Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

«Tzodieʼto ló xcalnadxiʼ Dios»

 CAPÍTULO 4

¿Xigony raquiin gapno respet galmandary?

¿Xigony raquiin gapno respet galmandary?

«Colgonyxiroʼ buñ de guirá clas.» (1 PEDRO 2:17.)

1, 2. a) Órni noʼ ni rony mandary lóono, ¿xí galnagan racalóno? b) ¿Xí galrranabdiitz guicapyno?

¿MA BIBIʼLO ximod rac lóo toib mbioxien órni noʼ ni rony mandary láabu né diti nainy guisobbu la? Mod rac lóbu raslooyni xi noʼ lainy xcalnabanybu. Racadiagbu ni raniʼ bixiosbu né nanbu que non gony respetarbu; per nigoreʼ por ni násini láabu diti nainy guisobbu bixiosbu. Xomodca mbioxien reʼ rioʼ ór láaca rasaclono scúca.

2 Diti guirá ór rioladxno guisobno buñ ni nap galmandary. ¿Ma gosaclolo modreʼ toibtica buelt la? Pal scú láani, diti looysi rasaclolo modreʼ. La Biblia ná guisobno buñ ni nap galmandary, ná noʼno ló gudxliogoxreʼ ni conforma radudy dzú más rac nayaʼ (Proverbios 24:21). Pal nainy tzodieʼno ló xcalnadxiʼ Dios, nigolú raquiin guisobno ni raxel la Biblia gonyno. Por ngú nigoreʼ guisuidyno, ¿xigony nigolú nagann par gonyno láani? ¿Xigony ranab Jehová guisobno? ¿Xí sacné lóono guisobno, né ximod labúu gonyno láani?

¿XIGONY NAGANN GUISOBNO?

3, 4. ¿Ximod gosaló galkié, né ximod rony naganni gapno respet buñ ni nap galmandary?

3 ¿Xigony diti rioladxno guisobno buñ ni rony mandary? Noʼ chop razón: primer, portín guiráno nacno buñ galkié, né ni rarop, portín buñ ni rony mandary lóono láaca nacyibu buñ galkié. Galkié ni rony mal lóono ma  xidal mil íz de goló gosalóni lainy lagary móz ni góc laa Edén órni Adán né Eva cualóyibu Dios. Xomod rabiʼno, galkié gosalóni órni layibu gocyibu buñ nayaʼ. Né dada ló xtzúno rálno né galnayaʼ (Génesis 2:15-17; 3:1-7; Salmo 51:5; Romanos 5:12).

4 Lóono nacno buñ galkié desde dzú rálno por ngú naguel racno buñ farmay né más nagann rac gacno buñdxo. Ná ma xidal íz casobno Jehová, labúu gacno buñ farmay né buñ ni diti rioʼ ló razón. Ngú ni gosaclóo Coré. Láabu gócbu toib israelita ni godudy ló xiroʼ galnagan toibsi né xcudx Dios. Per Coré goniiny nacaʼ más galmandary né cualóbu Moisés ni góc toib buñguieeu nigolú nadaʼa (Números 12:3; 16:1-3). Ngúca ni gosaclóo Uzías toib buñguieeu ni buny mandary nírcu, xtol galfarmay goyoʼbu lainy templo xtuny Jehová né bunybu dxiin ni nosi sacerdotes labúu rony (2 Crónicas 26:16-21). Coré né Uzías nigolú car godixyibu por ni bunyibu guirá ndeʼ. Ni gosacloyibu noʼ ni rasuidyni lóono: napno xi de cueʼno tiplad galfarmay portín ndeʼ rony nagann guisobno buñ ni nap galmandary.

5. ¿Xí láani ma buny buñgudxlio ni raslooy que mal rony mandaryibu?

