Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

¿Xí ni merpa rasuidy la Biblia?

 CAPÍTULO 4

¿Chú láabu ngú Jesucristo?

¿Chú láabu ngú Jesucristo?
  • ¿Xí dxiin ni rasac rony cumplir Jesús?

  • ¿Pu lagary bieed Jesús?

  • ¿Xí clas buñ gócbu?

1, 2. a) ¿Xigony diti láacani ngú ganno ximod laa toib buñ ni xidal buñ rimbu que guimbutzaayno láabu? b) ¿Xí nac xpensary buñ órni raniʼyibu de Jesús?

LÓ GUDXLIO noʼ buñ ni xidal buñ rimbu. Tipnésyibu nosi ló gudx ro rabésyibu rimbutzaay buñ layibu, o tipnésyibu ló guidopy Gudxlio. Per ni looy rimbulo laa toib buñ ni xidal buñ rimbu, diti raduidy diitz que rimbutzaaylo láabu. Láaca diti raslooyni que nanlo ximod nacbu o xí cós ma bunybu.

2 Ná ma godudy chop mil íz de goló bibanybu ló Gudxlio xidalguixo buñ de guidopynac Gudxlio ma bicadiagyibu de Jesús. Per xidalyibu diti nantzay chú merpa láabu. Tipnés ná que láabu nosi gócbu toib buñtzay. Stipnés raniʼ que láabu nosi gócbu toib ni goniʼ profecía. Láaca noʼ ni raluladx que Jesús láabu ngú Dios né non guienno láabu. ¿Nigolú láani la?

3. ¿Xigony rasac guimbutzaaylo Jehová Dios né Jesucristo?

3 Nigolú rasac guimbutzaaylo chú ngú merpa nac Jesús. ¿Xigony? Portín la Biblia raniʼ: «Ndeʼ raduidy diitz galnabáiny tipzó, que guimbuyibu looy toibguielot Dios ni nigolú, né guimbuyibu xiinlo Jesucristo ni bixel lo» (Juan 17:3). Scú, pal rimbutzaaylo chú merpa nac Dios né chú ngú merpa nac Jesucristo,  ndeʼ siné looy guibanylo tipzó ló Gudxlio móz (Juan 14:6). Per diti ngúsi, Jesús godiʼx toib mod ni non guibanyno né ximod guidzakno saʼno (Juan 13:34, 35). Ló primer capítulo de libro reʼ bisuidyno chú merpa nac Dios. Nigoreʼ guienno xí láani merpa rasuidy la Biblia de Jesucristo.

MESÍAS NI DIOS GONIʼ GUIEED

4. ¿Ximod rarexa chop títulos reʼ Mesías Cristo?

4 Xidzú íz dzú yása gál Jesús, la Biblia goniʼ guieed ni Dios guixel xomod Mesías o Cristo. Títulos Mesías (diitz hebreo) né Cristo (diitz griego) guiropcani raduidyni diitz «Ni Dios golú».  Por ngú ni Dios biduidy xtiitz guieed, Dios golú láabu par guicaʼbu toib lagary ni rasac. Ló stipnés capítulos ni sieed guisuidyno más xí lagary ni rasac racaʼ Jesús par guirebuʼ ni ma goniʼ Jehová. Láaca guisuidyno más de guirá galnasác ni Jesús labúu guitné nigoreʼ. Órni yása gál Jesús, xidal buñ gonabdiitz: «¿chú láabu guidxin gac Mesías?».

5. ¿Xí láani gondxich xpiin Jesús chú ngú ni merpa nacbu?

5 Ló xtzú Jesús, xpiimbu gondxich que láabu ngú Mesías ni goniʼ la Biblia guieed (Juan 1:41). Toibtica xpiimbu ni laa Simón Pedro, diti biatzladxbu órni goniʼbu: «Looy ngú Cristo» (Mateo 16:16). ¿Ximod gondxich xpiin Jesús que láabu ngú merpa Mesías, né ximod labúu gandxichno que scú nacní?

