Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 CAPÍTULO 19

Goyodieʼ ló xcalnadxiʼ Dios

Goyodieʼ ló xcalnadxiʼ Dios
  • ¿Xí raduidy diitz gandxiʼno Dios?

  • ¿Ximod labúu tzodieʼno ló xcalnadxiʼ Dios?

  • ¿Ximod guiduidy Jehová galnasác guirá ni noʼ ló xcalnadxiʼbu?

¿Sayopylo Jehová par guilaa looy ló tiemp nadzuʼpy reʼ la?

1, 2. ¿Pu lagary labúu guidzelno ro guilaano?

BUNY pensary que laʼga casaalo ló néz, nadzuʼpy rasaló rioxcaay guibá, tisintiempsi riapynís, raniʼ guisioʼo né rasaló riab guiee, raxonylo rayopylo toib lagary ro labúu guilaguiélo. Ór cú rabiʼlo que cué néz noʼ toib bileʼ nabich né labúu guilaalo cú. ¡Balaati rabaladxlo ni bidzel ló bileʼ reʼ!

2 Ló naareʼ nadzuʼpy nabanyno, portín gudxliogoxreʼ xalagary guinitlóni cós mal, racnéni gac xiroʼni más. Per noʼ toib lagary ro labúu guilaano ni nac xomod bileʼ, toib lagary ni sann lóono de nitisi cós mal. ¿Xí láani? Bibiʼ xí ni ná la Biblia: «Naʼ saabi Jehová: Looy naclo ro racachlana né naclo xomod toib muro ni ralaa, Dios xtuni ni napa confianz» (Salmo 91:2).

3. ¿Ximod labúu guilaa Jehová lóono?

3 Jehová ni Bisaʼ guirá cós né ni rony mandary guibá né guidopynac Gudxlio. ¡Ndeʼ nac toib galnasác! Jehová nap más  galnadip que nitisi buñ o cós ni gony mal lóono. Ná tzó ni gonynaa lóono Jehová labúu guinitló guirá galrrioop ni racaʼno. ¿Ximod labúu guilaa Jehová lóono? Sonybu láani por ni gapnó confianz láabu. Per diti ngúsi, la Biblia láaca raiby lóono: «Coltzodieʼ ló xcalnadxiʼ Dios» (Judas 21). Scú, non tzodieʼno ló xcalnadxiʼ Dios né guidzakno Bixiosno ni noʼ guibá. Pal ronyno láani, sandxichno que Jehová sann lóono. Per ¿ximod guidzakno ni Bisaʼ Gudxlio né guibá?

BUNY PENSARY LÓ GALNADXIʼ NI NAP DIOS LOOY NÉ BISOB LÁABU

4, 5. ¿Xí láani ngú tipnés prueby ni raslooy que Dios nadxiʼ lóono?

4 Jehová xidal mod ma bislooybu xcalnadxiʼbu lóono. Ni gonyno repas láani sacnéni tzodieʼno ló xcalnadxiʼ Dios. Buny pensary ló tipnés galrrasuidy ni sieed ló la Biblia ni ma bisuidylo ló libro reʼ. Par labúu guibanyno sacró, Dios ni Bisaʼ guibá né Gudxlio biduidy toib lagary ro guibanyno ronoʼ xiroʼgolu galrro, guixtaʼ, nimal né lagary móz ni radziguiaʼ buñ. Láaca nánno que Dios Bisaʼ la Biblia, loni sieed ximod laabu né xí clas buñ nacbu. La Biblia láaca rabexa que bixelbu Xiimbu ló Gudxlio né biduidybu lagary que Xiimbu nadudy ló galrrioop né ñaity por lóono (Juan 3:16). Modreʼ bunybu toib galrrascad ni rasac, né por ndeʼ cabésno guiguaʼno sacró ló dzú ni sietra.

