Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 CAPÍTULO 15

Religión ni Dios racacuent

Religión ni Dios racacuent
  • ¿Rioladx Dios guirá religión ni noʼ la?

  • ¿Ximod labúu guidzelno religión ni rasuidy xinésni?

  • ¿Chú layibu ni merpa rony ni ná Dios ló naareʼ?

1. ¿Xí galrracné sacaʼno pal rony adorarno Dios mod rioladxbu?

JEHOVÁ Dios ronladx lóono né por ngú raniiny gacnébu par tzeni lóono galán. Pal rony adorarno láabu xomod ranabbu, sabanyno sacró né sareʼno ló xiroʼ galnagan ni nóono ló. Láaca sacaʼno xilaaybu né xcalrracnébu (Isaías 48:17). Ná noʼ xidal religión ni ná que rasuidy chú ngú merpa nac Dios, ni rasuidyibu de Dios diti xinésni né diti rasuidyibu ni merpa ranabbu gonyno.

2. ¿Ximod labúu gannlo mod rac adorar Jehová, né ximod racné biyet ni ritlaa par guienno láani?

2 ¿Ximod labúu gannlo mod rac adorar Jehová? Diti raquiin que looy guisuidylo né guienlo guirá galrrasuidy de guirá religión ni noʼ. Nosi raquiin guisuidylo ni merpa rasuidy la Biblia par gony adorarno Dios. Guislooyno láani modreʼ: Xomod nanlo biyet falz nacní toib galnagan ló xidal gudxrop. Bunysi pensary que looy racaʼlo dxiin ro cuélo tiplad biyet falz de biyet tzaay. ¿Ximod guimbulo guirop clas biyet cú? ¿Non gony memorizarlo ximod nac biyet falz la? Yaca, ni más galán ngú guisuidylo ximod nac biyet tzaay. Órni guimbutzaaylo biyet tzaay saduidylo cuent chú ngú biyet falz. Né scúca, naguel rimbuno toib religión falz órni rasuidyno ximod nac toib religión ni rasuidy xinésni.

3. Xomod goniʼ Jesús, ¿xí gonyno par guicacuent Dios lóono?

 3 Nigolú rasac gony adorarno Jehová de toib mod ni racacuentbu. Xidal buñ raluladx que guirá religión cayony ni ná Dios, per la Biblia diti rasuidy ngú. Diti nosi guinino racanalno Jesús. Láabu goniʼbu: «Diti guirá buñ ni raiby naʼ: Señor, Señor, sioʼ lainy Gobierno ni noʼ guibá, nosi sioʼ buñ ni rony ni ná Bixiosa ni noʼ guibá». Scú, Dios nosi guicacuent lóono pal rasuidyno ni ranabbu lóono né pal ronyno láani. Jesús goleʼ laa guirá buñ ni diti rony ni ná Jehová xomod «ni rony pór cós yox» (Mateo 7:21-23). Religión falz nacní xomod biyet falz, diti rasacni. Né ni máspa, religión falz ronyni mal buñ.

4. ¿Xí raduidy diitz chop néz ni bisetlaa Jesús, né pu lagary rinéni?

4 Jehová raduidy lagary guirá buñ par guibany tipzó. Par labúu guibanyno tipzó ló Gudxlio móz raquiin gony adorarno Dios né guibanyno nigoreʼ mod ranabbu lóono. Xidal buñ diti rioladx gony láani, por ngú Jesús goniʼ: «Coltzoʼ niis roʼ puert ni nabé, portín xilag nac puert né xilag nac néz ni riné ro guinitló buñ, né xidal ni rioʼ niscú; laʼga nabé nac puert né nabé nac néz ni riné par guibany buñ, né tipnéssi radzel láani» (Mateo 7:13, 14). Religión ni rasuidy xinés riné lóono guibanyno tipzó, religión falz riné lóono guinitlóno. Jehová raniiny que ni toib buñ guinitló por ngú raduidybu lagary guirá buñ ni noʼ ló Gudxlio guisuidy guimbu láabu (2 Pedro 3:9). Scú láani, mod ni rony adorarno Dios labúu conés lóono guibanyno o gaityno tipzó.