5 Buñ ni nap galmandary por guirá ni ronyibu, stipnés buñ ma diti nap respet layibu. Xidalyibu nigolú buñ mal nac, diti ronyibu xinésni o ronyibu mal stipnés buñ. Guirá cós mal ni rac raduidyni diitz que buñ ni nap galmandary mal raquiinyibu láani (bíil Eclesiastés 8:9). Gonyno pensary ni góc né Saúl. Órni Jehová golú láabu par gonybu mandary, gócbu toib buñguieeu natzaay né buñdxo. Per después gócbu buñ farmay né gosaló bianladxbu né cuanalbu David (1 Samuel 9:20, 21; 10:20-22; 18:7-11). Después láaca David bidxin góc rey. Ná gócbu toib galán rey ni gop Israel, biquiimbu mal xcalmandarybu portín golambu tzeʼel Urías el hitita, né goloʼbu Urías ni diti  gop dool nisló guerr par ñaity (2 Samuel 11:1-17). Xomod rabiʼno, galkié ronyni que buñgudxlio raquiin mal xcalmandary, né más raquiinyibu mal láani órni diti napyibu respet Jehová. Después ni birexa ximod tipnés buñ ni rasanir nisló religión católica bunynaayibu né cuanalyibu tipnés buñ, toib estadista británico bicaʼ: «Galmandary raxinni mod nac buñ, né xiroʼ galmandary raxinni más mod nac buñ». Por guirá ndeʼ sigory ranabdiitzno lóocano: «¿Xigony raquiin gapno respet buñ ni nap galmandary?».

¿XIGONY GAPNO RESPET BUÑ NI NAP GALMANDARY?

6, 7. a) Golexa xigony napno respet xcalmandary Jehová. b) ¿Pu ór nga guisobno Jehová ná diti rienno xigony, né chú non guisuʼno?

6 Tzón razón ni noʼ ni más rasac par gapno respet galmandary, ralanyni ló galnadxiʼ: primer portín nadxiʼno Jehová, ni rarop nadxiʼno saʼno né ni rion nadxiʼno lóocano. Primer razón, lóono nadxiʼno Jehová más que guirá cós ni noʼ né por ngú nainy lóono guibaladxbu (bíil Proverbios 27:11; Marcos 12:29, 30). Nanno que desde dzú góc nayaʼyibu en Edén, cualóyibu derech ni Jehová nap par gony mandary guibá né Gudxlio. Láaca ma bisuidyno que casi guirá buñgudxlio rabeʼ tiplad Gobierno xtuny Dios né rioʼ xilad Buñdzab. Per lóono rabaladxno ni noʼno xilad Jehová. Por ngú órni rolno diitz ni ronyxiroʼ Jehová xomod ni sieed ló Revelación 4:11, ¿ximod rasacno? Nigolú radxinni lainy xcalnabanyno. Nandxichno que láasibu non gony mandarybu guibá né Gudxlio, por ngú noʼno xilad xcalmandarybu né rasobno láabu dzúna dzú.

7 Ni gapno respet Jehová, diti nosi raduidyni diitz guisobno láabu. Ronyno ni nábu portín nadxiʼno láabu. Per sioʼ ór sasaclono xomod mbioxien ni ma bisetlano, nagann  sac par guisobno Bixiosno né napno xi de guisuidyno guisobno láabu ná diti rienno xigony. Guisetnaladxno que Jesús guirá ór bisobbu bixiosbu, ná órni gosac naganbu guisobbu, goniʼbu diitzreʼ «diti gac ni nainy naʼ, sino gac ni nálo» (Lucas 22:42).

8. a) ¿Ximod rasobno Jehová ló naareʼ, né xí raslooy mod rasac Jehová órni diti ronyno láani? b) ¿Xí labúu gacné lóono guisobno litz né corrección ni racaʼno? (Bibiʼ cuadriyen ni sieed ló  páginas 46 né 47.)

8 Ló naareʼ, Jehová ma diti raninébu lóono. Láabu raquiimbu la Biblia né tipnés buñ ni noʼ ló Gudxlio né raibybu lóono xi ni non gonyno. Por ngú, toib mod ni guisobno Jehová, ngú guisobno buñ ni ma golúbu né ma biduidybu galmandary. Pal diti nacadiagno mod ralitzyibu o mod ragonésyibu lóono, Dios sasac mal. Ngú ni buny israelitas. Órni bitzotz roʼyibu né cualóyibu Moisés, gocni suusi nacalóyibu Jehová (Números 14:26, 27).

9. ¿Xigony ranino que pal nadxiʼno saʼno sapno respet buñ ni nap galmandary? Golexa láani.

