Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

«Tzodieʼto ló xcalnadxiʼ Dios»

 CAPÍTULO 5

Ximod diti gacno toibsi né gudxliogoxreʼ

Ximod diti gacno toibsi né gudxliogoxreʼ

«Lóoto diti nacto de gudxliogoxreʼ.» (JUAN 15:19.)

1. ¿Xí láani goleʼ loguiaʼ Jesús órni ma yaaca gaity?

GUEʼEL órni ma yaaca gaity Jesús, bislooybu que goyoʼbu ló galrrasaʼ xí guisaclóo xpiimbu ló dzú ni sietra. Láabu gonabbu lóo bixiosbu ndeʼ: «Diti canaba looy cueʼlo layibu ló gudxliogoxreʼ, xalagary ngú gon layibu xtol ni nigolú mal. Layibu diti nacyibu de gudxliogoxreʼ, xomodca naʼ diti naca de gudxliogoxreʼ» (Juan 17:15, 16). Ló diitz ni goniʼbu bislooybu balaati gondxiʼbu xpiimbu né balaati gosac diitz ni bisetlabu gueʼel cú, órni goniʼbu ndeʼ: «Lóoto diti nacto de gudxliogoxreʼ» (Juan 15:19). ¡Riendxichni que par Jesús nigolú gosac que xpiimbu diti ñac toibsi né gudxliogoxreʼ!

2. ¿Xí láani ngú «gudxliogox» ni goniʼ Jesús?

2 «Gudxliogox» ni bisetlaa Jesús nacni guirá buñ ni noʼ sit de Dios ni Buñdzab rony mandary, ni rioʼ ló galrrasaʼ nosi por ni caquiin né nac buñ farmay xomod Buñdzab (Juan 14:30; Efesios 2:2; 1 Juan 5:19). Por ngú, «ni rac ximig gudxliogoxreʼ rac xi enemig Dios» (Santiago 4:4). Per ¿ximod buñ ni nabany ló gudxliogoxreʼ né ná tzodieʼ ló xcalnadxiʼ Dios diti rac toibsi né láani? Guisuidyno gáay cós ni guisien lóono: tzoʼno xilad Gobierno xtuny Dios ni noʼ ladxña Cristo diti xilad partid, cueʼno tiplad espíritu xtuny gudxliogoxreʼ, guicaano cuidad mod ractzayno, guibanyno senciysi né guicaʼno guirá ni ma biduidy Dios lóono.

 TZOʼNO XILAD DIOS DITI XILAD PARTID

3. a) ¿Goyoʼ Jesús lad partid ni goyoʼ ló xtzúbu la? b) ¿Xigony ná la Biblia que buñ ni gony mandary lainy guibá, goyoʼ ni bixel layibu ló Gudxlio? (Bibiʼ ñeʼ guiich.)

3 Xalagary ñoʼ Jesús lad partid ni goyoʼ ló xtzúbu, láabu nosi goniʼbu de Gobierno xtuny Dios, Gobierno ni noʼ guibá ni gony mandarybu ló (Daniel 7:13, 14; Lucas 4:43; 17:20, 21). Por ngú órni bidxinbu nisló Poncio Pilato ni buny mandary, goniʼbu: «Gobierno xtuni diti nacni de gudxliogoxreʼ» (Juan 18:36). Lóono rasuʼno mod ni bisiambu órni noʼno xiladbu, órni noʼno xilad Gobierno xtunybu né órni ranino de Gobierno reʼ ló guidopynac Gudxlio (Mateo 24:14). Por ngú Pablo bicaʼ diitzreʼ: «Goyoʼ ni bixel lóodo par guinido xcuent Cristo [...]. Noʼdo xcuent Cristo, por ngú ranabdo: Colguiguaʼ sacró né Dios» (2 Corintios 5:20). *

4. ¿Ximod ma bislooy buñ ni racanal Jesús que noʼyibu xilad Gobierno xtuny Dios? (Bibiʼ cuadriyen ni sieed ló  página 52.)

