Rabiguet

Goyee menú ni rarop lagary

Goyee ro ná índice xtuny contenidos

Testigos xtuny Jehová

diitza

«Tzodieʼto ló xcalnadxiʼ Dios»

 CAPÍTULO 2

¿Ximod labúu gapno toib galrrien nayaa?

¿Ximod labúu gapno toib galrrien nayaa?

«Diti guisian gapto toib galrrien nayaa.» (1 PEDRO 3:16.)

1, 2. ¿Xigony raquiin buñ toib lámpara órni casaa gueʼel, né xigony nacni xomod galrrien?

BUNY pensary de toib buñ, ni laʼga casaa ranás gueʼel láabu ló néz. ¿Xí láani raquiimbu par diti guirel ñeʼbu né tzaguiabbu? Raquiimbu toib lámpara ni guisaní ló néz ro seebu.

2 Pal diti napbu toib lámpara diti labúu sabiʼbu ló néz ro casaabu né labúu tzaguiabbu o noʼ xi gacbu. Lámpara reʼ rasaníni ló néz ro seebu né labúu guilaani láabu. Scúca, Jehová ma biduidy lóono toib galrrascad: galrrien (Santiago 1:17). Pal diti noʼ xcalrrienno diti labúu ganno xi gonyno. Órni raquiinno láani galán, radzelno xi ngú néz galán ro saano né diti sareʼno loni. Mod ma bibiʼno, nacni toib galrrascad ni nigolú rasac ni labúu guicaʼno. Por ngú guisuidyno xi láani ngú galrrien né ximod ronyni dxiin, después guisuidyno: 1) ximod conésno galrrien; 2) xigony coʼno cuent xcalrrien stipnés, né 3) xí galnasác racaʼno órni rapno toib galrrien nayaa.

XÍ NGÚ GALRRIEN NÉ XIMOD RONYNI DXIIN

3. ¿Ximod rabexa diitz griego «galrrien», né órni ranino de galrrien xí raduidyni diitz?

3 Ló la Biblia diitz griego par «galrrien» raduidyni diitz «guimbuno lóocano». Diti noʼ stoib ló Gudxlio ni  Dios bisaʼ ni nap galrrien. Lóono labúu guisagaʼno guibiʼno lóocano nislainy né nisfuer né guibiʼtzayno pal cayonyno xinésni. Galrrien ronyni dxiin ni rony toib juez né labúu rabiʼtzayni ni noʼ lainy xcalnabanyno, ni noʼ guicno gonyno né mod nacno. Ragonésni lóono gonyno cós tzaay o raibyni lóono xi ngú cós tzaay né cós mal. Órni galán ronyno toib cós, galrrien ronyni que rasacno sacró né órni diti ronyno xinésni rasioʼobni lóono.

4, 5. a) ¿Ximod nanno que Adán né Eva gopyibu galrrien, né xí gocyibu órni diti bisobyibu Dios? b) ¿Xí rasetlaa la Biblia de buñ ni bibany Antes de Xtzúno ni bicadiag xcalrrien?

4 Primer buñgudxlio Adán né Eva, Dios goloʼ xcalrrienyibu. Rienni que scú gocni portín bitoyibu mális bichéyibu (Génesis 3:7, 8). Órni bichéyibu ma diti noʼ pu biquiin ni nachiin xcalrrienyibu layibu. ¿Xigony? Portín góc nayaʼyibu nisló Dios ná gonyibu que mal láani. Órni cualóyibu né gocyibu xi enemig Jehová gondxichyibu xi ni bunyibu. Por ngú ma biaʼanyñal ñony reglaryibu láani.

5 Xidal buñ diti rony xomod buny Adán né Eva, ná nacyibu buñ galkié racadiagyibu ni raiby xcalrrienyibu layibu. Ladyibu goyoʼ Job, toib buñguieeu ni buny ni ná Dios, láabu goniʼbu scareʼ: «Naʼ diti sasiana goni ni merpa nac xinésni, né diti saslaʼya láani; xcalnabani diti sagotz dool naʼ» (Job 27:6). * Job bicadiagtzay ni góoch xcalrriembu láabu antes ni nagoʼbu guicbu ñonybu toib cós. Por ngú goniʼtzaybu que  xcalrriembu diti bisioʼob o bituidy láabu ló galnatoy. Per David gadzé mod gosaclóo. Xcalrriembu bisioʼob láabu, portín la Biblia ná que «xcalnabany David diti bisian de bunynaa láabu» órni diti gopbu respet Saúl toib buñguieeu ni Jehová golú (1 Samuel 24:5). Ni bioʼob xcalrriembu nigolú gocnéni láabu, portín bisuidybu gapbu más respet.

