Accesibilidad ajuste

Biloyña diitz ni cayopylo

Goyee menú ni rarop lagary

Rabiguet

Testigos xtuny Jehová

diitza

Graduación 135 de la Escuela Bíblica de Galaad

Graduación 135 de la Escuela Bíblica de Galaad

Ló 14 de septiembre íz 2013, bidxin 10.500 buñ ló graduación 135 de la Escuela Bíblica de Galaad de la Watchtower, reunión reʼ gocni Patterson (Nueva York), lagary ro testigos xtuny Jehová ragoʼ scuel. Scuel reʼ racnéni a testigos xtuny Jehová ni nantzay par gacyibu galán mextra ni rasuidy ni ná la Biblia.

Guy Pierce, toibtica herman ni nac Tidxó Buñ ni nap xiroʼ Galnann ni Rasanir nisló testigos xtuny Jehová, gosalóbu graduación cú. Goleʼbu xtiscursbu ló diitz ni sieed ló Mateo 28:19, 20, ni ná: «Coltzé né colgony más xpiina guidopynac gudxlio, [...] colguisuidy layibu guisobyibu guirá ni bisuidy lóoto».

Hermano Pierce goniʼbu que diitz ni goniʼ Jesús dxoga dxoga cadxiinni dada ló xtzúno. Guirá ni racanal a Jesús rasuidyibu stipnés buñ par guisobyibu ni Jesús buny mandary, ladni sieed mandary ni ná que guisuidyno «diitz sacró xtuny Gobierno reʼ» (Mateo 24:14). Modreʼ guirá buñ ni nicopyga casaló casuidy ni ná Dios, láaca radxin racyibu mextra de Gobierno xtuny Dios. Hermano Pierce goniʼbu que por ni cayac ndeʼ, laʼga buñ cadal ló Gudxlio láaca xcudx Dios caniʼsni más.

«Biduidyibu más ni labúu rigaʼlni layibu.» Thomas Cheiky, toibtica anciano ni rasanir nisló Betel ni noʼ Estados Unidos, gosalóbu xtiscursbu né diitz ni sieed ló 2 Corintios 8:1-4. Congregaciones ni goyoʼ Macedonia ló primer siglo, ná gocyibu buñ ni godudy ló galsii gonabyibu que nacaʼyibu lagary par naduidyibu ni caquiin guirá herman ni goyoʼ Jerusalén ni cadudy ló galsii. Guirá herman ni noʼ ló scuel láaca biduidyibu ni napyibu né modreʼ bislooyibu que nír rioʼyibu galrrasaʼ por stipnés.

Nigoreʼ labúu gandxichno que guirá herman de gudx Macedonia, ná biduidyibu ni caquiin stipnés, diti goleʼyibu tiplad xfamilyibu né diti bisianyibu de ñonyibu xchiin Dios. Hermano reʼ bilitzbu a guirá herman ni noʼ ló scuel reʼ que nasuʼyibu mod buny guirá herman de gudx Macedonia.

«Scuel reʼ ma biloxni.» Stoib herman herman ni nac Tidxó Buñ ni nap xiroʼ Galnann ni Rasanir nisló Testigos xtuny Jehová ni laa Samuel Herd, buny animarbu guirá herman ni noʼ ló scuel reʼ par nasetnaladxyibu guirá ni gosacloyibu ló Escuela de Galaad. Láabu golexabu que xomodca toib música sacroyen labúu guisetnaladxyibu láani guidopy dzú, scúca ni ma bisuidyibu labúu guisetnaladxyibu né gony animarni layibu guirá dzú laʼga nabanyibu.

Hermano Herd láaca goniʼbu que lainy memoria xtuny Jehová diti napni fin. Dios ma goleʼ laa xidalguixo billones de vitzón ni noʼ guibá, né dipa rialadxbu laa ni toibtica de láani (Salmo 147:4). Por ngú, láabu diti sialadxbu dxiin nadip ni buñ herman ni goyoʼ ló scuel reʼ. Jehová cagoʼtzay ló memoria xtuny xidal cós móz ni cada toibyibu buny, né diti sioʼ ni cuann cós ni rasac reʼ ni ma bicuaʼ montónyibu lainy guibá (Mateo 6:20).

