Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 CAPÍTULO 17

Órni raninéno Dios rabigaxno láabu

Órni raninéno Dios rabigaxno láabu
  • ¿Xigony non guininéno Dios?

  • ¿Xí raquiin gonyno par guicadiag Dios lóono?

  • ¿Ximod racapy Dios órni raninéno láabu?

«Ni Bisaʼ guibá né gudxlio» noʼbu puext guicadiagbu ni ranabno lóbu

1, 2. ¿Xigony nacní toib privilegio ni labúu raninéno Dios, né xigony raquiin ganno xí rasuidy la Biblia de guirá ndeʼ?

ÓRNI rabiʼno guirá vitzón ni noʼ guibá, raduidyno cuent que Gudxlio nigolú mitien nacní. Scú láani, par Jehová, «ni Bisaʼ guibá né gudxlio», guirá gudxrop ni noʼ ló Gudxlio nacní xomod toib biniʼ lainy cubet (Salmo 115:15; Isaías 40:15). Per la Biblia ná: «Jehová noʼ gahx de guirá ni ranab lóbu, ni ranab xcalrracnébu né guidopy xcalnabany», né sony cumplirbu «buñ ni radzuiby láabu, láabu raduidybu ni nainy guicaʼyibu. Racadiagbu buñ ni canab xcalrracnébu» (Salmo 145:18, 19). ¡Bunysi xpensarylo xí raslooy diitzreʼ! Ni Bisaʼ Gudxlio né guibá, ni nap Xiroʼgolu galnadip noʼ gahxca lóono né racadiagbu buñ «ni ranab xcalrracnébu né guidopy xcalnabany». ¡Ndeʼ nac toib privilegio ni nigolú rasac!

2 Pal raniiny lóono que Jehová guicadiag órni raninéno láabu, non gonyno láani mod rioladxbu. ¿Ximod? Non guienno ni ná la Biblia né xí rioladx Dios órni raninéno láabu. Raquiin ganno ndeʼ par labúu guibignono láabu.

 ¿XIGONY NON GUININÉNO JEHOVÁ?

3. Bisetlaa xí láani nac toib razón ni más rasac par guininéno Jehová.

3 Toib razón ni rasac láani ngú que Jehová ranab lóono guininéno láabu. Xtiitzbu ná: «Diti tzóto ló galrasaʼ por nitisi cós, ni gonyto ngú guininéto, guinabto lóo Dios né guiduidyto guixquix láabu; modreʼ Dios gan xi canabto; né paz xtuny Dios ni rony gan guirá pensary san xcalnabanyto né xpensaryto por Cristo Jesús» (Filipenses 4:6, 7). Nandxichno que diti raniiny lóono cuéno Jehová tiplad, Dios ni rony Mandary guibá né Gudxlio.

4. ¿Ximod ni guininéno Dios guirá ór rony que radzakno más láabu?

4 Stoib razón ni guininéno Dios láani ngú que órni ronyno láani guirá ór, más rabignono Jehová. Buñ ni nac ximigdxin saʼ, diti rooyibu diitz órni nosi noʼ ni caquiinyibu, layibu rooyibu diitz guirá ór portín rioʼyibu xcalrasaʼ saʼyibu. Né radxin racyibu ximigdxin saʼyibu órni raniʼyibu xí noʼ ló xpensaryibu, xí galrasaʼ noyibu ló né xí rasacyibu. Né scú rac órni radzakno Jehová. Libro reʼ nigolú ma gocnéni looy bienlo  xí rasuidy la Biblia de Jehová, mod nacbu né ni noʼ guicbu gonybu. Looy ma nanlo que Jehová nac toib Dios ni nabany. Órni raninélo Jehová racaʼlo lagary gaibylo láabu xí noʼ ló xpensarylo né xí rasaclo. Modreʼ labúu sabigaxlo Bixioslo ni noʼ guibá (Santiago 4:8).

¿XÍ RAQUIIN GONYNO?

5. ¿Xí raslooy que Jehová diti racadiag guirá ni ranab buñ lóbu?

5 ¿Racadiag Dios guirá ni ranab buñ la? Bibiʼ xí góoch Dios a israelitas ni diti bisob láabu ló dzú ni bibany Isaías: «Ná guininéto naʼ guirá ór, diti racadiaga; ñato bidzani de runy» (Isaías 1:15). Scú láani, pal ronyno cós mal, Dios diti guicadiag órni guininéno láabu. Par labúu guicadiag Dios lóono, non gonyno ni ranabbu lóono.