6. ¿Xí raslooy que galrrien nacni toib galrrascad par guirá buñ?

6 Diti nosi buñ ni rasob Jehová nap galrrien. Dios golonés Pablo par nacaʼ diitzreʼ: «Guirá ór buñ pagan ni diti nap ley ronyibu por stiplaʼsiyibu cós ni ná ley, layibu, ná diti napyibu ley, nacyibu toib ley par laʼsiyibu. Lacaayibu raslooyibu que ni rasetlaa ley caani lainy xcalnabanyibu, laʼga xcalrrienyibu raniʼ né layibu, né xpensaryibu ronynuty layibu o rony que rasacyibu sacró» (Romanos 2:14, 15). Rioʼ ór buñ ni diti rimbu xitcal xiley Jehová, xcalrrienyibu rony modpa ná xilitz Jehová.

7. ¿Xigony rioʼ ór xcalrrienno diti ronyni dxiin galán?

7 Per rioʼ ór galrrien diti ronyni dxiin galán. ¿Xigony? Bunysi pensary ló lámpara ni ma bisetlano. Órni ma bidopy xquii bateria ni napni ma diti labúu rasaníni ló néz. Scúca rasaclóo xcalrrienno, pal diti rasuidyno Xtiitz Dios diti labúu saduidyno cuent xi ngú cós tzaay né cós mal. Né pal raduidyno lagary que cós mal ni rasobladxno tzoʼ lainy xcalnabanyno, xcalrrienno ranásni stoib néz. Láaca, par gony xcalrrienno dxiin galán raquiinno que espíritu xtuny Dios conés lóono. Xomod goniʼ Pablo: «Xcalrriena raniʼ né naʼ en espíritu santo» (Romanos 9:1). Nigoreʼ, ¿xí láani gonyno né xcalrrienno par gonyni dxiin xomod ná espíritu xtuny Jehová? Xomod guibiʼno nigoreʼ, raquiin conésno láani.

 XIMOD LABÚU CONÉSNO GALRRIEN

8. a) ¿Ximod xcalnabanyno labúu gonyni mal xcalrrienno, né xí más guisac par lóono órni coʼno guicno gonyno toib cós? b) ¿Xigony diti nosi raquiin guinino que napno toib galrrien nayaa? (Bibiʼ ñeʼ guiich.)

8 ¿Ximod guiquiinno xcalrrienno órni coʼno guicno gonyno toib cós? Xidal buñ rony pensary que nosi raquiin guicadiagyibu ni ná xcalnabanyibu. Sigory raniʼyibu: «Xcalrriena raduidy lagary goni láani». Per diti guialadxno que cós ni rasobladx xcalnabanyno nigolú nadipni, né labúu guixinni galrrien. Scú ná la Biblia: «Galnabany ngú ni más rony mal buñ que nitisi cós ni noʼ, diti napni remeidy. ¿Chú labúu guimbu láani?» (Jeremías 17:9). Por ngú, ni más guisac par lóono ngú gonyno ni ná Jehová diti ni ná xcalnabanyno. *

9. ¿Xí raduidy diitz guidzuibyno Dios, né ximod racnéni xcalrrienno par gony dxiin galán?

9 Buñ ni ma bisuidytzay xcalrrien, órni ragoʼ guic gony toib cós diti nosi rioʼ ló galrrasaʼ por láasibu, xalagary ngú rioʼbu ló galrrasaʼ por gonybu láani xomod rioladx Bixiosbu ni noʼ guibá. Scá buny toib buñ ni góc laa Nehemías ni bisob Dios. Láabu buny mandarybu gudx Jerusalén né por ngú labúu nanabbu bidxiich guirá buñ. Per Nehemías diti bunybu scú. ¿Xigony? Láacabu rabexabu láani: «Naʼ diti buni scá por ni radzubi Dios» (Nehemías 5:15). Diti goniiny láabu ñaʼanbu mal nisló Dios por ni natuidybu xcudxbu ló  galrrioʼob. Láaca nigolú rasac que lóono guidzuibyno Dios xomod bunybu láani. Pal ronyno láani scú, órni coʼno guicno gonyno toib cós sabiʼno xi ná la Biblia.

10, 11. ¿Xí litz ni sieed ló la Biblia labúu gacné lóono pal gueeno nís ni notz alcohol, né ximod labúu conés Dios lóono?