6. Bislooy ximod Jehová gocnébu ni buny ni nábu par guienyibu chú ngú Mesías.

6 Ni bicaʼ profecías xtuny Dios bibanyibu dzú yása gál Jesús né bicaʼyibu xí ni gony Mesías né xí guirá guisaclobu. Guirá ndeʼ ñacné a stipnés par ñanyibu chú ngú merpa nac Mesías. Guislooyno láani scareʼ: bunysi xpensarylo que looy non tzaléslo toib buñ ro radxin camión per looy diti rimbulo láabu. ¿Ñacnéni looy pal ñoʼ ni ñaiby looy ximod nac buñ ni tzaléslo la? Scúca, guirá profecías ni sieed ló la Biblia, Jehová goniʼ xí guirá ñony né nasaclóo Mesías. Né scú guirá ni rony ni ná Dios labúu ñentzaay órni nabiʼ ximod cayac cumplir profecías xtuny Mesías.

7. ¿Bisetlaa chop profecías ni góc cumplir né Jesús?

7 Guisuidyno chop profecías. Ni primer guisuidyno nacní ndeʼ: más de gatzgayoʼ íz antes Miqueas bicaʼ toib profecía ni goniʼ que Jesús gál gudx Belén, toib gudxyen ni noʼ Judá (Miqueas 5:2). ¿Pu lagary  gool Jesús? Scú, Jesús gool gudx Belén (Mateo 2:1, 3-9). Ni rarop, profecía ni sieed ló Daniel 9:25, xidzú íz antes biloyñani xí íz merpa guidxin Mesías: 29 Ló Xtzúno. * Ni góc cumplir ndeʼ né stipnés profecías bislooyni que Jesús ngú Mesías ni goniʼ Dios guidxin.

Órni Jesús goyonis, bidxinbu gócbu Mesías o Cristo

8, 9. ¿Ximod bientzaayni órni goyonis Jesús que láabu ngú Mesías?

8 Órni ma yaaca guilox íz 29 bientzaayni que Jesús ngú Mesías. Ló íz reʼ Jesús goyee ronoʼ Juan ni Ragonis par conis láabu lainy guʼuc Jordán. Jehová goniʼ que guiduidybu toib señal par guiduidy Juan cuent chú ngú Mesías. Jehová biduidy señal reʼ láabu órni Jesús goyonis. La Biblia raniʼ xí ni góc: «Bilox goyonis Jesús, órcuca bireʼbu lainy nís; né, ¡bibiʼ!, guibá bixalni, né láabu bibiʼbu espíritu xtuny Dios xomod palom sietj ronoʼbu. ¡Bibiʼ! Láaca goyoʼ toib rudx desde guibá ni caniʼ: Ndeʼ Xiinna, ni nadxiʼya, ni naʼ ma golúya» (Mateo 3:16, 17). Órni Juan bibiʼ né bicadiag xí ni góc, gondxichbu que Dios bixel Jesús (Juan 1:32-34). Dzúcu espíritu santo biab laidy Jesús, né ór cú Jesús bidxin góc Mesías o Cristo, buñ ni Dios golú par guisanir né gony Mandary (Isaías 55:4).

9 Profecía ni sieed ló la Biblia ni ma góc cumplir né ni Jehová goniʼ, bislooytzayni que Jesús góc Mesías ni Jehová goniʼ guieed. Per la Biblia racapy xchop galrranabdiitz ni rasac ni raquiin ganno de Jesucristo. ¿Pu lagary bieedbu, né xí clas buñ gócbu?

¿PU LAGARY BIEED JESÚS?

10. ¿Xí rasuidy la Biblia de Jesús dzú yása guieedbu ló Gudxlio?

