Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

«Tzodieʼto ló xcalnadxiʼ Dios»

 CAPÍTULO 17

«Colguisaʼ lóocato ló fe nayaa xtunycato»

«Colguisaʼ lóocato ló fe nayaa xtunycato»

«Colguisaʼ lóocato ló fe nayaa xtunycato [...] tzodieʼto ló xcalnadxiʼ Dios.» (JUDAS 20, 21.)

1, 2. ¿Xí láani casaʼno, né xigony nigolú rasac guibiʼno guirecaa dxiinreʼ galán?

NADIP cayonylo dxiin portín casaʼlo toib yoʼ. Ma xidzú de goló cayonylo láani né huasera dxiinreʼ. Dada nigoreʼ dxiin ni cayonylo nigolú naganni. Per ná scú nacni looy diti rareʼganlo né ragoʼlo guiclo guisloʼoxlo láani. Nainy looy gonylo dxiin galán, portín láani gonyni que guibanylo ló naareʼ né ló dzú ni sietra. ¿Xigony? ¡Portín yoʼ cú looyca láani!

2 Toib xpiin Jesús ni góc laa Judas bisetlabu dxiin ni lóocano non gonyno né lóono. Órni gochbu herman diitzreʼ: «Tzodieʼto ló xcalnadxiʼ Dios», né looca texto reʼ goniʼbu xí raquiin gonyno órni goniʼbu: «Colguisaʼ lóocato ló fe nayaa xtunycato» (Judas 20, 21). ¿Ximod labúu guisaʼno lóocano par labúu tzodieʼlo ló xcalnadxiʼ Dios? Nigoreʼ guisuidyno tzón mod ni labúu guisaʼno lóocano par guibigaxno Jehová.

CONFIANZ GAC NADIPNI MÁS LÓ GUIRÁ NI RONY MANDARY JEHOVÁ

3-5. a) ¿Ximod raniiny Buñdzab guibiʼno xiley Jehová? b) Bislooy ximod labúu guibiʼno xiley Jehová né ximod guisacno pal rabiʼno láani scú.

3 Primer raquiin gony nadipno fe xtunyno ló xiley Dios. Ló libro reʼ ma bisuidyno xidal cós ni xiley Jehová  ranab gonyno. Per ¿ximod rabiʼno láani? Buñdzab raniiny guiluladxno que guirá xiley né xilitz Jehová né ni rony mandarybu diti raduidyni lagary gonyno ni nainy lóono né nigolú nanoyni. Láabu ma biquiimbu tramp reʼ né birebuʼni lainy lagary móz ni góc laa Edén (Génesis 3:1-6). ¿Sarebuʼni né lóono nigoreʼ la? Ma riaʼanni en lóono ximod rabiʼno guirá ni rony mandary Jehová.

4 Par guienno láani guislooyno láani modreʼ: ro casaano lainy toib lagary sacroyen, rabiʼno toib leʼ nasoʼ ni dxiich goyaʼ, né láani diti raduidyni lagary tudyno lainy stoib lagary sacroyen. Primer moda diti rioladxno xigony nayegni. Per órni raguixlóno raduidyno cuent que lainy leʼ cú noʼ toib betz ni calangoluʼ. Nigoreʼ rabaladxno que napni toib leʼ par diti noʼ xi gacno. ¿Noʼ toib betz ni calangoluʼ ló naareʼ la? Xtiitz Dios raiby lóono: «Colcoʼ xcalrriento, ¡nanísi colguiguaʼ! Xi enemigto, Buñdzab, casaa xomod toib betz ni cacaʼ rudx, ni cayopy ni guá» (1 Pedro 5:8).

5 Buñdzab nac xomod toib betz ni calangoluʼ né diti rap laxtima. Jehová diti raniiny que tzaguiabno ladxña Buñdzab, por ngú ma bisiambu xileybu par gapni lóono de guirá «xcalmañós Buñdzab» ni nac nigolú mal (Efesios 6:11). Scú láani órni ronyno pensary ló xiley Dios, non guibiʼno láani que noʼni por ni nadxiʼ Jehová lóono. Pal rabiʼno láani scareʼ, xiley Dios sony que guibanyno sacró né goxt. Por ngú Santiago bicaʼ: «Buñ ni rony ni ná ley ni diti raché ley ni raduidy lagary gonyno ni nainy lóono, né buñ ni diti rasian láani, [...] sioʼ nakitbu pal ronybu láani» (Santiago 1:25).

