Rabiguet

Goyee ro ná índice xtuny contenidos

 CAPÍTULO 6

¿Xí racno órni raityno?

¿Xí racno órni raityno?

1-3. a) ¿Xí ranabdiitz buñ órni toib buñ raity? b) ¿Ximod racapy tipnés religiones galrranabdiitz reʼ?

LA BIBLIA raibyni lóono que ló dzú ni sietra «ma diti sioʼ galgoity» (Apocalipsis 21:4). Ló capítulo 5 bisuidyno que por xcalgoity Jesús labúu sabanyno tipzó. Per ná scú, cayaityra buñ (Eclesiastés 9:5). Por ngú, toibtica de galrranabdiitz ni más rasac ni ronyno ngú: «¿Xí racno órni raityno?».

2 Rasac ganno ximod rarexa galrranabdiitz reʼ, máspa órni toibtica xfamilno o ximigno raity. Sigory ranabdiitzno lóocano: «¿Pu noʼbu? ¿Cabiʼbu lóono la? ¿Cadudybu ló galrrioʼob la? ¿Labúu gacnébu lóono la? ¿Sioʼ dzú sabiʼno láabu stoib la?».

3 Religión racapy galrranabdiitz reʼ de xidal mod. Tipnés religión rasuidy que buñtzay riee guibá né buñ mal raʼij ló guii. Stipnés religión ná que órni raityno riaʼan xpuisno o rilésno gudx aima. Né stipnés rasuidy que órni raityno rioʼ ni rony juzgar lóono pal gacno stoib buñ o toib nimal.

4. ¿Xí rasuidy religiones de galgoity?

4 Ná tigaaga religión gadzéga cós rasuidy de galgoity, casi guiráyibu rasuidyibu que órni raityno, noʼ ni rareʼ laidyno ni diti raity. Per ¿nigolúni la?

¿XÍ RACNO ÓRNI RAITYNO?

5, 6. ¿Xí racno órni raityno?

5 Jehová nan xi racno órni raityno, né láabu raibybu  lóono que órni raity toib buñ, cuti raloxni. Galgoity láani ngú órni buñ diti nabany. Órni raityno ma diti labúu rabiʼno, ma diti labúu racadiagno né ma diti labúu ronyno pensary. Xpensaryno né mod rasacno raityni. Diti rioʼno xcudx aima. *

6 Rey Salomón bicaʼ que «gueʼet diti nan xitcal». Ndeʼ radudy diitz que diti nadxiʼyibu nili rianladxyibu. Salomón láaca goniʼ ndeʼ: «Diti labúu sonylo dxiin, diti labúu sasuidylo, diti labúu sienlo xitcal lainy Baʼ» (bíil Eclesiastés 9:5, 6, 10). Salmo 146:4 náni que órni raity buñ «xpensaryibu» láaca raity.

¿XÍ GONIʼ JESÚS DE GALGOITY?

Jehová bisaʼ buñ par nabany tipzó ló Gudxlio.

7. ¿Ximod goniʼ Jesús que nac galgoity?

7 Órni ximigbu Lázaro goity, Jesús gochbu xpiimbu: «Ximigno Lázaro natiasy, per naʼ tzaʼya guicuany láabu». ¿Xí bidudy diitz Jesús né diitzreʼ? Golexabu láani scareʼ: «Lázaro ma goity» (Juan 11:11-14). Modreʼ Jesús goniʼbu que galgoity nacni suusi órni buñ raisnit. Diti goniʼbu que Lázaro ma bidxin guibá o ma noʼ gudx aima. Láaca diti goniʼbu que Lázaro cayaʼij ló guii né diti goniʼbu que Lázaro ma bidxin góc stoib buñ o toib nimal. Xalagary ngú, gocni suusi Lázaro ñaisnit. Stipnés textos ni sieed ló la Biblia rasetlaa que galgoity nacni xomod toib bacaʼal. La Biblia ná que órni bigaityibu Esteban «gotiasybu ló galgoity» (Hechos 7:60). Né apóstol Pablo goniʼ que tipnés cristianos «ma natiasy ló galgoity» (1 Corintios 15:6).

