Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 APÉNDICE

Memorial: toib lanii ni ronyxiroʼ Dios

Memorial: toib lanii ni ronyxiroʼ Dios

BUÑ ni racanal Jesús, noʼ ni ma buny mandary layibu guisetnaladxyibu xcalgoity Cristo o «Cena del Señor» (1 Corintios 11:20). ¿Xigony nigolú rasac guisetnaladxno láani? ¿Pu dzú né ximod non gacni?

Jesucristo gosaló lanii reʼ goxin ni bunyibu xilanii Pascua judía íz 33 ló xtzúno. Pascua gocni lanii ni bunyibu toibsi buelt ló toib íz, dzú 14 de nisán (beʼo ni sieed ló calendary judío). Raloyni que judíos bigabyibu dzú órni ló primavera dzú napni 12 ór de govitz né 12 ór de gueʼel. Primer dzú de nisán rasalóni órni beʼo copy ma labúu rabiʼ buñ láani, né beʼo copy reʼ rabiʼ buñ láani de goló rarop  xomal de beʼo marz. Ór cú judíos rasaló ragabyibu trece dzú par gonyibu lanii Pascua.

Gueʼel cú Jesús bunybu xilanii Pascua né xpiimbu, láabu goleʼbu Judas Iscariote ro dxeeyibu ór cú gosalóbu bunybu Memorial. Láani goyoʼni xalagary Pascua judía né por ngú, ló toib íz nosi toib buelt non gony buñ Memorial.

Evangelio ni bicaʼ Mateo rabexa xí láani góc: «Jesús cuaʼ toib páa, né después ni biduidybu guixquix, bitzobu láani, né ro cadudybu láani xpiimbu, goniʼbu: Colguicaʼ, colguá. Ndeʼ raduidy diitz ladi. Né cuaʼbu toib copa, biduidybu guixquix né biduidybu láani layibu, né goniʼbu: Colgueʼ láani, guirácato, portín ndeʼ raduidy diitz xiruni xtuny acuerdo, ni non guixú par gacné xidal buñ tudy xcalkié scásiʼ» (Mateo 26:26-28).

Noʼ ni raluladx que Jesús nigolúpa xpeʼelbu bunybu páa, né nigolúpa xirunybu bunybu vino. Per órni Jesús bitzoo páa nabanysabu diti ma goitybu. ¿Labúu guiniʼ buñ que xpiimbu nigolúpa godóyibu xpeel Jesús né goʼyibu xirunybu la? Yaca, portín pal scú ñacni layibu ñacyibu xomod buñ ni ro xpeʼel stoib né nachéyibu ló xiley Dios (Génesis 9:3, 4; Levítico 17:10). Xomod ná Lucas 22:20, Jesús goniʼ: «Copa reʼ rarexa acuerdo copy por xiruni, ni non guixú por lóoto». ¿Nigolú góc copa reʼ «acuerdo copy» la? Yaca, dipa labúu ñacni scú, portín toib acuerdo ngú ni buñ rony, diti nacní toib cós ni labúu ragann buñ.

Por ngú, páa né vino nosi nacní ni rony representar. Páa rony representarni cuerpo xtuny Cristo ni diti gop galkié. Jesús biquiin toib páa ni diti gop levadura ni biaʼan sobra ni godoxtzuyibu ló Pascua (Éxodo 12:8). Órni la Biblia rasetlaa levadura nacní par gony representarni galkié o ni raxin toib cós. Scú nacní, páa rony representarni cuerpo xtuny Jesús ni diti nap galkié ni bunycuentbu par bilaa buñ (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vino rony representarni xiruny Jesús, ni rony que acuerdo copy rasacni. Jesús goniʼ naxúbu xirunybu «par tudy galkié scásiʼ». Rabaladxno que por láani, tipnés buñgudxlio rac nayaayibu nisló Jehová né rioʼyibu ló acuerdo copy né láabu (Hebreos 9: 14; 10:16, 17). Acuerdo, o pacto reʼ, ronyni que 144,000 buñ ni rony ni ná Jehová labúu tzeyibu guibá. Cú sony mandaryibu né sacyibu sacerdotes par gacnéyibu guirá buñgudxlio (Génesis 22:18; Jeremías 31:31-33; 1 Pedro 2:9; Revelación 5:9, 10; 14:1-3).

¿Chú layibu non guá né gueʼ vino ni raquiin ló Memorial? Xomod ma bisuidyno, nosi ni non gony láani ngú ni noʼ ló acuerdo copy, layibu ngú buñ ni guié guibá. Espíritu santo xtuny Dios rony que layibu gapyibu confianz que Dios ma golú layibu par gony mandaryibu lainy guibá (Romanos 8:16). Guiráyibu noyibu ló acuerdo copy par tzóyibu ló Gobierno né Jesús (Lucas 22:29).

Per ¿xí rony buñ ni cabés guibany ló Gudxlio móz por tipzó? Xomod buny mandary Jesús, layibu rieyibu Memorial né raslooyibu respet órni radopyibu, ná diti rooyibu né reʼyibu páa né vino. Testigos xtuny Jehová ronyibu Memorial toib buelt ló toib íz, órni riaʼisy Govitz ni rasaló dzú 14 de nisán. Ná ló guidopynac Gudxlio noʼ tidxósi buñ ni ná tze guibá, Memorial nigolú rasacni par guirá buñ ni racanal Jesús. Ndeʼ nac toib ór ni gonyibu pensary balaati nadxiʼ Jehová né Jesucristo layibu (Juan 3:16).