6. ¿Xí galán mod noʼ par gac nadip confianz ni napno ló xiley né xilitz Dios? Golexa láani.

6 Toib mod galán ni gony nadipno confianz ni napno ló xiley Jehová, Dios ni Raduidy Ley, ngú guisobno láani  guirá dzú laʼga nabanyno. Láaca raquiin guisobno «xiley Cristo» ndeʼ raduidy diitz guisuidyno stipnés buñ «guirá ni bisuidy» Jesús lóono (Gálatas 6:2; Mateo 28:19, 20). Lóono ni racanalno Jesús raquiin guidopno par gony adorarno Dios xomod rac mandary lóono né guibaladxno órni guiguaʼno toibsi né xhermanno (Hebreos 10:24, 25). Xiley Dios láaca rony mandary lóono guininéno láabu guirá ór né guidopy galnabany (Mateo 6:5-8; 1 Tesalonicenses 5:17). Órni rasobno ni rony mandary Jehová, raduidyno cuent que láabu ronladxbu lóono. Modreʼ nigolú rabaladxno né rioʼno goxt ná rabésno ló toib Gudxlio ni diti labúu raduidy xitcal lóono. Né nantzayno que confianz ni napno ló xiley Jehová rac nadipni más órni ronyno pensary mod racné guirá ni rony mandary Jehová lóono.

7, 8. ¿Ximod racné Xtiitz Dios lóono par diti tzoʼno ló galrrasaʼ guichéno ló xileybu conforma tudy íz?

7 Noʼ buñ ni rioʼ ló galrrasaʼ que conforma tudy íz nigolú nagann sac par layibu guisobyibu ni ná xiley né xilitz Dios. Radzuibyibu guichéyibu nisló Jehová. Pal rasacno modreʼ, guisetnaladxno diitzreʼ: «Naʼ, Jehová, Dios xtunylo, ni rasuidy looy par gacnéni looy, ni rony que saalo  ló néz ni non saalo. ¡Pal looy nacálo cuidad mandary ni napa! Paz ni naplo nadxin ñacni xomod nís ni nap toib guʼuc né justicia xtunylo ñacni xomod xcuann nís ni noʼ ló nisdaʼ» (Isaías 48:17, 18). ¿Ma bunyno pensary balaati racné diitzreʼ lóono la?

8 Ló texto reʼ Jehová raiby lóono que pal rasobno láabu sacnéni lóono. Láabu raduidybu xtiitzbu que sacaʼno chop clas galnasác pal ronyno láani. Primer, paz xtunyno sadxin sácni xomod toib guʼuc: ni noʼ dzuu, ni nap siil nís né ni caxony. Ni rarop, justicia xtunyno sácni xomod xcuann nís ló nisdaʼ. ¿Ximod nacni scareʼ? Pal rasagaʼno né rabiʼno ximod rac xcuann nís ló nisdaʼ, ronyni que rasacno que scú gacni guirá ór. Por ngú texto reʼ raniʼ que justicia xtunyno —o mod nabanyno gacni xomod ranab Dios lóono— labúu gacni por tipzó xomod xcuann nís ni noʼ ló nisdaʼ. ¡Pal ronyno xtem por gacno buñ ni diti raché nisló Jehová, láabu dipa saduidybu lagary guirel ñeʼno! (Bíil Salmo 55:22.) Órni rasuidyno ni ná diitzreʼ rac nadip confianz ni napno lóo Jehová né ló xileybu.

«GACNO BUÑ NI NADIP XFE»

9, 10. a) ¿Xigony ni gac nadip fe ni napno raquiin gonyno láani? b) Ni gac nadip fe ni napno, ¿ximod ronyno que tzoʼno goxt?

9 Ni rarop mod guisaʼno lóocano ngú rarexani ló texto reʼ ni ná: «Gonyno por gacno buñ ni nadip xfe» (Hebreos 6:1). Lóono ni racanalno Jesús raquiin coʼno guicno gonyno láani. Ló naareʼ diti labúu gacno buñ ni diti nap galkié, per guiráno labúu niʼs fe xtunyno. Né conforma gonyno láani sasacno más sacró. ¿Xigony?

