Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

«Tzodieʼto ló xcalnadxiʼ Dios»

 CAPÍTULO 1

«Mod rarexa galnadxiʼ ni napno Dios»

«Mod rarexa galnadxiʼ ni napno Dios»

«Ndeʼ nac mod rarexa galnadxiʼ ni napno Dios: guisobno ni rony mandarybu lóono; né, ná scú nacni, ni rony mandarybu diti naganni.» (1 JUAN 5:3.)

1, 2. ¿Xigony nadxiʼlo Jehová?

¿NADXIʼLO Dios la? Pal ma góc dedicarlo Jehová sacapylo scú láani, né noʼ razón par guicapylo scú, portín rareʼni lainy xcalnabanylo. Nadxiʼno Jehová portín láabu ma bunybu láani. Xomod ná la Biblia: «Nadxiʼno, portín láabu gondxiʼbu lóono primer» (1 Juan 4:19).

2 Jehová guirá ór rayopybu mod guislooybu ximod nga nadxiʼbu lóono. Láabu ma biduidybu toib Gudxlio sacroyen ro guibanyno. Raduidybu guirá ni caquiinno (Mateo 5:43-48). Per ni más rasac, rioʼbu ló galrrasaʼ por lóono. Láabu ma biscadbu la Biblia lóono. Raibybu lóono guinabno lóbu ni caquiinno, né nábu que sacadiagbu né saduidybu espíritu xtunybu par gacné lóono (Salmo 65:2; Lucas 11:13). Per galrrascad ni más rasac ni biduidybu ngú ni bixelbu Xiimbu ni más nadxiʼbu goity né bilaa lóono de galkié né de galgoity. ¡Balaati nadxiʼ Jehová lóono! (Bíil Juan 3:16; Romanos 5:8.)

3. a) ¿Xí raquiin gonyno par tzodieʼno ló xcalnadxiʼ Dios? b) ¿Xí raquiin guinabdiitzno, né pu lagary guidzelno mod rarexani?

 3 Jehová rioladx tzoʼno ló xcalnadxiʼbu por tipzó. Ma xcuentno noʼni pal rasaguelno gonyno láani o yaca. Xtiitz Dios raiby lóono: «Tzodieʼto ló xcalnadxiʼ Dios [...] né ni cabésto guibanyto tipzó» (Judas 21). Diitz «tzodieʼto» rarexani que par diti guisnitno xcalnadxiʼ Jehová, noʼ ni gonyno. Napno xi de guislooyno que nadxiʼno Dios. Por ngú nigolú rasac que cada toibno guinabdiitzno lóocano: «¿Ximod guislooya que nadxiʼya Dios?». Guibiʼno ximod sieedni ló  diitz ni goniʼ Juan: «Ndeʼ nac mod rarexa galnadxiʼ ni napno Dios: guisobno ni rony mandarybu lóono; né, ná scú nacni, ni rony mandarybu diti naganni» (1 Juan 5:3). Por ni nainy guislooyno que nadxiʼgoluno Jehová guisuidyno ximod rarexa diitz ni goniʼ Juan.

«NDEʼ NAC MOD RAREXA GALNADXIʼ NI NAPNO DIOS»

4, 5. a) ¿Xí biduidy diitz órni Juan goniʼ «galnadxiʼ ni napno Dios»? b) Bisetlaa ximod gosalólo gondxiʼlo Jehová.

4 ¿Xí láani bitzanló ló xpensary Juan órni bicaʼbu «galnadxiʼ ni napno Dios»? Ni goniʼbu diti raduidyni diitz galnadxiʼ ni nap Dios lóono, xalagary ngú raslooyni galnadxiʼ ni napno Dios. ¿Rasetnaladxlo dzú gosalólo gondxiʼlo Dios la?

Órni rac dedicarno né rionisno rasalóno rabanyno de toib mod ni raslooy que nadxiʼno né rasobno Jehová

5 Gosagaʼ né buny xpensarylo, órni gosalólo bisuidylo ni nigolú de Jehová né ni nainy gonybu, gosalólo goplo fe. Bienlo que desde dzú gool lo naclo buñ galkié né sit noʼlo de Dios. Ná scú, láabu biquiimbu Jesucristo né bixalbu néz par labúu guibanylo tipzó né gaclo buñ ni diti nap galkié xomod góc Adán nírcu (Mateo 20:28; Romanos 5:12, 18). Láaca looy gosalólo bienlo balaati rasac ni Jehová biduidy Xiin goity por looy. Bidxinni lainy xcalnabanylo né gosalólo gondxiʼlo Jehová Dios ni bislooy balaati nadxiʼ looy (bíil 1 Juan 4:9, 10).

