Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

«Tzodieʼto ló xcalnadxiʼ Dios»

 CAPÍTULO 7

¿Rasac vida par lóono xomod rasacni nisló Dios la?

¿Rasac vida par lóono xomod rasacni nisló Dios la?

«Portín né looy noʼ ro ralainy vida.» (SALMO 36:9.)

1, 2. ¿Xí cós ni rasac biscad Dios lóono, né xigony?

BIXIOSNO ni noʼ guibá ma biduidy lóono toib galrrascad ni rasacgoluʼ, láani ngú vida xomod buñ ni naní xcalrrien; né labúu rasuʼno mod nacbu (Génesis 1:27). Por ni napno galrrascad reʼ, labúu ronyno pensary ló xilitz la Biblia né rasobno láani. Pal ronyno scú, dxoga dxoga sonyno pensary xomod Jehová. Sacno buñ ni nadxiʼ láabu né sacno buñ «ni ma bisaʼ xcalrrien par gony dxiin guirá ór né labúu gan xí ngú cós tzaay né xí ngú cós mal» (Hebreos 5:14).

2 Ló naareʼ nigolú rasac guisobno xilitz la Biblia. Ló Gudxlio reʼ noʼ xidal cós né diti noʼ toib ley ni raniʼ ximod gac guiránacni. Xomod remeidy né stipnés cós ni raquiin doctor ro raquiinyibu runy. Lóono ni nacno buñ ni rasob a Jehová nigolú rasac ganno ndeʼ. ¿Ximod labúu gonyno cós ni diti guisioʼob xcalrrienno né gacné lóono tzoʼno ló xcalnadxiʼ Dios? Raquiin guientzaayno xilitz la Biblia ni raniʼ de láani (Proverbios 2:6-11). Guisuidyno láani né tipnés litz.

RUNY NÉ VIDA RASACNI

3, 4. ¿Pu dzú bisetlaa la Biblia primer buelt que runy rasacni, né xí litz rasetlaa láani?

3 Jehová ná que runy né vida radzaktzay saʼni, né que guiropcani rasacni. Primer buelt dzú goniʼbu que scú nacni, gocni después ni Caín bigaity Abel. Jehová góoch láabu: «¡Bicadiag! Xiruny buchlo cacaʼ rudx naʼ desde layoo»  (Génesis 4:10). Nisló Jehová, xiruny Abel buny representarni vida xtunybu. Gocni suusi xiruny Abel nacaʼ rudx nisló Dios par que Dios ñac vengar (Hebreos 12:24).

4 Después de guiérodann, Dios biduidy lagary buñgudxlio ñoo xpeʼel nimal per diti xirunymu. Dios góoch layibu: «Nosi beʼel né vida xtunymu —xirunymu— diti non guáto. Per diti nosi ngú, naʼ sanaba cuent por xirunyimu» (Génesis 9:4, 5). Ló xtzúno, lóono sieelno de xfamily Noé, napno xi de guisobno mandary reʼ ni goniʼ Dios dzú goninébu Caín. Primer, litz reʼ raslooyni que guirá ni nabany ló Gudxlio, vida o alma rony representarni runy. Né láaca raslooyni que Jehová ni nac ro Ralainy vida, sanab cuent buñ ni diti nap respet láani né ni diti nap respet runy (Salmo 36:9).

5, 6. ¿Ximod bislooy Xiley Moisés que runy nigolú rasacni nisló Dios? (Bibiʼ cuadriyen ni sieed ló  página 78.)