6. Par guicadiag Jehová órni raninéno láabu, ¿xí raquiin gapnó, né ximod raslooyno que napnó láani?

6 Toib cós ni raquiin gapnó, láani ngú fe (bíil Marcos 11:24). Pablo bicaʼ diitzreʼ: «Láaca, pal diti noʼ fe diti labúu sonyno que guibaladx Dios, portín ni rabigax ronoʼ Dios nap xi de guiluladx que láabu nabanybu né raduidybu xilaaybu guirá ni rayopy láabu né guidopy galnabany» (Hebreos 11:6). Per par labúu gapnó fe diti nosi ganno que Dios nabany né que racadiagbu né racapybu órni raninéno láabu. Pal napnó fe guislooyno láani mod ronyno né mod nabanyno (Santiago 2:26).

7. a) ¿Xigony non guininéno Jehová né respet? b) ¿Ximod raslooyno que nacno buñdxo né ni ranabno láabu ronyno láani né guidopy galnabany?

7 Stoib cós ni ranab Dios gonyno órni raninéno láabu, láani ngú gacno buñdxo né gonyno láani né guidopy xcalnabanyno. ¿Nigolú napnó razón par gacno buñdxo órni raninéno Dios la? Órni buñ raniné toib buñchiin ronybu láani né respet portín nambu que  ndeʼ nap toib dxiin ni rasac. Scú láani, Jehová láaca raquiin que órni guininéno láabu gonyno láani né xiroʼ respet (Salmo 138:6). ¿Xigony? Portín láabu nac «Dios ni nap Xiroʼgolu galnadip» (Génesis 17:1). Órni raninéno láabu, guislooyno que láabu noʼ más guiaʼ que lóono. Ni nacno buñdxo láaca ronyni que órni guininéno láabu gonyno láani né guidopy galnabany, né diti guinino ngúca ngúca guirá ór (Mateo 6:7, 8).

8. ¿Ximod gonyno modpa ni gonabno lóo Dios?

8 Stoib cós ni non gonyno par guicadiag Dios lóono, láani ngú gonyno guirá ni canabno láabu órni caninéno láabu. Guibiʼno ximod, pal ranabno Jehová: «Biduidy lóodo páa ni guádo dzureʼ» non gonyno dxiin nadip ló nitisi dxiin ni radzelno, pal xcalrrienno raduidy lagary gonyno láani (Mateo 6:11; 2 Tesalonicenses 3:10). Pal ranabno Jehová gacné lóono par diti guiabno ló cós mal, non gapnó lóono par diti tzóno lagary ni labúu gony que guiabno ló cós yox (Colosenses 3:5). Per diti nosi ganno ndeʼ, láaca raquiin ganno ximod racapy la Biblia tipnés galrranabdiitz ni rony buñ.

GALRRANABDIITZ DE ORACIÓN

9. ¿Chú láabu non guininéno par gacné lóono, né chú laa guiquiinno?

9 ¿Chú láabu non guininéno? Jesús bisuidy ni cuanal láabu mod guininéyibu Dios: «Bixiosdo ni noʼ guibá» (Mateo 6:9). Por ngú, nosi Jehová non guininéno. Raniiny láabu que gonyno láani ló laa Jesús. ¿Xigony? Xomod bisuidyno ló capítulo 5 Dios bixel toibguielot Xiimbu, Jesucristo, goity por lóono par guilaano de galkié né galgoity (Juan 3:16; Romanos 5:12). Láabu golúbu Jesús xomod Sumo Sacerdote ni rony  que labúu tudy xcalkiéno scásiʼ né Jehová láaca golú par gacbu Juez (Juan 5:22; Hebreos 6:20). Por ngú la Biblia raiby lóono que órni guininéno Dios guiquiinno laa Jesús. Láacabu goniʼbu: «Naʼ ngú néz né ni nigolú né vida. Ni toib rieed ronoʼ Bixiosa sino por naʼ» (Juan 14:6). Par guicadiag Jehová órni raninéno láabu, nosi láabu non guininéno né guiquiinno laa Xiimbu Jesús.

10. ¿Xigony diti raquiin tzó toib mod órni raninéno Dios?

10 ¿Noʼ toib mod ni gonyno órni guininéno Dios la? Yaca. Jehová diti ranab toib mod ni guisagaʼno o ni guiscaʼno ñano. La Biblia rasuidy que noʼ xidal mod ni Jehová rioladx. Toib buñ labúu guixixip, guisagaʼ né guiquiʼich lóo layoo (1 Crónicas 17:16; Nehemías 8:6; Daniel 6:10; Marcos 11:25). Ni nigolú rasac ngú diti mod nóono órni raninéno Jehová, ni más rasac ngú ni noʼ lainy xcalnabanyno. Labúu guininéno Dios dzudiguié né rotísi lagary, ná pal cayonyno dxiin o órni caquiinno xcalrracnébu. Sigory buñ diti raduidy cuent caninéno Dios, per Láabu cacadiagbu lóono (Nehemías 2:1-6).