10 Nigoreʼ guisuidyno ximod guibiʼno cerves né stipnés nís ni notz alcohol. Pal radopno né xhermanno par gonyno toib galnakit sigory ranabdiitzno lóocano: «¿Gueeya nís ni notz alcohol la?». Primer, non conéstzayno xcalrrienno né xilitz la Biblia. Xtiitz Dios diti raniʼ que mal gueʼ buñ tidxó nís ni notz alcohol, portín ronyxiroʼni Dios ni biduidy vino lóono (Salmo 104:14, 15). Per la Biblia raniʼtzay que mal gueʼgolu buñ né gony lanii ro rac cós yox (Lucas 21:34; Romanos 13:13). Per ni máspa, órni la Biblia rasetlaa galrrasoch ragoʼ láani lad galkié rodann xomod galyoxh né buñ ni ma noʼ tzeʼel ni ratné stoib (1 Corintios 6:9, 10). *

11 Xcalrrien toib ni rasob ni ná Jehová nagochni portín ronyni ni ná xilitz la Biblia. Por ngú órni noʼ ni raruʼ lóono par tzoʼno toib galnakit ro tzoʼ nís ni notz alcohol, non guinabdiitzno lóocano: «¿Ximod gac galnakit cú? ¿Sarecaani mal né sadxin midid gac cós yox ló lanii cú la? ¿Xí clas buñ naca? ¿Nigolú raniiny naʼ gueeya la? ¿Diti labúu rabany sin láani la? ¿Raquiin láani par guisaca sacró né goni mod ni nainy naʼ la? ¿Napa balory guiniya ma reʼti la?». Órni guisuidyno ni ná xilitz la Biblia o nitisi galrranabdiitz ni napno, raquiin guininéno Jehová par ganno ximod conésbu lóono (bíil Salmo 139:23, 24). Modreʼ ranabno  Jehová conés lóono né fuers ni napbu par gonybu ni nábu, modreʼca rasuidytzayno xcalrrienno guidzak xilitz Dios. Láaca órni coʼno guicno gonyno toib cós, noʼ ni non guicaano cuidad.

¿XIGONY RAQUIIN COʼNO CUENT XCALRRIEN STIPNÉS?

Órni la Biblia ma golonés xcalrrienno, láani sacnéni lóono pal gueeno o yaca

12, 13. ¿Xigony diti toibsi mod nac xcalrrien herman, né xí ni gonyno pal diti toibsi mod nac xcalrrienno?

12 Sigory rioʼ ór radziguiaʼno órni rabiʼno que diti guirá herman rony pensary toibsi mod. Noʼ herman ni raniʼ que tipnés costumbres né mod rony stipnés herman mal láani. Per noʼ stipnés herman galán rabiʼ láani. Nigoreʼ guisetlano stoib buelt nís ni notz alcohol, tipnés herman rioladxyibu guiguaʼyibu né ximigyibu né gueʼyibu tidxóyen; per noʼ ni rabiʼ mal láani. ¿Xigony gadzé mod ronyibu pensary, né xigony coʼno cuent mod nac xcalrrienyibu órni gonyno toib cós?

13 Noʼ xidal razón por ni buñ gadzé mod nac xcalrrien, diti guirá buñ goniʼs toibsi mod, noʼ cós ni gosacloyibu ni rony que xcalrrienyibu gacni gadzé mod. Scú láani, noʼ herman ni rasetnaladxtzay que goyoʼ dzú góc nagann par layibu nasianyibu galrrasoch, xidal buelt biabyibu ló galkié reʼ (1 Reyes 8:38, 39). Gonyno pensary que ridguen toib herman lóono, láabu gócbu toib ni gosochgoluʼ né por ngú diti rioladxbu guiniʼbu de nís ni notz alcohol. Pal raruʼno láabu gueʼbu tidxóyen, sigory xcalrriembu labúu gaiby láabu gapbu cuidad né diti guisaguelbu guicaʼbu láani. ¿Sadzuitzno por ni diti rasaguelbu la? ¿Sony lafuersno láabu gueʼbu láani la? Yaca, diti sonyno ngú. Por ni nadxiʼno láabu sapno respet mod ronybu  pensary, ná pal raibybu o diti raibybu lóono xigony diti rasaguelbu.

14, 15. ¿Xí galnagan goyoʼ por ni gadzé mod góc xcalrrien herman ló siglo primero, né ximod golexa Pablo galnagan reʼ?