5 Par labúu guiguaʼno sacró ló dzú ni sietra, noʼ ni ma buny Dios. Jehová ma goloʼ toib Gobierno lainy guibá, né Jesús cayony Mandary loni. Láani mápa mer guinitlóni guirá galrrioop né sonyni que Gudxlio gac toib lagary sacroyen. ¡Ndeʼ rony que radziguiaʼno! ¡Orcúrani saguaʼno sacroyen né guibanyno goxt por tipzó! (Salmo 37:29.) Laʼga cabésno dzúcu, xilitz Dios racné lóono guibanyno  galán mod rioladxbu. Jehová láaca ma biduidy stoib galrrascad lóono: labúu guininéno láabu sin tzó ni guicaa lóono. Ndeʼ nac tipnés prueby que Dios nadxiʼ looy né nadxiʼbu guirá buñgudxlio.

6. ¿Ximod labúu guicapylo galnadxiʼ ni Dios ma bislooy looy?

6 Nigoreʼ raquiin guinabdiitzlo looyca: «¿Ximod guislooya galnadxiʼ ni nap Jehová naʼ?». Sigory xidal buñ racapy: «Raquiin gandxiʼ buñ Jehová». ¿Modreʼca nac xpensarylo la? Jesús buny mandary xí ni más rasac: «Non gandxiʼlo Jehová, Dios xtunylo né guidopy xcalnabanylo né guidopynaclo né guidopy xcalrrienlo» (Mateo 22:37). Scú láani, looy naplo xiroʼ razón par gandxiʼlo Jehová, per par gandxiʼlo Dios né guidopynac xcalnabanylo, guidopynaclo né xcalrrienlo, ¿nosi raquiin que gonladxno láabu la?

7. Par gandxiʼno Dios, ¿nosi raquiin gonladxno láabu la? Golexa.

7 La Biblia raslooy que órni nadxiʼno Dios diti nosi ronladxno láabu. Scú, ná ni ronladxno Dios rasacni, per galnadxiʼ ni naplo láabu pénsa casalóni. Par guientzaayno láani, guislooyno láani scareʼ: pal calaʼnlo toib manzan, ¿ñoʼlo conforme nosi né ladxni la? Yaca. Ladxni raquiin par niʼs toib yac manzan, per ni looy calaʼnlo ngú manzan, diti ladxni. Né scúca rac órni ronladxno Jehová, xomod ladx raquiin guilainy né niʼsni par guiduidyni xcaani. La Biblia rasuidy: «Ndeʼ nac mod rarexa galnadxiʼ ni napnó Dios: guisobno ni rony mandarybu lóono; né, ná scú nacní, ni rony mandarybu diti naganni» (1 Juan 5:3). Scú láani órni nadxiʼno Jehová non guislooyno que natzaay xcaano, né raslooyno láani por ni ronyno (bíil Mateo 7:16-20).

8, 9. ¿Ximod raslooyno que nadxiʼno Dios né que raxquixno ni bunybu por lóono?

 8 Raslooyno que nadxiʼno Dios órni rasobno ni rony mandarybu né ronyno mod ná litz ni raduidybu. Láani diti naganni, noʼni par guiguaʼno sacró né guibaladxno laʼga nabanyno (Isaías 48:17, 18). Órni raduidyno lagary guisanéz Jehová lóono, raslooyno que nigolú rabaladxno por guirá ni ma bunybu pór lóono. Nabanni que tidxósi buñ raduidy guixquix Jehová. Lóono diti nainy gacno buñ ni diti raduidy guixquix Jehová, xomod tipnés buñ ni goyoʼ ló xtzú Jesús. Goyoʼ toib ór Jesús bisial chii buñ ni gop lepra, per nosi toib biduidy guixquix láabu (Lucas 17:12-17). Nandxichno que nainy gacno xomod buñ ni biduidy guixquix Jesús, diti xomod stipnés gaʼ buñ ni diti biduidy guixquix láabu.

9 Por ngú, ¿xí ni rony mandary Jehová non guisobno? Tipnés ma birexani ló libro reʼ. Per gonyno repas chop tzónni, pal rasobno ni rony mandary Dios diti sac nagann tzodieʼno ló xcalnadxiʼbu.

 BIBIG MÁS RONOʼ JEHOVÁ

10. ¿Xigony nigolú rasac guimbulo Jehová Dios?