11. ¿Xí labúu guisetlano órni raninéno Dios?

11 ¿Xí labúu guisetlano órni guininéno Dios? La Biblia rabexa: «Nitisi cós ni ranabno ni noʼ de acuerdo mod ni nábu, [Jehová] racadiagbu lóono» (1 Juan 5:14). Labúu guinino nitisi cós ni noʼ de acuerdo né ni nábu. Guibiʼno ximod, ¿raniiny Dios que gaibyno láabu xí galrasaʼ nóono ló la? ¡Scú láani! Órni raninéno Jehová nacní xomod órni raninéno ximigdxinno. Labúu guixalno xcalnabanyno, láacani ngú guinino né confianz guirá ni rasacno (Salmo 62:8). Láaca labúu guinabno gacnébu lóono né fuers ni raquiimbu par gonybu ni nábu par gonyno cós tzaay (Lucas 11:13).  Láaca labúu guinabno conésbu lóono antes de coʼno guicno gonyno toib cós ni rasac (Santiago 1:5). Órni rachéno labúu guinabno láabu guituidybu scásiʼ xcalkiéno por xcalgoity Jesucristo (Efesios 1:3, 7). Scú láani, diti guinino de lóosino non guinabno par stipnés, xomod xfamilno o xhermanno (Hechos 12:5; Colosenses 4:12).

12. ¿Xí labúu guinabno par guislooyno que ni noʼ guic Jehová más rasac?

12 Órni guininéno Jehová ni más guisetlano ngú ni noʼ guicbu gonybu. Napnó xiroʼ razón par gonyxiroʼno né guixquixno láabu né guidopy xcalnabanyno por xcalronladxbu (1Crónicas 29:10-13). Jesús bisian toib mod par guininéno Dios né radzelno láani ló Mateo 6:9-13, reʼ rasuidyni lóono guinabno gac nayaa laa Jehová (bíil). Después rasetlaa que guieed Gobierno xtuny Dios né gac ni nábu ló Gudxlio láaca lainy guibá. Biduidysi cuent, Jesús diti ni maca rasetlaa cós ni rony que rioʼno ló galrasaʼ, primer rasetlabu ni noʼ guic Jehová gony. Pal lóono raduidyno lagary que Dios guicá primer lagary órni raninéno láabu raslooyno que diti rioʼno ló galrasaʼ nosi por lóono.

13. ¿Xí raiby la Biblia lóono balac gaclano órni guininéno Dios?

13 ¿Xiroʼ ór non guininéno Dios la? La Biblia diti raniʼ balac tiemp gaclano órni guininéno Dios, pal ronyno láani toibno o nisló buñ. Labúu gacni dop órni guáno guet o labúu gacni sioʼol órni raxalno xcalnabanyno nisló Jehová órni nóono toibno (1 Samuel 1:12, 15). Jesús bianladx buñ ni goniʼ que diti raché nisló Dios, goninéyibu Dios xiroʼ ór par que stipnés buñ nadziguiaʼ layibu (Lucas 20:46, 47). Ndeʼ diti rony que radziguiaʼ Jehová, ni más rasac ngú guininéno láabu né guidopy xcalnabanyno. Por ngú, midid  gacla órni guininéno Jehová gacni por xí ni caquiinno o cadudyno ló.

Looy labúu guininélo Dios rotísi lagary nóolo

14. ¿Goniʼ ximod rarexa diitz «colguininé Dios guirá ór» né xí galnasác racaʼno?

14 ¿Guirá ór guininéno Dios la? La Biblia raiby lóono: «Colguininé Dios guirá ór», né «colguinab lóo Dios diti guisianto gonyto láani» (Mateo 26:41; Romanos 12:12; 1 Tesalonicenses 5:17). Ndeʼ diti raduidy diitz que guininéno Dios dzúna gueʼel. Ndeʼ raslooy que guirá ór guininéno Jehová par guixquixno láabu por xcalrronladxbu né par guinabno conésbu lóono gacnébu né guiduidybu xcalnadipbu lóono. ¡Ndeʼ nac toib galnasác rodann! Jehová raduidy lagary guininéno láabu xidal buelt né por xiroʼgolu tiemp ni nainy lóono. Pal rabiʼno ndeʼ xomod toib privilegio sadzelno xidal ór par gonyno láani.