5 Chop cós ni ma bisetlano láaca cuáni ló Xiley Moisés. Ló Levítico 17:10, 11, Jehová ná: «Nitisi buñ ni nac de lidx Israel o toib bioʼos ni cabés xomod bioʼos ladto ni guá nitisi clas runy, naʼ nigolú sagoʼya lóoya contra buñ ni cayó runy, né nigolú sachoga láabu lad xcudxbu. Portín vida xtuny nimal noʼni ló xirunymu, né naʼ ma bidudi lagary guiquiinto láani ló altar par guisiáto lóocato, runy rasiáni portín nacni vida xtunymu» (bibiʼ cuadriyen ni ná « Runy rasiáni galkié», ni sieed ló página 76.) *

6 Pal runy diti naquiinni ló altar, non naxúni layoo. Modreʼ gocni suusi nabiguetni ronoʼ Xpixuanni (Deuteronomio 12:16; Ezequiel 18:4). Per non guisetnaladxno que israelitas diti nigolú nanoy non ñacyibu par nabeʼyibu guiráxadit xiruny nimal. Nosi biquiin nagaityibu nimal,  naxúyibu xirunymu par labúu ñooyibu láamu né xcalrrienyibu diti nasioʼob layibu. Modreʼ naslooyibu respet por Dios ni biduidy láani layibu.

7. ¿Ximod bislooy David que gopbu respet runy?

7 Toib buñ ni bientzaay litz ni sieed ló ley ni Jehová buny mandary órni goniʼbu de runy góc David, ni Dios  goniʼ: «Buñguieeu ni xcalnabani rioladx mod nac» (Hechos 13:22). Toibtica buelt David goniʼ que cayaitybu galrralán nís. Órni tzón buñguieeu ni noʼ né láabu ló guerr bicadiag ndeʼ, buny tiraryibu goyoʼyibu ro dxee guirá xi enemigyibu né goleʼyibu nís lainy toib pós né bitnéyibu láani ronoʼ David. ¿Xí buny David ór cú? Láabu goniʼbu: «¿Seeya xiruny buñguieeu ni goloʼ ló ries vida xtuny par goleʼ nís la?». Par David, nís cú gocni xiruny, o vida xtuny guionca buñguieeu cú. Por ngú, ná calangoluʼbu nís «bixúbu láani par Jehová» (2 Samuel 23:15-17).

8, 9. ¿Bidzaʼ mod nac xpensary Jehová mod bibiʼbu vida né runy órni golainy congregación ló xtzú Jesús la? Golexa láani.

8 Después ni godudy xidalgayoʼ íz, bidop Tidxó Buñ ni gop xiroʼ Galnann ni Gosanir. Par ló dzúcu ma godudy gahxca chop mil tapgayoʼ íz desde dzú Noé cuaʼ mandary que diti non guábu runy, né par ló dzúcu ma godudy gahxca tipmil gaaygayoʼ íz desde dzú Jehová buny toib acuerdo xtuny Ley. Ló reunión cú, Jehová biduidy galnaní a Tidxó Buñ ni gop xiroʼ Galnann ni Gosanir par nacaʼyibu: «Espíritu santo né lóocado bibiʼdo galán diti gonyto más cós, nosi ni raquiin gonyto láani ngú: diti guáto ni ma godiʼxyibu nisló dioxh, diti guicaʼto runy, diti guáto nimal ni diti bixú xiruny, né diti gonyto galyoxh» (Hechos 15:28, 29).

9 Riendxichni que Tidxó Buñ ni gop xiroʼ Galnann ni Gosanir ló primer siglo bientzaay que runy rasacni, né pal buñ diti raquiin láani sacró racni toib galkié rodann como si cayenyibu dioxh o cayonyibu galyoxh. Ló naareʼ scúca rabiʼno láani. Órni doctor ná guicaʼno runy, rasuidytzayno xilitz la Biblia par coʼno guicno gonyno ni rioladx Jehová.

¿GUIQUIINNO RUNY XOMOD REMEIDY LA?

¿Ximod ñaabi doctor que diti racaʼya fracciones xtuny runy?

10, 11. a) Lóodo ni nacdo testigos xtuny Jehová, ¿rasagueldo racaʼdo runy né glóbulos rojos, glóbulos blancos, plaquetas né plasma la? b) ¿Xí cós labúu gonyno pal xcalrrienno raduidy lagary lóono?

10 Por ni rapdo respet mandary ni ná: «Diti guicaʼto  runy», testigos xtuny Jehová diti rasagueldo rascaddo runy, diti racaʼdo runy o ragoʼtzaydo xirunydo par guiquiindo láani stoib ór. Láaca diti rasagueldo racaʼdo: glóbulos rojos, glóbulos blancos, plaquetas né plasma.

