Rabiguet

Goyee ro ná índice xtuny contenidos

 CAPÍTULO 11

¿Xigony nogoluʼ galrrioʼob?

¿Xigony nogoluʼ galrrioʼob?

1, 2. ¿Xí raniiny gan xidal buñ?

TOIB xo rodann ragaity xidalguixo buñ. Toib buñguieeu ragaity toib buñ ni diti noʼ xi cayony. Toib buñgonaʼ raity xtol galguitz cáncer né gáay xiimbu riaʼan bisapy.

2 Órni rioʼ desgrasy xomod ndeʼ, xidal buñ ranabdiitzyibu xigony nogoluʼ galrrianladx né galrrioʼob ló Gudxlio. ¿Ma gonabdiitzlo ndeʼ toibtica buelt la?

3, 4. a) ¿Xí gonabdiitz Habacuc a Jehová? b) ¿Xí góoch Jehová láabu?

3 La Biblia rasetlaa tipnés xpiin Dios ni gonabdiitz ndeʼca. Por ejemplo, profeta Habacuc gonabdiitzbu Jehová: «¿Xigony radudylo lagary guibiʼya cós mal? ¿Né xigony radudylo lagary tzoʼ galrrioʼob? ¿Xigony noʼ galrranitló né xigony noʼ ni ronynaa saʼ nislóya? ¿Né xigony nogoluʼ galrradíil né xigony nigolú racaló buñ saʼ?» (Habacuc 1:3).

4 La Biblia ná que Jehová gochbu Habacuc que sabeʼbu guirá galnagan reʼ (Habacuc 2:2, 3). Jehová nadxiʼgolubu buñ. La Biblia ná que Dios «rioʼbu ló galrrasaʼ por lóoto» (1 Pedro 5:7). Más rioʼobni Dios órni rabiʼbu galrrioʼob que lóono (Isaías 55:8, 9). Pal scú nacni, ¿xigony nogoluʼ galrrioʼob ló Gudxlio? Guibiʼno guidoni.

¿XIGONY NOGOLUʼ GALRRIOʼOB?

5. a) ¿Xí ná xidal buñ ni rasanir ló religión órni radudyno ló galrrioʼob? b) ¿Né xí ná la Biblia?

5 Xidal xobal, pastores né buñ ni rasanir ló religión  raniʼyibu que radudyno ló galrrioʼob portín Dios ma goniʼ gacni scú. Sigory náyibu que Dios ma goniʼ xi sasaclono, dada xi desgrasy tudyno ló. Né sigory raniʼyibu que dipa sienno xigony noʼ galrrioʼob. Stipnés raniʼ que raityno par tzoʼno lainy guibá né Dios. Por ejemplo, órni raity toib mbioxien, raniʼyibu que Dios sané láabu guibá portín caquiimbu stoib ángel. Per diti nigolúni. Jehová dipa rony que gac cós mal. La Biblia ná: «¡Diti gony buñ pensary que Dios ni rony xinésni gony cós ni nigolú mal, que Dios ni nap Xiroʼgolu galnadip gony ni diti nac xinésni!» (Job 34:10).

6. ¿Xigony xidal buñ ragotz dool Dios por guirá galrrioʼob ni noʼ ló gudxliogoxreʼ?

6 Xidal buñ ragotz dool Dios por guirá galrrioʼob ni noʼ, portín ronyibu pensary que Dios rony mandary gudxliogoxreʼ. Per ló capítulo 3 bisuidyno que Buñdzab rony mandary gudxliogoxreʼ.

7, 8. ¿Xigony nogoluʼ galrrioʼob ló gudxliogoxreʼ?

7 La Biblia ná que «guidopynac gudxliogoxreʼ noʼni ladxña Buñdzab» (1 Juan 5:19). Buñdzab rony mandary gudxliogoxreʼ né láabu nigolú mal nacbu. Láabu cascúbu «guiránac buñgudxlio» (Apocalipsis 12:9). Xidal buñ rasuʼ mod nacbu. Ndeʼ nac primer razón por ni bidzagoluʼ galrrascú, galrrianladx né cós mal ló Gudxlio.