14 Ló siglo primero, Pablo biduidy cuent que guirá herman ni goyoʼ lainy congregación diti toibsi mod góc xcalrrien. Tipnés herman bibiʼ mal ñoo galrro ni godiʼx buñ nisló dioxh ni godoʼ lainy mercado (1 Corintios 10:25). Per Pablo diti bibiʼbu mal guábu láani. Par láabu dioxh diti bisac, portín galrro nacni xtuny Jehová diti xtuny dioxh. Per biduidybu cuent que diti guirá buñ góc xpensary xomod góc xpensarybu. Goyoʼ tipnés herman antes de nasuidyibu de Jehová bienyibu dioxh né por ngú raduidy yoʼob layibu nitisi cós ni radzak dioxh falz. ¿Ximod goniʼ Pablo guirexa galnagan reʼ?

15 Pablo goniʼ: «Lóono, ni nacno más nadip, non gony guantaryno debilidad xtuny ni diti nac nadip, né diti guiyopyno ni más rioladxno. Portín hasta Cristo diti biyopybu ni más rioladxbu» (Romanos 15:1, 3). Ndeʼ raduidy diitz que xomodca Jesús non coʼno primer lagary ni más galán par xhermanno xalagary gonyno ni nainy lóono. Ló stoib texto, Pablo goniʼ que más galán diti ñoobu beʼel par diti nachelbu ñeʼ stipnés xhermanbu por ni Cristo goity (bíil 1 Corintios 8:13; 10:23, 24, 31-33).

16. ¿Xigony diti gony juzgarno stipnés ni rony cós ni xcalrrienno diti raduidy lagary gonyno?

16 Scú láani, pal stipnés herman rony cós ni diti rioladxno gonyno, diti guinino mal de layibu. Diti gonyno pensary que guiránac buñ gac xcalrrien mod nac xcalrrienno (bíil Romanos 14:10). Galrrien noʼni par gony juzgarni lóocano diti par gony juzgarni stipnés.  Guisetnaladxno diitz ni goniʼ Jesús: «Colguisian de gony juzgarto, par diti tzoʼ ni gony juzgar lóoto» (Mateo 7:1). Guirá ni noʼ lainy congregación diti guitíil saʼ né guiniʼ que nap razón. Ni más guisac par lóono ngú gandxiʼno, gacnéno saʼno né guiguaʼno toibsi, diti guichelno ñeʼ saʼno (Romanos 14:19).

GALNASÁC NI RACAʼNO ÓRNI NAYAA XCALRRIENNO

Toib galrrien nayaa ragonés lóono par guibanyno né ronyni que tzoʼno goxt né guibaladxno

17. ¿Xí láani ma góc né xcalrrien xidal buñ?

17 Pedro bicaʼ diitzreʼ: «Diti guisian gapto toib galrrien nayaa» (1 Pedro 3:16). Toib galrrien nayaa nisló Jehová nacni toib galnasác. Per ló naareʼ diti guirá buñ nayaa xcalrrien. Xomod goniʼ Pablo: «Ma cuá señ ló xcalrrienyibu, suusi ñacni señ ni rony toib hier» (1 Timoteo  4:2). Órni buñ racaʼ hier toib nimal, racaʼyibu toib guip laguii né rasaʼijyibu laidy nimal, ló beʼel ro raʼij racni toib dim. Scúca xcalrrien xidal buñ, ma nacni xomod toib dim. Diti rioʼobni layibu. Por ngú órni ronyibu toib cós mal diti rioʼob xcalrrienyibu, diti ratoyibu né diti noʼ xi rasacyibu. Labúu guinino que ma bichóng xcalrrienyibu né «diti rioʼyibu ló galrrasaʼ» por láani.

18, 19. a) ¿Ximod racné lóono órni xcalrrienno rasioʼob né ratuidy lóono ló galnatoy? b) ¿Xí gonyno pal xcalrrienno diti rasian rasioʼob lóono ná ma godudy scásiʼ xcalkiéno?

18 Xidal buelt órni xcalrrienno rioʼobni raduidyni diitz que noʼ cós mal ni ma bunyno. Pal ragoʼno cuent láani né rasianno mod nacno labúu sadudy scásiʼ xcalkiéno,  ná pal nacni toib galkié rodann. Scú gosaclóo David ni buny mandary. Láabu biabbu ló galkié rodann, per Dios bituidy scásiʼ xcalkiébu portín góc arrepentirbu né guidopy galnabany. Scú láani, bianladxbu cós mal ni bunybu né goloʼbu guicbu guisobbu xiley Dios. Por ngú stipláacabu biduidybu cuent né gochbu Jehová: «Natzaaylo né puext noʼlo par guituidylo galkié scásiʼ» (Salmo 51:1-19; 86:5). Rioʼ ór galrrioʼob ni rasac xcalrrienno né galnatoy diti rasian rachiin lóono ná ma góc arrepentirno né ma godudy xcalkiéno scásiʼ. ¿Xí labúu gonyno ór cú?