10 Ni guimbulo Jehová nacní toib cós ni rasac par guibignolo láabu. Né ndeʼ diti saloxni. Buny pensary que toib gueʼel nóolo lainy guiʼix, né nigolú nachich, né ma goloʼlo guii par tzoxidzaʼlo. ¿Naduidylo lagary ñoʼy guii reʼ la? Yaca. Nandxichno que nagoʼlo yac loni par diti ñoʼyni, portín láani cagoxidzaʼni looy par diti guigaity galnal looy. Scú láani, xomod yac ronyni que diti rioʼy toib guii, «xcalnan Dios» ronyni que diti guinitló galnadxiʼ ni napnó Jehová (Proverbios 2:1-5).

Galnadxiʼ ni naplo Jehová nacní xomod guii: raquiin coʼlo yac loni par diti guioʼyni

11. ¿Ximod bisis ni bisuidy Jesús a ni cuanal láabu?

11 Jesús goniiny que buñ ni cuanal láabu diti nadopy galnadxiʼ ni gopyibu Jehová né por Xtiitzbu ni nac nigolú. Órni biásbu lad gueʼet golexabu a chop xpiimbu tipnés profecías ni sieed ló Escrituras Hebreas ni buny cumplirbu. ¿Ximod bisis ndeʼ xcalnabanyibu? Después, biinreʼ goniʼ: «¿Diti biaan xcalnabanyno órni láabu sieedbu caninébu lóono ló néz, órni caniʼbu né cabexabu Escrituras lóono la?» (Lucas 24:32).

12, 13. a) ¿Xí ma góc né xcalnadxiʼ buñgudxlio por Dios né por la Biblia? b) ¿Xí labúu gonyno par dipa guioʼy galnadxiʼ ni napnó Dios?

12 Órni gosalólo bisuidylo ni merpa sieed ló la Biblia, nánno que láaca biaan xcalnabanylo, bibaladxlo, né goniiny guiniʼlo ni cayenlo ló la Biblia, né gondxiʼlo Dios. Xidal buñ rasaclóo scú. Per ni nagann láani ngú tzodieʼno ló xcalnadxiʼ Dios né gonyno por niʼsni. Diti nainy gonyno mod rony gudxliogoxreʼ. Jesús goniʼ: «Xidalguixo buñ ma diti sonladx saʼ» (Mateo 24:12). ¿Xí labúu gonylo par diti guinit galnadxiʼ ni rasaclo por Jehová né ni rasuidy la Biblia?

13 Diti guisianlo gannlo de Jehová Dios, né de Xiimbu Jesucristo (Juan 17:3). Buny pensary ni casuidylo ló Xtiitz Dios né gonabdiitz looyca: «¿Xí rasuidy ndeʼ naʼ de  Jehová? ¿Raduidy ndeʼ toib razón naʼ par gandxiʼya láabu né guidopy xcalnabani, xcalrriena né guidopynaca la?» (bíil 1 Timoteo 4:15). Pal ronylo pensary modreʼ galnadxiʼ ni rasaclo por Jehová dipa sioʼyni.

14. ¿Xigony rasac guininéno Jehová par diti guioʼy galnadxiʼ ni napnó láabu?

14 Stoib mod par diti guioʼy galnadxiʼ ni napnó Jehová raquiin guininéno láabu guirá dzú (1 Tesalonicenses 5:17). Ló capítulo 17 bisuidyno que ni raninéno Jehová nacní toib galrrascad xtunybu ni rasac. Órni rooyno diitz né saʼno radzakno más layibu. Scúca, órni radzakno Jehová par diti guioʼy galnadxiʼ ni napnó láabu, raquiin guininéno láabu guirá ór. Non guiyopyno mod par diti guinino ngúca ngúca sin gonyno pensary. Non guininéno Jehová xomod toib mbiox rooy diitz né bixios. Guininéno láabu né respet né gaibyno láabu ni noʼ lainy xcalnabanyno (Salmo 62:8). Scú láani, par gony adorarno Dios rasacgoluʼ golno la Biblia toibno, guininéno né gaibyno láabu guirá ni rasacno. Modreʼ diti sac nagann par lóono tzodieʼno ló xcalnadxiʼ Dios.

