʼ dixtil. Por ngú, antes de ñeebu lagarycu biquiimbu JW Language par bisuidybu ximod guininébu buñ. Né tidxóyen ni bisuidybu, labúu biquiimbu láani dzú cuca órni goninébu toib buñ locay. Nigoreʼ buñreʼ né stap de xfamily ma casuidyibu ni ná la Biblia.

Entrevistas. De ngú la, William Turner, toib ni racné a Comité de Servicio de Tidxó Buñ ni nap xiroʼ Galnann, gonabdiitzbu a tap ni goyee scuel. Gonabdiitzbu xí guirá gosacloyibu dzú ni yása guidxinyibu Galaad né ximod rasacyibu por guirá ni bisuidyibu ló scuel reʼ.

Herman goleʼ loguiaʼ tipnés cós ni bitlaa ló scuel reʼ ni más gocné layibu. Toibtica de layibu goniʼ que bisuidybu xiroʼ ni rasetlaa capítulo 10 de Lucas. Guiráca 70 xpiin Jesús ni bixelbu tzaniʼ xtiitz Dios bibiguetyibu goxtiguie portín galán goyeeni layibu. Jesús láaca bibaladx, ná scú, Jesús góoch layibu que diti non guibaladxyibu por ni goyeeni layibu galán, xalagary ngú guibaladxyibu portín Dios rabaladx por xtem ni bunyibu. Ndeʼ rasien lóono que tzoʼno goxt portín napno xcalrracné Jehová né diti tampa por ni rieeni lóono galán.

Hermano Turner góoch diitz ni ritlaa ló Filipenses 1:6 a guirá ni goyee scuel né láaca goniʼbu que Jehová ma gosaló toib dxiin sacró loguiaʼyibu né que diti sasian layibu.

«Colguibiʼtzay ronoʼ Jehová.» Samuel Herd, ni nac toibtica de Tidxó Buñ ni nap xiroʼ Galnann, bituidy discurs ni más bireʼ loguiaʼ ló graduación reʼ. Ló discurs reʼ golexabu ximod bisalóno labúu tzoʼni ronoʼ Jehová ná diti rabiʼno láabu.

Toibtica mod ni labúu gonyno láani ngú guibiʼno guirá cós ni bisaʼbu, né órni rabiʼno guirá cós reʼ rasuidyno xiroʼ de láabu. Jehová láaca ma goloníbu bisaló xcalnabanyno (Efesios 1:18). Órni más rolno la Biblia más rasuidyno de Jehová. Né órni más nanno de Jehová, más rabigaxno láabu.

Raquiin guisuidygoluʼno tap Evangelios ni noʼ, portín mod goniʼ né mod buny Jesús racnéni lóono guientzaayno ximod nac Dios. Jesús bislooytzay mod nac Jehová por ngú goniʼbu: «Ni ma bibiʼ naʼ láaca ma bibiʼ Bixiosa» (Juan 14:9).

Hermano Herd gochbu ni goyee scuel reʼ que diti nosi guibiʼyibu Jehová por mod ni buny Jesús, xalagary ngú láaca non guisuʼyibu mod buny Jesús. Xomodca Jesús buny por biyaʼan stipnés buñ, lóono láaca scúca non gonyno por guiyaʼanno buñ, ndeʼ raduidy diitz guisuidyno layibu ni ná xtiitz Dios.

Pal rabiʼtzayno Jehová, láaca labúu guinino mod goniʼ ni bicaʼ salmos: «Naʼ napa Jehová nislóya guirási ór. Portín láabu noʼbu niis ladbuʼya, dipa sarel ñeʼya» (Salmo 16:8).

Biloxni. Órni guiráyibu cuaʼyibu diploma xtunyibu, toib herman bíil toib guiich ro biduidyibu guixquix por scuel reʼ. Ór cú hermano Jackson gochbu a guirá ni goyee scuel reʼ que diti guirá ni guisuidyibu herman gacni cós copy o cós nagan, portín xidalni ma nan herman láani. Hermano Jackson láaca goniʼ balaati rasac gacyibu buñdxo. Xalagary guiniʼyibu de láacayibu né de guirá ni bisuidyibu ló scuel reʼ, non guiniʼyibu ni ná la Biblia né ni ná guiich ni racaʼno. Né láaca, diti cueʼganyibu herman ni disaldi tzee ló Escuela de Galaad, xalagary ngú gonyibu por gacnéyibu herman guiquiin guirá galrracné ni layibu napyibu. Órni bilox graduación reʼ, guirá ni bidop goyoʼyibu goxtiguie né gopyibu gan gacnéyibu stipnés herman.

^ Párrafo. 2 Guirá ni bidop ló graduación reʼ cuaʼyibu cántico copy lainy xomal.

^ Párrafo. 32 Diti guirá gudx ro sieedyibu rienni ló mapa.

^ Párrafo. 34 Diti sieed laa guiráyibu.