Rabiguet

Goyee ro ná índice xtuny contenidos

 CAPÍTULO 12

¿Xí raquiin gonylo par gaclo ximig Dios?

¿Xí raquiin gonylo par gaclo ximig Dios?

1, 2. ¿Chú layibu góc ximig Jehová?

¿CHÚ láabu nabúlo par ñac ximiglo? Nabúlo toib buñ ni rioladxlo mod nac, ni radzaklo sacró, ni nac buñtzay né nap cualidades ni rioladxlo.

2 Jehová ma golú tipnés buñ ni góc ximigbu. Por ejemplo, Abrahán góc toibtica ximig Jehová (Isaías 41:8; Santiago 2:23). Rey David láaca góc ximig Dios. Jehová bioladx mod góc David (Hechos 13:22). Né Jehová láaca gochbu profeta Daniel: «Looy nigolú rasaclo» (Daniel 9:23).

3. ¿Xigony Abrahán, David né Daniel gocyibu ximig Jehová?

3 ¿Xigony Abrahán, David né Daniel gocyibu ximig Jehová? Jehová gochbu Abrahán: «Bisobdiitzlo xtiidza» (Génesis 22:18). Jehová rabúbu buñdxo né buñ ni rasob láabu par gac ximigbu. Dada toib gudxroʼ labúu guidxin gac ximigbu. Láabu gochbu gudx Israel: «Colguisob xtiidza, né naʼ saca Dios xtunyto né lóoto sacto xcudxi» (Jeremías 7:23). Scúca, pal nainy gaclo ximig Jehová non guisoblo láabu.

JEHOVÁ RACNÉ XIMIG

4, 5. ¿Ximod racné Jehová ximig?

4 Napno toib enemig ni nigolú nadip ni diti rioladx gacno ximig Dios. Per Jehová nainy gacnébu né ganbu lóono (bíil Salmo 55:22). La Biblia ná que Jehová  rayopy mod par «guislooybu xcalnadipbu a guirá ni rony ni nábu né guidopy galnabany» (2 Crónicas 16:9). Ló Salmo 32:8, Jehová ná que sadudybu galnan né salitzbu ximigbu.

5 Nacno ximigbu, por ngú ronyno xchiimbu né guidopy xcalnabanyno né diti rasianno láabu ná cadudyno ló galnagandaʼ. Láaca, napno confianz xomodca David. Láabu goniʼbu ndeʼ de Jehová: «Noʼbu niis ladbuʼya por ngú dipa sarel ñeʼya» (Salmo 16:8; 63:8). ¿Xí rony Buñdzab par diti labúu gacno ximig Jehová?

BUÑDZAB RANIʼ MAL DE BUÑ

6. ¿Xí raniʼ Buñdzab de buñ?

6 capítulo 11 bisuidyno que Buñdzab cualóbu Jehová né goniʼbu que Jehová rascú. Láaca goniʼbu que Dios diti rony xinésni, portín diti bidudybu lagary que Adán né Eva ñan xi ngú cós tzaay né cós mal. Libro xtuny Job rasuidy lóono que Buñdzab láaca raniʼbu mal de buñ ni ná gac ximig Dios. Buñdzab raniʼ que buñ rien Dios por guirá cós ni Dios radudy layibu, diti por galnadxiʼ. Láaca nábu que labúu gonybu que nitisi buñ diti guisob ni ná Dios. Guienno xi labúu guisuidyno de Job né ximod gocné Jehová láabu.

7, 8. a) ¿Chú láabu góc Job? b) ¿Xí goniʼ Buñdzab de Job?

7 ¿Chú láabu góc Job? Gócbu toib buñguieeu tzaay ni bibany de goló tzón mil xhoopgayoʼ íz. Jehová goniʼ que ló dzúcu diti goyoʼ toib buñ xomod Job ló Gudxlio. Job nigolú gop respet Jehová né bianladxbu cós mal (Job 1:8). Jehová bibiʼbu Job xomod ximigdxinbu.

 8 Buñdzab goniʼ que Job biembu Dios, portín Dios gocné láabu. Buñdzab góochbu Jehová: «¿Xí diti ma goloʼlo toib leʼ roloobu, roloo lidxbu né roloo guirá ni napbu la? Ma bisiablo xcalnasáclo ló xchiimbu, né xidal clas nimal ni napbu ma bidalyimu xidal lagary. Per nigoreʼ biscaʼ ñalo né goleʼ guirá ni napbu, né saniʼbu cós mal de looy nislócalo» (Job 1:10, 11).

9. ¿Xí bidudy lagary Jehová ñony Buñdzab?

9 Buñdzab goniʼ que Job biembu Jehová nosi por guirá cós ni Jehová bidudy láabu. Goniʼbu que labúu gonybu que Job ma diti ñony ni ná Jehová. Ná Jehová diti goyoʼ de acuerdo né Buñdzab, bidudybu lagary que Buñdzab natudybu Job ló castig. Modreʼ Job naslooy pal cayenbu Dios por galnadxiʼ.