6. ¿Ximod raslooylo que naplo galnadxiʼ, né xí ma bunylo por ni nadxiʼlo Jehová?

6 Per ni gosaclo ór cú, gocni ro pénsa casaló galnadxiʼ ni rasaclo por Jehová. ¿Xigony? Portín galnadxiʼ diti nosi nacni ni rasac buñ. Diti nosi raquiin guinino: «Naʼ nadxiʼya Jehová». Xomod fe, galnadxiʼ  ni nigolú rien que napno láani por ni noʼ ni ronyno (Santiago 2:26). Órni nadxiʼno toib buñ nainy lóono gonyno ni rioladxbu. Né scúca, órni gosaló golainy lainy xcalnabanylo gandxiʼlo Jehová, goniiny guibanylo mod rioladx Bixioslo ni noʼ guibá. ¿Ma goyonislo xomod testigo xtuny Jehová la? Pal scú láani, rientzaayni que nigolú nadxiʼlo Dios, por ngú goloʼlo guiclo góc dedicarlo par gonylo xchiimbu né goyonislo (bíil Romanos 14:7, 8). Per par labúu gony cumplirlo xtiitzlo raquiin gonylo ni rasetlaa Juan.

«GUISOBNO NI RONY MANDARYBU»

7. ¿Xí láani rony mandary Dios, né xí non gonyno par guisobno láani?

7 Juan rabexa que galnadxiʼ ni rasacno por Dios raduidyni diitz: «Guisobno ni rony mandarybu». ¿Xí láani ngú ni rony mandarybu? Ló la Biblia, Jehová nayadit raiby lóono xí láani diti gonyno. Láabu diti raduidybu lagary que buñ guisoch, gony galyoxh, guieen dioxh, cuann né guiscú (1 Corintios 5:11; 6:18; 10:14; Efesios 4:28; Colosenses 3:9). Ni guibanyno mod ná la Biblia, raduidyni diitz guisobno guirá ni Dios rony mandary diti gonyno.

8, 9. ¿Ximod labúu ganno xí rioladx Jehová órni diti noʼ toib ley ni raiby lóono xí ni merpa gonyno? Bisetlaa ximod.

8 Per par gonyno ni rioladx Jehová diti nosi raquiin guisobno ni rony mandarybu. Jehová diti ragoʼoy lóono né leyes por guirá cós ni ronyno. Guirá dzú racalóno xidal cós ro diti noʼ toib ley ni ná ximod gonyno láani. Per ¿ximod ganno pal ni cayonyno rioladx Jehová láani? La Biblia nayadit ná ximod  ronybu pensary. Órni rasuidyno ni ná la Biblia rienno xí cós nadxiʼbu né xí cós rianladxbu (bíil Salmo 97:10; Proverbios 6:16-19). Modreʼ raduidyno cuent xí cós né xí clas pensary rioladxbu. Órni más rimbuno mod nac xpensary Jehová, diti rac nagann par lóono ganno pal ni noʼ guicno gonyno rioladxbu láani. Láaca órni diti noʼ toib ley ni rasetlaa xi ni merpa gonyno, labúu guiduidyno cuent «xí ngú ni raniiny Jehová gony» (Efesios 5:17).

9 Guibiʼno ximod ló la Biblia diti sieed toib ley ro nayadit ná que diti guibiʼno películas o televisión ni raniʼ de galyoxh o ro ragaity buñ saʼ. Per ¿nigolú raquiin tzoʼ toib ley ro guiniʼ que diti non guibiʼno láani la? Ma nanno ximod nac xpensary Jehová. Ló la Biblia nayadit náni que rianladxbu «nitisi buñ ni nadxiʼ gony mal a stipnés» (Salmo 11:5). Láaca raibyni lóono: «Dios sony juzgar buñ ni rony galyoxh né buñ ni ma noʼ tzeʼel ni ratné stoib» (Hebreos 13:4). Pal ronyno pensary ló diitzreʼ sandxichno xi ni noʼ ló xpensary Jehová. Por ngú, diti ragoʼno guicno guibiʼno dibuj o retrat ni riendxich que nacni cós ni Dios xtunyno rianladx. Gudxliogox rayopy mod gonyno pensary que galnakit ni noʼ ditini mal, per Jehová rabaladxbu órni ronyno por cueʼno láani tiplad. *

10, 11. ¿Xigony guirá ór nainy lóono guisobno Jehová, né ximod rasobno láabu?

