Rabiguet

Goyee menú ni rarop lagary

Testigos xtuny Jehová

diitza

¿Noʼ tipnés litz ni non guisob testigos xtuny Jehová órni ma tzoʼ xinobyibu la?

¿Noʼ tipnés litz ni non guisob testigos xtuny Jehová órni ma tzoʼ xinobyibu la?

Testigos xtuny Jehová raluladxdo que guirá litz ni sitné la Biblia racnéni lóodo gonydo cós ni rioladx Dios né pal rasobdo láani rieeni lóodo galán (Isaías 48:17, 18). Diti guicdo gool guirá litz reʼ. Per rasobdo láani laʼga nabanydo. Guibiʼno ximod guirá litz reʼ ragonés a buñ ni ma ná tzoʼ xinoby. *

  • Dios goloʼ galtzeʼel diti par cuesné buñ saʼ tipratsi (Mateo 19:6). Testigos xtuny Jehová raluladxdo que órni chop buñ ma rasané saʼ nacni par ma gonyibu galtzeʼel. Por ngú, diti galrraguit racaʼdo láani.

  • Pal buñ diti nap íz par gony galtzeʼel, diti non tzoʼ xinobybu. Nosi labúu tzoʼ xinoby buñ ni «ma godudy gan nadip ni gopbu órni gócbu mbioxhlas» (1 Corintios 7:36).

  • Nosi buñ ni diti noʼ tzeʼel labúu guirené stoib buñ. Diti por ni ma bichíl buñ xcaltzeel raduidyni diitz que ma labúu gonybu galtzeʼel stoib. Dios nosi raduidy lagary que buñ guichíl xcaltzeel órni toibtica de layibu riab ló galyoxh né rascúbu tzeelbu (Mateo 19:9).

  • Buñ ni racanal a Jesús ni ná gony galtzeʼel nosi labúu gonybu galtzeʼel né buñ ni nac de xireligionbu (1 Corintios 7:39). Ndeʼ raduidy diitz que toib testigo xtuny Jehová nosi labúu gony galtzeʼel né stoib Testigo ni ma goyonis, diti né toib buñ ni pénsa casaló casuidy (2 Corintios 6:14). Dios ranab que buñ ni rasob láabu nosi gony galtzeʼel né buñ ni raluladx ni layibu raluladxyibu (Génesis 24:3; Malaquías 2:11). Per diti nosi la Biblia raniʼ láani, láaca buñnan náyibu que órni toib galtzeʼel nacyibu de toibsi religión más sacró rabesnéyibu saʼyibu. *

  • Mbioxhlas non guisob bixios né xinaʼ (Proverbios 1:8; Colosenses 3:20). Por ngú, mbioxhlas ni rabés né bixios né xinaʼ láaca non guisobdiitzyibu órni bixiosyibu raiby layibu pal ma labúu tzoʼ xinobyibu o pal yaca né xí diti non gonyibu.

  • La Biblia ralitz que tigaaga buñ non guicaa cuidad chú láabu guirené né pu ór ma labúu gonybu láani. Por ngú náni scareʼ: «Tigaaga buñ siné xquiʼx» (Gálatas 6:5). Ná scú nacni, órni toib Testigo ma ná tzoʼ xinoby, ragoʼbu xcalrriembu né ranabbu xcalrracné stipnés Testigos ni nadip xfe né ni rioʼ galrrasaʼ por láabu (Proverbios 1:5).

  • Xidal cós ni rony buñ órni noné xinoby nacni galkié rodann. La Biblia nayadit náni que diti non gony buñ galyoxh. Galyoxh diti nosi raduidyni diitz gatné buñ saʼ órni yása gony galtzeʼel, galyoxh láaca raduidyni diitz órni toib buñ raguit né ña xan stoib buñ. Láacani ngú, órni toib buñ raquiin roʼ par kit né láani ro ranés buñguieeu o ranés buñgonaʼ, órni buñ ratné saʼ né rony láani lad ro raxoʼon buñ (1 Corintios 6:9-11). Per diti ngúsi, láaca pal chop buñ ni nac xinoby saʼ roo bixit roʼ saʼ né raguʼuch saʼ dada radxin midid ma nainy gatnéyibu saʼyibu, ma cayonyibu cós buidy ni rianladx Dios, ná diti ma gotnéyibu saʼyibu (Gálatas 5:19-21). La Biblia láaca ná que Dios rianladx guiniʼ buñ diitz yox (Colosenses 3:8).

  • Xcalnabanyno o mod rasacno, labúu kitquelni lóono (Jeremías 17:9). Labúu guikíilni lóono gonyno cós ni nanno que nac cós mal. Por ngú, órni chop buñ rasaló rarené saʼ diti non guiaʼanyibu guiropsiyibu toib lagary, siaca guichiin xcalnabanyibu layibu gonyibu cós mal. Chop buñ ni rarené saʼ sieeni layibu galán pal rimbuyibu saʼyibu lad xidal buñ o pal ranabyibu toib buñ ni noʼ xcalrrien gony compañer layibu (Proverbios 28:26). Toib testigo xtuny Jehová nantzay que noʼ xiroʼ riesga pal rayopybu xinobybu ló Internet, né máspa pal diti tampa rimbubu buñ cú (Salmo 26:4).

^ Párrafo. 2 Noʼ tipnés lagary buñ diti riaʼ rasané saʼ par gony galtzeʼel. La Biblia diti rasetlani que fuerspa tzoʼ xinoby buñ par ma labúu gony galtzeʼel.

^ Párrafo. 6 Toib artículo ni bireʼ ló toib revista ni raniʼ de galtzeʼel né de family náni que «tzón estudios ni góc a buñ ni ma sané xidal íz ni rabesné saʼ (más de 25 íz) raslooyni que por ni nacyibu de toibsi religión ndeʼ racné layibu par diti guibíl xcaltzeelyibu» (Marriage & Family Review, volumen 38, número 1, página 88, 2005).