Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 CAPÍTULO 9

¿Rabésno ló «dzú ni ma guidubylagá la»?

¿Rabésno ló «dzú ni ma guidubylagá la»?
  • ¿Xí cayac ló xtzúno ni la Biblia goniʼ gac?

  • ¿Xí goniʼ la Biblia mod gac buñ ló «dzú ni ma guidubylagá»?

  • ¿Xí cós sacroyen goniʼ la Biblia ni gac ló «dzú ni ma guidubylagá»?

1. ¿Pu lagary radzelno xí ni gac ló dzú ni sietra?

ÓRNI rabiʼlo televisión né racadiaglo cós mal ni cayac, ¿ma gonabdiitzlo toibtica buelt xí gac né gudxliogoxreʼ la? Ló xtzúno cadudyno ló xiroʼgolu galnagan né diti nánno xí gac ló dzú ni sietra (Santiago 4:14). Per Jehová nantzay xí gac ló dzú ni sietra (Isaías 46:10). Ma por xidzú íz Xtiitz Dios, la Biblia, diti nosi goniʼ pór cós mal ni gac ló xtzúno, láaca goniʼni cós sacroyen ni gac ló dzú ni sietra ni ma yaaca guidxin.

2, 3. ¿Xí gonabdiitzyibu Jesús, né ximod cuapybu?

2 Jesucristo goniʼ de Gobierno xtuny Dios ni guinitló guirá cós mal né gony que Gudxlio reʼ gac toib lagary móz (Lucas 4:43). Buñ ni bicadiag a Jesús goniiny ganyibu pu dzú guieed Gobierno reʼ. Scú láani, xpiin Jesús gonabdiitz láabu: «[¿]Xí señal tzó órni looy ma nóolo né pu dzú ma guidubylagá gudxliogoxreʼ?» (Mateo 24:3). Jesús cuapy layibu que nosi Jehová nandxich pu dzú guidubylagá gudxliogoxreʼ (Mateo 24:36). Per Jesús goniʼ xidal cós ni gac ló Gudxlio órni mápa mer Gobierno xtuny Dios gony que guibanyno sacroyen  né goxt ló Gudxlio. ¡Né guirá ni goniʼbu cayacni ló xtzúno!

3 Antes de guisuidyno de guirá cós ni cayac ni raslooy que nabanyno ló «dzú ni ma guidubylagá gudxliogoxreʼ», guienno de toib guerr ni buñgudxlio diti bibiʼ. Ndeʼ góc lainy guibá né ni góc lagarycu dada lóono ralaani.

GUERR NI GÓC LAINY GUIBÁ

4, 5. a) ¿Xí góc lainy guibá después que Jesús gosaló buny Mandary? b) Xomod ná Revelación 12:12, ¿xí cós bitné guerr ni goyoʼ lainy guibá?

4 Ló capítulo ni ma bisuidyno golexa que Jesucristo gosaló buny Mandary lainy guibá ló íz 1914 (bíil Daniel 7:13, 14). Diti xidzú tiemp Jesús racaʼ galmandary reʼ né racalóbu Buñdzab, la Biblia ná: «Gosaló guerr lainy guibá: Miguel [stoib laa Jesús] né guirá ángeles xtuny godíilyibu né dragón [Buñdzab] né dragón reʼ né guirá ángeles xtuny godíilyibu». * Buñdzab né xidemony diti bunyibu gann né biabyibu ló Gudxlio. Ángeles ni cayony ni ná Jehová bibaladxyibu que Buñdzab né xidemony ma diti goyoʼyibu guibá. Per buñ diti naguaʼyibu goxt, la Biblia goniʼ láani scareʼ: «¡Maláy de gudxlio [...]!, portín Buñdzab ma bieetj ronoʼto, né nigolú cadzuitzbu, portín ma nambu que ma tidxósi tiemp napbu» (Revelación 12:7, 9, 12).

5 Biduidy cuent xí cós nitné guerr ni goyoʼ lainy guibá. Ló xcalrradzuitz Buñdzab nagoʼbu xiroʼgolu galnagan ló Gudxlio. Xomod guienno, lóono rabésno ló dzú nagann cú. Per ndeʼ sácni por «tidxósi tiemp». Buñdzab nandxich láani. La Biblia rabeʼ laa tiemp  reʼ xomod «dzú ni ma guidubylagá» (2 Timoteo 3:1). ¡Balaati rabaladxno que Dios mápa mer guinitló cós mal ni cayony Buñdzab ló Gudxlio! Guisuidyno tipnés cós ni la Biblia goniʼ ni cayac ló xtzúno. Guirá cós ni cayac raduidy diitz que nabanyno ló dzú ni ma guidubylagá, né que mápa mer Gobierno xtuny Dios guitné galnasác tipzó par guirá ni nadxiʼ láabu. Primer guienno tap cós ni cayac ló xtzúno ni nac señal ni Jesús goniʼ que rabésno ló dzú ni ma guidubylagá.