8 Guisuidyno ni rarop razón por ni nogoluʼ galrrioʼob. Órni Adán né Eva góc nayaʼyibu nisló Dios, bitudyibu galkié xiinyibu. Buñ nap galkié né por ngú ratudyibu stipnés buñ ló galrrioʼob. Casi guirá buñ nainy layibu guireʼ loguiaʼyibu ló stipnés, rieeyibu guerr né ronynayibu buñ (Eclesiastés 4:1; 8:9). Ni rion razón  por ni lóono radudyno ló galrrioʼob láani ngú que «tiemp né desgrasy guirá buñ rasaclóo láani» (Eclesiastés 9:11). Ndeʼ radudy diitz que rioʼ ór rasaclono desgrasy rotísi lagary.

9. ¿Xigony nandxichno que Dios napbu razón por ni cadudybu lagary tzoʼ galrrioʼob?

9 Jehová diti ratudybu buñ ló galrrioʼob. Diti napbu dool por ni noʼ guerr, cós mal, galrradíil né órni diti rac xinésni. Láaca diti napbu dool órni radudy xo rodann, guiérodann né stipnés desgrasy. Per sigory ranabdiitzlo ndeʼ: «Pal Jehová nap xiroʼgolu galnadip, ¿xigony radudybu lagary tzoʼ galrrioʼob?». Nandxichno que Dios nigolú ronladxbu lóono, por ngú napbu razón por ni cadudybu lagary tzoʼ galrrioʼob (1 Juan 4:8).

¿XIGONY RADUDY DIOS LAGARY TZOʼ GALRRIOʼOB?

10. ¿Xí goniʼ Buñdzab de Jehová?

10 Lainy lagary sacróyen ni góc laa Edén, Buñdzab bunybu gan que Adán né Eva diti nasobyibu Dios. Buñdzab goniʼ que Jehová diti rony mandary galán. Goniʼbu que noʼ cós tzaay ni Dios diti ná guidudy layibu. Buñdzab biyopy mod naluladxyibu que láabu rony mandarybu más sacró né que buñ diti raquiin xcalrracné Dios (Génesis 3:2-5). (Bibiʼ ni ná nota 27, «Derech ni nap Jehová par gony mandary»).

11. ¿Xí galrranabdiitz raquiin guicapyno?

11 Adán né Eva diti bisobyibu né cualóyibu Jehová. Bunyibu pensary que stipláacayibu labúu ñanyibu xi ngú cós tzaay né xi ngú cós mal. ¿Xí labúu ñony Jehová  par naslooybu que Adán né Eva diti nap razón né que láabu nanbu xí láani más galán par lóono?

12, 13. a) ¿Xigony diti nimaca binitló Jehová a Adán né Eva? b) ¿Xigony cadudy Jehová lagary que Buñdzab gony mandary gudxliogoxreʼ né que buñ gony mandary saʼ?

12 Jehová goniiny que Gudxlio ñacni toib lagary móz ro nabés guirá xiin Adán né Eva. Né Jehová sony cumplirbu ni ma goniʼbu gonybu, ná Buñdzab rayopy mod guicaa loni (Génesis 1:28; Isaías 55:10, 11). Por ngú, Jehová diti nimaca binitlóbu Adán né Eva, bidudybu lagary ñoʼ xiinyibu. Modreʼ xiin Adán né Eva labúu nabúyibu chú ñony mandary layibu.

13 Buñdzab bigotzbu dool Jehová nisló xidal millón de ángeles (Job 38:7; Daniel 7:10). Modreʼ Jehová bidudy xiroʼ tiemp par naslooy Buñdzab pal nap razón o yaca. Láaca bidudybu tiemp buñ par ñonyibu mandary láacayibu ló xcudxliogox Buñdzab. Modreʼ buñ naslooy pal labúu ñony mandaryibu láacayibu sin xcalrracné Dios.

14. Ló tiemp ni ma godudy, ¿xí ma biendxich?

14 Por xidal mil íz, buñ cayony mandary saʼ, per xcalmandaryibu diti rarebuʼni. Ma biendxich que Buñdzab rascú né que buñ raquiinra xcalrracné Dios. Profeta Jeremías gop razón órni goniʼbu: «Nandxichi Jehová, que buñ diti labúu ragonésbu láacabu. Buñ ni casaa stipláacabu diti labúu ragonésbu mod rasaabu» (Jeremías 10:23).

¿XIGONY YÁSA CUEʼ JEHOVÁ GALRRIOʼOB?

15, 16. a) ¿Xigony yása cueʼ Jehová galrrioʼob? b) ¿Xigony diti ma buny reglar Jehová galnagan ni ragoʼ Buñdzab?

