Rabiguet

Goyee ro ná índice xtuny contenidos

¿Chú láabu nap dool?

¿Chú láabu nap dool?

Pal Dios diti nap dool, ¿chú láabu nap dool? ¿Xigony xidal buñ cayaity xtol galrralán? ¿Xigony nogoluʼ guerr, galguitz, xo rodann o stipnés desgrasy ni rony que raity buñ? Xtiitz Dios, la Biblia, rabexa que buñgudxlio radudy ló galrrioʼob por tzón razón:

  1. Buñ rioʼ galrrasaʼ por láacayibu, rasobladx né rianladx saʼ. «Buñ rony mandary saʼ par gonybu mal láacabu» (Eclesiastés 8:9). Casi guirá ór, buñ rasaclóo cós mal portín buñgudxlio nosi rioʼ galrrasaʼ por láasiyibu.

  2. Tiemp né desgrasy guirá buñ rasaclóo láani. La Biblia láaca raiby lóono que buñ radudy ló galrrioʼob «portín tiemp né desgrasy guirá buñ rasaclóo láani» (Eclesiastés 9:11). Ndeʼ raduidy diitz, desgrasy racni portín noʼno toib lagary ro diti non tzoʼno o por ni diti rapno cuidad o por ni rachéno.

  3. Ni rony mandary gudxliogoxreʼ nac nigolú mal. La Biblia nayadit raiby lóono chú ngú ni merpa nap dool por galrrioʼob ni rasaclóo buñ órni rasetlaa ndeʼ: «Gudxliogoxreʼ noʼni ladxña ni nigolú mal» (1 Juan 5:19). «Ni nigolú mal» raduidyni diitz Buñdzab, láabu napbu galnadip, primer gócbu toib ángel tzaay, per «diti biaʼanbu ló ni nigolú» (Juan 8:44). Stipnés ángeles láaca góc toibsi né Buñdzab par gonyibu ni raniiny layibu né modreʼ bidxin gocyibu demony (Génesis 6:1-5). Buñdzab né xidemony cualóyibu Dios né desde dzúcu gudxliogoxreʼ noʼni ladxñayibu, né xcalmandaryibu más rientzaayni nigoreʼ. Buñdzab nigolú cadzuitz né «cascú guiránac buñgudxlio», por ngú la Biblia ná: «Maláy de gudxlio né de nisdaʼ» (Revelación 12:9, 12). Buñdzab diti nap galrronladx, rioladxbu gonybu mal stipnés, né rasacbu sacró órni buñ cadudy ló galrrioʼob. Láabu napbu dool por guirá galrrioʼob ni noʼ, diti Dios.

BUNYSI PENSARY: Nosi toib buñ mal ni diti rioʼob xcalnabany ñony que buñ ni diti nap dool nadudy ló galrrioʼob. Per la Biblia ná que «Dios ngú galnadxiʼ» (1 Juan 4:8). Por ngú, diti labúu gonyno pensary que Dios ni rony xinésni gony cós mal (Job 34:10).

Per sigory ranabdiitzlo ndeʼ, né noʼ razón: «¿Sadxin dzú sanitló Dios xcalmandary Buñdzab la?». Xomod ma bisuidyno, Dios rianladxbu cós mal né rioʼob xcalnabanybu órni rabiʼbu lóono cadudyno ló galrrioʼob. Láaca, ló Xtiitzbu rony animarni lóono gaibyno láabu xí galrrasaʼ noʼno ló, portín láabu ronladxbu lóono (1 Pedro 5:7). Ló stoib árticulo ni guisuidyno guienno ximod raslooy Dios que nigolú ronladxbu lóono né que napbu galnadip par guinitlóbu galrrioʼob né guirá cós ni diti rac xinés. *

^ Párrafo. 7 Pal nainy looy ganlo más xigony caduidy Dios lagary tzoʼ galrrioʼob, goyee ló capítulo 11 ló libro ni laa, ¿Xí ni merpa rasuidy la Biblia?, ni rabeʼ testigos xtuny Jehová. Labúu guilitlo láani scásiʼ ló www.jw.org/zpa.