11 Ló naareʼ tap cós ni ma bisetlano labúu radzoni ló fracciones ni raquiin doctor par gony remeidy. ¿Labúu guinino que nacni «runy» la? ¿Labúu guicaʼno láani la? Nosi lóono labúu cuuno xí gonyno. Né láaca scúca nac remeidy xomod hemodiálisis, hemodilución né máquina ni ratop runy, labúu gonyno láani pal nacni xirunyno ni diti ma goyoʼtzay (bibiʼ apéndice ni sieed ló páginas 215 a 218).

12. Órni guiquiinno xcalrrienno, ¿ximod non gonyno né xí gacné lóono coʼno guicno gonyno toib cós?

12 ¿Rasac par Jehová mod ronyno pensary de ndeʼ la?  Scú, portín rioʼbu ló galrrasaʼ xí ni noʼ ló xpensaryno né xigony ragoʼno guicno gonyno láani né xigony yaca (bíil Proverbios 17:3; 24:12). Por ngú, ¿xí láani non gonyno antes de guicaʼno o diti guicaʼno remeidy o cós ni doctor caduidy lóono? Primer non guininéno Dios, guisuidytzayno láani, né gonyno ni raiby xcalrrienno lóono (Romanos 14:2, 22, 23). Diti guiduidyno lagary que ni toib buñ gaiby lóono xi gonyno, láaca diti guinabdiitzno: «¿Looyga xí ñonylo?». Ló ndeʼ, «tigaaga buñ siné xquiʼx» (Gálatas 6:5; Romanos 14:12; bibiʼ cuadriyen ni ná « ¿Rasac runy par naʼ la?», ni sieed ló página 81). *

XILEY JEHOVÁ RASLOOYNI XCALNADXIʼBU

13. ¿Xí raslooy leyes né litz ni nap la Biblia mod nac Jehová? Golexa láani.

13 Ló leyes né litz ni sieed ló la Biblia riendxichni que Jehová nac toib Dios ni raduidy leyes né nacbu Bixiosno ni nadxiʼ né rabiʼ ximod tudyno dzú (Salmo 19:7-11). Ná mandary ni sieed ló la Biblia ni ná: «Diti guicaʼto runy» diti doctor ranab láani buñ, per láani ralaani lóono de riesga ni noʼ órni buny racaʼ runy (Hechos 15:20). Scú láani, tipnés buñnan ni nac doctor ni raniʼ que buñ ni rac operar sin runy, nacni mod galán ni guicanal guirá doctor ló naareʼ. Lóono ni rasobno Jehová riendxichno que láabu nacbu Bixiosno ni nap galnadxiʼ né ni nap xiroʼgolu galnann (bíil Isaías 55:9; Juan 14:21, 23).

14, 15. a) ¿Xí leyes bislooy que Jehová gondxiʼ xcudx? b) ¿Ximod guisobno litz ni ná que guicaano cuidad guirá ni cayonyno?

14 Dios guirá ór rioʼbu ló galrrasaʼ por xcudxbu. Scareʼ raslooy xidal leyes ni biduidybu gudx Israel. Jehová bixel que nasaʼyibu pretíl guic yoʼ lidxyibu. Lagarycu nigolú biquiinyibu láani ló dzúcu, por ngú ley reʼ gop layibu par diti  nasacloyibu toib desgrasy (Deuteronomio 22:8; 1 Samuel 9:25, 26; Nehemías 8:16; Hechos 10:9). Láaca cuaʼyibu mandary nasiegyibu yós nadox ni gopyibu (Éxodo 21:28, 29). Buñ ni diti nasob ley reʼ ñabbu ló toib galkié rodann, né labúu ñapbu dool por ni naxú xiruny stipnés.

