Rabiguet

Goyee ro ná índice xtuny contenidos

Galrrioʼob: ¿nacni castig ni raduidy Dios la?

Galrrioʼob: ¿nacni castig ni raduidy Dios la?

LUCÍA MODA NACHIT RASAA. Dzú nacbu mbioxien golainyguitzbu de poliomielitis, toib galguitz mal ni radudy laidy stoib buñ né ronyni mal nervios ni noʼ laidy buñ. Dzú gopbu 16 íz, toib buñgonaʼ ni bunybu xchiin góoch láabu: «Dios buny castigar looy né galguitz reʼ portín diti bisoblo né diti goplo respet xinaʼlo». Godudy íz, Lucía rasetnaladxsabu ximod bunynaa diitz ni góoch buñgonaʼ reʼ láabu.

DZÚ DÁMARIS GON QUE NAP TOIB TUMOR LÓ YOBGUIC, bixiosbu góoch láabu: «Nandxichi que bunylo cós mal por ngú casaclolo ndeʼ. Né Dios cayony castigar looy». Diitzreʼ nigolú bisiobni xcalnabany Dámaris.

Ma por xidal mil íz buñ rony crer que galguitz nacni castig xtuny Dios. Libro ni laa, Usos y costumbres de las tierras bíblicas ná que, ló dzú ni bibany Jesús, buñ biluladx que «buñ raxoʼ xtol xcalkié, o de xfamilbu, né ndeʼ gocni toib castig por galkié ni bunyibu». Ló libro, Medieval Medicine and the Plague (La medicina medieval y la peste) ná que ló tiemp de la Edad Media, «tipnés buñ biluladx que Dios biquiimbu galguitz par ñony castigarbu buñ por xcalkié». Per ¿galguitz ni bigaity xidalgoluʼ buñ Europa ló siglo catorce gocni castig xtuny Dios la? ¿O gocni por toib infección, xomod biduidy cuent ciencia después la? Sigory ranabdiitzlo pal Dios raquiin galguitz par gony castigarbu buñ por xcalkié. *

BUNYSI PENSARY: Pal galguitz né galrrioʼob gocni toib castig ni sieed de Dios, ¿xigony Jesús bisialbu buñguitz? ¿Diti naduidy ndeʼ diitz que cacalóbu Dios la? (Mateo 4:23, 24). Jesús dipa nacalóbu Bixiosbu. Láabu goniʼbu: «Guirá ór roni ni rioladxbu» né «naʼ goni xomodpa ma buny mandary Bixiosa naʼ goni» (Juan 8:29; 14:31).

La Biblia nayadit raniʼ que Jehová guirási ór «nacbu justo né ronybu xinésni» (Deuteronomio 32:4). Por ejemplo, Dios dipa ñonybu que xidal buñ ni diti nap dool nasaclóo toib desgrasy lainy roplan par ñony castigarbu a toibsi buñ ni noʼ lainy roplancu. Abrahán, toib ni buny ni ná Dios gonbu que Jehová dipa ñony ngú. Por ngú goniʼbu que, «nagangoluni» o diti godudyni ló xpensary Dios guigaitybu «buñtzay toibsi né buñ mal» (Génesis 18:25). Láaca la Biblia rasetlaa que diti radudy ló xpensary Dios «gony cós ni nigolú mal» o «que Dios ni nap Xiroʼgolu galnadip gony ni diti nac xinésni» (Job 34:10-12).

XÍ RASUIDY LA BIBLIA LÓONO DE GALRRIOʼOB

Órni radudyno ló galrrioʼob diti nacni toib castig ni sieed de Dios por toib galkié ni bunyno. Jesús nayadit golexa que órni láabu né xpiimbu bibiʼyibu toib buñguieeu ni gool lochep. Xpiimbu gonabdiitz láabu: «Rabí, ¿chú láabu buny galkié, buñguieeu reʼ, bixiosbu o xinaʼbu, par ñalbu lochep?». Né Jesús cuapy layibu: «Ni buñguieeu reʼ, ni bixiosbu ni xinaʼbu buny galkié» (Juan 9:1-3).

Por mod buny crer tipnés buñ ló dzúcu xpiin Jesús nigolú bidziguiaʼ órni Jesús góoch layibu que nili buñguieeu reʼ nili bixios né xinaʼ buñguieeu reʼ biab ló toib galkié rodann par ñac castigar láabu. Órni Jesús bixal bisaló buñguieeu reʼ diti nosi bisialbu buñguitz reʼ, láaca bislooybu que  mod buny pensary buñ dzúcu nacni galrrascú (Juan 9:6, 7). Ni nanno que Dios diti nap dool por galrrioʼob ni radudyno ló rasialdóni xcalnabany buñ ni nap galguitz roʼ.

Pal galguitz né galrrioʼob gocni toib castig ni sieed de Dios, ¿xigony Jesús bisialbu buñguitz?

La Biblia raiby lóono:

  • «Né cós mal Dios diti rioʼ ló prueby, né láacabu diti ragoʼbu ló prueby ni toib buñ» (SANTIAGO 1:13). Né, láaca Dios mápa mer sanitló «guirá cós mal» ni noʼ ló Gudxlio por xidal mil íz, xomod galguitz, galrrioʼob né galgoity.

  • Jesucristo «bisialbu guirá buñ ni cadudy ló galrrioʼob» (MATEO 8:16). Guirá ni buny Jesús bislooyni tidxóyen ni gony Gobierno xtuny Dios ló guidopynac Gudxlio.

  • Dios «sasiábu nís ni rareʼ bisalóto, galgoity ma diti sioʼni más, ma diti sioʼ ni guisac maláy, láaca ma diti sioʼ ni guicalas rudx, láaca diti sioʼ ni tudy ló galrrioʼob. Cós ni ma góc ma godudyni» (REVELACIÓN [APOCALIPSIS] 21:3-5).

¿CHÚ LÁABU NAP DOOL?

Per, ¿xigony nogoluʼ galrrioʼob ló Gudxlio reʼ? Pal Dios diti nap dool, ¿chú láabu nap dool? Por xidal mil íz buñ ranabdiitz ndeʼ. Ló stoib artículo guicapyno galrranabdiitz reʼ.

^ Párrafo. 4 Ló dzú ni see, Dios buny castigarbu tipnés buñ né galguitz, desgrasy o stipnés cós por ni bunyibu galkié, per la Biblia diti rasetlaa que cayonysabu láani ló naareʼ.