4 Embajadores órni rieeyibu stoib gudxrop rony representaryibu xcudxyibu. Por ngú layibu diti rioʼyibu lad partid de gudx ro cayonyibu dxiin. Ná noʼyibu stoib gudx rioʼyibu xilad xcudxbu. Scúca rony buñ ni guiee guibá, ni racanal Cristo. Por ngú raniʼyibu: «Nacdo de guibá» (Filipenses 3:20). Por ni nadip raniʼyibu de Gobierno xtuny Dios ma labúu gocnéyibu xidalguixo de «stipnés xiil» par guiguaʼ sacró né Dios (Juan 10:16; Mateo 25:31-40). Xidalguixo buñ ni guibany ló Gudxlio racnéyibu xherman Cristo ni guiee guibá. Racyibu toibsi né rioʼyibu xilad Gobierno xtuny Cristo. Guiropca grupo reʼ diti rioʼyibu lad partid ni noʼ ló gudxliogoxreʼ (bíil Isaías 2:2-4).

5. ¿Xigony herman ni noʼ ló naareʼ diti nacyibu xomod gudx Israel ni goyoʼ nírcu, né ximod rienni que scú nacni?

 5 Cristianos diti nosi por ni rioʼyibu xilad Cristo ma bireʼyibu lad gudxliogoxreʼ, láaca noʼ stipnés razón por ni diti ronyibu láani. Lóono diti nacno xomod gudx Israel  ni bibany ló toibsi gudx ni Jehová biduidy layibu. Xhermanno noʼ ló guidopynac Gudxlio (Mateo 28:19; 1 Pedro 2:9). Por ngú pal ñoʼno xilad toib partid, diti labúu naguaʼno toibsi né xhermanno né diti labúu nanino de Gobierno xtuny Dios a guirá clas buñ (1 Corintios 1:10). Láaca órni nasaló toib guerr nacalóno xhermancano ni la Biblia raxel gandxiʼno (Juan 13:34, 35; 1 Juan 3:10-12). ¡Nigoreʼ rientzaayno xigony Jesús góoch xpiin que diti guigaity saʼ, xalagary ngú goniʼbu que gandxiʼyibu buñ ni bianladx layibu! (Mateo 5:44; 26:52; bibiʼ cuadriyen ni ná « ¿Raca toibsi né gudxliogoxreʼ la?», ni sieed ló página 55.)

6. ¿Ximod rasobno César por ni ma góc dedicarno Dios?

6 Lóono góc dedicarno Dios, diti a toib buñgudxlio, toib grupo, o toib gudxrop. Por ngú, 1 Corintios 6:19, 20 náni: «Diti rony mandaryto lóocato, portín noʼ ni gosiʼ lóoto». Ná ronyxiroʼno «César», raguiixno impuestos né rasobno dada ro labúuni lóono, ni non gonyno ngú guiduidyno «Dios cós ni nasapy[no] Dios» (Marcos 12:17; Romanos 13:1-7). Ndeʼ raduidy diitz guienno né gandxiʼno láabu né guidopy xcalnabanyno, guisobno, tzoʼno xiladbu né hasta gaityno pal raquiin gonyno láani (Lucas 4:8; 10:27; bíil Hechos 5:29; Romanos 14:8).

CUEʼNO TIPLAD «ESPÍRITU XTUNY GUDXLIOGOX»

7, 8. ¿Xí láani ngú «espíritu xtuny gudxliogox», né ximod «rakíil» espíritu reʼ buñgudxlio?

7 Stoib mod ni diti gacno toibsi né gudxliogoxreʼ ngú cueʼno tiplad espíritu mal reʼ. Por ngú Pablo bicaʼ que diti racaʼno «espíritu xtuny gudxliogox, xalagary ngú racaʼno espíritu ni sieed de Dios» (1 Corintios 2:12). Né gochbu guirá herman de Éfeso que goyoʼ dzú bunyibu «xomod rony gudxliogoxreʼ, xomod ni rony mandary buu, espíritu ni rony dxiin nigoreʼ noʼni ló guirá xiin ni nayaʼ» (Efesios 2:2, 3).