15 ¿Xigony yása cueʼ Jehová galrrioʼob? ¿Xigony  radudybu lagary tzoʼ cós mal? Non nadudy xiroʼ tiemp par ñendxich que xcalmandary Buñdzab diti nilabúuni. Buñ ma gop xidal clas gobiernos, per ni toib clas gobierno raquiin. Ná ló naareʼ noʼ más ciencia né tecnología per diti rac xinésni, noʼ más galsii, cós mal né guerr que nírcu. Riendxichni que diti labúu rony mandaryno lóocano sin xcalrracné Dios.

16 Láaca Jehová diti ma buny reglar galnagan ni ragoʼ Buñdzab. Pal ñonybu láani ñacnébu xcalmandary Buñdzab, né Dios dipa labúu ñony ngú. Né buñgudxlio ñony pensary que labúu rony mandaryibu láacayibu. Per diti nigolúni né Dios diti sacné galrrascú reʼ, portín láabu dipa rascúbu (Hebreos 6:18).

17, 18. ¿Xí láani gony Jehová par gony reglar guirá cós mal ni cayac xtol Buñdzab?

17 Jehová labúu gony reglar guirá cós mal ni rac xtol xcalnayaʼ Buñdzab né xtol buñ. Par Jehová diti naganni. Jehová nan pu ór ma birexa guirá ni ma goniʼ Buñdzab. Órni guidxin dzúcu sonybu Gudxlio toib lagary móz, xomod goniiny láabu nírcu. «Guirá ni noʼ lainy baʼ» siás (Juan 5:28, 29). Buñ ma diti saxoʼ nili saity. Jehová saquiimbu Jesús «par guichílbu guirá xchiin Buñdzab» ndeʼ radudy diitz gony copybu guirá ni ma bixin Buñdzab (1 Juan 3:8). Laʼga guidxin dzúcu, radudyno guixquix Jehová portín cayapbu paseins lóono. Ndeʼ radudy oportunida guiráno guimbuno láabu né ganno pal nainy gony mandarybu lóono (bíil 2 Pedro 3:9, 10). Dada órni radudyno ló galrrioʼob, Jehová racné lóono gony guantaryno (bíil 1 Corintios 10:13).

18 Jehová diti rony lafuers lóono tzoʼno xan xomandarybu.  Radudybu lagary lóono ganno xi láani gonyno, ndeʼ nac toib galrrascad rodann. Guisuidyno xi radudy diitz galrrascad reʼ.

¿XIMOD GUIQUIINLO GALRRASCAD NI BIDUDY DIOS LOOY?

19. a) ¿Xí galrrascad rodann ma bidudy Jehová lóono? b) ¿Xigony non guidudyno guixquix por galrrascad reʼ?

19 Jehová radudy lagary guiráno ganno xi láani gonyno. Por ngú labúu cuuno xi láani gonyno laʼga nabanyno né ganno pal nainy gonyno xchiimbu o yaca. Diti nacno xomod nimal, layimu diti nanyimu xi ngú cós tzaay o cós mal (Proverbios 30:24-28). Láaca diti nacno xomod máquinas ni nan rony toibsi cós. Radudybu lagary lóono ganno xi clas buñ gacno, chú layibu gac ximigno né xi gonyno laʼga nabanyno. Jehová raniiny guibanyno goxtiguie.

20, 21. ¿Xí láani ngú ni más galán gonylo nigoreʼ?

20 Jehová raniiny gandxiʼno láabu né guidopy xcalnabanyno (Mateo 22:37, 38). Láabu nacbu xomod toib buñ ni rioʼ nakit órni xiimbu raiby láabu né guidopy xcalnabany: «Ronladxi looy». Jehová radudy lagary lóono ganno pal nainy gonyno ni nábu o yaca. Buñdzab, Adán né Eva goleʼyibu Jehová tiplad. Né looyga, ¿xí gonylo?

21 Ni más galán gonylo nigoreʼ, láani ngú gonylo ni ná Jehová. Xidalguixo buñ cayonyibu ni ná Dios né rabeʼyibu Buñdzab tiplad (Proverbios 27:11). Xomod ma bisuidyno, Dios sanitló galrrioʼob né sonybu Gudxlio toib lagary móz. ¿Xí raquiin gonylo par labúu guibanylo lagarycu? Ló capítulo ni sieed guicapyno galrranabdiitz reʼ.