BUÑDZAB BITUDYBU JOB LÓ CASTIG

10. a) ¿Ximod bitudy Buñdzab a Job ló castig? b) ¿Xí buny Job?

10 Buñdzab primer bunybu que buñ nabann tipnés xinimal Job né stipnés xinimalbu ñaity. Después Buñdzab bunybu que guirá xomós Job nagaity buñ layibu. Job bisnit guirá ni gop. Por último, Buñdzab buny que chii xiin Job ñaity ló toib buroʼdant. Per Job dipa bisiambu Jehová. La Biblia ná que «ló guirá ndeʼ, Job diti biché nili goniʼbu que Dios buny cós mal» (Job 1:12-19, 22).

Job cuaʼ xiroʼ galnasác portín dipa bisiambu Jehová.

11. a) ¿Xí más buny Buñdzab a Job? b) ¿Xí buny Job?

11 Buñdzab diti bireʼgan. Cualóbu Dios órni goniʼbu ndeʼ: «Pal rascaʼlo ñalo né ronylo mal xpeʼelbu né dxit laidybu, saniʼbu mal de looy nislócalo». Ór cú Buñdzab buny que Job naxoné toib galguitz ni bitudy láabu ló castig (Job 2:5, 7). Ná scú, Job diti bisiambu  Jehová. Goniʼbu que dada dzú ñaitybu dipa nasiambu Dios (Job 27:5).

12. ¿Ximod bislooy Job que Buñdzab rascú?

12 Job diti gon xitcal ni góoch Buñdzab a Jehová né láaca diti gonbu xigony nigolú godudybu ló galrrioʼob. Bunybu pensary que Jehová catudy láabu ló prueby (Job 6:4; 16:11-14). Ná scú, Job dipa bisiambu Jehová. Biendxichni que Job diti biembu Dios por guirá cós tzaay ni Dios bidudy láabu. Gócbu ximig Dios por galnadxiʼ. Guirá ni goniʼ Buñdzab por galrrascú gocni.

13. ¿Xí cuaʼ Job por ni dipa bisiambu Jehová?

13 Ná Job diti gonbu ni góc lainy guibá, diti bisiambu Dios né bislooybu que Buñdzab nac nigolú mal. Jehová bidudy xiroʼ galnasác a Job portín dipa bisiambu Jehová (Job 42:12-17).

BUÑDZAB LÁACA RANIʼ MAL DE LOOY

14, 15. ¿Xí cós mal raniʼ Buñdzab de guirá buñ?

14 Labúu guisuidyno tipnés cós ni rasac ni gosaclóo Job. Ló naareʼ, Buñdzab raniʼ mal de guirá ni cayony ni ná Dios. Nábu que rienno Dios portín Dios racné lóono. Buñdzab goniʼ: «Buñ sadudy guirá ni nap par labúu guilaa» (Job 2:4). Buñdzab raniʼ que guirá buñgudxlio rony ni ná Dios portín racné Dios layibu, diti nosi goniʼbu mal de Job. Xidalguixo íz después de goló goity Job, Buñdzab cualórabu Jehová né goniʼbu mal de xpiin Dios. Nanno láani portín ló Proverbios 27:11 Jehová ná: «Goloʼ xcalrrienlo, xiingaʼna, né buny que guibaladx xcalnabani, par labúu guicabi ni cayony borla naʼ».

 15 Looy labúu guiniʼlo pal gonylo ni ná Jehová né gaclo ximigbu. Modreʼ saslooylo que Buñdzab rascú. Sigory non guitzaʼlo mod nabanylo par labúu gaclo ximig Dios, per ndeʼ ni más galán gonylo. Nigolú rasac gonylo láani, portín Buñdzab raniʼ que looy sasianlo Jehová órni cadudylo ló galnagan. Ronybu rutirigaʼlni láabu par diti guisobdiitzno Dios. ¿Ximod?

16. a) ¿Xí rony Buñdzab par galsit buñ de Jehová? b) ¿Xí rony Buñdzab par diti gonylo ni ná Jehová?

16 Buñdzab rayopy xidal mod par diti gacno ximig Dios. Rioʼ ór, racalóbu lóono xomod «betz ni cacaʼ rudx né cayopy ni guá» (1 Pedro 5:8). Por ngú, diti guidziguiaʼlo pal ximiglo, xfamilo o stipnés buñ rakíil looy par ma diti guisuidylo la Biblia né ma diti gonylo xinésni. Sigory rasaclo que que Buñdzab cacaló looy (Juan 15:19, 20). * Rioʼ ór «Buñdzab ronybu xomodpa rony toib ángel ni natzaay». Rayopybu mod guiscúbu lóono par diti guisobno Jehová (2 Corintios 11:14). Buñdzab láaca rayopy mod gonyno pensary que diti raquiinno par gonyno ni ná Jehová (Proverbios 24:10).

BISOB NI RONY MANDARY JEHOVÁ

17. ¿Xigony rasobdiitzno Jehová?