 8 «Buu» o espíritu xtuny gudxliogoxreʼ láani ngú toib fuers ni diti rabiʼno ni rachiin buñ gac nayaʼ nisló Dios, né rachiinni buñ gony «ni raniiny beʼel laidy buñ gony né ni raniiny bisaló buñ gony» (1 Juan 2:16; 1 Timoteo 6:9, 10). ¿Xigony espíritu reʼ rony mandaryni buñgudxlio? Portín rachiinni buñgudxlio gony galkié, noʼni nagach, guirá ór ronyni dxiin né nacni xomod buu ni racaʼno. Né ¿ximod «rakíil» espíritu reʼ buñ? Ronyni que buñ gac buñ farmay, buñ ni rioʼ galrrasaʼ nosi por ni caquiin, buñ ni rasobladx, buñ ni diti ná tzoʼ xan xomandary stipnés né buñ nayaʼ. * Ló tidxósi diitz, espíritu xtuny Buñdzab dxoga dxoga raniʼsni lainy xcalnabany buñ (Juan 8:44; Hechos 13:10; 1 Juan 3:8, 10).

9. ¿Ximod labúu guiaʼis espíritu xtuny gudxliogoxreʼ lainy xpensaryno né lainy xcalnabanyno?

9 ¿Labúu guiaʼis espíritu reʼ lainy xpensaryno né lainy xcalnabanyno la? Labúu, pal raduidyno lagary láani (bíil Proverbios 4:23). Espíritu reʼ nagach rasaló radxinni ronoʼno órni rasaló radzakno buñ ni ralooypa diti nac mal, per diti nadxiʼyibu Jehová (Proverbios 13:20; 1 Corintios 15:33). Láaca labúu guicaʼno espíritu mal reʼ ló Internet ro sieed galyoxh, ló guiich xtuny apóstatas, ló galnakit ni diti noʼ pu racné lóono, galrraguit ro pórsi lóono nainy gonyno gan né nitisi buñ o cós ni raslooy que nap xpensary Buñdzab né xpensary gudxliogoxreʼ.

10. ¿Ximod labúu cueʼno tiplad espíritu xtuny gudxliogoxreʼ?

10 ¿Ximod labúu cueʼno tiplad espíritu xtuny gudxliogoxreʼ né tzodieʼno ló xcalnadxiʼ Dios? Nosi labúu gonyno láani pal racacuentno guirá ni Jehová raduidy lóono par gac nadip fe xtunyno né pal ranabno láabu guirási ór espíritu xtunybu. Jehová más nadipbu que Buñdzab né  gudxliogox ni noʼ xan xomandary Buñdzab (1 Juan 4:4). ¡Nigolú rasac guibigaxno Jehová órni guininéno láabu!

GUICAANO CUIDAD MOD RACTZAYNO

11. ¿Ximod espíritu xtuny gudxliogoxreʼ ma bixinni mod ractzay buñ?

11 Toib mod ni rien que buñ nap espíritu xtuny gudxliogoxreʼ ngú mod ractzay, mod roc lairy né pal nac buñ  nayaa o yaca. Ló xidal gudxrop mod roc buñ lairy ma bixinni. Por ngú, toib buñ ni rareʼ ló televisión nábu que mod nac ló naareʼ, buñgonaʼ yox ma diti sadzel xi clas lairy guac par guibiʼ buñ layibu. Toib periódico láaca bisetlaa que pensary reʼ rarexani ló chop tzónsi diitz: «Tidxósi lairy, tidxósi galnatoy». Dada mbioxgonaʼyen ni diti ma nac mbioxhlas roc lairy de clas reʼ. Buñ láaca cuenunysi rioladx guac lairy ni raslooy que nacyibu buñ nayaʼ. Lairy de clas reʼ raduidy diitz que diti napyibu respet né diti nadxiʼyibu láacayibu.

12, 13. ¿Xí litz guicanalno órni gactzayno?