8. ¿Ximod nanno que Dios diti bisaʼbu lóono par gaityno?

 8 ¿Bisaʼ Dios buñgudxlio par ñaity la? Yaca. ¿Ximod nanno láani? Jehová bisaʼ Adán né Eva par nabanyibu tipzó ló Gudxlio né dipa naxoʼyibu. Láaca, órni Dios bisaʼ layibu, Dios goloʼ lainy xcalnabanyibu guiniiny guibanyibu tipzó (Eclesiastés 3:11). Ni toib buñ rioladx guibiʼ xiin guixoʼ né gaity. Scúca, Bixiosno Jehová láaca diti rioladxbu guibiʼbu lóono guixoʼno né gaityno. Per pal Dios bisaʼ lóono par guibanyno tipzó, ¿xigony raityno?

 ¿XIGONY RAITYNO?

9. ¿Xigony diti nagan nasob Adán né Eva ni buny mandary Dios layibu?

9 Lainy Lagary móz ni góc laa Edén, Jehová gochbu Adán: «Labúu guálo de guirá yac ni noʼ lainy lagary sacróyen dada guidza lainylo. Per diti non guálo yac ni rony que buñ gan xi ngú cós tzaay né xi ngú cós mal, portín dzú ni looy guálo láani saitylo» (Génesis 2:9, 16, 17). Nayadit ni góoch Dios layibu né diti nagan nasob buñ láani. Jehová bisaʼ layibu né nosi láabu naniʼbu xi ngú cós tzaay né cós mal. Pal Adán né Eva nasobdiitzyibu Jehová, naslooyibu que napyibu respet xcalmandary Jehová né naslooyibu que radudyibu guixquix por guirá ni ma cuaʼyibu.

10, 11. a) ¿Ximod bikíil Buñdzab a Adán né Eva par diti nasobyibu Dios? b) ¿Xigony diti goyoʼ razón ñac nayaʼ Adán né Eva?

10 Nabanni, Adán né Eva diti bisobdiitzyibu. Buñdzab gochbu Eva: «¿Nigolúpa Dios ma goniʼ que lóoto diti non guáto guirá yac ni radudy xcaa ni noʼ lainy lagary sacróyen la?». Né Eva cuapy: «Labúu guádo xcaa guirá yac ni noʼ lainy lagary sacróyen. Per, Dios ma goniʼ de xcaa yac ni sagaʼ galay lagary sacróyen: Diti non guáto láani; yaca, diti non canto láani. Pal ronyto láani, saityto» (Génesis 3:1-3).

11 Ór cú Buñdzab gochbu Eva: «Dipa saityto. Portín, Dios nan que dzú ni lóoto guáto láani, dzúcuca saxal bisalóto né sacto xomod Dios: simbuto cós tzaay né cós mal» (Génesis 3:4-6). Buñdzab goniiny que Eva naluladx que stipláacabu ñanbu xi ngú cós tzaay né cós mal. Per Buñdzab diti gochbu Eva xipa nasaclobu pal diti nasobbu Dios. Láabu goniʼbu que Eva diti  ñaity pal ñoobu cuánnaxcu, por ngú Eva godó xcaani. De ngú bidudybu láani tzeelbu, né Adán láaca godó láani. Adán né Eva gonyibu que Jehová góoch layibu que diti ñooyibu cuánnaxcu. Órni godóyibu láani, diti bisobyibu ni góoch Dios layibu. Ni bunyibu bislooy que diti gopyibu respet Bixiosbu ni noʼ guibá ni binladx layibu. ¡Diti goyoʼ razón par ñonyibu ngú!

12. ¿Xigony Adán né Eva bisioʼobyibu xcalnabany Jehová?