XIMOD GANNO XÍ RELIGIÓN RASUIDY XINÉSNI

5. ¿Ximod labúu ganno chú rony ni ná religión ni rasuidy xinés?

5 ¿Ximod labúu guidzelno «néz ni riné par guibany buñ»? Jesús goniʼ que religión ni rasuidy xinésni labúu guienni por mod nabany buñ ni rony ni náni. Láabu  goniʼbu: «Por xcaayibu simbuto layibu» portín «guirá yac natzaay raduidy xcaa ni nasac» (Mateo 7:16, 17). Scú, ni rony ni ná religión ni rasuidy xinésni labúu rienni por ni ronyibu crer né mod nabanyibu. Ná nacyibu buñ galkié né rachéyibu racyibu toibsi par gony adoraryibu Dios. Nigoreʼ guibiʼno xhoop cós ni nap religión ni rasuidy xinés.

6, 7. Ni rony xchiin Dios, ¿ximod rabiʼyibu la Biblia, né ximod Jesús godiʼx toib mod ni racanalyibu?

6 Guirá ni rony ni ná Dios ló la Biblia rabeʼyibu ni rasuidyibu. La Biblia raniʼ: «Guirá ni caa ló la Biblia sieetni de Dios, rasuidyni buñ, nadip ralitzni, ragonésni, rasuidyni lóono ximod labúu guibanyno, modreʼ buñ ni rony ni ná Dios gantzay né tzoʼ puext par gony guirá clas dxiin galán» (2 Timoteo 3:16, 17). Pablo bicaʼ ndeʼ a guirá ni góc xhermanbu: «Órni lóoto cuacuento xtiitz Dios, ni bicadiagto de lóodo, cuacuento láani diti xomod xtiitz buñgudxlio, xalagary ngú, xomodpa nacni, xomod xtiitz Dios» (1 Tesalonicenses 2:13). Scú láani, ni rasob ni rony religión ni rasuidy xinésni diti rareʼni ló crenys o costumbre ni nap buñ. Ni ronyibu crer sieetni ló Xtiitz Dios, la Biblia.

7 Jesús godiʼx toib mod galán portín guirá ni bisuidybu goleʼbu láani ló Xtiitz Dios. Órni goninébu bixiosbu goniʼbu: «Xtiitzlo ngú ni nigolú» (Juan 17:17). Jesús buny crer ló Xtiitz Dios né guirá ni bisuidybu gocni modpa sieed ló la Biblia. Jesús guirá ór goniʼ: «Scá caani» né rasetlabu xí ni sieed ló la Biblia (Mateo 4:4, 7, 10). Scú láani, buñ ni rony ni ná Dios diti rasuidyibu ni noʼ ló xpensaryibu. Raluladxyibu que la Biblia nacní Xtiitz Dios, né ni rasuidyibu rabeʼyibu láani ni merpa sieed ló la Biblia.

8. Ni rony xchiin Jehová, ¿xí toib mod rony adoraryibu Jehová?

 8 Buñ ni rony ni ná religión ni rasuidy xinésni nosi Jehová rony adoraryibu né raniʼyibu ximod laabu. Jesús goniʼ: «Jehová Dios xtunylo, láabu ngú non gony adorarlo, né nosi xchiimbu non gonylo» (Mateo 4:10). Scú láani, ni rony xchiin Dios nosi rony adoraryibu Jehová diti noʼ stoib. Rasuidyibu ximod laa né ximod nac Dios ni rasuidy xinésni, ndeʼ nac toib mod ni rony adoraryibu Dios. Salmo 83:18 ná: «Looy, laalo ngú Jehová, nosi looy ngú ni noʼ más Guiaʼ ló guidopynac gudxlio». Jesús godiʼx toib mod órni gocnébu buñ guidxin guimbu Dios. Láacabu goniʼbu ndeʼ: «Ma bisudi laalo a guirá buñgudxlio ni biduidylo naʼ» (Juan 17:6). Ló naareʼ ni merpa rony xchiin Dios rasuidyibu saʼyibu mod laa Dios, xí noʼ guicbu gonybu né mod nacbu.

