Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 APÉNDICE

Jesucristo, Mesías ni Dios goniʼ guieed

Jesucristo, Mesías ni Dios goniʼ guieed

JEHOVÁ Dios góoch profetas ni bicaʼ la Biblia xidal cós de Mesías, ni goniʼbu guieed par Guilaa buñ. Diti nagann ganno chú ngú Mesías, portín layibu goniʼyibu ximod né pu lagary gálbu, ximod gonybu xchiin Dios né ximod gaitybu. De toib mod ni radziguiaʼ buñ guiráxadit ni goniʼyibu góc cumplirni  en Jesucristo. Lóono labúu guiduidyno cuent que nigolú scú gocni órni rabiʼno tipnés profecías ni raniʼ ximod golbu né órni gócbu mbiox.

Profeta Isaías goniʼbu que Mesías ñacbu de xfamily David (Isaías 9:7). Né scú gocni: Jesús bieed de xfamily David (Mateo 1:1, 6-17).

 Stoib profeta xtuny Dios ni góc laa Miqueas, goniʼ que Jesús ñal gudx «Belén Efrata» né nadxin ñacbu ni rony mandary (Miqueas 5:2). Scú láani, órni Jesús bieed ló Gudxlio, goyoʼ chop gudx ni góc laa Belén. Toibni goyoʼ niis lad norte de gudxrop cú, gahxca gudx Nazaret, né stoib cú goyoʼ lainy gudx Judá, gahxca Jerusalén. Ni biaʼan gahx gudx Jerusalén primer góc laani Efrata. Né lagarycupa gool Jesús, modreʼ góc cumplir profecía ni goniʼ de láani (Mateo 2:1).

Stoib profecía ni sieed ló la Biblia goniʼni que Dios sabudx Xiin par guireʼ «de Egipto». Né scú gocni, portín órni Jesús góc mbiox, bixiosbu né xinaʼbu gonyné láabu Egipto, diti xidzú de goló góc ndeʼ, órni Herodes goity, Jesús bibiguet xcudx. Modreʼ góc cumplir profecía ni goniʼ de láani (Oseas 11:1; Mateo 2:15).

Ló cuadriyen ni laa,  «Profecías ni raniʼ de Mesías» sabiʼlo diitz ni ná «Profecía», lagarycu sieed xidal textos ni goniʼ xí guirá guisaclóo Mesías. Raruʼdo looy guitzaklo guirá textos reʼ né textos ni ná «Ximod góc cumplirni». Modreʼ más saduidylo cuent que Xtiitz Dios por nigolú raniʼni.

Órni looy guisuidytzaylo guirá textos reʼ, diti guialadxlo que guirá profecías reʼ cuáni xidalguixo íz dzú yása gál Jesús. Jesús láacabu goniʼbu: «Guirá cós ni cuá ni raniʼ de naʼ ló Xiley Moisés né ló Profetas né ló Salmos non gac cumplirni» (Lucas 24:44). Labúu guiyopylo ló Biblia ni naplo né guiduidylo cuent que guiráxadit profecías reʼ góc cumplirni, xomodpa sieetni ló la Biblia.