10 ¿Xí razón ni más rasac noʼ par guisobno ni Dios rony mandary? ¿Xigony raniiny lóono guibanyno guirá dzú mod ronybu pensary? Diti nosi rasobno  Jehová par diti tzoʼno ló galnagan o par diti gony castigarbu lóono (Gálatas 6:7). Rasobno Jehová portín modreʼ napno toib oportunida guislooyno balaati nadxiʼno láabu. Xomod toib mbiox rayopy mod que bixios guioladx ni cayonybu, láaca scúca, raniiny lóono que Jehová guioladx ni cayonyno (Salmo 5:12). Nacbu Bixiosno, né nadxiʼno láabu. Diti noʼ stoib cós ni rony que rabaladxno ni lóono ganno que mod nabanyno «Jehová racacuent» láani (Proverbios 12:2).

11 Por ngú diti rasobno Dios de mal gan por ni noʼ ni raduidybu lóono o gonyno láani mod nainy lóono. * Diti lóono non guinino pu ór guisobno o gonyno láani. Per lóono nacno buñ ni rasob «né guidopy galnabany» (Romanos 6:17). Xomod salmista ranino: «Nigolú rioladxi guirá ni rony mandarylo» (Salmo 119:47). Scú láani, rioladxno guisobno Jehová. Nantzayno que ngú ni non gonyno né ndeʼ ni ranabbu lóono. Guisobno láabu guirá ór né diti guitzotz roʼno (Deuteronomio 12:32). Nainy gacno xomod Noé, láabu por xidal íz bisobbu né modreʼ bislooybu que gondxiʼbu Dios. La Biblia ná de láabu: «Noé buny guirá ni buny mandary Dios gonybu» (Génesis 6:22).

12. ¿Xí ni ronyno ni rony que rabaladx xcalnabany Dios?

12 ¿Ximod rasac Jehová órni rasobno láabu né guidopy galnabany? La Biblia raiby lóono que rabaladx xcalnabanybu (Proverbios 27:11). ¿Labúu gonyno que guibaladx xcalnabany Dios ni rony Mandary  guibá né guidopynac Gudxlio la? Labúu gonyno láani. Jehová bisaʼ lóono par labúu gonyno ni nainy lóono. Ndeʼ raduidy diitz que labúu cuuno guisobno láabu o yaca (Deuteronomio 30:15, 16, 19, 20). Por ngú, órni ragoʼno guicno guisuʼno Jehová por ni nadxiʼno láabu né guidopy galnabany, láabu nigolú rabaladxbu (Proverbios 11:20). Láaca modreʼ cacanalno toib mod ni Dios rioladx.

«NI RONY MANDARYBU DITI NAGANNI»

13, 14. ¿Xigony ranino que «ni rony mandary Jehová diti naganni», né ximod nabexalo láani?

13 Juan raniʼ tipnés diitz ni rony que rasacno sacró: «Ni rony mandarybu diti naganni». Ló diitz griego «naganni», ni rac traducir ló 1 Juan 5:3, rarexani xomod «nanaʼ». * Por ngú, stoib Biblia rony traducir láani scareʼ: «Ni rony mandarybu diti nanaʼni» (Nuevo Testamento, Pedro Ortiz). Jehová diti ranab lóono ni diti labúu gonyno o ni nigolú nagann. Ná guiráno nacno buñ galkié labúu guisobno xileybu.

14 Guislooyno láani modreʼ: bunysi xpensarylo que toibtica de ximigdxinlo ranab looy gacnélo láabu guituidyto xcafébu. Napto xi de guituidyto xidal sac café, tipnésni nasusy né tipnésni nanaʼ ni nosi chop buñ labúu goʼoy. Ximiglo raiby looy xi sac labúu goʼoylo. Diti raibybu looy guilíslo ni nanaʼ, portín diti nainy láabu gacnalo. Modreʼca rac né Dios ni nadxiʼ lóono, diti ranabbu gonyno cós ni nagann  (Deuteronomio 30:11-14). Jehová diti ranabbu goʼoyno cós ni nigolú nanaʼ. Raduidybu cuent dada púti labúu rigaʼlni gonyno, portín «rimbutzaaybu ximod goyaʼno, né rasetnaladxbu que nacno yoo» (Salmo 103:14).