12 Lóono ni ronyno xchiin Jehová rioladxno que stipnés gony pensary sacró de lóono por mod ractzayno, lairy nayaa ni rocno, lairy ni rien sacró, né lairy ni raquiinno par cada lagary ro tzoʼno. Guirási ór mod ni ractzayno guiduidyni diitz que nacno buñ ni racaa cuidad né ragoʼ xcalrrien, né ndeʼ gacni toibsi né «dxiin galán» ni cayonyno par gonyxiroʼno Dios. Diti rayopyno que buñ guidziguiaʼ lóono, xalagary ngú raniiny tzodieʼno «ló xcalnadxiʼ Dios» (1 Timoteo 2:9, 10; Judas 21). Scú láani, par guienno sacró raquiin gacno buñ natzaay desde lainy xcalnabanyno portín ndeʼ «nigolú rasac nisló Dios» (1 Pedro 3:3, 4).

13 Guisetnaladxno que mod rocno lairy né mod ractzayno, labúu gonyni que stipnés buñ guibiʼ sacró religión ni rony xinésni. Diitz griego ni ná que buñ «guicaa cuidad» mod ractzay, raslooyni gonyxiroʼno o gapno respet mod rasac o mod nac xpensary stipnés. Por ngú, galán coʼno cuent ni rony pensary stipnés buñ né diti gonyno ni nainy lóono. Par lóono ni más rasac ngú, gonyxiroʼno Jehová né xcudxbu né stipnés buñ guibiʼ que cayonyno xchiimbu. Nainy gonyno guirá cós par gonyxiroʼno Dios (1 Corintios 4:9; 10:31; 2 Corintios 6:3, 4; 7:1).

Mod ni ractzaya, ¿ronyxiroʼni Jehová la?

14. ¿Xí non guinabdiitzno lóocano por mod ni ractzayno né por mod nacno?

 14 Órni rasaano yoʼ por yoʼ o órni rioʼno reunión nigolú raquiin que xhapno gacni nayaa né gactzayno sacró. Por ngú non guinabdiitzno lóocano: «¿Stipnés buñ rabiʼ naʼ por mod nac lairy ni nóca o por ni diti naca buñ nayaa la? ¿Ratoy stipnés buñ saa né naʼ la? ¿Xí láani rasac más par naʼ: guaca lairy mod ni nainy naʼ o goni cós tzaay par gapa más privilegio lainy congregación la?» (Salmo 68:6; Filipenses 4:5; 1 Pedro 5:6.)

15. ¿Xigony diti sieed ló Xtiitz Dios xí claspa lairy guacno o ximodpa gacno buñ nayaa né ximod gactzayno?

15 Ló la Biblia Jehová diti raiby lóono xi claspa lairy guacno o ximodpa gacno buñ nayaa né ximod gactzayno. ¿Xigony? Portín Jehová diti racaa lóono gonyno mod ni nainy lóono. Láabu rioladxbu que gacno buñ ni nan xi láani gony, buñ ni ragoʼ guic gony xomod ná xilitz la Biblia, buñ «ni ma bisaʼ xcalrrien par gony dxiin guirá ór né labúu gan xí ngú cós tzaay né xí ngú cós mal» (Hebreos 5:14). Per ni máspa Jehová raniiny que guirá ni gonyno gacni por ni nadxiʼno láabu né nadxiʼno saʼno (bíil Marcos 12:30, 31). Permís ni napno ronyni que labúu guidzelno ximod gactzayno né xi clas lairy guacno. Par guiduidyno cuent ximod nacni, nosi raquiin  tzoʼno samblia ni nap testigos xtuny Jehová ló xidal gudxrop par guibiʼno xidal color de xhapyibu né ximod raguaʼyibu goxt.

GUIBANYNO SENCIYSI

16. ¿Xigony espíritu xtuny gudxliogoxreʼ diti radzakni xcalrrasuidy Jesús, né xí guinabdiitzno lóocano?

16 Espíritu xtuny gudxliogoxreʼ nigolú rascúni né rachiinni xidalguixo buñ guiyopy galnakit ló bidxiich né ló stipnés cós. Per Jesús goniʼ: «Ná órni buñ nap xiroʼgolu cós, láani diti ronyni que buñ guibany» (Lucas 12:15). Jesús diti godudy ló midid né diti goniʼbu que buñ guibany ló galsii o diti labúu siʼ xitcal. Láabu bisuidybu que nosi buñ ni labúu rabany goxt né labúu ralaa ngú «buñ ni nan que non guiyopy Dios» né buñ ni rabany senciysi, ndeʼ raduidy diitz que ni más rasac ngú  guidzakno Dios (Mateo 5:3; 6:22, ñeʼ guiich). Por ngú guinabdiitzno lóocano: «¿Nigolú raluladxi ni bisuidy Jesús o raluladxi ni ná bixios galmoxter la?» (Juan 8:44). «¿Xí raslooy diitz ni raniya, ni noʼ guica goni, ni ragoʼya primer lagary né mod nabani?» (Lucas 6:45; 21:34-36; 2 Juan 6.)