19 Órni ma bisianno mod nacno ma diti noʼ pu raquiin guioʼob xcalrrienno. Per pal xcalnabanyno rasioʼobsa lóono non guisetnaladxno que Jehová más xiroʼ que ni rasacno. Ór cú non gonyno ni rioʼ ór raibyno a stipnés buñ: «Naplo xi de guisetnaladxlo que Jehová nadxiʼ looy né goloʼ guiclo que ma bituidybu scásiʼ xcalkiélo» (bíil 1 Juan 3:19, 20). Órni ma nayaa xcalrrienno sioʼno goxtiguie, sabaladxno né sacró sasacno, diti guirá buñ rasac scú. Xidal buñ ni biab ló galkié rodann, nigoreʼ ma rasacyibu sacró, né ló naareʼ ronyibu xchiin Jehová né toib galrrien nayaa (1 Corintios 6:11).

20, 21. a) ¿Xigony goyaʼ libro reʼ? b) ¿Xí permís ma biduidy Jehová lóono, né ximod guiquiinno láani?

20 Libro reʼ goyaʼni par gacnéni lóono guibaladxno né gapno toib galrrien nayaa laʼga cacalóno xcudxliogox Buñdzab ló dzú ni ma cadubylagaʼ. Per libro reʼ diti sitné guiránac leyes né litz ni sieed ló la Biblia ni ná ximod guicalóno guirá galnagan dzúna dzú. Órni láani raniʼni de galrrien, diti raibyni lóono xi labúu gonyno né xi diti labúu gonyno guirá ór. Ni ronyni ngú, racnéni lóono ximod guisobno ni rasuidy Xtiitz Dios,  né modreʼ ragonésni né rascochni xcalrrienno. Diti guialadxno que Ley xtuny Moisés goniʼ guisob buñ modpa sieed ló leyes. Per «xiley Cristo» noʼni par guiquiinno xcalrrienno né guiduidyno lagary conés xilitz la Biblia lóono (Gálatas 6:2). Scú láani, Jehová raduidy xiroʼ lagary gonyno ni náni lóono. Per la Biblia raruʼ que diti guiquiinno permís reʼ «par gonyno cós mal» (1 Pedro 2:16). Non guiquiinno permís ni ma biduidy Jehová lóono par guislooyno balaati nadxiʼno láabu.

21 Órni gosalólo bimbulo Jehová, gosaalo ló néz par guibanylo. Par diti guireʼlo ló nézcu raquiin gonylo pensary né guininélo Dios ximod guiquiinlo litz ni sieed ló la Biblia né ximod guisoblo láani. Modreʼ saclo xomod toib buñ ni raquiin «xcalrrien par gony dxiin guirá ór» (Hebreos 5:14). Órni ma golonéslo xcalrrienlo né xcalrracné xilitz la Biblia nigolú sacnéni looy. Xomod toib lámpara ni rasaní ro casaalo, xcalrrienlo labúu gacné looy gonylo ni rioladx Bixioslo ni noʼ guibá. Né láaca sacnéni looy tzodieʼlo ló xcalnadxiʼ Dios.

^ Párrafo. 5 Ló Escrituras Hebreas ni toib buelt sieed toib diitz ni ná «galrrien». Per riendxichni que raniʼni de galrrien. Diitzreʼ «galnabany» casi guirá ór rarexani xomod ni nacno nislainy. Per ló texto reʼ né ló stipnés rientzaayni que raniʼni de galrrien. Ló Escrituras Griegas noʼ toib diitz par «galrrien», né sieedni gahxca treint buelt.

^ Párrafo. 8 La Biblia rasuidy que diti nosi raquiin guinino que nayaa xcalrrienno. Guibiʼno ximod goniʼ Pablo: «Diti noʼ cós ni ragotz dool naʼ. Per diti por ngú raniya que cayóni xinésni, portín ni rabiʼtzay naʼ ngú Jehová» (1 Corintios 4:4). Tipnés buñ ronynaa cristianos xomod buny Pablo, né ná scú diti rioʼob xcalrrienyibu portín xpensaryibu cayonyibu ni ná Dios. Por ngú, ni más rasac ngú gapno toib galrrien nayaa nisló Dios (Hechos 23:1; 2 Timoteo 1:3).

^ Párrafo. 10 Xidal doctor raniʼ que buñ ni gosochgoluʼ né ma bisian láani diti labúu gueʼyibu ná «tidxóyensi».