Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 CAPÍTULO 11

¿Xigony raduidy Jehová lagary tzó galrrioop?

¿Xigony raduidy Jehová lagary tzó galrrioop?
  • ¿Nap Dios dool de guirá galrrioop ni noʼ ló Gudxlio la?

  • ¿Xí goniʼ Buñdzab lainy lagary sacroyen en Edén?

  • ¿Xí láani gony Dios par guinitló guirá galrrioop ni noʼ ló Gudxlio?

1, 2. ¿Xí clas galrrioop radudy buñ ló naareʼ, né xí ranabdiitz xidal buñ?

LÓ TOIB gudxrop ro goyoʼ guerr, xidalguixo buñgonaʼ né mbiox goity xtolni. Guirá buñreʼ bigach lainy toibsi garió né goyoʼ ni bisagaʼ xidal crois rolooni ro caa toib diitz ni ná: ¿Xigony? Ndeʼ galrranabdiitz nabann ni rony buñ órni radudy ló guerr, ló galguitz, órni rioʼ ni ragaity xfamilybu ni diti nap dool, órni ranit lidxyibu o stoib clas galrrioop ni radudyibu. Nainy ganyibu xigony rasacloyibu guirá desgrasy reʼ.

2 ¿Xigony raduidy Jehová lagary tzó galrrioop? Jehová nap xiroʼgolu galnadip, galnadxiʼ, nangoluʼbu né ronybu xinésni, per ¿xigony ló Gudxlio bidzani de galrrianladx né ni diti rac xinésni? ¿Toibtica buelt ma gonabdiitzlo ndeʼ la?

3, 4. a) ¿Xí raslooy que diti mal láani guinabdiitzno xigony Dios caduidy lagary tzó galrrioop? b) ¿Xí rony pensary Jehová ni noʼ cós mal né galrrioop?

3 ¿Mal láani guinabdiitzno xigony Jehová raduidy lagary tzó galrrioop la? Tipnés buñ rony crer pal ranabdiitzyibu raslooyibu que diti napyibu fe o que diti rony respetaryibu  Jehová. Per órni goʼol lo la Biblia, saduidylo cuent que buñ ni bisob Dios láaca gonabdiitz ndeʼ. Guibiʼno ximod, Habacuc ni bicaʼ profecía gonabdiitzbu Jehová: «¿Xigony raduidylo lagary guibiʼya cós mal? ¿Né xigony raduidylo lagary tzoʼ galrrioʼob? ¿Xigony noʼ galrranitló né xigony noʼ ni ronynaa saʼ nislóya? ¿Né xigony nogoluʼ galrradíil né xigony nigolú racaló buñ saʼ?» (Habacuc 1:3).

Jehová guinitlóbu guirá galrrioop

4 ¿Godilné Jehová Habacuc por ni gonabdiitzbu guirá ndeʼ la? Yaca, diti godilné Jehová láabu. Xalagary ñonybu ngú, Jehová biduidy lagary que xtiitz Habacuc nacáni ló la Biblia. Dios láaca gocné láabu par ñentzaaybu né par ñac nadip fe xtunybu. Nainy Jehová gonybu né looy scúca. Bisednaladx, la Biblia rasuidy que «láabu rioʼbu ló galrasaʼ» por lóono (1 Pedro 5:7). Dios rianladxgolú cós mal né galrrioop ni noʼ, más que nitisi buñgudxlio (Isaías 55:8, 9). Per ¿xigony nogoluʼ galrrioop ló Gudxlio?

¿XIGONY NOGOLUʼ GALRRIOOP?

5. ¿Xí razón raduidy tipnés buñ par cuéxa xigony radudyno ló galrrioop, per xí rasuidy la Biblia?