CÓS NI CAYAC LÓ DZÚ NI MA GUIDUBYLAGÁ

6, 7. ¿Ximod cayac cumplir ló naareʼ diitz ni goniʼ Jesús de guerr né de galrralán?

6 «Gudxrop né gudxrop sadíil, né gobierno láaca sacaló saʼ gobierno.» (Mateo 24:7.) Ló tigayoʼ íz ni ma godudy, millón de buñ ma goity ló guerr. Toib buñ ni bicaʼ historia goniʼ: «Ló siglo 20 buñ bigaity saʼ más que stipnés siglos. [...] Tiemp reʼ nigolú goyoʼ guerr né goyoʼ tidxósi tiemp ro diti goyoʼ guerr». Ni bicaʼ Instituto Worldwatch náni: «Ló guerr [ni goyoʼ siglo 20] buñ ni goity gocni tzón midid, guirá buñ ni goity siglo 1 después de Cristo dada 1899». Más de tigayoʼ millón de buñ ma goity ló guerr desde  1914. Scú, guerr ma bisian xidalguixo buñ sin xfamily o ximig. Sigory láaca ma gosaclolo ndeʼ.

7 «Sioʼ galrralán.» (Mateo 24:7.) Buñnan ná que ló treint íz ni ma godudy goyoʼ más galrro par guá buñ. Per noʼsa govinn portín xidal buñ diti nap layoo ro guidxiʼp né láaca diti nap bidxiich par siʼ ni guá. Noʼ gudxrop ro más de mil millón de buñ radudyibu dzú né tidxóyen: toib dólar por dzú, rioʼ ór más tidxóyen bidxiich. Né xidalyibu radudy ló xiroʼ galrralán. Organización Mundial de la Salud raniʼni que xtol galrralán raity más de gáay millón de mbioxien ló toib íz.

8, 9. ¿Xí láani raslooy que profecías ni goniʼ Jesús ni sioʼ xo rodann né galguitz ma cayac cumplir?

8 «Sioʼ xo rodann.» (Lucas 21:11.) Mod ni ná Servicio Geológico de Estados Unidos, gahxca diecinueve xo rodann radudy toib íz. Nacní xo rodann ni racataʼ yoʼ né raxal Gudxlio. Né láaca casi guirá íz radudy xo rodann ni ranitló yoʼ. Registros ni noʼ raslooy que xo rodann ni godudy ma bigaityni más de chop millón buñ desde ló íz 1900. Toib guiich rasetlaa: «Tecnologías ni noʼ labúu bicaani ló tidxósi galgoity ni goyoʼ».

 9 «Sioʼ [...] galguitz ni ragaity guixo buñ.» (Lucas 21:11.) Ná ma noʼ xidal clas remeidy, buñgudxlio nigolú raxoʼ portín nogoluʼ galguitz, nacní galguitz ni nicopyga careʼ né galguitz ni ma xidzú noʼ. Tipnés informes ná que ló último íz ni ma godudy gaal galguitz ni ma rimbu buñ góc xiroʼni más —xomod roo, xilanal, galrradudy ni ritné galrradxib né stipnés galguitz nacní más nagann par guisial remeidy ni noʼ láani. Né stipnés galguitz nigolú nagann par guisial remeidy láani. Láaca birecaa treint galguitz copy. Tipnés de láani nacní galguitz ni ragaity né dada nigoreʼ diti radzel xi remeidyni.

BUÑ NI RABÉS LÓ DZÚ NI MA GUIDUBYLAGÁ

10. ¿Ximod sac buñ ló dzú ni ma guidubylagá xomod sieed ló 2 Timoteo 3:1-5?