15. ¿Xigony napno confianz que guirá ni rony mandary Jehová noʼni par gacnéni lóono?

15 Ni rony mandary Jehová diti naganni o nanaʼni, noʼni par gacnéni lóono (bíil Isaías 48:17). Moisés gochbu gudx Israel diitzreʼ: «Jehová bixel gonyno guirá ni rony mandarybu, guidzuibyno Jehová, Dios xtunyno par tzeeni lóono galán por xidzú, par labúu guibanyno, xomod ló dzureʼ» (Deuteronomio 6:24). Scúca napno confianz que Jehová raduidybu xileybu lóono nigoreʼ par labúu guibanyno goxt por tipzó. Ley reʼ racnégoluʼni lóono, ¿xigony? Portín sieedni de Jehová Dios ni diti radopy xcalnan (Romanos 11:33). Láabu nanbu xi más galán par lóono, né láaca láabu ngú galnadxiʼ (1 Juan 4:8). Xcalnadxiʼ Dios ngú ni más rasac né ndeʼ rachiin láabu guiniʼbu né gonybu guirá cós. Ronoʼ galnadxiʼ reʼ ralainy guirá mandary ni raduidybu buñ par guisob láabu.

16. ¿Xí láani racné lóono guisobno Dios ná gudxliogoxreʼ ratuidy lóono ló galrrioʼob né ná nacno buñ galkié?

16 Per ndeʼ diti raduidy diitz que ni guisobno Dios nabaʼni. Napno xi de guicalóno gudxliogoxreʼ ni noʼ «ladxña ni nigolú mal» (1 Juan 5:19). Láaca por ni nacno buñ galkié rachiinni lóono guichéno ló xiley Dios (Romanos 7:21-25). Per galnadxiʼ ni napno Dios labúu gacné lóono gonyno gan. Jehová rasiab xilaay ronoʼ buñ ni ragoʼ guic guisob láabu por galnadxiʼ. Dios raduidy espíritu xtuny a «guirá ni rasob láabu  xomod ni rony mandary» (Hechos 5:32). Láani ronyni que gacno buñtzay né gonyno cós tzaay ni rioladx Dios (Gálatas 5:22, 23).

17, 18. a) ¿Xí guisuidyno ló libro reʼ, né xí guisetnaladxno órni gonyno repas? b) ¿Xí guibiʼno ló capítulo ni sieed?

17 Ló libro reʼ guisuidyno mandary xtuny Jehová, litz né tipnés cós ni non gonyno. Órni gonyno repas reʼ guisetnaladxno tzón cós. Primer, Jehová diti rony lafuers lóono guisobno xileybu né xilitzbu; raniiny láabu guisobno ni nábu portín rareʼni lainy xcalnabanyno. Ni rarop, diti guialadxno que Jehová canab lóono guibanyno de toib mod par labúu guisiabbu xilaaybu ronoʼno nigoreʼ, né conésbu lóono guibanyno tipzó ló dzú ni sietra. Ni rion, ni guisobno Jehová né guidopy galnabany nacni toib mod par guislooyno balaati nadxiʼno láabu.

18 Jehová ma biscad galrrien lóono, par gacnéni lóono ganno xi ngú cós mal né xi ngú cós tzaay. Per par labúu conéstzay galrrien cú lóono raquiin guisuidyno láani, ndeʼ guibiʼno ló capítulo ni sieed.

^ Párrafo. 11 De mal gan demony láaca rasob. Órni Jesús buny mandary tipnés espíritus nareʼ laidy tipnés buñ, ná lafuers biduidyibu cuent que Cristo nap galmandary né ór cú bisobyibu (Marcos 1:27; 5:7-13).

^ Párrafo. 13 Diitz reʼca sieed ló Mateo 23:4, ro rasetlaa «guiʼx ni nanaʼ» ni fariseos bigoʼoy buñ par ñony cumplir bisaʼ clas costumbres ni goyoʼ ló dzúcu. Ló Hechos 20:29, 30 rac traducirni xomod ni «[rotñeʼ] buñ», diitzreʼ raniʼni de apóstatas ni nascú né ñony mal por ni naniʼyibu «cós ni diti nac xinésni».