15. ¿Xigony non guinino «amén» órni guilox guininéno Dios?

15 ¿Xigony órni guilox guininéno Dios guinino «amén»? Diitz amén rarexani «scú gacni». Noʼ xidal lagary ro la Biblia raslooy que labúu guinino «amén» órni raninéno Dios toibsino o nisló buñ (1 Crónicas 16:36; Salmo 41:13). Órni ranino diitz «amén» né nóono toibno, raduidyno diitz que ni gonino bunyno láani né guidopy galnabany. Órni ranino láani nisló buñ (lainy xcalnabanyno o rien buñ láani), raduidyno diitz que nóono de acuerdo né oración ni góc (1 Corintios 14:16).

¿XIMOD RACAPY DIOS NI RANABNO LÁABU?

16. ¿Xí confianz labúu gapnó órni guininéno Dios?

16 ¿Nigolú racapy Dios órni raninéno láabu la? Scú láani. Napnó razón par gapnó confianz que láabu nac ni «racadiag oración» (Salmo 65:2). Jehová racapy lóono de xidal mod.

17. ¿Xigony labúu ranino que Dios raquiin ángeles xtuny né buñ ni rony ni nábu par guicapybu ni ranab buñ?

 17 Jehová raquiin ángel ni nap né buñ ni rony ni nábu ló Gudxlio par guicapybu ni canabno láabu (Hebreos 1:13, 14). Xidal buñ ranab lóo Dios galrracné par guieen la Biblia, né ni maca riguen toib testigo xtuny Jehová layibu. Ni rac né buñ raslooy que ángeles rasanir ló xchiin Jehová (Revelación 14:6). Órni nóono ló galnagan Jehová labúu guichiin toib herman gacné lóono (Proverbios 12:25; Santiago 2:16).

Jehová labúu guicapy ni ranabno láabu órni guichiinbu toib herman gacné lóono

18. ¿Ximod raquiin Jehová espíritu xtuny né la Biblia par guicapybu buñ ni rony ni nábu?

 18 Jehová Dios láaca raquiimbu xcalnadipbu né Xtiitzbu la Biblia par guicapybu buñ ni rony ni nábu. Labúu guicapybu ni ranabno láabu par guicalóno galnagan, láabu sagonésbu né sacnébu lóono né xcalnadipbu (2 Corintios 4:7). Órni ranabno láabu par gonyno cós ni noʼ guicno, xidal ór racapybu láani ló la Biblia. Sigory radzelno xidal textos órni toibno cayolno la Biblia, o stipnés guiich xomod libro reʼ. Láaca sigory ronyni que rasetnaladxno stipnés litz ni sieed ló la Biblia ni raquiin gonyno. Labúu gacni scú órni rioʼno reunión o órni toib anciano ni rioʼ ló galrasaʼ por lóono ralitz lóono (Gálatas 6:1).

19. ¿Xí guisetnaladxno pal rioʼ ór ralooypani Dios diti racapy ni ranabno láabu?

19 Rioʼ ór labúu gonyno pensary que Jehová cayacla guicapy ni gonabno láabu. Per ndeʼ diti raduidy diitz que diti labúu racapybu láani. Guisetnaladxno que Jehová sacapybu de toib mod né toib ór ni láabu rioladx. Láabu rimbubu más xí caquiinno né nambu ximod guiduidybu láani lóono, más que lóono. Xidal buelt raduidybu lagary guinabno, guiyopyno né canno (Lucas 11:5-10). Pal  ronyno láani guislooyno que ni canabno Dios nigolú raniiny lóono láani, né fe ni napnó nigolúni. Láaca rioʼ ór Jehová racapy lóono de toib mod que diti rienno ximod ronybu láani. Guibiʼno ximod, pal ranabno láabu gacnébu lóono por ni cacalóno toib galnagan, xalagary ni guinitlóbu láani raduidybu galnadip lóono par gony guantaryno láani (bíil Filipenses 4:13).

20. ¿Xigony guiquiinno privilegio ni napnó ni raninéno Jehová?

20 Raxquixpano Jehová ni Bisaʼ guibá né Gudxlio portín noʼbu gahxca guirá ni raniné láabu mod rioladxbu (bíil Salmo 145:18). Ni raninéno Jehová guirá ór nacní toib privilegio ni rasac. Pal ronyno láani, sabaladxno guibigaxno más Jehová, ni Racadiag oración.