5 Buñ de xidal religión ranabdiitzyibu ni rasanir  nislóyibu né mextra ni noʼ xigony nogoluʼ galrrioop. Biinreʼ racapy layibu que nga ni raniiny Dios né ma xidzú goniʼbu guirá ni gac, xomod desgrasy ni caduidyno ló. Biinreʼ raniʼ que xinés Dios diti labúu guieen buñ láani, láaca raniʼyibu que Dios riné buñ né mbiox par guiguaʼ toibsi né láabu lainy guibá. Per mod ma bisuidylo Jehová Dios dipa ronybu mal. La Biblia ná: «¡Diti gony buñ pensary que Dios ni rony xinésni gony cós ni nigolú mal, que Dios ni nap Xiroʼgolu galnadip gony ni diti nac xinésni!» (Job 34:10).

6. ¿Xigony xidal buñ ragotz dool Dios por guirá galrrioop ni noʼ ló gudxliogoxreʼ?

6 ¿Nanlo xigony raché buñ órni ragotz dool Dios por guirá galrrioop ni noʼ la? Xidal buelt ragotzyibu dool Dios ni nap Xiroʼgolu galnadip, portín raluladxyibu que Dios rony mandary gudxliogoxreʼ. Diti nanyibu xí láani ni nayadit rasuidy la Biblia, ni looy ma bienlo ló capítulo 3 que ni rony mandary gudxliogoxreʼ ngú Buñdzab.

7, 8. a) ¿Ximod raslooy gudxliogoxreʼ que noʼni ladxña Buñdzab? b) Ni noʼ galkié né «tiemp né desgrasy», ¿xigony ronyni que buñ radudy ló galrrioop?

7 La Biblia nayadit raniʼ: «Guidopynac gudxliogoxreʼ noʼni ladxña ni nigolú mal» ni nac Buñdzab (1 Juan 5:19). Texto reʼ rabexatzay guirá ni ranabdiitzno. Gudxliogoxreʼ rony modpa rony ángel mal ni «cascú guiránac buñgudxlio» (Revelación 12:9). Buñdzab rascú, rianladx, né nigolú nagudx xcalnabany. Por ngú, gudxliogoxreʼ noʼni ladxñabu, né bidzani de galrrianladx, galrrascú né nigolú nagudx xcalnabany buñ. Ndeʼ nac primer razón por ni nogoluʼ desgrasy.

8 Ni rarop razón por ni nogoluʼ galrrioop láani ngú: buñ nap galkié né raché. Xomod ma bienno ló capítulo 3 gosaloni órni Adán né Eva diti bisobyibu Dios en Edén. Scú láani, buñ raniiny gony mandary né rayopy  mod gonybu láani, ndeʼ rony que rioʼ guerr, rioʼ buñ ni rony mal saʼ né rioʼ galrrioop (Eclesiastés 4:1; 8:9). Ni rion razón ni nogoluʼ galrrioop láani ngú ni rasetlaa la Biblia: «Tiemp né desgrasy» (bíil Eclesiastés 9:11). Jehová diti rony mandary gudxliogoxreʼ, por ngú diti napni xcalrracnébu. Ndeʼ rony que buñ labúu guisaclóo toib desgrasy rotísi lagary.

9. ¿Xigony nandxichno que Jehová nap razón par guiduidy lagary tzó galrrioop?

9 Racnéni lóono ganno que Dios diti ragoʼ lóono ló galrrioop. Diti napbu dool por guirá guerr ni noʼ, buñ ni ragaity saʼ, buñ ni rony mal saʼ, o xo rodann né stipnés cós ni ragoʼ lóono ló galrrioop. Per raquiin ganno, ¿xigony Jehová raduidy lagary tzó galrrioop? Láabu napbu Xiroʼgolu galnadip né labúu gonybu láani. Per ¿xigony diti ronybu láani? Ma rimbuno Jehová né ma nánno que nacbu toib Dios ni nadxiʼ buñ, nandxichno que napbu razón par guiduidybu lagary tzó galrrioop (1 Juan 4:8).

