Rabiguet

¿Nigolú noʼ Dios la?

¿Nigolú noʼ Dios la?

Mod rabexa la Biblia láani

Ló la Biblia sieed xidal prueby ni raslooy que nigolúpa noʼ Dios. Láaca rasuidyni lóono que par gapno fe lóo Dios, non guiquiinno xcalrrienno diti nosi gonyno crer ni rony crer stipnés religión (1 Juan 5:20; Romanos 12:1). Guibiʼno xi prueby rasetlaa la Biblia ni raslooy que nigolúpa noʼ Dios.

  • Mod nac Gudxlio né guibá raslooyni lóono que noʼ ni bisaʼ láani. La Biblia ná: «Guirá yoʼ noʼ ni bisaʼ láani, per ni bisaʼ guirá cós ngú Dios» (Hebreos 3:4). Noʼ buñ ná que diti noʼ xi laa guiquiin buñ ejemplo reʼ, per ná scú, noʼ tipnés buñnan ni rioʼ ló razón órni racadiag láani. *

  • Lóono ni nacno buñgudxlio, racladxno ganno xigony nabanyno, pal diti nanno láani, nac nacsi rabanyno. Xomod órni raniiny guáno, scúca raniiny guimbuno né gony adorarno Dios (Mateo 5:3; Apocalipsis 4:11). Ndeʼ raslooy que noʼ toib Dios ni nap galrronladx né que bisaʼbu lóono par gony adorarno láabu né par guibaladxno (Mateo 4:4).

  • Xidal profecías xtuny la Biblia góc cumplirni xidal mil íz de goló cuáni. Guiráxadit ni bisetlani góc cumplirni, ndeʼ raslooy que diti golanyni ló xpensary buñgudxlio (2 Pedro 1:21).

  • Buñ ni bicaʼ la Biblia gopyibu xiroʼ galnan ni diti gop buñ ló dzú ni bibanyibu. Por ejemplo, ló dzúcu bunyibu pensary que toib xol, toib buu, toib yós o stoib nimal bieʼ Gudxlio. Per la Biblia ná que «Gudxlio noʼni laabu» (Job 26:7). Láaca órni la Biblia rasetlaa Gudxlio, raniʼni que Gudxlio «narikni» (Isaías 40:22). Noʼ ni ná que buñ ni bicaʼ la Biblia gon láani portín Dios bisaní layibu.

  • La Biblia racapy xidal galrranabdiitz ni rony buñ ni diti rony crer que noʼ Dios, xomod: Pal Dios natzaaybu né napbu xiroʼ galnadip, ¿xigony nogoluʼ cós mal né galrrioʼob? ¿Xigony ragoʼ religión galrradíil lad buñ? (Tito 1:16). Mod rabexa la Biblia galrranabdiitz ni ma bunyno né stipnés galrranabdiitz labúu sacnéni looy gonylo crer que nigolú noʼ Dios.

^ Párrafo. 2 Por ejemplo, órni astrónomo Allan Sandage goniʼ de guibá né Gudxlio goniʼbu ndeʼ: «Naʼ raabi que guirá ni noʼ diti stipláacani goyaʼni. Goyoʼ ni bisaʼ láani. Diti naana ximod nac Dios, per guirá ni noʼ raslooyni que noʼbu».