17 Órni rasobdiitzno Jehová, raslooyno que Buñdzab rascú. ¿Xí sacné lóono guisobdiitzno? La Biblia ná: «Gondxiʼ Jehová Dios xtunylo né guidopynac  xcalnabanylo, né guidopynac alma xtunylo né guidopynac xcalnadiplo» (Deuteronomio 6:5). Rasobdiitzno Jehová portín nadxiʼno láabu. Laʼga más nadxiʼno Jehová más saniiny gonyno guirá ni ranabbu lóono. Apóstol Juan bicaʼ: «Scareʼ non gandxiʼno Dios: guisobno ni rony mandarybu lóono, né diti nagan ni rony mandarybu» (1 Juan 5:3).

18, 19. a) ¿Xí cós mal ná Jehová diti gonyno? b) ¿Xigony nandxichno que Jehová diti canabbu lóono cós ni diti labúu gonyno?

18 Jehová ná que noʼ tipnés cós mal. Sadzelo tipnés ejemplos ro ná « Bianladx ni Jehová rianladx». Sigory primer sonylo pensary que diti nigolú malni. Per órni goʼol lo textos ni sitnéni né gonylo pensary loni, sadudylo cuent que sacnéni looy pal rasobdiitzlo ni ná Dios. Láaca sigory sadudylo cuent que non guitzaʼlo mod naclo. Rioʼ ór sasac naganlo láani. Ná  scú, pal ronylo láani sabanylo goxt né sioʼ nakitlo xomod rioʼ nakit ximig Jehová ni diti rasian láabu (Isaías 48:17, 18). ¿Ximod nanno que labúu guitzaʼno mod nacno?

19 Jehová dipa ranab lóono ni diti labúu gonyno (Deuteronomio 30:11-14). Láabu nacbu ximigdxinno né rimbutzaaybu lóono más que lóocano. Nanbu xi cós ronyno galán né xi cós yaca (Salmo 103:14). Apóstol Pablo rony animar lóono né diitzreʼ: «Dios ronybu xinésni né diti sadudybu lagary tudyto ló toib prueby ni diti labúu gony guantaryto, xalagary ngú sacnébu lóoto par gony guantaryto láani» (1 Corintios 10:13). Nandxichno que Jehová guirá ór sadudy fuers lóono par gonyno xinésni. Né sacaʼlo «galnadip ni radudy Dios» par gacnébu looy gony guantarylo galnagan (2 Corintios 4:7). Órni Pablo godudy  ló galnagan, Jehová gocné láabu. Por ngú goniʼbu: «Napa fuers par goni nitisi cós portín Dios radudy galnadip naʼ» (Filipenses 4:13).

BISUIDY GANDXIʼLO NI DIOS NADXIʼ

20. ¿Xí cualidades ni nap Jehová non guisuʼno, né xigony?

20 Pal nainy lóono gacno ximig Jehová, diti nosi guisianno de gonyno cós ni nábu que nac mal. Noʼ más ni raquiin gonyno (Romanos 12:9). Ximig Dios nadxiʼ cós ni nadxiʼbu né ximigbu «nap galnadxiʼ, rioʼ nakit, nap paz, nap paseins, natzaay xcalnabanybu, napbu galrronladx, napbu fe, nacbu buñ nadaʼdot, rony mandarybu láacabu» (Gálatas 5:22, 23). Par labúu ganlo ximod nac ximig Dios, bíil Salmo 15:1-5.

21. ¿Xí sacné looy gaplo cualidades ni Dios nadxiʼ?

21 ¿Xí sacné looy gaplo cualidades sacró reʼ? Bisuidy ni Jehová nadxiʼ. Par labúu gonylo láani, bíil né bisuidy la Biblia guirá dzú (Isaías 30:20, 21). Pal ronylo láani, sandxiʼlo más Jehová né saniiny looy guisoblo láabu.

22. ¿Xí sadudy Jehová lóono pal rasobdiitzno láabu?

22 Órni buñ rasian mod nac, nacni suusi nabeʼ buñ lairy yox ni nóc né ñoc lairy copy. La Biblia ná: «Colguisian mod gócto nírcu né cós ni bunyto, né colguibany mod casuidy Dios lóoto» (Colosenses 3:9, 10). Ná naganni, Jehová sadudy galnasác lóono pal rasianno mod nacno né rasobdiitzno láabu (Salmo 19:11). Bisobdiitz Jehová portín nadxiʼlo láabu, diti por galnasác ni guidudybu looy ló dzú ni sietra. Pal rasobdiitzlo láabu, saslooylo que Buñdzab rascú né sadxin saclo ximigdxin Jehová.

^ Párrafo. 16 Ndeʼ diti radudy diitz que merpa Buñdzab rakíil buñ par guicaa looy guisuidylo la Biblia. Per Buñdzab nac «dios xtuny gudxliogoxreʼ», né la Biblia ná que «guidopynac gudxliogoxreʼ noʼni ladxña Buñdzab». Por ngú diti radziguiaʼno órni tipnés buñ rayopy mod guisianno gonyno xchiin Jehová (2 Corintios 4:4; 1 Juan 5:19).