15 ¿Ximod rasobno litz ni ma bisetlano? Órni racaano cuidad par diti guixin xcamionno, racaano cuidad ximod raxonyno láani, ximod noʼ lidxno, lagary ro ronyno dxiin, racaano cuidad nimal ni napno lidxno né rabútzayno galnakit. Ló xidal gudxrop mbioxhlas raity portín cuenunysi raxonyibu camión. Por ngú, mbioxhlas ni ná tzodieʼ ló xcalnadxiʼ Dios né rasac vida par láabu diti ragoʼbu láani ló riesga nosi par guisacbu sacró. Nanbu que labúu guisaclobu toib desgrasy. Né diti cuenunysi ronybu, por ngú rabanybu más goxt (Eclesiastés 11:9, 10).

16. ¿Xí litz noʼ par buñ ni ratuidy xiin? (Bibiʼ ñeʼ guiich.)

16 Nisló Dios nigolú rasac vida xtuny buñ, dada toib badaʼ ni noʼsa lainy xinaʼ. Ló Xiley Moisés, Dios biloyña xi láani ñac órni toib buñ ñonynaa toib buñgonaʼ ni nacxiin. Pal buñgonaʼ o badaʼ ni noʼsa lainybu raity, buñ ni nap dool radxinbu racbu ni ragaity né raguiixbu «vida por vida» (bíil Éxodo 21:22, 23). * Por ni ma bisetlano rientzaayno ximod rasac Jehová órni rabiʼbu que guirá íz xidalguixo buñgonaʼ ratuidy xiin, xidal buelt ronyibu láani par tzeeni layibu sacró o portín raniiny gonyibu más galyoxh.

17. ¿Ximod gacnéno buñ ni bituidy xiin dzú yása guisuidybu la Biblia?

17 Per ¿né pal toib buñgonaʼ bituidy xiin dzú yása guisuidybu ni ná la Biblia ga? ¿Non gonybu pensary que Dios diti sap galrronladx láabu la? Diti non gonybu pensary  ngú. Guirá buñ ni rac arrepentir, labúu gandxichyibu que Jehová satuidy scásiʼ xcalkiéyibu por runy ni bixú Jesús (Salmo 103:8-14; Efesios 1:7). Jesús láacabu goniʼbu: «Naʼ bieela, diti par guixelcaʼya buñ ni rony xinésni, xalagary  ngú par guixelcaʼya buñ galkié par gac arrepentir» (Lucas 5:32).

CUEʼNO LAINY XCALNABANYNO CÓS MAL

18. ¿Ximod raloyña la Biblia razón ni noʼ porni buñ ragaity saʼ?

18 Per Jehová diti nosi rioʼ conforma pal diti noʼ xi ronyno saʼno. Raniiny láabu cueʼno lainy xcalnabanyno galrrianladx, portín por xtol ndeʼ ma bixú xiroʼgolu runy. Por ngú, Apostol Juan raiby lóono: «Nitisi buñ ni rianladx buch nacbu buñ ni ragaity» (1 Juan 3:15). Ndeʼ diti raduidy diitz órni toib buñ diti tampa galán riabbu lóono, xalagary ngú, ndeʼ raduidy diitz que raniiny lóono gaitybu. Pal rianladxno láabu ndeʼ labúu ñony que nanino mal de láabu o nagotzno dool láabu par nacaʼbu xcastig Dios (Levítico 19:16; Deuteronomio 19:18-21; Mateo 5:22). Scú láani, nigolú rasac gonyno xtem cueʼno lainy xcalnabanyno cós mal ni rasacno (Santiago 1:14, 15; 4:1-3).

19. ¿Xí rasuidy Salmo 11:5 né Filipenses 4:8, 9 buñ ni raduidy lagary que xilitz la Biblia conés láabu?

19 Pal nislóno nigolú rasac vida xomod rasacni nisló Jehová né raniiny tzodieʼno ló xcalnadxiʼbu, sabeʼno tiplad guirá clas galrradíil ni noʼ. Ló Salmo 11:5 ná que Jehová «rianladxbu nitisi buñ ni nadxiʼ gony mal a stipnés». Per Salmo reʼ diti nosi raslooyni lóono xi rasac Dios; láaca ragonésni lóono de stoib mod. Pal nadxiʼno Dios, diti sonyno ni toib clas galnakit ni gony que guioladxno guibiʼno buñ ni cacalsaʼ. Scúca por ni nanno que Jehová nac «Dios ni nap paz» rachiinni lóono coʼno ló xpensaryno né lainy xcalnabanyno pór cós natzaay cós ni rasac, cós ni ronyxiroʼ né ni ragoʼ paz (bíil Filipenses 4:8, 9).