17. Bisetlaa tipnés galnasác ni racaʼ buñ ni nabany senciysi.

17 Jesús goniʼ: «Buñ ni noʼ xcalrrien rien que napbu láani por ni ronybu» (Mateo 11:19). Por ngú buñ ni senciysi nabany racaʼ xidal galnasác. Layibu rabanyibu goxt por ni ronyibu xchiin Dios (Mateo 11:29, 30). Ndeʼ racné layibu par diti tzoʼyibu ló xiroʼ galrrasaʼ né diti tudyibu ló xiroʼ galrrioʼob (bíil 1 Timoteo 6:9, 10). Napyibu más tiemp par xfamilyibu, par xhermanyibu né rioʼyibu conforma né ni napyibu par tudyibu dzú. Por ngú dada raisyibu más sacró (Eclesiastés 5:12). Rabanyibu más goxt portín raquiinyibu xtiempyibu né cós ni napyibu par gacnéyibu saʼyibu (Hechos 20:35). Láaca napyibu xiroʼ «esperanza», né rioʼyibu goxt né rabaladxyibu (Romanos 15:13; Mateo 6:31, 32). Nigolú, ¡guirá galnasác reʼ rasacgoluʼni!

GUIQUIINNO «GUIRÁ NI MA BIDUIDY DIOS» LÓONO PAR GUICALSAʼNO

18. ¿Xí ná la Biblia de xi enemigno, mod racalóbu né mod ni racalsaʼno láabu?

18 Pal noʼno ló xcalnadxiʼ Jehová, salaabu lóono de Buñdzab, portín Buñdzab diti raniiny guiguaʼno goxt né guibanyno tipzó (1 Pedro 5:8). Pablo bicaʼ: «Cacalsaʼno né toib ni diti nac de runy né de beʼel, cacalsaʼno guirá ni rony mandary, guirá buñchiin, cacalsaʼno a guirá ni rony mandary guidopynac gudxlio ni noʼ ló galnacay, cacalsaʼno demony ni noʼ guibá» (Efesios 6:12). Diitz griego ni ná «cacalsaʼno» diti raduidyni diitz órni buñ  cadíil sit de saʼ o noʼ nagach lainy toib garió, xalagary ngú, raduidyni diitz órni chop buñ canás saʼ. Per diti ngúsi, órni rasetlani ni «rony mandary», «buñchiin» né «ni rony mandary guidopynac gudxlio» raduidyni diitz que guirá demony ni cacalsaʼ né lóono, toibsi ronyibu dxiin né nompa rayopyibu mod par guicalóyibu lóono.

19. Golexa xí láani ngú guirá ni ma biduidy Dios lóono par guicalsaʼno.

19 Ná nacno buñ galkié ni raché guirá ór, labúu gonyno gan. ¿Ximod? Pal raquiinno «guirá ni ma biduidy Dios» lóono par guicalsaʼno (Efesios 6:13). Ndeʼ rarexa ló Efesios 6:14-18 ni ná: «Por ngú colguisagaʼ dxiich, dxiich colguixiʼ faj lainyto ni nac ni nigolú, né colguiquiin guip ni rap ladxdaʼto ni nac xinésni, né ñeʼto tzoʼni puext par guiniʼto diitz sacró de paz. Per ni máspa, colguicaʼ escudo xiroʼ de fe xtunyto, né láani labúu guisioʼyto guirá flech ni nap guii ni sieed de ni nigolú mal. Láaca, colguicaʼ yelmo ni ralaa, né espad xtuny espíritu, ni nac xtiitz Dios, né diti guisian guininéto Dios né colguinabgoluʼ lóbu guirá ór né espíritu».