9 Ni rarop razón por ni rasobno buñ ni nap galmandary nacni portín nadxiʼno saʼno. Par guientzaayno láani, bunysi xpensarylo que looy naclo toib soldad. Pal looy né xcompañerlo nainy gonyto xchiinto sacró né guilaato, non gapto respet buñ ni rony mandary lóoto, gacnéto né guisobdiitzto guirá ni raibyibu lóoto. Pal nosi toib soldad diti nasob, guiránac soldad labúu ñoʼ ló galnagan. Órni ranino de soldad sigory rieed ló xpensaryno guerr né galrrioʼob. Per Jehová nap xidalguixo soldad ni rony cós tzaay. La Biblia rabeʼ laa Dios xidalgayoʼ buelt, «Jehová ni rasanir ló xidalguixo soldad» (1 Samuel 1:3). Láabu ngú Comandante ni rasanir ló xidal ángeles ni nap xiroʼgolu galnadip. Láaca la Biblia rasetlaa que nacno xomod xidalguixo soldad ni rony xchiin Dios (Salmo 68:11; Ezequiel 37:1-10). Nisló guiráyibu Dios ma goloʼ tipnés buñguieeu par guisanir. Pal diti rasobno layibu satuidyno ló galnagan guirá xhermanno. Por ngú, órni toib herman  diti rasobdiitz ancianos ni noʼ lainy congregación, ratuidybu ló galnagan stipnés herman (1 Corintios 12:14, 25, 26). Ngúca rac órni toib mbiox diti rasob bixios, guiráca xfamilbu radudy ló galnagan. Xomod ma bibiʼno pal racnéno né napno respet nacni toib mod ni guislooyno que nadxiʼno saʼno.

10, 11. ¿Xigony rasac ganno xí galnasác racaʼno órni rasobno galmandary? Golexa láani.

10 Ni rion razón por ni rasobno buñ ni nap galmandary, nacni par tzeeni lóono sacró. Órni Jehová raiby lóono guisobno toib buñ, láaca raibybu lóono ximod sacnéni lóono. Jehová raiby mbiox que pal rasobbu bixiosbu né xinaʼbu, sabanybu más xidzú né sacroyen (Deuteronomio 5:16; Efesios 6:2, 3). Raibybu lóono que pal rasobno xilitz ancianos ni noʼ lainy congregación, sacnéni lóono guidzakno más Jehová (Hebreos 13:7, 17). Né pal rasobno buñchiin, sieeni lóono sacró (Romanos 13:4).

 11 Órni nanno xi razón noʼ por ni Jehová ná guisobno diti sac nagann par lóono gapno respet buñ ni nap galmandary. Guisuidyno nigoreʼ tzón cós ro labúu guislooyno que napno respet.

RESPET LAINY FAMILY

12. ¿Xí dxiin ma cuaʼ buñguieeu ni ma noʼ tzeʼel, né ximod non gonybu láani?

12 Jehová ngú ni bisaʼ family. Láabu nacbu toib Dios ni diti cuenunysi rony, ma bisiambu ximod gony toib family dxiin galán (1 Corintios 14:33). Jehová ma golú a buñguieeu par gac guic toib family. Por ngú buñguieeu non guisanir, né non gapbu respet Jesucristo ni nac guicbu. ¿Ximod ronybu láani? Rasuʼbu mod ragonés Jesús congregación (Efesios 5:23). Por ngú, toib buñguieeu ni galán rony xchiin diti rasiambu láani ladxña stipnés. Ronybu xchiimbu xomod toib buñguieeu ni rony cumplir xchiin. Per diti nacbu buñguieeu nachóng ni rony mal xfamily. Láabu nacbu toib buñguieeu natzaay ni ronladx né ni rioʼ ló razón. Diti rialadxbu que cuaʼbu tidxósi galmandary né que diti rigaʼlbu xcalmandary Jehová.

Buñguieeu órni ragonésbu xfamilbu rasuʼbu mod buny Cristo

13. ¿Ximod buñgonaʼ ni ma noʼ tzeʼel labúu gony cumplir sacró xchiin nisló Jehová?

