Rabiguet

Goyee ro ná índice xtuny contenidos

¿Raquiinra xilitz la Biblia ló xtzúno la?

¿Raquiinra xilitz la Biblia ló xtzúno la?

TIPNÉS BUÑ NÁ QUE YACA. Toib doctor goniʼbu que pal buñ naquiin la Biblia nacni suusi toib mextra naquiin toib libro ni bireʼ ló íz 1920 par nasuidy mbiox de Química. Buñ ni diti nap respet la Biblia sigory dada nanabdiitzyibu looy pal naquiinlo manual xtuny toib computadora ni ma godudy xtzú par nasuidylo naquiinlo toib computadora copy. Modcuca noʼ buñ ni ná que la Biblia ma godudy xtzúni.

Nabanyno ló toib tiemp ro bidza cós copy né noʼ xidal clas tecnologías, ¿xigony ñoʼ ni ñaiby naquiin la Biblia ni ma xidzúgolu cuá? Né máspa ló naareʼ ni noʼ xidal páginas ló Internet ro sieed xí labúu gony buñ. Noʼ programas né entrevistas ro rareʼ psicólogos, buñ ni raduidy consej né buñ ni rabeʼ libros. Né empresas rabeʼ xidalguixo guiich par gacnéni buñ né modreʼ ronyibu gan xiroʼ bidxiich.

Né información ni guirá ór careʼ, ¿xigony raquiinno xcalrracné la Biblia, toib libro ni cuá ma de goló chop mil íz? ¿Nap razón buñ ni diti raluladx ló la Biblia órni náyibu que pal rayopyno xilitz la Biblia nacni suusi nayopyno xcalrracné toib libro de química o manual xtuny toib computadora ni ma godudy xtzú la? Yaca, diti láani ngú ni raniʼyibu. Ciencia né tecnología naguel radzaʼni, per ¿ma bidzaʼ mod nac buñgudxlio la? Buñ raniinysa guibany goxt, guibany toib lagary ro diti tzoʼ ni guitzuiby layibu, raniiny guiguaʼyibu sacró né xfamilyibu né gapyibu ximigyibu ni cobioo layibu.

Ná la Biblia ma xidzú de goló cuáni, raniʼni ximod guicaló buñ guirá galnagan ni ma bisetlano né raniʼni más. Láaca náni que Dios ni Bisaʼ lóono, golonésbu buñgudxlio par nacaʼ láani. Ralitzni lóono ló guirá clas galnagan né raibyni lóono ximod guicalóno láani (2 Timoteo 3:16, 17). Per ni máspa, xilitzni noʼni por tipzó, dipa sadudy xtzúni. La Biblia láacani náni: «Xtiitz Dios nabanyni» (Hebreos 4:12).

¿Nigolúpani la? ¿Ma godudy xtzú la Biblia o nacni toib libro ni más racné lóono que nitisi libro ni noʼ la? Revista Guiich ni caniʼ, goyaʼni par gacnéni looy guicapylo guirá galrranabdiitz reʼ né nacni primer revista ni guiniʼ de toibsi tema.