¿XÍ GONIʼ BUÑDZAB EN EDÉN?

10. ¿Xí goniʼ Buñdzab que diti labúu gony Dios, né ximod bunybu láani?

10 Par ganno xigony raduidy Dios lagary tzó galrrioop, raquiin guienno órni gosaló guirá galnagan. Órni Buñdzab buny que Adán né Eva diti bisob Jehová, bireʼ loguiaʼ toib galnagan ni raquiin guienno. Buñdzab diti goniʼ que Jehová diti nap galnadip. Gondxichbu que xcalnadip Jehová diti radopyni. Xalagary naniʼbu ngú, goniʼbu que Jehová diti rony mandary galán. Nadip góc xtiitzbu que Dios rascú né racaabu cós tzaay par guirá ni noʼ ló xomandarybu, né diti labúu rony mandarybu galán (bíil Génesis 3:2-5). Láaca Buñdzab bislooy que buñgudxlio labúu nabany más sacró pal Dios diti ñony mandary layibu. Modreʼ Buñdzab cualó xcalmandary Jehová.

11. ¿Xigony diti binitló Jehová ni diti bisob láabu en Edén?

 11 Adán né Eva cualóyibu Jehová. Scú, layibu goniʼyibu: «Diti raquiinno Jehová par gony mandary lóono. Stip lóocano labúu cuuno xí ngú cós tzaay né cós mal». ¿Ximod ñony reglar Jehová galnagan reʼ? ¿Ximod naslooybu a guirá ángeles ni naní xcalrrien que ni racaló láabu diti nap razón, né mod ronybu mandary más galán láani? Noʼ buñ ni rony pensary que Dios non nagaity ni diti bisob láabu, né nasaʼbu stipnés. Per Jehová ma goniʼ que Gudxlio gacni toib lagary móz né nadzani né xiin Adán né Eva (Génesis 1:28). Guirá ni Jehová raniʼ rarebuʼni (Isaías 55:10, 11). Láaca noʼ stoib razón, pal Jehová nanitlóbu ni góc nayaʼ en Edén diti ñac reglar ni goniʼ Buñdzab que Jehová diti rony mandary galán.

12, 13. ¿Bislooy xigony Jehová caduidy lagary Buñdzab gony mandary gudxliogoxreʼ né xigony caduidybu lagary buñ gony mandary saʼ?

12 Cuéxano láani scareʼ. Toib mextra cabexa nisló ximbiox scuel toib cuent de matemáticas. Né ór cú toib mbiox ni naní guic per nayaʼ raniʼ que mod ni mextra  cabexa cuent reʼ diti láani ngú, modreʼ raslooybu que mextra reʼ diti nann. Mbiox scuel reʼ nadip rac xtiitz que nambu toib mod más galán par cuéxabu láani. Tipnés xcompañerbu raluladx que napbu razón né rac toibsi né mbiox reʼ. ¿Xí láani ñony mextra reʼ? Labúu nalaʼkbu guirá mbiox ni nac nayaʼ, per ¿xí ñony pensary stipnés mbiox ni dxee cú? Sigory ñonyibu pensary que xcompañeryibu né stipnés mbiox ni góc toibsi né láabu nap razón. Mbiox ni noʼ lainy scuel labúu nadxin ñac nayaʼ né ñony pensary que mextra reʼ radzuiby guislooy que diti nann. Per buny pensary pal mextra reʼ raduidy lagary mbiox nayaʼ reʼ guislooy nisló stipnés mbiox ximod láabu cuéxabu cuent reʼ.

¿Más nantzay mbiox scuel que xomextra la?

