Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

«Tzodieʼto ló xcalnadxiʼ Dios»

 APÉNDICE

¿Ximod gony reglarno galrradíil ni rioʼ xtol negosy?

¿Ximod gony reglarno galrradíil ni rioʼ xtol negosy?

1 Corintios 6:1-8, Pablo raniʼ de galrradíil ni rioʼ lad herman. Láabu goniʼbu que diti bioladxbu que tipnés herman de gudx Corinto gop balory goyee «nisló buñchiin ni diti rony xinésni» (versículo 1). Pablo bisetlaa xidal razón ni rasac ni noʼ par que toib herman diti non ñee naguiʼx demand nisló buñchiin, xalagary ñonyibu ngú más galán nabexayibu galrradíil né litz ni noʼ lainy congregación. Guisuidyno tipnés razón ni rasac par guisobno ni goniʼ Pablo ló xquiich, né láaca guisuidyno que rioʼ ór diti labúu gonyno láani.

Pal noʼ galrradíil ladno xtol negosy, ni primer gonyno ngú guiyopyno mod cuéxano láani xomod rioladx Jehová diti xomod nainy lóono (Proverbios 14:12). Xomod bislooy Jesús láani, más galán láani gony reglarno galrradíil ni maca, antes de gacxiroʼni más (Mateo 5:23-26). Nabanni, per tipnés herman nigolú rioladxyibu tíilyibu né stipnés buñ, hasta rieeyibu nisló buñchiin. Pablo goniʼ: «Ma góc gan lóoto órni noʼ galrradíil ladto». ¿Xigony? Portín órni ronyno láani rac buidy laa Jehová Dios xtunyno né laa congregación. Par diti guisaclono ngú non guisobno ni goniʼ Pablo: «¿Xigony diti raduidyto lagary que tzoʼ ni gony mal lóoto?» (versículo 7).

Pablo láaca rasetlaa que Jehová ma bisian lainy congregación ximod guirexa galrradíil ni tzoʼ. Ancianos nacyibu buñ ni nap xcalnan la Biblia, né Pablo goniʼ que layibu labúu gonyibu «juzgar lad» herman de guirá cós «ni rac ló gudxlio reʼ» (versículos 3-5). Jesús goniʼ que par gac reglar galkié rodann xomod, galrrascú rodann né galgobáan, noʼ tzón cós ni labúu gonyno: primer guiyopyno mod gony reglarno galrradíil né toib herman guiropsino; né pal diti rac reglarni, ni rarop ni non gonyno ngú guixelcaʼno  toib o chop testigos. Né pal noʼsa galrradíil non tzanéno láani nisló ancianos (Mateo 18:15-17).

Scú láani, ancianos diti nacyibu abogados o buñ ni racné ló negosy né diti raquiin gonyibu láani. Diti layibu guiniʼyibu ximod gac reglar galrradíil xtol negosy ni nap herman. Xalagary ngú, racnéyibu herman ni cadíil né saʼ par guisobyibu xilitz la Biblia né guiguaʼyibu sacró. Né pal nigolú noʼyibu ló toib galrradíil rodann non guinabyibu xcalrracné superintendente de circuito o xcalrracné herman ni rony dxiin Betel. Ni goniʼ Pablo diti raguiñani guirá ni rasaclono órni rioʼ galrradíil. Guibiʼno ximod.

Rioʼ ór buñ raguiʼx demand nisló buñchiin portín scú ranab buñchiin láani né láaca par gony cumplirbu ni ranab gobierno, diti racni por cayopy buñ galrradíil. Rioʼ ór raquiin gony buñ láani par guichíl xcaltzeel, gap derech par gan xiin, par tzeelbu guiyaʼan xfamily, quiix seguro, gan buñ que ma diti napbu negosy né ma caquiimbu galrracné o cueʼbu testamento. Láaca rioʼ ór toib hermano raguiʼx toib demand nisló buñchiin par diti tzoʼ xí gacbu por ni stoib ma buny demandary láabu. *

Órni toib herman raguiʼx demand de clas reʼ né diti cayonyibu láani par tíilbu né buñ. Diti raduidyni diitz que cayac nayaʼyibu né diti casobyibu xilitz Pablo. * Lóono ni racanalno Jesús ni más rasac par lóono ngú gonyxiroʼno laa Jehová né guiguaʼno toibsi né goxt lainy congregación. Buñ rimbu lóono por galnadxiʼ ni noʼ ladno, galnadxiʼ ni diti rioʼ ló «galrrasaʼ por láasini» (1 Corintios 13:4, 5; Juan 13:34, 35).

^ Párrafo. 2 Sigory pal toibtica buelt toib herman ñony toib galkié rodann xomod naxinbu a toib buñ, ñonynaabu, nagaitybu o nabannbu xiroʼ, labúu quiʼxno toib demand nisló buñchiin, ná pal ndeʼ gony que tzeebu press.

^ Párrafo. 3 Pal nainy looy ganlo más, bibiʼ La Atalaya 15 de marzo íz 1997, páginas 17 a 22, né La Atalaya 15 de octubre íz 1991, páginas 25 a 28.