Rabiguet

Goyee ro ná índice xtuny contenidos

¿Pu dzú gony mandary Gobierno xtuny Dios Gudxlio?

¿Pu dzú gony mandary Gobierno xtuny Dios Gudxlio?

Tipnés xpiin Jesús goniiny ñanyibu pu dzú nasaló ñony mandary Gobierno xtuny Dios Gudxlio. Jesús cuapy layibu que diti raquiin ganyibu láani (Hechos 1:6, 7). Per Jesús maca góoch layibu que órni nabiʼyibu tipnés señales toibsi tiemp, ñanyibu que Gobierno xtuny Dios ma noʼni gaxtiguié né que ma bidxin ór par gony mandarybu guidopynac Gudxlio (Lucas 21:31).

¿XÍ CÓS GONIʼ JESÚS GAC?

Láabu goniʼbu: «Gudxrop né gudxrop sadíil né gobierno láaca sacaló saʼ gobierno. Sioʼ xo rodann né, guirá lad sioʼ galrralán né galguitz ni ragaity xidalguixo buñ» (Lucas 21:10, 11). Xomodca órni raniʼ guisioʼo né riapynís ma nanno que mápa mer gac guié, scúca guirá ndeʼ raslooy que Gobierno xtuny Dios ma noʼni gax. ¿Rabiʼno guirá ndeʼ la? ¿Cayac cumplirni ló guidopynac Gudxlio la? Guibiʼno xi cayac.

1. GUERR

Íz 1914 gosaló toib guerr ni diti ma goyoʼ dzú góc. Buñ ni racaʼ historias raniʼ que ízcu gosaló toib guerr ni godiña guidopynac Gudxlio. Ló guerrcu nigolú biquiinyibu tanques, bombas aéreas, ametralladoras, gases tóxicos né stipnés guip ni ragaity. Después, ló Segunda Guerra Mundial, goyoʼ bombas atómicas. Desde íz 1914, buñgudxlio ma bibiʼ guerr xitzca saʼ, né ma bigaityni xidalguixo buñ.

2. XO RODANN

Enciclopedia Britannica Academic, náni que cada íz radudy casi tigayoʼ xo rodann ni racantaʼ yoʼ. Láaca, Servicio Geológico de Estados Unidos náni: «Desde íz 1900 rabiʼdo balac xo radudy, guirá íz rabésdo midid dieciséis xo rodann». Tipnés buñ sigory raniʼ que diti noʼ más xo rodann ni nacni la, nigoreʼ buñ ma radudy cuent órni radudyni. Per nandxichno que ló naareʼ nogoluʼ galrrioʼob né galgoity xtol xo rodann.

 3. YADI GALRRO

Yadi galrro ló Gudxlio xtol guerr, xtol bidxiich, xtol buñ gobáan né portín ma diti racá ni radxiʼp buñ. Toib informe de Programa Mundial de Alimentos ná: «Ló Gudxlio, 821 millones de buñ radudy ló galrralán, né midid 124 millón mápa mer gaity» (2018 Year in Review). Guirá íz, xtol galrralán raity 3,1 millón de mbioxien. Ló íz 2011, de guirá mbioxien ni goity ló guidopynac Gudxlio casi tigalaʼni gocni xtol galrralán.

4. GALGUITZ NI RAGAITY XIDALGUIXO BUÑ

Organización Mundial de la Salud rasetlaa: «Ló siglo veintiuno nigolú bidal galguitz ni ragaity xidalguixo buñ. Galguitz xomod galrradudy, galguitz ni naguel radudy stipnés buñ né xilanal birecaani stoib, láaca nigoreʼ ma noʼ síndrome respiratorio agudo grave, gripe pandémica, síndrome respiratorio de Oriente Medio, ébola né zika». Ná científicos né doctor ma más nanyibu de galguitz, diti ma bidzelyibu ximod gac buñ remeidy.

5. BUÑ CANIʼ XTIITZ DIOS LÓ GUIDOPYNAC GUDXLIO

Jesús goniʼ stoib señal: «Buñ saniʼ diitz sacró xtuny Gobierno ló guidopynac gudxlio par guicadiag guirá gudx láani, né ór cú sadxin fin» (Mateo 24:14). Ná nogoluʼ galnagan ló Gudxlio más de xhoon millón de buñ de guirá gudxrop caniʼ diitz sacró de Gobierno xtuny Dios ló 240 gudxrop né stipnés lagary, raniʼyibu láani ló más de tipmil diitz. Dipa ma goyoʼ dzú gocni scú.

 ¿XIGONY NON GUICAANO CUIDAD GUIRÁ NI CAYAC?

Guirá ni goniʼ Jesús cayacni ló naareʼ. ¿Xigony non guicaano cuidad láani? Guisetnaladxno ni goniʼ Jesús: «Órni guibiʼto que ma cayac guirá ndeʼ, colguidudy cuent que Gobierno xtuny Dios ma noʼni gax» (Lucas 21:31).

Mápa mer Gobierno reʼ sony ni ná Dios ló Gudxlio.

Señal ni goniʼ Jesús né ni rasetlaa profecías raslooyni que Gobierno xtuny Dios gosaló buny mandaryni lainy guibá desde íz 1914. * Ízcu bunybu rey a Xiimbu, Jesucristo (Salmo 2:2, 4, 6-9). Mápa mer Gobierno xtuny Dios gony mandaryni Gudxlio, sanitlóbu guirá gobiernos ni noʼ né sonybu Gudxlio reʼ toib lagary móz ro guibanyno tipzó.

Mápa mer gac cumplir oración ni bisuidy Jesús lóono ni laa padrenuestro: «Guieed Gobierno xtunylo. Gac ni nálo, xomod lainy guibá, láaca ló gudxlio» (Mateo 6:10). Per ¿xí cayony Gobierno xtuny Dios desde íz 1914? ¿Né xí sonyni órni gony mandaryni buñgudxlio?

^ Párrafo. 17 Pal nainy looy ganlo más de 1914, bíil ni ná nota 22 ni sieed ló libro ni laa, ¿Xí rasuidy la Biblia lóono? (ni rabeʼ testigos xtuny Jehová).