Hermano reʼ goniʼ pal Dios goloʼtzay lainy memoria xtuny dxiin nadip ni buny guirá herman ló scuel reʼ, xomod galrronladx ni bislooyibu, diti nac xitcal que layibu guisetnaladxyibu guirá ni bunyibu ló Escuela de Galaad. Hermano Herd goniʼbu: «Órni guisetnaladxto guirá cós sacró ni bunyto ló scuel reʼ láani sagoʼ nakitni lóoto, diti guialadxto por Jehová gocni scú, colguiduidy guixquix láabu. Diti guialadxto guirá cós tzaay, portín guirá galnasác ni láabu raduidybu lóoto diti sialadxto láani.»

«Colgap confianz ló galnadip ni xpensaryto diti rigal nap Jehová.» Sam Roberson, toibtica mextra ni goloʼ scuel cú, bilitzbu guirá herman ni goyee scuel que órni guicalóyibu galnagan non gapyibu confianz ló xcalnadip Jehová diti ló xcalnadipyibu. Ló Efesios 3:20 ná que Dios labúu gonybu más cós por lóono ni xpensaryno diti rigaʼl guienno. Xcalnadip Jehová nigolú xiroʼni, né por ngú diti rigaʼlni lóono guienno láani. Por ngú ná guinino que Jehová nap xiroʼgolu galnadip diti ngúsi láani portín versículo reʼ raduidy diitz que Jehová labúu gonybu más que ngú.

Jehová raduidy xcalnadip a guirá buñ ni rasob láabu. Órni cacalóno galnagan, láabu nacbu xomod toib buñ ni riee ló guerr «ni nadipgolú» (Jeremías 20:11). Herman Sam Roberson gochbu guirá ni goyee scuel cú que Jehová sacné layibu guireʼyibu ló nitisi galnagan.

«Diti guisian gonyxiroʼto dxiin ni nigolú rasac ni cuaʼto.» Stoib mextra ni laa, William Samuelson, golexabu que Gobierno xtuny Dios bunyni que guirá herman ni goyoʼ ló scuel reʼ nasacyibu de chop mod. Bunyni que antes de ñoʼyibu ló scuel reʼ né ló scuel bislooyibu que nacyibu buñ ni labúu gap buñ confianz lóo. Né por stoib lad, layibu rasacyibu portín noʼyibu xilad Gobierno xtuny Dios, toib gobierno ni rony mandary ló guidopynac Gudxlio né guibá.

¿Ximod diti guisian gonyxiroʼyibu dxiin ni cuaʼyibu? Herman Samuelson buny animarbu par gonyxiroʼyibu Jehová né gapyibu respet a stipnés. Jesús láacabu biduidybu diitz que stipnés buny rasac par láabu né dada órni bilitzbu né golonésbu buñ bislooybu que nacbu buñ de clas reʼ. Scúca apostol Pablo bunyxiroʼbu dxiin ni cuaʼbu né diti bunyxiroʼbu láacabu (Romanos 11:13). Pal guirá herman ni noʼ ló scuel reʼ rony scúca, sasacyibu más nisló Jehová.

«Xcalnadip mainy napto láani roʼto.» Michael Burnett, stoib mextra de Galaad, goniʼbu que pal ronyibu guirá ni rasuidyibu ló reunión, ndeʼ sacné layibu órni tzeeyibu yoʼ por yoʼ né modcu racnéyibu guirebuʼ ni ná Revelación 9:19. Né láaca stipnés herman goniʼyibu né buny escenificaryibu ni gosacloyibu órni casaayibu yoʼ por yoʼ laʼga noʼyibu ló scuel reʼ. Toibtica de layibu gonabdiitz toib buñ ni rony dxiin ro radoʼ gasolin: «¿Pu dzú gosaló né bilox tiemp ni noʼ par gudxrop?» (Lucas 21:24). Órni herman reʼ bibiguet ronoʼ buñguieeu reʼ, gocnébu nadzelbu galrracapy ló capítulo 4 ló libro xtuny Daniel né apéndice de libro ni laa, ¿Xí ni merpa rasuidy la Biblia?