10 Toib buñ ni ma nadip xfe, rony pensary xomod Jehová (Juan 4:23). Pablo bicaʼbu ndeʼ: «Portín ni rabés conforme mod ná beʼel laidy buñ, rony pensary mod ná beʼel laidy buñ, per ni nabany mod ná espíritu, rony pensary ló cós del espíritu» (Romanos 8:5). Toib buñ ni rony  pensary xomod buñ galkié diti rabany goxt, portín rioʼbu ló galrrasaʼ por láasibu, nachep bisalóbu, né nosi rasobladxbu bidxiich né cós ni rasac. Per toib buñ ni nadip xfe nosi rioʼ ló galrrasaʼ gony ni ná Jehová, «Dios ni rabaladx» (1 Timoteo 1:11). Toib buñ ni nadip xfe raniiny gony ni ná Jehová ná cadudy ló prueby. ¿Xigony? Portín prueby nacni toib oportunida par guislooybu que Buñdzab rascú, gony nadipbu fe ni napbu né gonybu que guibaladx Bixiosbu ni noʼ guibá (Proverbios 27:11; bíil Santiago 1:2, 3).

11, 12. a) ¿Xí ná Pablo gonyno par guisaʼ xcalrrienno, né xí raduidy diitz que xcalrrienno «gony dxiin»? b) Golexa ximod ni rony toib badaʼyen né buñ ni rony ejercicio toibsi mod nacni.

11 Par que fe ni napno gac nadipni raquiin gonyni dxiin guirá ór. Scá rabexa versículo reʼ láani: «Per galrro nacni par buñgox, ni ma bisaʼ xcalrrien par gony dxiin guirá ór né labúu gan xí ngú cós tzaay né xí ngú cós mal» (Hebreos 5:14). Órni Pablo goniʼ que nacno buñ ni ma bisaʼ xcalrrien par «gony dxiin», biquiimbu toib diitz griego ni biquiin buñ ló xtzú Jesús lainy gimnasio ni goyoʼ gudx Grecia, né diitzreʼ raslooyni «ejercicio ni rony toib buñ». Guisuidyno nigoreʼ xí raquiin gony buñ par guidxin gac toib gimnasta.

Buñ ni rony ejercicio labúu gonybu láani galán pal rasuidytzaybu láacabu

12 Ni toib de lóono órni gócno badaʼ gosaano ni maca. Badaʼ diti ni maca raduidy cuent pu noʼ ña, né hasta stipláacayibu ragapyibu lóoyibu né radzuitzyibu. Per dxoga, dxoga rasuidyibu: primer radamóyibu, después rasadaʼatyibu né radxin midid dada raxonyibu. * ¿Per xí labúu guinino de toib gimnasta? Órni rabiʼno ximod rasandopbu  né rabixnaybu labu rioladxno mod ronybu láani, portín casi ronybu láani xomod toib máquina ni goyaʼtzay. Per buñ ni rony guirá galrradziguiaʼ reʼ diti tisintiempsi buny láani, láabu nigolú xidzú bunybu ejercicio par birebuʼ bunybu láani. La Biblia rasetlaa que «ejercicio tidxósi racnéni buñ», por ngú más rasac gonyno que xcalrrienno gony dxiin galán (1 Timoteo 4:8).

13. ¿Xí labúu gony que xcalrrienno gonyni dxiin galán guirá ór?

13 Ló libro reʼ ma bisuidyno xidal cós ni labúu gacné xcalrrienno par gonyni dxiin guirá ór, par gac nadip fe ni napno né diti guisianno Jehová. Guirá dzú antes de coʼno guicno gonyno toib cós non guinabno lóo Jehová par guisaní lóono ló xilitzbu né ló xileybu. Ló nitisi cós ni non gonyno non guinabdiitzno lóocano: «Órni nainy naʼ goni toib cós, ¿xí leyes labúu gacné naʼ? ¿Ximod labúu goni láani? ¿Sioladx Bixiosa ni noʼ guibá ni goni la?» (Bíil Proverbios 3:5, 6; Santiago 1:5). Pal ranabdiitzno ndeʼ órni ragoʼno guicno gonyno toib cós, sonyni que xcalrrienno gonyni dxiin galán. Ndeʼ sacné lóono gacno buñ ni nadip xfe né buñ ni radzak a Jehová.

