Accesibilidad ajuste

Biloyña diitz ni cayopylo

Goyee menú ni rarop lagary

Rabiguet

Testigos xtuny Jehová

diitza

Noʼ ni ralaa a toib buñ ni ná guisandop guic Sky Tower

Noʼ ni ralaa a toib buñ ni ná guisandop guic Sky Tower

Sky Tower nacni toib torre ni nasoʼ 328 metros (1.076 pies) ni noʼ ló gudx Auckland (Nueva Zelanda), lagary reʼ goyoʼ toib galnadx ro bilaayibu toib buñ. Toib testigo xtuny Jehová ni laa Graham Browne, ni nap 80 íz, gocnébu policia par coʼbu ló razón a toib buñguieeu ni ma canit xcalrrien par diti nasandopbu né nagaitybu láacabu. Graham ná: «Buñguieeu reʼ gonab guinébu toib testigo xtuny Jehová, né por ngú toib policia de lagary reʼ biyopy naʼ.

Buñ ni rony dxiin ronoʼ torre ni laa Sky Tower bixiʼbu doʼ naʼ par diti tzaguiaba né láaca bixiʼbu Biblia né toib doʼ sioʼol. Policia cú gonyné naʼ ronoʼ plataforma niisraxitz torre ni nasoʼ 192 metros (630 pies). Dzúcu nigolú calopy buchich. Gahxca de ronoʼya buñguieeu ni canit xcalrrien sobbu roʼ plataforma nal ñeʼbu labuu.

Bicaʼya rudx láabu né goodxi láabu que naca testigo xtuny Jehová né raniiny naʼ gacnéya láabu. Después ni gonaba lóo Jehová lainy xcalnabani, bixala Biblia né biyopy mod par tzoʼbu ló razón.

Goodxi láabu balaati rasac vida, né merpa tema cú bitudi ló reunión xomal ni godudy.

Goodxi láabu: Looy rasacgoluʼ nisló Dios né láabu biduidybu toib galrrascad looy láani ngú vida. ¿Xí diti rioladxlo guislooylo que nigolú rasacni par looy la? Por ngú godaʼ reʼ, né bilaa looy.

Láaca bíilneya láabu xidal textos ni sieed ló la Biblia, ladni noʼ Juan 3:16, ni ná: «Portín nigolú gondxiʼ Dios buñgudxlio por ngú biduidybu toibguielot Xiimbu, modreʼ guirá ni gap fe láabu diti guinitló né labúu guibany tipzó».

Después de ngú goodxi láabu: Dios nadxiʼ looy né nainy láabu guibanylo.

Primer ralooypani diti cacadiagbu naʼ. Né por ngú gonaba lóo Jehová par labúu ñacnébu naʼ nadxin ni cayabi láabu lainy xcalnabanybu. Después buñguieeu reʼ gosaló bisisbu, biásbu né tzagaaga tzagaaga bibigaxhbu ronoʼya ná diti goyodzubu.

Ór cú láabu bisetbu: Diti xidzú testigos xtuny Jehová goyeeyibu lidxi, né naʼ bixony layibu, nigoreʼ nigolú rioʼobni naʼ. ¿Satuidydo lainy scásiʼ la?

Diti tzoʼlo galrrasaʼ —goodxi láabu—, dada toibtica de lóodo láaca bunydo ngúca antes de ñacdo Testigos. Goleʼxiguic láani portín Jehová satuidy láani scásiʼ.

GuixquixI looy —goochbu naʼ— nga rony que nigoreʼ ma rasaca sacró.

Órni caniʼbu goodxi láabu: ¿Nanlo la? Radzubi, per diti por naʼ. Portín xiʼ doʼ naʼ par diti tzaguiaba, per looy labúu guiroch ñeʼlo né looy saitylo. Né sioʼobgoluni Jehová ni looy gaitylo. ¿Labúu guieedlo scareʼ la?

Por ni buñguieeu reʼ ma moda cayoʼbu ló razón gochbu naʼ: Bay sa tzaʼya ronoʼlo.

Órni bidxinbu ronoʼya, policia bilit láabu de lagarycu. Después de ngú biiydo diitz gahxca tip ór».

Testigos xtuny Jehová nigolú rioʼyibu galrrasaʼ por guirá buñ, né máspa rioʼyibu galrrasaʼ por buñ ni cadudy ló galrrioʼob. Guidopy ló Gudxlio Testigos raniʼ diitz sacró ni sieed de Dios par gacnéni buñ né par né ganyibu que Dios nigolú ragoʼ cuent layibu.