Accesibilidad ajuste

Biloyña diitz ni cayopylo

Goyee menú ni rarop lagary

Goyee ro ná índice xtuny contenidos

Rabiguet

Testigos xtuny Jehová

diitza

«Tzodieʼto ló xcalnadxiʼ Dios»

 APÉNDICE

¿Pu ór non coʼ buñgonaʼ lairy guic, né xigony?

¿Pu ór non coʼ buñgonaʼ lairy guic, né xigony?

¿Pu ór né xigony toib hermana non coʼ lairy guic par gonybu xchiin Jehová? Guibiʼno xí goniʼ Pablo de ndeʼ. Láabu gochbu lóono par ganno ximod gonyno xinésni né gonyxiroʼno Dios (1 Corintios 11:3-16). Pablo rasetlaa tzón cós ni non guisetnaladx buñgonaʼ órni gony xchiin Jehová: 1) dxiin ni gonybu ro raquiin coʼbu lairy guicbu; 2) lagary ro gonybu dxiinreʼ, né 3) xigony nainy láabu guisobbu mandary reʼ.

Dxiin ni gonybu. Pablo rasetlaa chop dxiin: órni buñ raniné Dios né órni raniʼ profecías (versículos 4, 5). Órni raninéno Dios nacni toib mod ni rony adorarno láabu. Órni ranino profecías raduidyni diitz dxiin ni ronyno órni rasuidyno stipnés buñ Xtiitz Jehová. Por ngú, ¿biduidy diitz Pablo que buñgonaʼ coʼ lairy guic órni guininé Dios o guisuidy la Biblia a stipnés buñ la? Yaca. Buñgonaʼ non coʼ lairy guic pal noʼbu toib lagary ro non gonybu láani.

Lagary ro gonybu dxiinreʼ. Pablo rasetlaa de chop lagary: lainy family né lainy congregación. Láabu rasetlabu ndeʼ: «Guic buñgonaʼ ngú buñguieeu; [...] guirá buñgonaʼ ni diti rasieg guic órni raniné Dios né rony profetizar ratuidybu guicbu ló galnatoy» (versículos 35). Lainy family Jehová ma golú buñguieeu par gac guic toib buñgonaʼ. Por ngú, ¿xí rac órni toib buñgonaʼ rony dxiin ni Jehová ma goniʼ gony tzeelbu? Pal diti raslooybu respet galmandary ni nap tzeelbu  satuidybu tzeelbu ló galnatoy. Guibiʼno xidal mod, toib hermana noʼbu né tzeelbu né napbu xi de guisuidybu a stoib buñ. Por ni napbu respet xcalmandary tzeelbu non coʼbu lairy guicbu. Ná pal tzeelbu ma goyonis o yaca, buñgonaʼ non coʼ lairy guic portín tzeelbu nac guic xfamilbu. * ¿Xí láani gony toib hermana órni guininé Dios né guisuidy stipnés buñ nisló xiin, ná ndeʼ nac mbioxsa per ma goyonis? Xinaʼbu non coʼ lairy guic, ná mbiox reʼ diti rasanir lainy family. ¿Xigony? Portín napbu respet galmandary ni ma cuaʼ guirá buñguieeu ni ma goyonis ni noʼ lainy congregación.

Ni rarop lagary ni bisetlaa Pablo láani ngú congregación órni bicaʼbu ndeʼ: «Pal noʼ ni ná tíil xtol tipnés costumbres, lóono diti napno stoib costubre, ni congregación xtuny Dios diti nap láani» (versículo 16). Lad congregación Jehová ma golú tipnés buñguieeu ni ma goyonis par guisanir (1 Timoteo 2:11-14; Hebreos 13:17). Por ngú, nosi raduidybu lagary buñguieeu ni ma goyonis ni nac ancianos né siervos ministeriales ganyibu congregación (Hechos 20:28). Per rioʼ ór raquiin que toib hermana gony tipnés dxiin ni non gony toib buñguieeu ni ma goyonis. Rioʼ ór toib hermana ragoʼ reunión par guireʼyibu yoʼ por yoʼ portín yadi buñguieeu. * Reunión reʼ nacni xomod toib reunión ni rac lainy Lagary ro radopno, né toib buñguieeu ni ma goyonis non gony láani. Né scúca rac órni toib hermana rasuidy la Biblia a stipnés buñ nisló toib buñguieeu ni ma goyonis. Por ngú, láabu non coʼbu lairy guicbu portín cayonybu dxiin ni non gony toib buñguieeu.