9, 10. ¿Ximod guirá ni rony xchiin Dios raslooy que nadxiʼ saʼ?

9 Ni rasob Dios raslooyibu que nigolú nadxiʼyibu saʼyibu. Jesús goniʼ: «Pal nadxiʼto saʼto guirá buñ simbu que lóoto nacto buñ ni racanal naʼ» (Juan 13:35). Herman ni goyoʼ ló xtzú Jesús gondxiʼ saʼ modreʼ. Galnadxiʼ ni napyibu rony que guiguaʼyibu toibsi né guirá clas buñ ni nac gadzé color o de stoib gudx (bíil Colosenses 3:14). Buñ ni noʼ lad religión falz diti nap galnadxiʼ de clas reʼ. ¿Ximod nánno ndeʼ? Portín ragaityibu saʼyibu ni nac gadzé color o de stoib gudx. Buñ ni noʼ ló religión ni rasuidy xinésni diti racaʼ guip par guigaity xherman o stipnés buñ. La Biblia rasuidy: «Noʼ toib mod ganno chú ngú guirá xiin Dios né chú ngú guirá xiin Buñdzab: Nitisi ni diti rony xinésni diti sieed de Dios, láaca ni diti nadxiʼ buch [...;] non gandxiʼno saʼno; diti xomod Caín, ni bieed de Buñdzab né bigaity buch» (1 Juan 3:10-12; 4:20, 21).

10 Nayaa noʼni, galnadxiʼ reʼ raduidy diitz diti guigaityno saʼno, per diti ngúsi. Guirá ni merpa rony ni ná Dios  raduidyibu tiemp, galnadip né bidxiich par gacnéyibu né gony animaryibu stipnés buñ (Hebreos 10:24, 25). Racné saʼyibu órni cadudyibu ló desgrasy né buñ nap confianz lóoyibu. Layibu rasuidyibu litz ni sieed ló la Biblia ni ná: «Laʼga labúuni lóono, gacnéno guirá buñ» (Gálatas 6:10).

11. ¿Xigony rasac guicacuentno Jesús xomod toib ni Dios raquiin par guilaa?

11 Ni rony xchiin Dios racacuentyibu Jesús xomod toib ni raquiin Dios par guilaa buñ. La Biblia ná: «Diti noʼ stoib buñ ni labúu ralaa lóono, portín diti noʼ stoib laa lainy guet guibá ni ma cuaʼno ni labúu guilaa lóono» (Hechos 4:12). Xomod bisuidyno ló capítulo 5 Jesús goity par guilaa buñ ni rasob Dios (Mateo 20:28). Jehová golú láabu par gony Mandary ló Gobierno xtunybu ni noʼ guibá né ndeʼ sony mandary Gudxlio. Dios ranab guisobno Jesús né gony cumplirno ni bisuidybu, pal nainy guibanyno tipzó. Por ngú la Biblia ná: «Ni nap fe lóo Hijo sabany tipzó; ni diti rasob Hijo diti sabany» (Juan 3:36).

12. ¿Xí raduidy diitz que diti ronyibu mod rony gudxliogoxreʼ?