10 La Biblia rasuidy que Jesús bibany guibá dzú  yása guieedbu ló Gudxlio. Miqueas diti nosi goniʼ que Jesús gál gudx Belén, láaca goniʼbu que Jesús «ma xidzú tiemp noʼbu» lainy guibá (Miqueas 5:2). Xidal buelt Jesús goniʼ que bibanybu lainy guibá dzú yása gálbu xomod toib buñgudxlio (bíil Juan 3:13; 6:38, 62; 17:4, 5). Lagarycu gócbu toib ángel ni bidzaktzay Jehová.

11. ¿Ximod raslooy la Biblia que Jehová más nadxiʼbu xiimbu Jesús?

11 Por xidal razón Jehová nadxiʼbu más Jesús. La Biblia rabeʼ laabu «lagol ló guirá ni goyaʼ», portín nirdiguié láabu bisaʼ Dios (Colosenses 1:15). * Per láaca noʼ más ni rony que Dios nadxiʼ láabu. Láabu ngú «toibguielot Xiimbu» (Juan 3:16). Ndeʼ raduidy diitz que Jesús nacbu toibguielot ni Jehová bisaʼ sin ñoʼ ni ñacné láabu. Láaca Jesús góc toibguielot ni Dios biquiin órni bisaʼbu guirá cós (Colosenses 1:16). Per láaca laabu, «Diitz» (Juan 1:14). Diitzreʼ raslooyni lóono que Jehová biquiimbu Jesús par biné xtiitzbu a stipnés xiin Dios né xí ni non gonybu, xomod ángeles né buñgudxlio.

12. ¿Ximod labúu ganno que Xiin lagol Dios diti toibsi nacbu né Bixiosbu?

12 Dios né Xiin lagol, ¿toibsi nacyibu xomod raluladx buñ la? La Biblia diti rasuidy láani scú. Xomod ma bienno, Jesús goyoʼ ni bisaʼ láabu. Ndeʼ raslooytzayni que Jesús gosaló bibany, per Jehová diti gosaló bibany portín láabu nabanybu por tipzó (Salmo 90:2). Jesús dipa bichiinni láabu nadxin ñacbu toibsi né bixiosbu. La Biblia rasuidytzay que Bixiosbu ngú lagol lóbu (bíil Juan 14:28; 1 Corintios 11:3).  Nosi «Dios ni nap Xiroʼgolu galnadip» (Génesis 17:1). Scú láani, diti noʼ stoib xomod Dios. *

13. ¿Xí raslooy la Biblia órni raniʼ que Xiin Dios «nacbu xomod Dios ni diti labúu rabiʼ buñ»?

13 Jehová né Xiin lagol sacroyen bidzak saʼyibu por xidal millón de millón de íz, dzú yása ñaʼ vitzón né Gudxlio. ¡Nigolú gondxiʼyibu saʼyibu! (Juan 3:35; 14:31.) Jesús gócbu xomod Bixiosbu, por ngú la Biblia raniʼ que «nacbu xomod Dios ni diti labúu rabiʼ buñ» (Colosenses 1:15). Scú láani, xomod toib mbiox xidal mod rareʼbu merpa bixiosbu, scúca Jesús ni nac Xiin Dios ni noʼ guibá, bireʼbu merpa bixiosbu né láaca ronybu mod rony Bixiosbu.

14. ¿Ximod toibguielot Xiin Jehová bidxin góc buñgudxlio?

14 Jesús, toibguielot Xiin Jehová, goyoʼbu puext bisiambu guibá né bieedbu ló Gudxlio par guibanybu xomod buñgudxlio. Sigory ranabdiitzlo ndeʼ: «¿Ximod labúu toib espíritu ni noʼ guibá gál xomod toib buñ?» Par labúu bunybu ndeʼ Jehová buny toib galrradziguiaʼ. Biquiimbu toib mbioxhlas judía ni góc laa María par nasann xiimbu ni nac lagol. Bixiosbu diti góc toib buñgudxlio. María gosann toib badaʼ ni diti gop galkié ni góc laa Jesús (Lucas 1:30-35).