12 Nandxichno que Adán né Eva bisioʼobyibu xcalnabany Jehová. Diti gopyibu respet Bixiosbu Jehová ni Bisaʼ layibu. Bunysi pensary que looy ronylo xtem por guisniʼslo xiingaʼnlo né xiindzaplo. Per layibu rac nayaʼyibu né ronyibu ni náapayibu. ¿Nigolú nasioʼobni xcalnabanylo ja?

Adán goyaʼbu de yoo né bidxin gócbu yoo stoib.

13. ¿Xí bidudy diitz Jehová órni gochbu Adán que sacbu yoo stoib?

13 Órni Adán né Eva góc nayaʼyibu nisló Jehová, bisnityibu oportunida de nabanyibu tipzó ló Gudxlio. Jehová gochbu Adán: «Yoo looy né yoo saclo stoib» (bíil Génesis 3:19). Adán goyaʼbu de yoo, né ndeʼ Jehová bidudy diitz que Adán ñac yoo stoib (Génesis 2:7). Órni Adán goity, binitlóbu por tipzó.

14. ¿Xigony raityno?

 14 Pal Adán né Eva nasobdiitzyibu Dios, nabanysayibu dada nigoreʼ. Per órni góc nayaʼyibu, bunyibu galkié né bidxin dzú goityibu. Galkié nacni xomod toib galguitz ni bisianéyibu lóono. Raityno portín guiráno ralnéno galkié (Romanos 5:12). Per Jehová dipa goniiny que buñgudxlio ñaity. Por ngú, la Biblia ná que galgoity nacni toib «enemig» (1 Corintios 15:26).

ÓRNI NANNO XI RASACLÓO GUEʼET MA DITI NOʼ NI RASCÚ LÓONO

15. ¿Xí galrrascú ma diti raluladxno órni nanno xí rasaclóo gueʼet?

15 Xidal religión rasuidyibu que buñ ni ma goity nabanysayibu stoib lagary né lóono labúu gacnéno layibu. Por ngú órni raity toib buñ, rioʼ ór xfamilyibu raguiixyibu buñ ni rasanir ló religión par guinab por buñ ni ma goity o gonyibu toib mix par gueʼetcu. Per la Biblia rasuidy que gueʼet diti cadudy ló galrrioʼob nili rioʼ nabanyibu. Diti labúu guininéno layibu né diti labúu gacnéno layibu nili labúu guitzuibyibu lóono. Por ngú, diti noʼ xi portín guidzuibyno buñ ni ma goity. Per órni ranno xi rasacloyibu, ma diti raluladxno guirá galrrascú reʼ.

16. ¿Xí galrrascú rasuidy xidal religión de galgoity?

16 Buñdzab raquiin religión falz par guiscú lóono né par guiluladxno que gueʼet nabanysayibu stoib lagary. Por ejemplo, tipnés religión ná que órni raityno noʼ ni rareʼ laidyno ni diti raity né rilésni stoib lagary. ¿Rasuidy xireligionlo ngú la, o rasuidyni ni ná la Biblia? Buñdzab raquiin galrrascú reʼ né xidal clas galrrascú par galsit buñ de Dios.

17. ¿Xigony órni buñ ná que buñ mal riee ló guii rasioʼobni xcalnabany Jehová?

 17 Ni rasuidy xidal religión de galgoity, rasioʼobni xcalnabany Jehová. Por ejemplo, tipnés religión rasuidy que buñ mal saʼijyibu por tipzó. Per ngú diti nigolú. ¡Jehová dipa satudy buñ ló galrrioʼob! (Bíil 1 Juan 4:8). ¿Xí ñonylo pensary pal nabiʼlo toib buñ cagoʼ ña xiin ló guii? Nandxichno que looy ñonylo pensary que nigolú buñ mal láabu, né diti naniiny looy ñaclo ximigbu. Buñdzab raniiny gonyno pensary que scú nac Jehová.

18. ¿Xigony diti guidzuibyno buñ ni ma goity?

18 Tipnés religión rasuidy que órni buñ raity riaʼan xpuisyibu. Láaca raniʼyibu que non gapno respet né guidzuibyno xpuisyibu, portín labúu gacyibu ximigno o xi enemigno. