Accesibilidad ajuste

Biloyña diitz ni cayopylo

Goyee menú ni rarop lagary

Rabiguet

Testigos xtuny Jehová

diitza

Buñ ni ma cayopy mod gaity rioʼ ni ralaa layibu

Buñ ni ma cayopy mod gaity rioʼ ni ralaa layibu

ÓRNI chop testigos xtuny Jehová casaayibu yoʼ por yoʼ bidxinyibu toib yoʼ né ór cú toib buñguieeu bixal puert cú, ló buñguieeu reʼ biduidy diitz que nigolú noʼbu nabann. Laniolidxbu niis ronoʼ squiler rien que bigalxigaʼbu toib doʼ par guixiʼbu yainybu.

Buñguieeu reʼ bituidy layibu laniolidx, né Testigos gonabdiitzyibu xigony nal doʼ cú lagarycu. Láabu bisetbu que nainy naxiʼbu yainybu, per órni bicadiagbu que casuch timbre, goyeebu né bixalbu puert. Testigos reʼ biiy diitz né láabu né biné láabu ló doctor par gocné láabu.

Galnadx reʼ bireʼni ló toib periódico belga. Testigos xtuny Jehová diti nosi buñreʼ ma gocnéyibu par diti ñaity. Guibiʼno stipnés ni góc ló xidal lagary ló Gudxlio.

Toib buñgonaʼ de gudx Grecia bicaʼbu: «Órni buñ ni golesnéya bisian naʼ xtol stoib buñgonaʼ nigolú goyoʼ nabana. Diti bidzel xcalrrien xí láani goni né dada bidxinni ló xpensari nagati naca. Buny pensary que pal naʼ ñati, xcalrrioʼoba cuti naloxni».

Xalagary ñonybu ngú, gonaʼ reʼ goyee ló doctor. Diti xidzú ni bunybu ngú, biyopybu a Testigos né gosalóbu bisuidybu ni ná la Biblia, né goyeebu reunión. Láabu rabexabu mod rasacbu: «Lad guirá herman bidzela galrronladx ni nigolú, galrronladx ni ma xidzú cayobi». Né láaca goniʼbu: «Nigoreʼ ma noʼ buñ ni nac ximigdxina, ni naʼ labúu gapa confianz lóo. Né láaca ma rasaca goxtiguie né rioʼya nakit, ma diti rioʼya galrrasaʼ por xí gac ló dzú ni sietra».

Toib buñguieeu Testigo ni nac de gudx Inglaterra goniʼbu: «Toibtica ór, toib buñgonaʼ ni rimbuya goniné naʼ por teléfono, ló xtiitzbu bieen que nigolú noʼbu nabann, né gochbu naʼ que gueʼel cú nainy láabu guigaitybu láacabu. Ór cú bisetnaladxi revista ¡Despertad! beʼo may íz 2008 ni raniʼ xigony buñ ma diti ná guibany, né ór cú biyobi mod nagoʼya láabu ló razón né bisetlaaya ni raniʼ tipnés textos ni sieed ló la Biblia, par nasacbu sacró. Né nigoreʼ ná napbu galnagan, ma diti ronybu pensary que xcalrrioʼobbu sadudyni pal guigaitybu láacabu».

Toib testigo xtuny Jehová ni laa Michael ni rabés gudx Ghana, toib ór gosaló goninébu toib mbioxhlas gonaʼ ni riee ratoʼ tipnés cós lagary ro ronybu dxiin. Toibtica dzú Michael biduidy cuent que mbioxhlas gonaʼ reʼ noʼ nabann, né Michael gonabdiitz láabu pal noʼ xi cayacbu.

Láabu goniʼbu que raniiny gaitybu portín tzeelbu bisian láabu xtol stoib buñgonaʼ. Michael gocné láabu né biscad chop libros ni rabexa ni ná la Biblia. Ni láabu bíilbu bidxinni lainy xcalnabanybu né bunyni que ma diti nagaitybu láacabu, né gosalóbu bisuidybu la Biblia né gócbu testigo xtuny Jehová.

Ló gudx Estados Unidos toib periódico goniʼ xí gosaclóo toib mbioxhlas buñguieeu ni nac testigo xtuny Jehová ni casaa yoʼ por yoʼ. Órni casaabu ló cay bibiʼbu toib camión ni sagadzu né caa guii láani, mbioxhlas reʼ rasetlabu scareʼ:

«Bibiyaʼ xan camión ro rareʼ goʼox noʼ toib manguer ni radxin roʼ bentan xtuny camión cú né nayegdxiichni né cinta.

Bixoni ronoʼ camión cú, né godixloya roʼ bentan que bidza goʼox lainyni, bibiʼya toib buñgonaʼ cayibdxaʼ né ór cú bicaʼya rudx: ¡Xí láani cayonylo!

Órni naʼ caxal puert cú bibiʼya tzón mbioxien ni sob nixitz. Órni naʼ bixala láani buñgonaʼ reʼ góoch naʼ: ¡Biduidy lagary naʼ! ¡Biduidy lagary naʼ gati! ¡Nainy naʼ gati toibsi né ximbioxa!

Gonaba láabu diti ñonybu ngú, portín ngú diti sabeʼ láabu ló galnann ni cadudybu ló.

Né láabu cuapybu naʼ que sieebu guibá toibsi né ximbioxbu, né gochbu naʼ que guiduidy lagary tzanébu ximbioxbu.

Laʼga buñgonaʼ reʼ cayibdxaʼ ná bixixiba nislóbu, né gorudxaʼya, gonaba lóbu: «¡Diti gonylo ngú ranaba looy! Né ór cú godudxi láabu né goleʼya láabu tzagaga, tzagaga lainy camión cú.

Né bicaʼbu rudx: ¡Ximbioxa, ximbioxa, goleʼ ximbioxa!

Guionca mbioxien biscaʼ ña par labúu nabeʼya layibu. Lainy camión cú goyoʼ chop mbioxgonaʼyen toib de tap íz né toib de gáay íz né toib mbioxguieuyen de chop íz. Guioncayibu dzudiguié sobyibu, diti bunyibu pensary que stidxosi merpa ñaityibu.

Mális bilox goleʼya guidapyibu, bisioʼy camión cú né gorunéya layibu toib lagarien né góoch buñgonaʼ reʼ: Góoch naʼ xí cayaclo».

Guirá testigos xtuny Jehová nigolú rasac par layibu vida né nacni xomod toib galrrascad ni biduidy Dios ni Bisaʼ lóono. Láaca noʼdo puext gacnédo né guisialdodo buñ ni ná gaity, né láaca racnédo buñ ni ma bisnit xfamily ló galgoity.