13 Labúu guinino que Jehová nac xomod mextra reʼ. Bisednaladx que ni goyoʼ en Edén diti nosi layibu goyoʼyibu ló galnagan reʼ. Láaca millón de ángeles bibiʼ ni góc (Job 38:7; Daniel 7:10). Mod ni Jehová ñony reglar ni Buñdzab cualó láabu nigolú nasacni par stipnés ángeles, né conforma nadudy dzú par guirá ni Jehová bisaʼ. Por ngú, ¿xí buny Jehová? Biduidybu lagary Buñdzab naslooy ximod gony mandary buñgudxlio. Dios láaca caduidy lagary que buñ gony mandary saʼ mod ná Buñdzab.

14. ¿Ximod sacné a guirá ni natzaay xcalnabany ni Jehová caduidy lagary que buñ gony mandary láacayibu?

14 Mextra ni bisetlano nann que mbiox scuel né ni góc toibsi né láabu diti nap razón. Per láaca nambu pal raduidybu lagary cuéxabu cuent reʼ mod nayibu sacnéni a guirá ni noʼ lainy scuel. Órni mbiox reʼ diti labúu rabexabu cuent stipnés ni natzaay xcalnabany, rien que nosi mextra reʼ labúu coʼ scuel. Láaca sienyibu xigony mextra ralaʼk guirá mbiox ni diti ná guisob. Scúca láani, Jehová nann que buñgudxlio né ángeles ni natzaay xcalnabany sacnéni layibu órni guibiʼyibu que Buñdzab né  xidemony diti nap razón né que buñgudxlio diti labúu gony mandary láacabu. Guientzaayibu ni goniʼ Jeremías: «Nandxichi, oh Jehová, que buñ diti labúu ragonésbu láacabu. Buñ ni casaa stipláacabu diti labúu ragonésbu mod rasaabu» (Jeremías 10:23).

¿XIGONY MA GODUDY XIROʼGOLU TIEMP?

15, 16. a) ¿Xigony caduidy Jehová lagary tzó galrrioop por xiroʼ tiemp? b) ¿Xigony diti rony Jehová xitcal par diti tzó desgrasy ló Gudxlio?

15 Per ¿xigony caduidy Jehová lagary que tzó galrrioop por xiroʼgolu tiemp? ¿Xigony diti racaabu ló cós mal? Gonyno pensary stoib de mextra ni ma bisetlano né de chop cós ni mextra reʼ diti ñony. Primer diti nacaabu mbiox reʼ par naniʼ ximod nabexa cuent reʼ. Ni rarop, mextra reʼ diti ñacnébu mbiox reʼ par nabexa láani. Scúca noʼ chop cós ni Jehová diti ma buny. Primer, Jehová diti ma bicaabu Buñdzab né guirá ni góc toibsi né láabu par guislooyibu pal napyibu razón. Por ngú Dios digundi gonybu xitcal. Ló xidalguixo íz ni nabany buñ ló Gudxlio, buñ ma biyopy xidal clas galmandary. Buñnan ma buny xidal cós ni radziguiaʼ buñ, per galsii, ni diti rac xinésni, buñ mal ni ragaity saʼ né guerr cayac xiroʼni. Rientzaayni que galmandary ni nap buñgudxlio diti raquiin.

16 Ni rarop, Jehová diti racnébu Buñdzab gony mandary gudxliogoxreʼ. Pal Dios nabeʼ desgrasy nigoreʼ, ¿diti naslooybu que cayacbu toibsi né Buñdzab né guirá buñ mal ni noʼ la? ¿Ñonyno pensary que buñgudxlio labúu ñony mandary láacabu sin tzó galrrioop o cós mal ló Gudxlio la? Pal Jehová ñony ndeʼ ñacnébu toib galrrascú. Per «Dios nagann par guiscú» (Hebreos 6:18).

17, 18. ¿Xí láani gony Jehová né guirá cós mal ni ma buny xomandary buñ né ni noyibu ló xomandary Buñdzab?