GALSITNO DE GRUPOS NI RAXÚ RUNY

20-22. Buñ ni racanal a Jesús, ¿ximod rabiʼyibu gudxliogoxreʼ, né xigony?

20 Nisló Dios, xcudxliogox Buñdzab nap dool por ni  raxú xiruny buñ ni diti nap dool. Gobiernos xtunyibu, ló la Biblia rac representarni xomod nimal ni nigolú mal, ma bigaityibu xidalguixo buñ né lad buñ ni ma bigaityibu noʼ buñ ni rasob a Jehová (Daniel 8:3, 4, 20-22; Revelación 13:1, 2, 7, 8). Xidal imperios xtuny negosy né grupos de buñnan racnéyibu guirá potencias xtuny partid par guisaʼyibu guip nadzuʼpy, né par gapyibu xiroʼ bidxiich. Riendxichni «gudxliogoxreʼ noʼni ladxña ni nigolú mal» (1 Juan 5:19).

21 Per buñ ni racanal Jesús labúu guibanyibu sin gapyibu dool ná por tigaagayibu o por grupo. ¿Xigony? Portín rasobyibu ni goniʼ Jesús: «Diti nacto de gudxliogoxreʼ», né por ngú diti rioʼyibu lad partid né diti rieeyibu guerr (Juan 15:19; 17:16). * Láaca, órni noʼ ni ronynaa layibu, rasuʼyibu Cristo né diti racalóyibu, xalagary ngú nadxiʼyibu xi enemigyibu portín dada ranabyibu lóo Jehová gacné layibu (Mateo 5:44; Romanos 12:17-21).

 22 Per ni máspa buñ ni racanal Jesús diti racyibu toibsi né «Babilonia la Grande» —imperio xtuny religión falz ni noʼ ló guidopynac Gudxlio—, láani nigolú napni dool por ni ma bixúni runy. Ló Xtiitz Dios ná: «Ronoʼbu bidzel xiruny profetas né xiruny santos né xiruny guirá ni ma goity ló gudxlio». Né por ngú Dios raiby lóono: «Colguireʼ ladni», lóoto ni nacto xcudxi (Revelación 17:6; 18:2, 4, 24).

23. ¿Xí raguiña diitz ni ná que guireʼ buñ de Babilonia la Grande?

23 Órni toib buñ rasian Babilonia la Grande diti nosi rareʼ laabu ló xquiich buñ ni noʼ lad religión cú. Noʼ más ni ronybu, rianladxbu cós mal ni religión falz rony né láaca rianladxbu guirá ni racacuent religión falz xomod: galyoxh, ni rioʼyibu lad partid né napyibu bidxiich por ni rasobladxyibu láani (bíil Salmo 97:10; Revelación 18:7, 9, 11-17). ¡Balaati xiroʼ runy ma bixú xtol cós ni rony Babilonia!

24, 25. ¿Xí cós rabiʼ Jehová par guislooybu galrronladx buñ ni ma góc arrepentir por ni bixú runy, né ximod góc representarni ló gudx Israel?

24 Dzú yása tzoʼno lad religión ni rasuidy xinésni, goyoʼno xilad gudxliogoxreʼ ni noʼ ladxña Buñdzab. Por ngú gopno tidxó dool por ni bunyibu. Per gonásno stoib néz, gopno fe ló xcalgoity Cristo né góc dedicarno Dios. Modreʼ galrronladx né ni Dios ralaa gocné lóono (Hechos 3:19). Xomod guisuidyno nigoreʼ galrralaa reʼ buny representarni gudx ni ralaa buñ (Números 35:11-15; Deuteronomio 21:1-9).