14. Par niʼs fe xtunyno, ¿xí raquiin gonyno né xí cós non cueʼno tiplad?

14 Ná ma nacno buñ ni nadip xfe, diti guiduidyno lagary tzoʼ ni guicaa lóono. Par gacno buñ nadip, nigolú raquiin guicaano cuidad xi clas galrro cayóno, por ngú Pablo goniʼbu: «Galrro nacni par buñgox». Ndeʼ raduidy  diitz que par gac nadip fe xtunyno raquiin guisuidyno Xtiitz Dios. Né láaca raquiin gonyno ni cayenno. La Biblia ná: «Ni más rasac ngú que buñ gap galnann né gony láani». Por ngú raquiin guixalno ló xcalrralanno par guisuidyno cós galán ni sieed de Bixiosno (Proverbios 4:5-7; 1 Pedro 2:2). Per ná ma napno xiroʼ galnann diti noʼ razón par guiatzno né gonyno pensary que más rasacno que stipnés. Raquiin guicaano cuidad lóono guirá ór que galfarmay né stipnés cós mal diti tzoʼ lainy xcalnabanyno. Pablo bicaʼbu ndeʼ: «Colguiduidy prueby que napto fe; lóocato colguiduidy prueby mod nacto» (2 Corintios 13:5).

15. ¿Xigony raquiin gapno galnadxiʼ par gac nadip fe xtunyno?

15 Órni ralox rasaʼno toib yoʼ, raquiin gony reglarno láani né láaca rioʼ ór hasta racaʼno stoib yoʼ cueʼni. Né ngúca rac né fe ni napno. ¿Xí raquiin gonyno par diti guixinni né niʼsni? Ni más raquiin gapno ngú galnadxiʼ. Galnadxiʼ ni napno Jehová né xhermanno non gac nadipni guirá dzú. Pal diti ñapno galnadxiʼ, guirá xcalnanno né xchiinno diti noʼ pu naquiinni. Ñacni xomod toib guip ni rasuchlaʼsi (1 Corintios 13:1-3). Scú láani par gac nadip fe xtunyno raquiin gapno galnadxiʼ.

COʼNO GUICNO NOSI LÓ NI JEHOVÁ GUIDUIDY LÓONO

16. ¿Xí clas pensary rachetz Buñdzab, né ximod ran Jehová lóono?

16 Nigoreʼ guisuidyno ni rion cós ni non gonyno par gac nadip fe ni napno. Par gacno toib buñtzay ni racanal a Jesús raquiin guicaano cuidad xí noʼ ló xpensaryno. Buñdzab, ni rony mandary gudxliogoxreʼ, toib mextra láabu par cueganbu lóono, par diti guiluladxno Dios, né guixacladxno por ni cabésno lóo Jehová (Efesios 2:2). Pal ronyno pensary modreʼ rioʼno ló xiroʼ riesga, xomod órni rioʼ balaʼ toib yoʼ ni goyaʼ de pórsi yac. Per guixquixno Jehová  portín raduidybu ni guilaa lóono, láani ngú: esperanza.

17. ¿Ximod raslooy Xtiitz Dios balaati rasac cuésno lóo Jehová?

17 La Biblia rasetlaa que «esperanza ni ralaa» racnéni lóono guicalóno Buñdzab né xcudxliogox. Né la Biblia raslooy láani xomod toib casco ni rioʼ guic toib soldad (1 Tesalonicenses 5:8). Soldad ni goyoʼ dzú cuá la Biblia biquiin toib casco ni góc de guip né lainyni goyoʼ guid par que órni ñoʼ ni ñonynaa láabu diti tampa ñoʼobni; órni toib soldad ñee guerr né diti naquiin láani, láabu gondxichbu que diti xidzú ñaclabu ló guerr ni maca ñoʼ ni nagaity láabu. Xomodca yelmo o casco ran guic toib soldad, scúca ni lóono cuésno ni guiduidy Jehová lóono sap xpensaryno.

18, 19. ¿Ximod bislooy Jesús que golésbu lóo Jehová, né ximod guisuʼno láabu?

18 Jesús bislooytzaybu lóono xi raduidy diitz cuésno lóo Jehová. Guisetnaladxno guirá ni buny guantarybu último gueʼel ni goyoʼbu ló Gudxlio. Toibtica ximigdxinbu bunycuent láabu xtol bidxiich. Stoib ximigbu nadip góc xtiitz que diti bimbu láabu. Né tipnéscu bisian láabu né bixony. Né buñ xcudxcabu cualó láabu né gonabyibu que buñ romanos nagaity láabu. Scú láani, láabu cualóbu xidal galnagan ni lóono diti sioʼ dzú sacalóno. ¿Xí láani gocné láabu? Hebreos 12:2 racapy: «Por ni láabu gonbu que sioʼbu goxt buny guantarybu yac nadop, diti bitoybu, né ma gorúbu ladbuʼ trono xtuny Dios». Xomod rabiʼno, guirá ór «por ni láabu gonbu que sioʼbu goxt buny guantarybu».