10 La Biblia diti nosi goniʼ ni gac ló Gudxlio dzú ni ma guidubylagá, láaca raniʼ ximod buñ guitzá mod nac. La Biblia ná ndeʼ: «Ló dzú ni ma guidubylagaʼ sieed dzú ni nagann par guicaló buñ» (bíil 2 Timoteo 3:1-5). Ndeʼ nac cós ni goniʼ Pablo que buñ sadxin sac:

  • sacyibu buñ ni por lásibu tzóbu xcalrasaʼ

  • sonladx bidxiich

  •   ni diti rasob bixios

  • ni diti rony xinés

  • ni diti nap galronladx

  • ni diti labúu rony mandary láacabu

  • buñ nadox

  • sonladxibu pór cós ni rony que rioʼ buñ nakit, lagary gonladxyibu Dios

  • mod ni rony adoraryibu ralooypani galán láani, per por ni ronyibu raslooyibu que diti scú láani

11. Xomod raslooy Salmo 92:7, ¿xí guisaclóo guirá buñ mal ni noʼ ló xtzúno?

11 ¿Scá nac buñ ni noʼ lagary ro rabéslo la? Nandxichno que scú nacyibu. Guirá lagary noʼ buñ ni rony modreʼ. Ndeʼ raslooy que Dios mápa mer guinitló buñ mal, la Biblia ná: «Órni buñ mal ralainy xomod guiʼx né guirá ni rony cós mal riaal, nacni par ma guinitlóyibu por tipzó» (Salmo 92:7).

CÓS SACRÓ NI CAYAC LÓ XTZÚNO

12, 13. ¿Ximod «galnann ni nac xinésni saniʼsni» ló «dzú ni ma guidubylagá»?

12 Ló dzú ni ma guidubylagá noʼ xiroʼgolu galnagan, xomod goniʼ la  Biblia. Gudxlio reʼ bidza de galnagan per noʼ cós sacroyen ni cayac lainy xcudx Jehová.

13 «Galnann ni nac xinésni saniʼsni», ndeʼ nac profecía ni bicaʼ Daniel. ¿Pu dzú ñac cumplir guirá ndeʼ? Ló «dzú ni ma guidubylagá» (Daniel 12:4). Desde 1914, Jehová cayacné a guirá ni nainy gony ni nábu par guientzaay ni ná la Biblia. Ma bientzaayibu ni merpa rasuidy la Biblia de laa Dios né ni nainy gonybu, láaca ma bieenyibu xigony goity Jesús, xí rac né buñ ni ma goity, né ximod guiás gueʼet. Guirá ni rony adorar Jehová ma bisuidyibu guibanyibu de toib mod ni racné layibu par gonyxiroʼyibu Jehová. Ma bientzaayibu xí ngú Gobierno xtuny Dios né ximod guinitlóni galnagan ló Gudxlio. Ni ma nanyibu guirá ndeʼ, ¿xí ronyibu? Ndeʼ riné lóono a stoib profecía ni cayac cumplir ló dzú ni ma guidubylagá.

«Diitz sacró xtuny Gobierno reʼ sioʼni ló guidopynac gudxlio.» (Mateo 24:14)

14. ¿Dada púti cayenyibu diitz sacró de Gobierno xtuny Dios, né chú layibu cayony láani?

14 «Diitz sacró xtuny Gobierno reʼ sioʼni ló guidopynac gudxlio», ndeʼ goniʼ Jesús ni gac ló «dzú ni ma guidubylagá gudxliogoxreʼ» (bíil Mateo 24:3, 14). Ló guidopynac Gudxlio buñ cayen diitz sacró de Gobierno xtuny Dios, xí ni gonyni né ximod labúu guicaʼno galnasác ni guiduidyni. Diitz sacró reʼ cayen buñ láani más de ló chopgayoʼ treint gudxrop né ló xidal gayoʼ diitz ni raniʼ buñ. Millón testigos xtuny Jehová sieed de «guirá gudxrop, family xiroʼ, gudx, né diitz ni raniʼ buñ» né rabaladx raniʼ diitz sacró de Gobierno xtuny Dios (Revelación 7:9). Testigos láaca rasuidyibu buñ ni ná gann xí ni merpa rasuidy la Biblia né ronyibu láani scásiʼ. Ndeʼ rony que radziguiaʼno ni cayac cumplir profecía reʼ, né ni máspa por ni goniʼ Jesús que buñ ni canal né ni cayony xinésni «buñ sianladx» layibu (Lucas 21:17).

 ¿XÍ LÁANI GONYLO?

15. a) ¿Raluladxlo que ma rabésno ló dzú ni ma guidubylagá, né xigony racapylo scú? b) Órni «guilox gudxliogoxreʼ», ¿xí guisaclóo guirá ni racaló Jehová né xí guisaclóo ni rasob Gobierno xtunybu?

