Rabiguet

Goyee ro ná índice xtuny contenidos

¿Xí galnasác racaʼno órni rimbuno Dios?

¿Xí galnasác racaʼno órni rimbuno Dios?

Dada reʼ ma bisuidyno tipnés cós ni racné lóono ganno chú láabu ngú Dios. Ma bisuidyno que la Biblia ná que laabu Jehová né cualidad ni napbu ni más rareʼ loguiaʼ ngú galnadxiʼ. Láaca ma bisuidyno ni bunybu ló dzú ni see né ni gonybu por buñ ló dzú ni sietra. Ná noʼra más cós ni labúu guisuidyno de Dios, sigory ranabdiitzlo pal rasac gonyno láani.

Jehová raduidy xtiitz pal rayopyno láabu, sadzelno láabu (1 Crónicas 28:9). Bunysi pensary xi galnasác guicaʼlo pal ronylo rutirigaʼlni looy guimbulo Jehová: saclo ximigdxinbu (Salmo 25:14). ¿Xí galnasác sacaʼlo pal racbu ximiglo?

Goxtiguie sabanylo. La Biblia ná que Jehová nac toib «Dios ni rabaladx» (1 Timoteo 1:11). Pal ronylo por guidzaklo né rasuʼlo mod nacbu, sabanylo goxt, né ngú sony que guisaclo nigolú sacró, xpensarylo sioʼni goxt né ma diti sasac malo (Salmo 33:12). Looy láaca labúu guibanylo goxt, gaclo buñ ni natzaay xcalrrien né guidzaklo sacró stipnés buñ. Scú láani, saniʼlo xomod goniʼ salmista: «Naʼ sabigaxa ronoʼ Dios portín ngú ni más galán» (Salmo 73:28).

Dios sandxiʼdot looy. Jehová raibybu buñ ni nac ximigbu: «Naʼ sabiʼya looy né salidza looy» (Salmo 32:8). Ndeʼ raduidy diitz que Jehová ran tigaaga xpiin né raduidybu ni merpa caquiinyibu (Salmo 139:1, 2). Órni guidxin gaclo ximig Jehová saduidylo cuent que guirá ór noʼbu puext gacnébu looy.

Sacaʼlo xidal galnasác. Diti nosi nigoreʼ sacné Jehová looy guibanylo goxt láaca ló dzú ni sietra saduidybu xiroʼ galnasác looy (Isaías 48:17, 18). La Biblia ná: «Ndeʼ raduidy diitz galnabány tipzó, que guimbuyibu looy toibguielot Dios ni nigolú, né guimbuyibu xiinlo Jesucristo ni bixel lo» (Juan 17:3). Ni cabésno guiduidy Dios lóono ló dzú ni sietra nacni xomod toib ancla ni ranás dxich toib bark par diti guiguichni ló nisdaʼ, scúca ni cabésno ranás dxich lóono ló tiemp nagan reʼ (Hebreos 6:19).

Ndeʼ nosi nac tipnés galnasác ni racaʼno órni rimbuno Dios, né radxin racbu ximigno. Pal nainy looy ganlo más, raruʼdo looy guininélo toib testigo xtuny Jehová o goyee ló página xtunydo www.jw.org/zpa.