Rabiguet

Goyee ro ná índice xtuny contenidos

¿Ximod laa Dios?

¿Ximod laa Dios?

Órni nainy lóono guimbuno toib buñ, primer ranabdiitzno láabu: «¿Ximod laalo?». Pal labúu nanabdiitzno ngú Dios, ¿xí nacapybu lóono?

«Naʼ naca Jehová. Ndeʼ laaya» (Isaías 42:8).

¿Ma goyoʼ ór bicadiaglo laa Dios la? Sigory yaca, portín xidal traductores xtuny la Biblia diti tampa raquiinyibu laa Dios, o rioʼ ór diti raquiinyibu láani. Casi guirá ór xalagary guicaʼyibu laa Dios, racaʼyibu SEÑOR. Per laa Dios sieedni más de gatz mil buelt ló guiichgool ni cuá dada nírcu. Racáni né tap letras hebreas ni rimbuno nigoreʼ xomod YHWH o JHVH, né, por xidal mil íz rac traducirni ló dixtil xomod «Jehová».

Laa Dios sieedni ló guiichgool ni cuá ló diitz hebreo né sieedni ló xidal traducciones xtuny la Biblia

Rollo del mar Muerto ro sieed libro xtuny Salmos (siglo primero L.X., HEBREO)

Traducción ni buny Tyndale (1530, INGLÉS)

Versión Reina-Valera (1602, DIXTIL)

Union Version (1919, CHINO)

XIGONY RASAC LAA DIOS

Rasacni par Dios. Diti goyoʼ toib ni goniʼ que scá guireʼ laa Dios. Láacabu goniʼbu gac laabu scú. Jehová goniʼ: «Ndeʼ laaya por tipzó, né guirá generación sasetnaladx laaya» (Éxodo 3:15). Ló la Biblia, laa Dios sieedni xidal buelt más que stipnés títulos xtunybu, xomod Señor o Dios, ni nap Xiroʼgolu galnadip o Bixiosno. Laa Dios sieedni más que stipnés laa buñ xomod Abrahán, Moisés, David o Jesús. Per diti ngúsi, Jehová raniiny guimbuno ximod laabu. La Biblia ná: «Par gan buñ que, looy, laalo ngú Jehová, nosi looy ngú ni noʼ más Guiaʼ ló guidopynac gudxlio» (Salmo 83:18).

Rasacni par Jesús. Ló oración ni rimbuno xomod padrenuestro, Jesús bisuidybu xpiimbu nanabyibu lóo Dios: «Gac nayaa laalo» (Mateo 6:9). Né Jesús láacabu gochbu Dios: «Bixiosa, bunyxiroʼ laalo» (Juan 12:28). Par Jesús más gosac ñonyxiroʼbu laa Dios né por ngú goniʼbu: «Naʼ ma bisuidy laalo layibu né sasuidy láani guimbu buñ» (Juan 17:26).

Rasacni par buñ ni rimbu Dios. Xpiin Dios ni bibany ló dzú ni see gonyibu que par labúu nalaayibu biquiin ñanyibu laa Dios. «Laa Jehová nacni toib torre ni sagaʼ dxich. Buñ ni rony xinésni riee ronoʼni né ralaa» (Proverbios 18:10). «Guirá ni rasetlaa laa Jehová salaa» (Joel 2:32). La Biblia ná  que buñ simbu xpiin Dios por laa Dios. «Portín guirá gudx sasaayibu, cada toibyibu ló laa dios xtunyibu, per lóono sasaano ló laa Jehová Dios xtunyno por tipzó» (Miqueas 4:5; Hechos 15:14).

¿XÍ RASLOOY LAA DIOS LÓONO?

Laa Dios rabeʼ loguiaʼni mod nacbu. Xidal buñnan ná que Jehová rarexani xomod «Láabu Ronybu que Guidxin Gac». Mod golexa Jehová laa nisló Moisés, racnéni lóono guienno xi raduidy diitz laabu. Jehová goniʼ: «Naʼ Gaca nitisi nainy naʼ gaca» (Éxodo 3:14). Por ngú, laabu diti nosi raduidyni diitz que bisaʼbu guirá cós ni noʼ. Mod laabu láaca raduidyni diitz que láacabu radxin racbu ni cayac falt órni caquiinni né modreʼ guirebuʼ ni nainy láabu gonybu. Mod laabu láaca raslooyni lóono que guirá ni bisaʼbu radxin rac o rony guirá ni raquiin gac par guirebuʼ ni nábu. Ná stipnés títulos ni napbu raslooyni lóono pu lagary noʼbu raslooyni lóono xcalmandarybu o xcalnadipbu per nosi laabu, Jehová, rasienni lóono ximod nacbu né xi láani labúu gonybu.

Laa Dios raslooy que rioʼbu galrrasaʼ por lóono. Mod rarexa laa Dios rasienni lóono balaati nadxiʼbu guirá ni bisaʼbu. Dios raiby lóono ximod laabu portín raniiny láabu guimbuno mod nacbu. Lainy xcalnabanybu golainy gaibybu lóono ximod laabu antes de nanabdiitzno láani. Riendxichni que Jehová diti nábu gonyno pensary que nacbu toib dioxh ni noʼ sit de lóono, xalagary ngú nainy láabu guienno que nigolú nabanybu né labúu guibigaxno ronoʼbu (Salmo 73:28).

Órni raquiinno laa Dios raslooyno que rioʼno galrrasaʼ por láabu. Bunysi pensary que nainy guidzaklo toib buñ né ranablo láabu guiniʼbu laalo. ¿Ximod nasaclo pal diti nasaguelbu naquiimbu laalo? Sigory ñonylo pensary que diti rioladxbu guidzakbu looy. Scúca labúu nasac Jehová. Ma goniʼbu ximod laabu né raniiny láabu guiquiinno láani. Órni ronyno ngú raslooyno que nainy guibigaxno ronoʼbu. Jehová dada ma nanbu chú cayony pensary ló laabu (Malaquías 3:16).

Par guimbuno Dios nír raquiin ganno ximod laabu. Per diti nosi ngú raquiin ganno, láaca non guimbuno xi clas Dios nacbu.

¿XIMOD LAA DIOS? Laa Dios ngú Jehová. Mod rarexa laabu raslooyni que láasibu labúu gony cumplirbu guirá ni ma goniʼbu gonybu.