«Ma góc nadip xcalnabanyto.» Stoib anciano ni rasanir nisló Betel ni noʼ Estados Unidos, ni laa Adrián Fernández, gonabdiitzbu a chop galtzeʼel de scuel reʼ. Hermano Helge Schumi golexa ximod la Biblia raniʼ de buñ ni primer bisob Dios né después góc buñ farmay órni cuaʼyibu tipnés privilegios, nigolú rasac que ló scuel de Galaad guirá ór rac galrraiby a herman que raquiin gac buñdxo (2 Crónicas 26:16). De ngúca goniʼ herman Peter Canning, láabu goleʼ loguiaʼbu litz ni cuaʼ herman ni goyee ló scuel ro bisuidyibu stoib diitz: «Diti gacto buñ farmay coltzoʼ puext tudyto ló galnatoy». Tap herman ni góc entrevistar biduidyibu guixquix portín scuel reʼ nigolú gocné layibu: gacyibu nadip, gonyibu xchiinyibu né toib galnabany nadip (Hebreos 13:9).

«Colguibaladx portín laato caani lainy guibá.» (Lucas 10:20.) Discurs ni más bireʼ loguiaʼ ni bituidy Geoffrey Jackson, ni nac Tidxó Buñ ni nap xiroʼ Galnann ni Rasanir nisló testigos xtuny Jehová. Láabu bisetlabu que ma de goló chop tzón íz xidal herman ni goyee scuel de Galaad diti racaʼyibu asignaciones ro rieeyibu toib lagary ro dingundi gony herman dxiin né diti tampa rasacloyibu cós sacroyen. ¿Ximod guisacyibu?

Órni Jesús bixel 70 xpiin ñee yoʼ por yoʼ né órni bibiguetyibu, goniʼyibu que goleʼyibu demony laidy stipnés buñ ló laa Jesús (Lucas 10:1, 17). Ná Jesús goyoʼ nakit por ni bunyibu, Jesús góoch layibu: «Diti guibaladxto por ni espíritus rasob lóoto, xalagary ngú colguibaladx por ni laato caani lainy guibá» (Lucas 10:20). Modreʼ nayadit goniʼbu que diti guirá ór xpiinyibu sieeni layibu galán. Por ngú diti non tzoʼyibu galrrasaʼ pal buñ racadiag layibu o yaca, xalagary ngú tzoʼyibu galrrasaʼ diti guisianyibu Jehová par que laayibu «guicaani lainy guibá».

Hermano Jackson goniʼ: «Ni góoch Jesús a 70 xpiin láaca labúu gacnéni lóono». Diti gonyno pensary que órni saano yoʼ por yoʼ guirá ór sieeni lóono galán né nigolú guibaladxno. Nosi pal radzaktzayno Jehová sonyno dada rutirigaʼlni lóono guicanalno láabu, modreʼ sasacno sacró né sacno fiel nislóbu.

Jesús láaca cualó galnagan ni labúu nabeʼgan láabu. Toibtica buelt xidal mil buñ cuanal láabu nosi por ni biyaʼanbu guirá buñreʼ (Juan 6:10-14, 22-24). Per órni bicadiagyibu ni Jesús bisuidy, xidalyibu bidzuitz né bisian láabu. Por ngú labúu guinino que por tidxósi tiemp xidalguixo buñ bibaladx né cuanal láabu (Juan 6:48-56, 60, 61, 66). Ná guirá buñreʼ siee, apóstoles diti bisianyibu Jesús. Xalagary nareʼganyibu por ni gosacloyibu ngú, layibu más goyoʼyibu galrrasaʼ gacyibu fiel né gacyibu ximig Jehová (Juan 6:67-69).

Biloxni. Bilox cuaʼyibu diplomas xtunyibu, toibtica ni góc graduar bisloʼoxbu programa reʼ órni bíilbu toib guiich ro guiráyibu bicaʼ xi ni rasacyibu por ni bieedyibu scuel reʼ. Hermano Pierce goniʼ que ló gudxliogoxreʼ diti ronladx buñ ni rony xchiin Dios, né lad ndeʼ noʼ guirá ni ma goyee scuel de Galaad (Hechos 4:13; 1 Corintios 1:27-31). Per Jehová racacuent dxiin ni ronyno né raduidybu xcalnadipbu lóono. Sigory Jehová diti radziguiaʼ lóono ni ma nangoluʼno, per xomod goniʼ hermano Pierce, Dios «radziguiaʼ por ni diti rasianno láabu, né ni nacno fiel né nadxiʼno láabu».

 

PAR GANNLO MÁS

Dada lagary ni noʼ más sit ló Gudxlio

Escuela Bíblica de Galaad de la Watchtower racnéni xchiin Jehová ni cayac ló guidopy Gudxlio né scú buñ gan diitz sacró de Gobierno xtuny Dios. Bicadiag ni raniʼ misioneros ni ma goyee scuel reʼ.