¿XÍ CLAS BUÑ GÓC JESÚS?

15. ¿Xigony ranino que Jesús racné lóono par guimbuno más Jehová?

15 Ni Jesús goniʼ né buny laʼga goyoʼbu ló Gudxlio racnéni lóono guimbutzaayno láabu. Per más que ngú, Jesús racné lóono par guimbuno más Jehová. ¿Ximod? Bisednaladx Jesús nac merpa xomod nac  Bixios. Por ngú, Jesús góoch a toib xpiin: «Ni ma bibiʼ naʼ láaca ma bibiʼ Bixiosa» (Juan 14:9). Ló tap libros ni sieed ló la Biblia ni rimbuno xomod Evangelios —Mateo, Marcos, Lucas né Juan—, rasuidy lóono ximod bibany Jesús xí bunybu, né xí clas buñ gócbu.

16. ¿Xí diitz ni más rasac goniʼ Jesús, né chú xtiitz bisuidybu?

16 Jesús góc laabu «Mextra» (Juan 1:38; 13:13). ¿Xí bisuidybu? Ni más goniʼbu ngú «diitz sacró de Gobierno» xtuny Dios ni gony mandary Gudxlio né guiduidy xiroʼ galnasác buñ ni rasob a Jehová (Mateo 4:23). ¿Chú xtiitz goniʼ Jesús? Láacabu goniʼbu: «Ni rasudi diti nacní xtuni, nacní xtuny ni bixel naʼ» (Juan 7:16). Jesús gon que bixiosbu goniiny láabu que buñ nacadiag diitz sacró de Gobierno. Ló capítulo 8 guisuidyno más de Gobierno xtuny Dios né ni gonyni.

17. ¿Pu lagary bisuidy Jesús, né xigony bunybu por bisuidybu buñ?

17 ¿Pu lagary bisuidy Jesús? Rotísi goyoʼ buñ, xomod laidy dainy, gudx, ranch, lagary ro radoʼ né lidx buñ. Jesús diti golés que buñ ñeed ronoʼbu. Láabu goyebu ronoʼ buñ (Marcos 6:56; Lucas 19:5, 6). ¿Xigony goleʼ Jesús tiemp né bunybu por goyebu yoʼ por yoʼ né bisuidybu buñ? Portín ndeʼ ni goniiny Jehová gac. Jesús guirá ór buny ni ná Bixios (Juan 8:28, 29). Per goyoʼ stoib razón por ni gosaabu yoʼ por yoʼ. Láabu binladxbu xidalguixo buñ ni goyee ronoʼbu (bíil Mateo 9:35, 36). Buñ ni gosanir ló toib religión dzúcu diti bisuidy layibu chú ngú merpa nac Dios né xí ni gonybu. Per Jesús gondxich balaati caquiin guicadiagyibu diitz sacró de Gobierno xtuny Dios.

18. Mod góc Jesús, ¿xí ni más rioladxlo?

18 Jesús góc buñtzay. Ni bunybu, bunybu láani  né guidopy xcalnabanybu. Láaca goyoʼ ni bibiknoo láabu né gócbu natzaayxat. Hasta mbioxien goxt goyoʼ né láabu (Marcos 10:13-16). Jesús godabioo guirá clas buñ. Bianladxbu cós mal, né ni diti rac xinésni (Mateo 21:12, 13). Ná ló dzúcu buñgonaʼ tidxo respet cuaʼ, Jesús godabioo buñgonaʼ né buñgonaʼ gosac par láabu (Juan 4:9, 27). Jesús nigolú gócbu buñdxo. Godipbu ñeʼ xpiimbu, bunybu dxiin ni rony toib mós.

Jesús goniʼ xtiitz Dios rotísi lagary ro goyoʼ buñ

19. ¿Xí raslooy que Jesús bioʼobni láabu órni buñ godudy ló galrrioop?