17 ¿Xí cós mal ma buny buñgudxlio por ni cualóyibu Dios? Guisetnaladxno que Jehová nap Xiroʼgolu galnadip.  Por ngú, sanitlóbu guirá cós ni rony mal buñ. Xomod ma bisuidyno Gudxlio sadxin sácni toib lagary móz, ná buñ caxin láani. Guirá galrrioop ni ritné galkié guinitlóni por fe ni napnó ló xcalgoity Jesús. Galgoity láaca guinitlóni órni Jehová guilís gueʼet. Modreʼ Dios guiquimbu Jesús par «guichílbu xchiin Buñdzab» (1 Juan 3:8). Jehová gony guirá ndeʼ merpa xorni. Guibaladxno que Jehová diti ma bunybu láani, ni nacbu paseinys caduidybu lagary guisuidyno ni ná la Biblia, né gonyno ni nábu (bíil 2 Pedro 3:9, 10). Laʼga cayonybu ndeʼ, cayopybu buñ ni raniiny gony adorar láabu né guidopy xcalnabany né racnébu buñ par gony guantary guirá galnagan (Juan 4:23; 1 Corintios 10:13).

18 Tipnés rony pensary que guirá galrrioop reʼ nanitlóni pal Dios nasaʼ Adán né Eva de toib mod par diti labúu naché. Par ganno xigony diti bunybu láani, guisetnaladxno galrrascad rodann ni Jehová biduidy lóono.

¿XIMOD GUIQUIINLO XCALRRASCAD DIOS?

Dios sacné looy par gony guantarylo galrrioop

19. ¿Xí galrrascad ni rasac biduidy Jehová lóono, né xigony gandxiʼno láani?

19 Xomod ma bienno ló capítulo 5 Dios bisaʼ buñ par gonyibu ni náni layibu. ¿Raduidylo cuent que galrrascad reʼ nigolú rasacni la? Dios láaca bisaʼ xidalguixo nimal per layimu diti nanyimu xí ngú cós tzaay né cós mal (Proverbios 30:24). ¿Nabanyno goxtiguie pal Dios nasaʼ lóono xomod toib nimal la? Yaca, rabaladxno ni labúu ronyno ni náni lóono, xomod xí clas buñ gacno, ximod guibanyno,  né xí clas buñ guidzakno. Rabaladxno que labúu gonyno ni náni lóono, né Jehová nainy gonyno láani.

20, 21. ¿Ximod labúu guiquiinno galrrascad ni Dios biduidy lóono de toib mod galán, né xigony raquiin ñonyno ndeʼ?

20 Jehová diti rioladx gonyno xchiimbu lafuers (2 Corintios 9:7). Guislooyno láani modreʼ, toib buñ ni noʼ xiin, ¿rioladxbu que xiimbu gaiby láabu: «Ronladxi looy» portín goyoʼ ni buny lafuers xiimbu guiniʼ láani o por ni rareʼni lainy xcalnabany xiimbu guiniʼ láani la? Scú, ni guinabdiitzlo looyca ngú, ¿ximod guiquiina galrrascad ni Dios biduidy naʼ? Buñdzab, Adán né Eva diti biquiinyibu galán galrrascad reʼ, layibu golsityibu de Jehová. Looy, ¿xí gonylo?

21 Looy labúu guiquiinlo galrrascad, ni labúu gonylo ni náni looy de toib mod galán. Labúu gaclo toibsi né guirá buñ ni noʼ xilad Jehová. Guirá buñreʼ ronyibu que Dios rabaladx portín raslooyibu que Buñdzab pór galrrascú raniʼ, né diti raquiimbu par gony mandarybu (Proverbios 27:11). Looy láaca labúu gonylo scúca pal rabanylo mod ná Dios. Ló capítulo ni sieed rarexa ximod.

PAR GANNLO MÁS

¿Xigony guisuidyno la Biblia?

La Biblia cayacné a xidalguixo buñ ló guidopynac Gudxlio par guidzelyibu guirá galrranabdiitz ni más rony buñ. ¿Nainy looy gaclo toibtica de layibu la?