Rabiguet

Goyee ro ná índice xtuny contenidos

Gony apoyarno Gobierno xtuny Dios

Gony apoyarno Gobierno xtuny Dios

Bunysi pensary que toib guiérodann mápa mer guidxinni ro rabéslo. Buñchiin radudy abís reʼ: «¡COLGUIREʼ NÉ COLGUIYOPY RO GUILAATO!». ¿Xí láani ñonylo? ¿Nayopylo ro nalaalo ja?

Scúca toib «guiérodann» cadxin ronoʼno. Jesús goleʼ laani «gran tribulación» (Mateo 24:21). Né, ná diti labúu guicaano loni, labúu guiyopyno ro guilaano. ¿Xí non gonyno?

Ló Discurs ni goloʼ Jesucristo laidy dainy, gochbu lóono: «Primer colguiyopy Gobierno né justicia xtuny Dios» (Mateo 6:33). ¿Xí radudy diitz ndeʼ?

«Primer colguiyopy Gobierno». Ndeʼ radudy diitz que más guisac par lóono Gobierno xtuny Dios (Mateo 6:25, 32, 33). ¿Xigony non gonyno pensary scú? Portín diti labúu sabeʼno galnagan ló Gudxlio. Nosi Dios labúu sony láani.

Colguiyopy «justicia xtuny Dios». Ndeʼ radudy diitz que non gonyno xtem por guisobno xiley né xilitz Dios. ¿Xigony? Portín pal stiplóocano rabúno xi ngú cós tzaay né cós mal, sarecaano mal (Proverbios 16:25). Per pal rasobno ni rony mandary Jehová, sagoʼ nakitno xcalnabanybu né láaca sieeni lóono galán (Isaías 48:17, 18).

¿Xigony goniʼ Jesús: «Primer colguiyopy Gobierno né justicia xtuny Dios»? Portín goniʼbu que tipnés buñ labúu ñony pensary que pal napyibu más bidxiich sabanyibu más goxt. Stipnés nigolú ñoʼ ló galrrasaʼ par nadudy dzú né ma diti ñapyibu tiemp nayopyibu Gobierno xtuny Dios (Mateo 6:19-21, 25-32).

 Per Jesús goniʼ que buñ ni gony apoyar Gobierno xtuny Dios sapyibu ni caquiinyibu nigoreʼ, né ló dzú ni sietra sacaʼyibu xiroʼ galnasác (Mateo 6:33).

Ná xpiin Jesús nír biyopyibu Gobierno né justicia xtuny Dios, diti por ngú ma diti godudyibu ló galnagan. Per labúu bilaayibu. ¿Ximod?

Por ni bisobyibu ni rony mandary Dios, diti godudyibu ló galnagan ni radudy buñ ni diti racadiag a Jehová. Gopyibu fe que sadxin Gobierno xtuny Dios ngú gocné layibu par labúu cualóyibu galnagandaʼ. Né gonyibu «que más nadip galnadip ni radudy Dios lóono», ngú gocné layibu buny guantaryibu (2 Corintios 4:7-9).

¿NÍR SAYOPYLO GOBIERNO XTUNY DIOS LA?

Cristianos ni bibany ló primer siglo nír biyopyibu Gobierno xtuny Dios xomod goniʼ Jesús. Goniʼyibu diitz sacró de Gobierno reʼ ro golésyibu (Colosenses 1:23). ¿Noʼ ni cayony dxiinreʼ ló naareʼ la?

¡Scú! Testigos xtuny Jehová nan que mápa mer Gobierno xtuny Dios sanitlóni gudxliogoxreʼ. Por ngú, ronyibu xtem gony cumpliryibu diitz ni goniʼ Jesús: «Buñ saniʼ diitz sacró xtuny Gobierno ló guidopynac gudxlio par guicadiag guirá gudx láani, né ór cú sadxin fin» (Mateo 24:14).

¿Xí láani sonylo órni guicadiaglo diitz sacró reʼ? Rony animardo looy guisuʼlo ejemplo xtuny buñ ni bibany ló primer siglo lainy gudx Berea, ni riaʼan niis Macedonia. Órni bicadiagyibu diitz sacró ni bisuidy apóstol Pablo, «cuacuentyibu xtiitz Dios né gan né nanoydiguieʼ bíilyibu láani guirá dzú par ganyibu pal nigolú ni cacadiagyibu» (Hechos 17:11, 12).

Looy labúu gonylo ngúca. Pal nír rayopylo Gobierno né justicia xtuny Dios, sadzelo ro labúu guilaalo nigoreʼ, né ló dzú ni sietra sabanylo goxt por tipzó né ma diti sioʼ ni satzuiby looy.