13 Buñgonaʼ non gacné tzeʼel. Láabu láaca ma cuaʼbu galmandary laniolidxbu, la Biblia ná: «Diti  guialadxlo ni ná xinaʼlo gonylo» (Proverbios 1:8). Per buñgonaʼ nanbu que xcalmandarybu diti noʼni más guiaʼ que xcalmandary tzeelbu, né por ngú racnébu tzeelbu par labúu guisanir galán laniolidx. Racnébu né ronybu dxiin toibsi né tzeelbu, dipa rabeʼbu tzeelbu tiplad, diti rayopybu mod gac ni náapabu, diti rioʼbu xalagary tzeelbu par gony mandarybu laniolidxbu. Órni diti noʼbu de acuerdo rayopybu mod raniʼbu né respet ximod nac xpensarybu, per dipa raniʼbu mal ni tzeelbu ma goloʼ guic gony. Né pal tzeelbu diti nac Testigo, ¿xí láani gonybu? Sigory más sac nagann par láabu guisobbu per pal rony respetarbu xcalmandary tzeelbu, ndeʼ sony que sioʼ dzú tzeelbu labúu guiyopy Jehová (bíil 1 Pedro 3:1).

14. ¿Ximod mbiox labúu gony que guibaladx xcalnabany bixios né xcalnabany Jehová?

14 Mbiox rony que xcalnabany Jehová rabaladx órni rasobbu bixiosbu né xinaʼbu. Né bixiosbu né xinaʼbu láaca  rabaladx (Proverbios 10:1). Órni mbiox rabés nosi né bixios o nosi né xinaʼ láaca raquiin guisobyibu; rienyibu que más naganni par bixiosbu o xinaʼbu por ngú raquiin gacnéyibu lidxyibu. Órni cada toib buñ ni noʼ lainy family rony xchiin galán rabanyibu goxt né sacró. Láaca ronyxiroʼyibu Jehová ni Bisaʼ family (Efesios 3:14, 15).

RESPET LAINY CONGREGACIÓN

15. a) ¿Ximod raslooyno lainy congregación que napno respet xcalmandary Jehová? b) ¿Xí litz gacné lóono guisobno buñ ni rasanir lainy congregación? (Bibiʼ cuadriyen ni sieed ló  páginas 48 né 49.)

15 Jehová ma bisian congregación ladxña Jesucristo par gony mandary láani (Colosenses 1:13). Jesús ma golú «mós ni rony xinésni né naní xcalrrien» par gan xi caquiin xcudx Jehová (Mateo 24:45-47). Noʼ Tidxó Buñ ni nap xiroʼ Galnann ni Rasanir nisló testigos xtuny Jehová. Layibu nacyibu mós ni rony xinésni né naní xcalrrien. Xomod ló primer siglo, Tidxó Buñ ni nap xiroʼ Galnann ni Rasanir ralitzyibu ancianos. Rioʼ ór raquiinyibu superintendentes de circuito par gony láani. Por ngú órni napno respet xcalmandary ancianos, ni casobno ngú Jehová (bíil 1 Tesalonicenses 5:12; Hebreos 13:17).

16. ¿Xigony ná la Biblia que espíritu santo rabú toib herman par guidxin gac anciano?

16 Ancianos né siervos ministeriales nacyibu buñ galkié. Layibu rachéyibu xomodca guirá buñ. Ná scú nacni, ancianos nacyibu toib «galrrascad», ni raduidy Jehová par gac nadip fe xtuny herman (Efesios 4:8). La Biblia ná que espíritu santo golú layibu (Hechos 20:28). ¿Xigony nacni scú? Primer, portín antes que toib herman guidxin gac anciano, tipnés ancianos rabiʼ pal ronybu guirá ni ranab Xtiitz Dios ni cuá né xcalrracné espíritu santo (1 Timoteo 3:1-7, 12; Tito 1:5-9). Ni rarop, portín órni ancianos rabiʼ pal rasobbu guirá ni ranab Xtiitz Dios, ranabyibu xcalrracné Jehová par conés layibu né xcalrracné espíritu.

17. ¿Xigony ragoʼ hermanas lairy guic órni ronyibu tipnés dxiin lainy congregación?

 17 Lainy congregación noʼ xidal dxiin ni pórsi ancianos né ministeriales rony, xomod reunión ni rioʼ órni rareʼno yoʼ por yoʼ. ¿Xí rac órni diti noʼ toib anciano o ministerial par coʼ reunión reʼ? Ór cú toib buñguieeu ni ma goyonis rony láani. ¿Né pal diti noʼ toib herman ni ma goyonis? Ór cú toib hermana ni nantzay labúu gony láani. Per órni toib hermana gony dxiin ni rony toib buñguieeu ni ma goyonis non coʼbu lairy guicbu (1 Corintios 11:3-10). * Órni buñgonaʼ ragoʼ lairy guic diti raduidyni diitz que diti rasacbu, xalagary ngú raslooybu respet lagary ni Jehová ma goloʼ par family né par congregación.