19 Jesús binladxbu buñ ni cadudy ló galrrioop. Bislooybu láani órni bunybu galrradziguiaʼ né espíritu xtuny Dios (Mateo 14:14). Toib dzú órni toib buñguieeu ni gop lepra goyee ronoʼ Jesús né góoch láabu: «Pal nainy looy, bisiá naʼ». Jesús bioʼob xcalnabanybu órni bibiʼbu buñreʼ ni noʼ ló galrrioop.  Jesús gop galronladx né biscaʼbu ñabu né godanbu buñguitz reʼ né goniʼbu: «¡Nainy naʼ! Góc nayaa». ¡Né buñguitz reʼ bial! (Marcos 1:40-42.) ¿Ronylo pensary ximod gosac buñguieeu reʼ la?

BUNYBU NI NÁ DIOS DADA DZÚ GOITYBU

20, 21. ¿Ximod godiʼx Jesús toib mod galán par guisobtzayno Dios?

20 Jesús godiʼxbu toib mod galán par guisobtzayno Dios. Láabu diti bichébu nisló Dios, ná godudybu ló bisaʼ clas galnagan, né xidal clas galrrioop. Jesús gosagaʼdxich né diti biabbu ló xtoʼ Buñdzab (Mateo 4:1-11). Primer tipnés xfamilybu diti gop fe lóbu hasta goniʼyibu que «ma binit xcalrriembu» (Marcos 3:21). Per Jesús diti bireʼgan, láabu bunybu ni ná Dios. Ná goyoʼ ni buny borla né bunynaa láabu Jesús buny guantary né dipa bunybu scúca (1 Pedro 2:21-23).

 21 Jesús bisob Dios dada goitybu, xcalgoitybu nadzuʼpy gocni órni xi enemigbu bigaity láabu (bíil Filipenses 2:8). Buny pensary ximod buny guantarybu dzú ma gaitybu xomod buñgudxlio. Jesús bigaʼ né goyoʼ testigo falz ni goniʼ mal de láabu, láaca jueces ni goniʼ pór galrrascú, né láaca goyoʼ soldad ni bunynaa láabu. Órni nalxigaʼbu ló yac nadop ro cayaity cabanybu último goniʼbu: «¡Ma góc cumplirni!» (Juan 19:30). Per ló tzón govitz Bixiosbu ni noʼ guibá golís láabu lad gueʼet xomod toib ángel (1 Pedro 3:18). Chop tzón xomal, de goló biásbu bibiguetbu guibá né «gorúbu nis ladbuʼ Dios» né golésbu guicaʼbu Mandary xtuny Dios (Hebreos 10:12, 13).

22. ¿Xí láani buny Jesús gann órni bisobbu Dios dada goitybu?

22 ¿Xí láani buny Jesús gann órni bisobbu Dios dada goitybu? Xcalgoity Jesús bixalni toib néz par labúu guibanyno tipzó ló Gudxlio móz xomod goniiny Dios ñac nírcu. Ló capítulo ni sieed guienno ximod xcalgoity Jesús ronyni que labúu guibanyno tipzó.

^ Párrafo. 7 Par guientzaaylo ximod góc cumplir profecías xtuny Daniel ni goniʼ de Jesús bíil apéndice ni laa, «Profeta Daniel raniʼ pu dzú guieed Mesías

^ Párrafo. 11 Jehová nacbu Bixiosno portín Bisaʼbu lóono (Isaías 64:8). Dios bisaʼ Jesús por ngú Jesús laabu Xiin Dios. Né por ngúca, ángeles né láaca Adán rac laa xiin Dios (Job 1:6; Lucas 3:38).

^ Párrafo. 12 Par gannlo más que Xiin lagol Dios gadzé láabu, bíil apéndice ni laa, «Ni nigolú del Padre, Hijo né espíritu santo