Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

Xfamilylo labúu guiguaʼ goxt

 MIDID 4

¿Ximod gonyto gaxt xpidxiichto?

¿Ximod gonyto gaxt xpidxiichto?

«Órni buñ rooy diitz né saʼ rarebuʼ ni noʼ guicyibu gonyibu.» (Proverbios 20:18)

Raquiinno bidxiich par guiduidyno ni caquiin xfamilno (Proverbios 30:8). Scú láani, «bidxiich rapni buñ» (Eclesiastés 7:12). Rioʼ ór rac nagann par galtzeʼel guiniʼ ximod gony gaxt xpidxiich, per diti guiduidyibu lagary que órni guiniʼyibu de ndeʼ gac naganni par layibu (Efesios 4:32). Non gapto confianz saʼto né guiniʼto guiropcato pu gonyto gaxt xpidxiichto.

 1 DITI CUENUNYSI GONYLO GAXT

NI NÁ LA BIBLIA: «¿Chú de lóoto órni ná guisaʼ toib torre diti primer rabú né rony pensary balac gony gaxt né rabiʼ pal rigaʼlni láabu?» (Lucas 14:28). Raquiingoluʼni gooyto diitz ximod guiquiinto xpidxiichto (Amós 3:3). Buny pensary xi caquiinto né balac bidxiich gonyto gaxt (Proverbios 31:16). Diti por ni ma naplo bidxiich cuenunysi gonylo gaxt. Biyopy mod par diti tzoʼlo ló diʼin, xalagary ngú buny gaxt nosi bidxiich ni naplo (Proverbios 21:5; 22:7).

NI LABÚU GONYLO:

  • Pal riaʼan sobra xpidxiichlo órni riaʼ beʼo, gonabdiitz tzeʼel lo ximod guiquiinto láani

  • Pal noʼlo ló diʼin, biyopy mod par diti gonylo gaxt más bidxiich ni yadi. Diti siʼlo galrro ni ma goctzay xalagary ngú bunytzaay láani rioʼ

 2 BISET BALAC BIDXIICH RIAXLO

NI NÁ LA BIBLIA: «Gacno buñ ni natzaay xcalrrien, diti nosi nisló Jehová láaca nisló buñ» (2 Corintios 8:21). Góoch tzeʼel lo balac riaxlo né balac bidxiich ronylo gaxt.

Guirá ór gonabdiitz tzeʼel lo antes de gonylo gaxt bidxiich (Proverbios 13:10). Guirá ór biiy diitz né tzeʼel lo de guirá ndeʼ, né scú labúu guiguaʼto goxt. Guirá bidxiich ni riaxlo nacni xtunyto diti nosi xtunylo (1 Timoteo 5:8).

NI LABÚU GONYLO:

  • Nír colgooy diitz balaati labúu gonyto gaxt cada toibto ór cú ma diti guinabdiitzto saʼto guirási ór

  • Diti órni ma noʼto ló toib galnagan guiniʼto de bidxiich