ÓRNI RONY ADORARNO DIOS RONYNI QUE RABALADXNO

15, 16. ¿Xigony raquiin guibiʼno xchiin Gobierno xtuny Dios xomod toib privilegio ni rasacgoluʼ?

15 Órni rolno la Biblia né raninéno Dios nacní toib mod par gony adorarno láabu né casi guirá ór toibno ronyno láani. Nigoreʼ guisetlano tipnés cós ni ronyno órni dxeeno né stipnés buñ: guinino ni ronyno crer. ¿Ma goninélo toib buñ xí ni rasuidy la Biblia la? Pal scú láani ma gopló toib privilegio sacroyen (Lucas 1:74). Órni ranino ni ma bisuidyno de Jehová Dios, rony cumplirno toib dxiin ni rasac ni tzóno yoʼ por yoʼ par guinino diitz sacró de Gobierno xtuny Dios (bíil Mateo 24:14; 28:19, 20).

 16 Pablo nigolú bioladxbu gosaabu yoʼ por yoʼ portín gosacni par láabu (2 Corintios 4:7). Ni guinino de Jehová né ni noʼ guicbu gonybu nacní toib dxiin ni más rasac ni noʼ. Ronyno xchiin Jehová ni nac Xpixuanno, né dxiinreʼ nigolú racnéni buñ. Órni rasaano yoʼ por yoʼ racnéno buñ  ni natzaay xcalnabany par guibigaxyibu Bixiosbu ni noʼ guibá né par tzóyibu ló néz ni riné guibanyibu tipzó. ¿Noʼ stoib dxiin ni rony que guisacno sacró la? Órni raibyno stipnés buñ de Jehová né de Xtiitzbu, raniʼs fe xtunyno né galnadxiʼ ni napnó Dios. Jehová racacuent xtem ni ronyno (Hebreos 6:10). Pal rasaano yoʼ por yoʼ racnéni lóono tzodieʼno ló xcalnadxiʼ Dios (bíil 1 Corintios 15:58).

17. ¿Xigony ni guinino de Gobierno xtuny Dios raquiin gacni ni maca?

17 Raquiin guisetnaladxno que ni guinino de Gobierno xtuny Dios raquiin gonyno láani ni maca. La Biblia ná: «Goniʼ xtiitz [Dios]; buny láani ni maca» (2 Timoteo 4:2). ¿Xigony raquiingoluʼ gonyno dxiinreʼ ló xtzúno? Portín Xtiitz Dios raiby lóono: «¡Xtzú rodann Jehová ma noʼni gaxtiguié! ¡Noʼni gahx né cabigaxni nigolú naguel!» (Sofonías 1:14). Ma gaxtiguié sieed xtzú Jehová ro guinitló gudxliogoxreʼ. ¡Buñ non gann láani! Ganyibu que nigoreʼ non guisobyibu Jehová ni rony mandary guibá né guidopynac Gudxlio. Scú, portín fin «¡sadxinni dzú non guidxinni!» (Habacuc 2:3).

18. ¿Xigony raquiin gony adorarno Jehová toibsi né xhermanno?

18 Jehová raniiny que gony adorarno láabu toibsi né stipnés xhermanno. Por ngú Xtiitzbu ná: «Guibiʼno saʼno par guichiin lóono gandxiʼ saʼno más né gonyno dxiin ni nac galán, dipa guisianno de guidopno, xomod rony tipnés, xalagary ngú gacnéno saʼno, né máspa órni guibiʼto que dzú ma cabigax» (Hebreos 10:24, 25). Órni radopno né xhermanno napnó toib oportunida par gonyxiroʼno né gony adorarno Jehová. Ndeʼ láaca racné né rony animar saʼno.

19. ¿Xí labúu gonyno par labúu gac nadip xcalnadxiʼno lainy congregación?