25 ¿Noʼ ro biquiin guirá gudx reʼ la? Biquiinni par gopni israelitas ni nagaity por desgrasy a toib buñ né naxony ñee lagarycu par nalaa. Órni nadxiimbu lainy toibtica gudx reʼ ñac juzgar láabu né nabésbu lagarycu dada dzú ñaity sumo sacerdote ór cú ma labúu ñeebu rotísi lagary ñoladxbu. Modreʼ rientzaayni que Dios nap xiroʼgolu galrronladx né que nigolú rasac vida par láabu. ¿Xí rony representar gudx ni ralaa buñ? Láani ngú ni Jehová raquiin ló naareʼ par  guilaa lóono. ¿Xí láani? Jehová raquiin xcalgoity Jesucristo par guilaa lóono de galgoity por ni rachéno ló xileybu né por ni diti rabiʼno runy né vida xomod ni rasac. ¿Ximod raslooyno que rasac guirá ndeʼ par lóono? Toib mod ngú guiruʼno buñ guieed par tzoʼ lagary ni nac xomod «gudx ni ralaa buñ». Ndeʼ nigolú raquiin gonyno ló naareʼ portín ma gaxtiguié noʼ «gran tribulación» (Mateo 24:21; 2 Corintios 6:1, 2).

ÓRNI RANINO DE GOBIERNO XTUNY DIOS RASLOOYNO QUE RASAC VIDA

26-28. ¿Ximod noʼno xalagary profeta Ezequiel, né ximod labúu tzodieʼno ló xcalnadxiʼ Dios?

26 Ló naareʼ, xcudx Dios noʼyibu xomod toib profeta ni bibany nírcu ni góc laa Ezequiel. Jehová golú láabu par nasuidybu gudx Israel. Láabu cuaʼbu dxiinreʼ: «Órni guicadiaglo diitz ni rareʼ roʼya ni maca tzágudxlo ni ma goniya». Pal Ezequiel diti ñony xchiin galán, ñapbu dool por runy ni naxú órni Dios nanab cuent a gudx Jerusalén (Ezequiel 33:7-9). Láabu bunybu xchiimbu galán né diti gopbu dool por buñ ni goity.

27 Mápa mer xcudxliogox Buñdzab guinitlóni. Por ngú, testigos xtuny Jehová racacuentdo dxiinreʼ xomod toib privilegio né non guinido de «dzú ni Dios xtunyno gac vengar» né guinido de Gobierno xtunybu (Isaías 61:2; Mateo 24:14). ¿Ronyno dxiinreʼ né gan la? Scú buny Pablo láani né por ngú goniʼbu: «Noʼya nayaa de xiruny guirá buñ, portín diti biatzladxi naniya guirá xilitz Dios» (Hechos 20:26, 27). Scú láani, Pablo bisiambu toib mod galán ni guisuʼno.

28 Por ngú, par tzodieʼno ló xcalnadxiʼ Bixiosno diti nosi raquiin guibiʼno vida né runy xomod rabiʼ Jehová láani. Xomod guisuidyno ló capítulo ni sietra, láaca nigolú raquiin gacno buñ nayaa nisló Dios.

^ Párrafo. 5 Diitz ni ná «vida xtuny nimal noʼni ló xirunymu», revista ni laa Investigación y Ciencia raniʼ ndeʼ: «Runy rony representarni vida, per láaca guirá clas células ni noʼ ló runy raquiinni par guibany buñ né par guibany nimal».

^ Párrafo. 12 Bibiʼ revista ¡Despertad! de agosto íz 2006, páginas 3 a 12, ni rabeʼ testigos xtuny Jehová.

^ Párrafo. 16 Tipnés buñ ni racaʼ de la Biblia raniʼ que mod sieed diitz hebreo, «diti nosi rac aplicarni a buñgonaʼ ni racnaa». La Biblia ná que diti sadzaʼ castig ni guicaʼ buñ ni ragaity badaʼyen ni pénsa cayaʼ o ni ma bilox goyaʼ lainy xinaʼ.

^ Párrafo. 70 Par ganlo más bibiʼ apéndice ni sieed ló páginas 215 a 216.