19 Per ¿xigony goyoʼbu goxt? Portín gonbu que pal ñony guantarybu ñonyxiroʼbu laa nayaa xtuny Dios né naslooybu que Buñdzab nac moxter. ¡Diti goyoʼ stoib cós ni golésbu ni ñony que nasacbu goxt! Láaca gonbu que  Bixiosbu saduidy xiroʼ galnasác láabu né guilís láabu par tzoʼbu cueʼ bixiosbu stoib. Órni Jesús nigolú godudy ló galrrioʼob bisetnaladxbu ni cabésbu guicaʼbu. Lóono láaca non gonyno scúca, dipa guialadxno ni cabésno guicaʼno ni Jehová ma godiʼx nislóno. Jehová ronyxiroʼ lóono portín raduidybu lagary que guiliskiaʼno láabu né guislooyno que Buñdzab nac moxter. ¿Ximod labúu gonyno láani? Diti guisianno Jehová ni rony Mandary guibá né guidopynac Gudxlio né tzoʼno ló xcalnadxiʼbu ná guicalóno nitisi clas galnagan.

20. ¿Xí sacné lóono par diti guireʼganno né cuésno lóo Jehová?

20 Jehová diti nosi noʼbu puext gacnébu buñ ni diti rasian láabu, Láabu nigolú raniiny gonybu láani (Isaías 30:18; bíil Malaquías 3:10). Órni ranabyibu cós ni nac xinésni, Jehová rioladx guiduidy láani layibu (Salmo 37:4). Por ngú nigolú raquiin diti guisianno de cuésno ni guiduidy Jehová lóono ló dzú ni sietra. Dipa guireʼganno, diti gonyno cós yox né guirá cós buidy ni rony gudxliogoxreʼ ni noʼ ladxña Buñdzab. Pal raduidyno cuent que moda casuʼno layibu, guinabgoluʼno «paz xtuny Dios ni rony gan guirá pensary». Láani sapni xcalnabanyno né xpensaryno (Filipenses 4:6, 7).

21, 22. a) ¿Xí galnasác sacaʼ «xidalguixo buñ»? b) ¿Xí láani rasac más par looy, né xí láani non coʼlo guiclo gonylo?

 21 Nigolú sacroyen ngú ni cabésno lóo Jehová. Pal noʼno lad «xidalguixo buñ» ni guilaa ló «gran tribulación» gonysino pensary ló guirá galnasác ni guicaʼno (Revelación 7:9, 14). Diti rigaʼl xpensaryno guirá galnasác ni guicaʼno órni Buñdzab né xidemony ma diti sioʼ ló Gudxlio. Scú diti noʼ ni toib buñ ni ralaa de guirá xtramp Buñdzab. Órni guinitló guirá galnagan ni ragoʼ Buñdzab, sacroyen sácni órni Gudxlio reʼ guidxin gac toib lagary móz dzú Cristo né 144,000 gonyibu mandary lainy guibá. ¡Balaati raniiny lóono guibiʼno dzú ni guinitló galguitz né guibiʼno stoib a guirá buñ ni nadxiʼno guibany, né ni guibanyno sacroyen xomod goniiny Dios nírcu! Órni ma yaaca gacno buñ ni diti nap galkié sacaʼno toib galnasác ni nigolú xiroʼ láani ngú gapno «liberta ni nap xiin Dios» (Romanos 8:21).

22 Jehová raniinygolu guicaʼlo lagary gonylo ni nainy looy. Né par labúu guicaʼlo láani raquiin guisoblo. Por ngú nigolú rasac gonyno por guisobno Dios dzúna dzú. Scú láani, raquiin diti guisianno de guisaʼno lóocano ló fe nayaa xtunyno né modreʼ labúu tzodieʼno ló xcalnadxiʼ Dios por tipzó.

^ Párrafo. 12 Buñnan raquiin diitz propiocepción. ¿Xí raduidyni diitz? Ndeʼ nac toib mod ni laidy buñ labúu gan pu lagary noʼ ña o ñeʼ. Por ni napno láani láabu ronyno xidal cós, xomod capno ladxñano ná nayeg bisalóno. Per pal propiocepción ni napno raxinni órni ma nacno buñgol sigory ma diti labúu guisagaʼno, saano o ma diti labúu guigaʼ laidyno.