RESPET NI GAPNO BUÑCHIIN

18, 19. a) ¿Ximod nabexalo litz ni sieed ló Romanos 13:1-7? b) ¿Ximod raslooyno que napno respet buñchiin?

18 Lóono ni racanalno Jesús ronyno xtem por guisobno litz ni sieed ló Romanos 13:1-7 (bíil). Pal rolno texto reʼ saduidyno cuent que raniʼni de «buñchiin». Jehová raduidy lagary que tzoʼ buñchiin par gony tipnés dxiin ni non gac, layibu racnéyibu guiguaʼ buñ sacró né raduidyibu tipnés cós ni buñ caquiin. ¿Ximod raslooyno que napno respet layibu? Raslooyno láani órni rasobno ni rony mandaryibu gonyno. Raguiixno impuestos, rastzano guiich ni ranabyibu né ronyno ni ranab ley ni napyibu, ná nacni par lóosino, par xfamilno, par negosy o cós ni napno. Per pal buñchiin raiby lóono diti guisobno Dios, racapyno layibu xomod cuapy xpiin Jesús nírcu: «Non guisobno Dios xomod ni rony mandary xalagary guisobno buñgudxlio» (Hechos 5:28, 29; bibiʼ cuadriyen ni ná « ¿Xí galmandary non guisoba?», ni sieed ló página 42).

 19 Stoib mod ni gapno respet buñchiin ngú gapno respet buñ ni rony dxiin né layibu, máspa órni rooyno diitz né layibu. Toibtica ór, Pablo goyee nisló Herodes Agripa ni buny mandary ló xtzúbu né nisló Festo toib buñchiin. Ná gondxichbu que guiropca biinreʼ diti buny xinésni, Pablo goniné layibu né respet (Hechos 26:2, 25). Lóono non guisuʼno mod bunybu, ná pal noʼno nisló toib buñxirop o nisló toib xiaʼac. Mbioxhlas ni rony ni ná Jehová scúca non gap respet xomextra o nitisi buñ ni rony dxiin lainy yolayscuel. Per lóono diti nosi napno respet buñ ni rioladx ni rasuidyno, láaca napno respet buñ ni racaló testigos xtuny Jehová. Scú láani, guiránac buñ non guibiʼ que lóono napno respet layibu ná diti nacyibu xhermanno (bíil Romanos 12:17, 18; 1 Pedro 3:15).

20, 21. ¿Xí galnasác guicaʼno pal napno respet buñchiin?

20 Diti gacno buñ naguib par guislooyno respet stipnés buñ. Xalagary gapno respet chop tzónsi buñ, más galán guisobno diitzreʼ: «Colgonyxiroʼ buñ de guirá clas» (1 Pedro 2:17). Xidal buñ radziguiaʼyibu órni rabiʼyibu que napno respet layibu, portín ló naareʼ ma guxeesi buñ nap respet. Órni napno respet, rasobno ni bixel Jesús gonyno: «Colguisaní guii ni napto nisló buñ, par guibiʼyibu dxiin galán ni ronyto né gonyxiroʼyibu Bixiosto ni noʼ guibá» (Mateo 5:16).

21 Gudxliogoxreʼ noʼni ló galnacay per buñ ni natzaay xcalnabany rabigaxyibu ronoʼ xcalnaní Jehová. Por ngú, pal napno respet xfamilno, xhermanno né buñchiin sioʼ buñ ni guibiʼ mod nacno né ndeʼ guichiin layibu guiguaʼyibu toibsi né lóono ronoʼ xcalnaní Dios. ¡Nigolú sacroyen pal ñacni scú! Per pal yaca, noʼ galnasác ni racaʼno: ronyno que xcalnabany Jehová rabaladx né tzodieʼno ló xcalnadxiʼbu.

^ Párrafo. 17 Ló apéndice páginas 209 a 212, sieed xidal mod ni guisobno litz reʼ.