15 Xidal profecías cayac cumplir ló xtzúno, ¿raluladxlo que nabanyno ló dzú ni ma guidubylagá la? Diitz sacró gann buñ láani dada órni Jehová tzó conforme, né nandxiichno que ór cú «guilox gudxliogoxreʼ» (Mateo 24:14). Diitz «guilox gudxliogoxreʼ» rarexani tiemp ni Jehová guinitló cós mal ni cayac. Sanitlóbu guirá ni racaló láabu, par gonybu ndeʼ saquiimbu Jesús né guirá ángeles nadip xtunybu (2 Tesalonicenses 1:6-9). Buñdzab né xidemony ma diti sascúyibu buñ. Después de ndeʼ, Gobierno xtuny Dios sitné xiroʼ galnasác par guirá ni rasob Gobierno ni rony xinésni (Revelación 20:1-3; 21:3-5).

16. ¿Xí láani ngú non ñonylo ló naareʼ?

16 Ni ma nanlo que xcudxliogox Buñdzab mápa mer guinitló, raquiin guinabdiitzlo, ¿xí láani ngú ni non goni nigoreʼ? Ni más rasac ngú, guisuidylo más de Jehová né xí ranabbu lóono (Juan 17:3). Bisuidy la Biblia nanoy. Goyee reunión guirá xomal ni nap Testigos xtuny Jehová ni rony xtem por gony ni ná Jehová (bíil Hebreos 10:24, 25). Bimbu Jehová Dios né xcalrracné la Biblia, né bitzá mod nacloʼ par labúu gonylo que guibaladx xcalnabany Dios (Santiago 4:8).

17. ¿Xigony galrranitló buñ mal guidxin tisintiemp órni buñ diti cabés láani?

17 Jesús goniʼ profecía reʼ que buñ diti naluladx que ma rabésno ló dzú ni ma guidubylagá. Galrranitló buñ mal tisintiempsi guidxinni órni buñ diti cabés láani. Xomod rony toib buñ gobáan ni rony nadxiʼin gueʼel (bíil 1 Tesalonicenses 5:2). Jesús goniʼ gapnó cuidad: «Xomodca góc ló dzú ni bibany Noé, scúca sac órni ma noʼ Xiin buñgudxlio. Portín xomod dzú yása guieed Guiérodann cayoyibu, cayeʼyibu, buñguieeu cacaʼ buñ  né buñgonaʼ sée par guicaʼ buñ láabu, hasta órni Noé goyoʼ lainy arca, né diti goloʼyibu cuent hasta órni bieed Guiérodann né binitló guiráyibu, scúca sac órni ma noʼ Xiin buñgudxlio» (Mateo 24:37-39).

18. ¿Xí diitz ni goniʼ Jesús diti guicaʼno galraguit?

18 Por ngú, Jesús góoch ni cacadiag láabu: «Colguicaa cuidad lóocato par que xcalnabanyto dipa guidzani por ni cayogoluʼto cayeʼgoluto, né por galrasaʼ ni rioʼ buñ laʼga nabany, né tisintiempsi dzú rodann guidxin órni diti cabésto láani guiabni laidyto xomod toib doʼ. Portín sieetni laidy guiránac ni noʼ ló gudxlio reʼ. Por ngú, colguiguaná, guirási ór colguinabgoluʼ [ló Dios] par labúu guilaato de guirá cós ni ma nánno que gac, né guisagaʼto nisló Xiin buñgudxlio» (Lucas 21:34-36). Ni goniʼ Jesús diti guicaʼno láani galraguit. ¿Xigony? Portín guirá buñ ni Jehová Dios né «Xiin buñgudxlio» Jesucristo racacuent, labúu guibanyibu né diti saityibu órni xcudxliogox Buñdzab sanitló. Láaca sabanyibu tipzó ló toib Gudxlio móz ni ma noʼ gaxtiguié (Juan 3:16; 2 Pedro 3:13).

^ Párrafo. 4 Ló apéndice ni laa, «¿Chú láabu ngú arcángel Miguel?» raslooy que Miguel nac stoib laa Jesucristo.

PAR GANNLO MÁS

¿Xigony guisuidyno la Biblia?

La Biblia cayacné a xidalguixo buñ ló guidopynac Gudxlio par guidzelyibu guirá galrranabdiitz ni más rony buñ. ¿Nainy looy gaclo toibtica de layibu la?