12 Ni rony xchiin Dios diti racyibu toibsi né gudxliogoxreʼ. Órni Jesús goyoʼ nisló Pilato ni buny mandary gudx Roma, Jesús goniʼ: «Gobierno xtuni diti nacní de gudxliogoxreʼ» (Juan 18:36). Rotísi gudxrop rabésyibu, rioʼyibu ló mandary Gobierno ni noʼ guibá. Por ngú dipa rioʼyibu lad partid né ló galradíil ni noʼ ló gudxliogoxreʼ. Per pal noʼ buñ ni ná gac de toib partid, gac president o ná gony votar, layibu diti racaayibu lóo buñ ni ná gony láani. Ná diti rioʼyibu lad partid rasobyibu ni ná buñchiin. ¿Xigony? Portín xtiitz Dios rony mandary layibu que guirá buñ «guisob ni ná buñchiin» (Romanos 13:1). Per órni buñchiin ranab gonyibu ni diti rioladx Dios, ni rasob  Dios rasuʼ mod ni bisian xpiin Jesús órni goniʼyibu: «Non guisobno Dios xomod ni rony mandary xalagary guisobno buñgudxlio» (Hechos 5:29; Marcos 12:17).

13. ¿Xí rony crer ni rony ni ná Jesús que gony Gobierno xtuny Dios, né por ngú xí ronyibu?

13 Ni racanal Jesús raniʼyibu que nosi Gobierno xtuny Dios sacné buñ. Jesús goniʼ ndeʼ: «Diitz sacró xtuny Gobierno reʼ sioʼni ló guidopynac gudxlio par gann guiránac  buñ láani, né ór cú guilox gudxliogoxreʼ» (Mateo 24:14). Buñ ni racanal a Jesús raduidy abís que nosi Gobierno xtuny Dios labúu sacné buñgudxlio, xalagary gony animaryibu buñ gap confianz ló guirá gobiernos xtuny buñgudxlio. Ni ronyibu ngú raniʼyibu que nosi Gobierno xtuny Dios labúu sacné lóono (Salmo 146:3). Jesús bisuidy guinabno lóo Dios, Gobierno ni diti raché órni goniʼbu: «Guieed Gobierno xtunylo né gac ni nálo xomod lainy guibá, láaca ló gudxlio» (Mateo 6:10). Xtiitz Dios goniʼ que Gobierno xtunybu: «Sonynoyni né sanitlóni guirá gobiernos reʼ, né sony mandaryni por tipzó» (Daniel 2:44; Revelación 16:14; 19:19-21).

14. Looy ximod nac xpensarylo, ¿xí grupo rony cumplir guirá ni non gap religión ni rasuidy xinésni?

14 Ni ma nanlo ni pénsa bisuidyno gonabdiitz looyca, ¿xí religión rabeʼ ló la Biblia guirá ni rasuidy, né raniʼ que laa Dios ngú Jehová? ¿Xí grupo ni noʼ nigolú nadxiʼ saʼ, raslooy que nap fe lóo Jesús, diti rony mod rony gudxliogoxreʼ né raniʼ que nosi Gobierno xtuny Dios sacné buñgudxlio? De guirá religión ni noʼ ló Gudxlio, ¿chú nac religión ni rony guirá ndeʼ? Noʼ prueby que nosi testigos xtuny Jehová rasuidy xinésni (bíil Isaías 43:10-12).

¿XÍ LÁANI GONYLO?

15. Ni lóono ronyno crer que noʼ Dios, ¿xí más ranabbu lóono?

15 Diti nosi gonyno crer lóo Dios par labúu guibaladxbu. La Biblia ná que dada demony rony crer que noʼ Dios (Santiago 2:19). Nandxichno que layibu diti ronyibu ni ná Dios né diti racacuent Dios layibu. Par guicacuent Dios lóono diti nosi gonyno crer que nabanybu láaca raquiin guisobno ni rony mandarybu. Non galsitno de religión falz né non guiyopyno religión ni rasuidy xinésni.

16. ¿Xí non gonyno par diti gacno toibsi né religión falz?

 16 Pablo bislooy que diti gacno toibsi né religión falz órni bicaʼbu diitzreʼ: «Colguireʼ ladyibu, colguirestzoo tiplad, —ná Jehová—, né colguisian cannto cós buidy, né naʼ sacacuent lóoto» (2 Corintios 6:17; Isaías 52:11). Por ngú, ni rony ni merpa ná Jesús diti ronyibu cós ni noʼ lad religión falz.