Per hermana diti non coʼbu lairy guicbu órni gonybu stipnés dxiin par gony adorarbu Jehová. Diti ronybu láani órni ralísbu ñabu ló reunión, rasaabu yoʼ por yoʼ (ná pal seebu né tzeelbu o stoib buñguieeu ni ma goyonis) né órni raninébu Dios o rasuidybu xiimbu ni diti ma goyonis. Per ¿xí láani  gonybu pal rioʼ ór diti nanbu xí ni merpa gonybu? Ni primer gonybu, guisuidybu nanoy par guientzaaybu xi raquiin gonybu. * Per pal ná ronybu ngú né diti nanbu xigonybu né xcalrriembu raiby láabu gonybu láani, labúu coʼbu lairy guicbu xomod caa ló retrat ni noʼ ló guiich reʼ.

Xigony nainy láabu guisobbu. Ló versículo 10 sieed chop razón ni guichiin a toib hermana gony cumplir mandary reʼ: «Guic buñgonaʼ gap toib señal ni guislooy que noʼbu xan xomandary stoib buñ, non gacni scú por ángeles». Primer razón nacni «toib señal ni guislooy que noʼbu xan xomandary stoib buñ». Scú láani, lairy ni rioʼ guic toib buñgonaʼ raslooyni que napbu respet galmandary ni Jehová ma biduidy a buñguieeu ni ma goyonis ni noʼ lainy congregación. Modreʼ raslooybu galnadxiʼ né que noʼbu xilad Jehová. Ni rarop razón «non gacni scú por ángeles». Per ¿ximod racnéni ángeles ni nap galnadip órni buñgonaʼ ragoʼ lairy guic?

Ángeles rabiʼyibu ni rony guirá ni noʼ lainy xcudx Jehová, ná noʼyibu lainy guibá o ló Gudxlio, né racaatzaybu cuidad pal raslooyibu respet xcalmandary Dios. Ángeles racnéni layibu órni rabiʼyibu que buny galkié rasob. Ángeles non guiduidyibu prueby que rasobyibu arreglos ni ma bisian Dios, toib cós ni diti guirá ángeles buny nírcu (Judas 6). Ló naareʼ órni hermanas rasob né guidopy galnabany xcalmandary toib buñguieeu ni ma goyonis, ná pal buñgonaʼ nap más íz, nan más o más naní xcalrrien, rasianyibu toib mod galán ni ángeles labúu guisuʼ. Né ángeles más radziguiaʼ órni toib hermana ni tzee guibá rony láani. ¿Xigony? Portín  ló dzú ni sietra hermana reʼ sony mandary toibsi né Cristo lainy guibá né sioʼbu más guiaʼ que ángeles. Xomod casuidyno, hermanas napyibu toib privilegio rodann. Mod ronyibu né mod rasobyibu rasuidyibu a xidalguixo ángeles que nacyibu buñdxo né buñ ni rasob.

^ Párrafo. 3 Toib hermana ni ma noʼ tzeʼel diti raninébu Dios nisló tzeelbu, nosi labúu gonybu láani pal tzeelbu ma see xtiitz por xtol galguitz.

^ Párrafo. 1 Toib hermana diti raquiin coʼ lairy guic órni casuidybu stoib buñ nisló toib publicador ni diti ma goyonis ni diti nac tzeelbu.

^ Párrafo. 2 Par ganlo más bibiʼ La Atalaya 15 julio íz 2002, páginas 26 né 27, né La Atalaya 15 julio íz 1977, páginas 445 a 448.