19 Órni radopno né stipnés testigos xtuny Jehová rabigaxno né nadxiʼno xhermanno ni noʼ lainy congregación.  Non guibiʼno xí clas buñ nac xhermanno, xomod Jehová rabiʼ xí clas buñ nacno. Diti cuéslo que xhermanlo diti guiché, bisednaladx guiráno rachéno diti toibsi midid raniʼsno xomod ranab Jehová (bíil Colosenses 3:13). Bidzak buñ ni nadxiʼ Jehová né guidopy xcalnadip, né saduidylo cuent ximod niʼs fe ni naplo. Pal rony adorarlo Jehová toibsi né xhermanlo diti sac naganni par looy tzodieʼlo ló xcalnadxiʼ Dios. Guibiʼno nigoreʼ ximod raduidy Jehová xilaay ni rony adorar láabu né riodieʼ ló xcalnadxiʼbu.

BUNY POR GUICAʼLO «NI MERPA NAC VIDA»

20, 21. ¿Xí ngú «ni merpa nac vida», né xigony sacró guicaʼno láani?

20 Galnasác ni raduidy Jehová guirá ni rasob láabu ngú vida, per ¿xí clas vida nacní? Xidalno labúu nanino que ma nabanyno portín racaʼno buu, roono né reeno. Né órni nóono goxt ranino: «¡Ndeʼ nigolú vida!». La Biblia raslooy que ni toib buñ nabany modni merpa nac vida.

Jehová raniiny que looy gapló «ni merpa nac vida». ¿Sacaʼlo láani la?

21 La Biblia rony animar a buñ guiyopy, «ni merpa nac vida» (1 Timoteo 6:19). Diitz «ni merpa nac vida» nacní clas vida ni cabésno ló dzú ni sietra. Órni ma diti sacno buñ galkié, sabanyno xomod goniiny Dios nírcu. Dzú guiguaʼno ló Gudxlio móz ma diti sapnó galguitz guiguaʼno sacroyen né goxtiguie orcúrani sacaʼno «ni merpa nac vida» ndeʼ raduidy diitz guibanyno tipzó (1 Timoteo 6:12). ¿Diti nac ndeʼ toib cós sacroyen ni cabésno la?

22. ¿Ximod labúu guicaʼlo «ni merpa nac vida»?

22 ¿Ximod labúu guidxin toib buñ gap «ni merpa nac vida»? Antes de guiniʼ Pablo diitzreʼ bilitzbu: «Gonyto dxiin ló cós tzaay [...] gacto ric ló dxiin galán» (1 Timoteo 6:18). Scú, rasac gonyno ni casuidyno ló la Biblia. Per ¿goniʼ Pablo que dxiin galán nosi gonyno ngú par guicaʼno «ni merpa nac vida» la? Yaca, ni guibanyno tipzó  nacní por «xcalnadxiʼ» Dios (Romanos 5:15). Per ni Jehová rioladx ngú guiduidybu galnasác guirá ni rasob láabu xomod nábu. Nainy láabu que looy guicaʼlo «ni merpa nac vida», ni guibanylo tipzó, sacroyen né goxtiguie. Ndeʼ nac vida ni cabés guirá ni riodieʼ ló xcalnadxiʼbu.

23. ¿Xigony rasac tzodieʼno ló xcalnadxiʼ Dios?

23 Por tigaano galán guinabdiitzno ndeʼ: «¿Cayoni adorar Dios xomod rony mandarybu ló la Biblia la?». Pal guirá dzú racapyno scú nacní, xinésni cayonyno. Labúu gapnó confianz que Jehová labúu guilaa lóono. Láabu sambu xcudxbu de guirá cós mal ni cayac ló gudxliogoxreʼ dzú ma cadubylagaʼ. Láaca sagonésbu lóono guibanyno ló Gudxlio sacroyen ni ma noʼ gaxtiguié. ¡Ndeʼ sacroyen sac! ¡Balaati rabaladxno ni nóono lad xcudx Jehová ló dzú ni ma cadubylagaʼ! Pal looy ragoʼlo guiclo gonylo ni ná Jehová nigoreʼ, sioʼlo goxt né sacaʼlo «ni merpa nac vida», xomod goniiny Dios nabanyno nírcu.

PAR GANNLO MÁS

¿Xigony guisuidyno la Biblia?

La Biblia cayacné a xidalguixo buñ ló guidopynac Gudxlio par guidzelyibu guirá galrranabdiitz ni más rony buñ. ¿Nainy looy gaclo toibtica de layibu la?