Rabiguet

Goyee ro ná índice xtuny contenidos

 LESIONY 11

Cuéno religión falz tiplad

Cuéno religión falz tiplad

Buñdzab né ángeles xtuny diti rioladx gonyno ni ná Dios. Ronybu pór cuébu buñ xilad Dios. ¿Ximod ronybu láani? Toib mod ni raquiimbu láani ngú religión ni diti rony ni ná Jehová (2 Corintios 11:13-15). Toib religión falz láani, si diti rasuidyni mod ni ná la Biblia. Religión falz nacní xomod toib bidxiich falz: ralooypani rasacni pero yaca. Né ndeʼ sagoʼ lóono ló galnagan.

Jehová toib Dios ni rasuidy xinésni, né diti rioladxbu guirá religión ni rascú. Ór ni Jesús goyoʼ ló Gudxlio, guirá guías religiosos de dzúcu goniiny nagaitybu Jesús. Par layibu mod ni cayenbu Dios ngú mer láani. Raniyibu: «Lóodo noʼ toibsi bixiosdo, ngú Dios». Pero ¿goyoʼ Jesús de acuerdo la? Yaca. Láabu cuapybu: «Lóoto sieedto de bixiosto Buñdzab» (Juan 8:41, 44). Lo dzureʼ, xidal buñ raluladx que cayen Dios, pero layibu cayenbu Buñdzab né ángeles xtuny (1 Corintios 10:20).

 Ximodca toib yac ni raduidy cuanax yotz, scúca nac religión falz, pór buñ mal ni diti raquiin raduidy. Lo gudxlio ro rabésno bidza de galnagan por guirá cós mal ni rony buñ. Nogolú galyoxh, galradil, galgobaʼn, nogolú buñ ni rac ni na, ni ragaity buñ, né ni ranás xo buñgonaʼ. Xidal buñ ni rony guirá cós reʼ noʼ religión xtunybu, pero religión xtunybu diti rony par gonybu cós buen. Diti labúu sacbu ximig Dios si pal diti rasiambu guirá cós mal ni ronybu (Mateo 7:17, 18).

Religión falz rasuidy buñ que guiembu diox. Dios ná que diti non gony orarno diox. Né láabu nap razón. ¿Rioladxno que tzó buñ que diti guininé lóono pero que labúu goybu diitz né xi retratno la? ¿Labúu ñac buñreʼ ximigno la? Yaca, diti labúu. Jehová rioladx que buñ guininé láabu, diti toib dioxyoo o retrat de toib buñ ni diti nabany (Éxodo 20:4, 5).

Religión falz rasuidy que labúu guigaityno stipnés buñ ór ni noʼ guerr. Jesús goní que ximig Dios sonladxibu saʼyibu. Diti ragaityno buñ ni ronladxno (Juan 13:35). Diti láani ngú que guigaityno buñ mal. Ór ni xi enemig Jesús gonás láabu, diti biduidybu lagary que xpiimbu ñony por nalaa láabu (Mateo 26:51, 52).

Religión falz rasuidy que buñ mal guiebu lo infierno. Pero la Biblia rasuidy que por ni napnó galkié ngú rony que raityno (Romanos 6:23). Jehová nac toib Dios ni ronladx lóono. ¿Sony castigar toib Dios tzaay a buñ la? Yaca. Lo Gudxlio móz toibsi religión sioʼ, religión ni Jehová racacuent (Revelación 15:4). Guirá stipnés religión ni rasuidy guirá ni rascú Buñdzab, sanitló.