17, 18. ¿Xí ngú «Babilonia la Grande», né xigony raquiin guireʼlo ni maca ladni?

17 La Biblia rasuidy que guirá religión falz nacní «Babilonia la Grande» (Revelación 17:5). * Diitzreʼ rasetnaladx lóono gudx gool Babilonia ro golainy religión falz después ni godudy guiérodann ni góc ló xtzú Noé. Xidal galrrasuidy né mod rony religión falz golainyni gudxrop Babilonia ma xidzú íz. Guibiʼno ximod, buñ ni goyoʼ Babilonia buny adoraryibu tzón toibsi buñ né ló xtzúno ni más rasuidy religión falz nacní ndeʼ, que Dios nac tzón buñ toibsi Dios. Per la Biblia gadzé mod rasuidy, nayadit raniʼni que nosi noʼ toib Dios ni rasuidy xinésni, Jehová, né que Xiimbu ngú Jesucristo (Juan 17:3). Buñ ni goyoʼ Babilonia láaca bunyibu crer que buñ nap toib alma ni diti raity, né que alma reʼ labúu radudy ló galrrioop. Ló naareʼ xidal religión rasuidy que napnó toib alma o toib espíritu ni diti raity ni labúu tze ló guii par tudy ló galrrioop.

18 Religión ni goyoʼ ló gudx gool Babilonia biretzlasni ló guidopynac Gudxlio. Por ngú labúu guinino que Babilonia la Grande ni noʼ ló naareʼ raduidyni diitz que nacní guirá religión falz ni noʼ. Scú, Dios ma goniʼ que guirá religión falz ni noʼ ló Gudxlio guiabni tisintiemp. ¿Rienlo xigony nigolú rasac galsitno de Babilonia  la Grande la? Jehová Dios raniiny que looy guireʼlo ni maca lad religión falz laʼga noʼ tiemp gonylo láani (bíil Revelación 18:4, 8).

Órni gonylo xchiin Jehová toibsi né Xcudxbu sioʼ más ximiglo que ni ma gopló

19. ¿Xí galnasác guicaʼlo por ni gonylo ni ná Jehová?

19 Órni guireʼlo lad religión falz sigory sioʼ ximiglo ni galsit de looy. Per órni gonylo xchiin Jehová né Xcudxbu sioʼ más ximiglo que ni ma gopló. Guisaclolo mod gosaclóo buñ ni cuanal a Jesús, layibu bisianyibu xidal cós par cuanalyibu Jesús: sioʼ xidal xhermanlo buñgonaʼ né buñguieeu. Scú láani, sadxin sacloʼ de toib family xiroʼ de xidalguixo herman ni gandxiʼ looy né sapló confianz de guibanylo «ló dzú ni sietra» (bíil Marcos 10:28-30). Láaca sigory sioʼ buñ ni galsit de looy portín ma gadzé Dios rony adorarlo né sigory conforma dzú guisuidyibu ni ná la Biblia né sadxin sonyibu ni ná Jehová.

20. ¿Xí láani cabés guirá buñ ni noʼ lad religión ni rasuidy xinésni?

20 La Biblia rasuidy que Dios mápa mer guinitló gudxliogoxreʼ né guitné toib Gudxlio móz ro Gobierno xtunybu gony Mandary (2 Pedro 3:9, 13). ¡Nigolú sacroyen sac lagary móz reʼ! Lagarycu toibsi religión sioʼ, toibsi mod sony adorarno Dios. ¿Diti ronylo pensary que raquiin guitzálo mod nabanylo par gaclo toibsi nigoreʼ né guirá ni rony adorar Dios xomod raniiny láabu la?

^ Párrafo. 17 Ló apéndice ni laa, ¿Xí ngú «Babilonia la Grande»? rarexa xigony Babilonia la Grande rony representarni guirá religión falz ni noʼ ló Gudxlio.