Accesibilidad ajuste

Biloyña diitz ni cayopylo

Goyee menú ni rarop lagary

Rabiguet

Testigos xtuny Jehová

diitza

Dibuj ni raquiindo ló libros né guiich racnéni buñ par guieen láani

Dibuj ni raquiindo ló libros né guiich racnéni buñ par guieen láani

Xidal libros né guiich ni rabeʼ testigos xtuny Jehová napni dibuj de xidal color ni racné buñ guieen ni náni, per nírcu diti scú gocni. Primer número de La Atalaya ni bireʼ ló íz 1879 diti gopni dibuj. Ló xidal íz guiich ni goleʼ testigos gopni más letras que dibuj; Nagapsi ór bitnéni dibuj o retrat per gocni niyaʼas né niquiich.

Ló naareʼ, xidal libros né guiich ni rabeʼdo napgoluʼni retrat né dibuj. Testigos xtuny Jehová ni nan rabeʼ dibuj né retrat láacayibu ronyibu láani par guireʼni ló guiich né ló página ni napdo ló Internet. Par guireʼ toib dibuj galán, layibu rasuidyibu nanoy ximod cueʼyibu láani par que dibuj reʼ gacnéni buñ guieen ni merpa rasuidy la Biblia né par gacnéni buñ guieen ximod góc guirá ni rasetlani.

Xomod dibuj ni sieed reʼ ni bireʼ primerdiguieʼ ló capítulo 19 de libro «Testimonio cabal» del Reino de Dios. Ndeʼ góc lainy toib gudx ni góc laa Corinto. Mod rasetlaa capítulo 18 del libro de Hechos, ro Pablo sagaʼbu nisló buñchiin. Tipnés buñ ni rony investigar gochbu a guirá herman ximod gocni, pu lagary gocni, xi color góc mármol né ximod góc lagary ro gurú buñchiin ro goyee Pablo. Láaca goniʼyibu xi color de lairy godoc buñ de gudx Roma ló siglo I Ló Xtzúno. Né modreʼ labúu goleʼyibu dibuj de buñchiin ni góc laa Galión (labúu guibiʼlo láabu galay dibuj reʼ) nócbu lairy ni roc buñchiin: toib lairy yoʼol ñaron, né toib lairy yoʼol xilag ni nap toib ray bat morad né nacañeʼbu tip par zapat ni laa cálceos. Par que ni natié dibuj reʼ ñonybu láani modpa gocni, investigadores góoch layibu ximod góc lagary ro gurú Galión sigory cabiʼbu nís lad noroeste.

Toib catálogo ni goyaʼtzay né raquiingoluʼ

Guirá ni rayopyibu rac documentarni né riotzayni toibsi né dibuj, né racuatzayibu guiráni par órni guiquiinyibu láani naguel guidzelni. Por xidal íz, xidalguixo dibuj goyoʼtzayni lainy sobre conforma bireʼni ló libros o guiich, né retrat láaca goyoʼtzayni mod ná guirá tema xtunyni. Per bidxin midid ma gocni xidalguixo retrat né dibuj, né ma nagann gocni par layibu nadzelyibu dibuj ni ma biquiinyibu.

Ló íz 1991, bilox bisaʼdo toib programa ni naquiingoluʼ. Programa reʼ laa Image Services System né par ló naareʼ napni más de 440.000 dibuj. Gadzé ni ma bireʼ ló libros né guiich, né láaca nagoʼtzaydo xidalguixo catálogos ni nap xidal mil retrat ni guiquiindo ló dzú ni sietra.

Guirá archivos reʼ napni xidal cós, xomod pu dzú né pu lagary biquiindo dibuj reʼ, laa buñ ni biquiindo né xí dzú raloyñani. Ni guidzeldo dibuj ni caquiindo más naguel racnégoluʼ par órni cayaʼ stipnés libros o guiich.

Rioʼ ór raquiindo tipnés retrat ni rasacgoluʼ ni raquiin siido. Por ejemplo, pal raquiindo toib retrat de anillos xtuny Saturno par guireʼni ló toib revista ¡Despertad!, buñ ni ronynédo dxiin rayopy xí retrat guiquiindo né órni ma radzelyibu láani raninéyibu buñ ni goleʼ retrat reʼ par guinabdo permís guiquiindo retrat reʼ. Por ni diti ronydo negosy né libros né guiich, noʼyibu scásiʼ raduidyibu retrat reʼ lóodo. Noʼ ór raquiin quiixdo midid ni rasacni o cuéxado chú xtuny láani. Órni radxindo ló toib acuerdo, dibuj reʼ raquiindo láani ló xquiichdo né maca ragoʼtzaydo láani par guiquiindo láani stoib ór.

Ló naareʼ, tipnés libros né guiich ni rabeʼdo napni más dibuj que letras. Guibiʼno toib mod, tipnés historietas bíblicas ilustradas ni noʼ ló Internet napni más dibuj que letras. Reʼ láaca sadzelo xidal guiich né libros ni nap xidal dibuj de guirá color ni rasuidy lesiony ni rasacgoluʼ ló tidxósi diitz, xomod follet Bicadiag ni ná Dios. Guirá guiich né libros, ná nacni ni rareʼ o ni noʼ ló Internet nosi rasuidyni buñ ni ná la Biblia.