20. ¿Xigony diti nacno xomod soldad ni riee ló guerr?

20 Guirá ni ma biduidy Dios par guicalsaʼno, sacnéni lóono pal raquiinno láani guirá ór. Lóono diti nacno xomod soldad ni riee ló guerr portín rioʼ ór rasaladxyibu xidzú laʼga diti noʼ guerr, per lóono cacalsaʼno né xi enemigno dzúna gueʼel. Galrradíil reʼ saloxni órni Dios guinitló xcudxliogox Buñdzab né guisieg láabu toibsi né xidemonybu (Revelación 12:17; 20:1-3). Por ngú, pal nigoreʼ galkié né xcalnabanylo cachiin looy gonylo cós mal, diti guireʼganlo. Portín guiráno napno xi de gony lafuersno lóocano par diti guisianno Jehová (1 Corintios 9:27). ¡Tzoʼno ló galrrasaʼ pal diti cayonyno xitcal!

21. ¿Nosi ximod labúu gonyno gan galrradíil ni napno?

 21 Scú láani, diti labúu sonyno gan por stiplóocano. Por ngú, Pablo raiby lóono que raquiin guinabno lóo Jehová «guirá ór né espíritu». Láaca raquiin guicadiagno Jehová órni golno Xtiitzbu né guidzakno xhermanno ni láaca cacalsaʼ né Buñdzab. Xomod ma bisuidyno diti noʼno toibno (Filemón 2; Hebreos 10:24, 25). Pal ronyno ndeʼ diti nosi sonyno gan, láaca dzúna dzú labúu sanino ni ronyno crer nisló stipnés buñ órni tzoʼ ni guiniʼ mal de láani.

TZOʼNO PUEXT GUININO DE FE XTUNYNO

22, 23. a) ¿Xigony non tzoʼno puext guinino de fe ni napno, né xí non guinabdiitzno lóocano? b) ¿Xí guisuidyno ló capítulo ni sietra?

22 Jesús goniʼ: «Portín lóoto diti nacto de gudxliogoxreʼ, [...] gudxliogoxreʼ rianladx lóoto» (Juan 15:19). Por ngú non guinino de fe xtunyno, né guiyopyno mod gonyno láani nadaʼa (bíil 1 Pedro 3:15). Raquiin guinabdiitzno lóocano: «¿Rientzaaya xigony testigos xtuny Jehová rioʼ ór diti ronyibu guirá ni rony buñ la?». «Órni diti roni xomod stipnés buñ, ¿napa confianz que la Biblia né mós ni rony xinésni né naní xcalrrien nap razón la?» (Mateo 24:45; Juan 17:17.) «Né órni napa xi de tzoʼya xilad Jehová, ¿raslooya que noʼya puext par gaca gadzé clas buñ né rabaladxi portín nacni scú la?» (Salmo 34:2; Mateo 10:32, 33.)

23 Buñdzab láaca nigolú rayopy mod par coʼbu lóono ló prueby órni ragoʼno guicno diti gacno toibsi né gudxliogoxreʼ. Xomod ma bisuidyno, Buñdzab rayopy mod guichéno né raquiimbu galnakit de pór cós yox. ¿Ximod labúu cuuno galnakit ni natzaay ni gacné lóono né ni diti guisioʼob xcalrrienno? Guisuidyno ndeʼ ló capítulo ni sietra.

^ Párrafo. 3 Desde ló Pentescostés de íz 33 L.X., Cristo rony mandary buñ ni guiee guibá ni noʼ ló Gudxlio (Colosenses 1:13). Ló íz 1914, Cristo cuaʼ «gobierno xtuny gudxliogox». Por ngú buñ ni guiee guibá goyoʼ ni bixel layibu né nacyibu xtuny Gobierno ni noʼ guibá (Revelación 11:15).

^ Párrafo. 8 Bibiʼ libro Razonamiento a partir de las Escrituras, páginas 140 a 144, ni rabeʼ testigos xtuny Jehová.

^ Párrafo. 65 Bibiʼ apéndice ni sieed ló páginas 212 a 215.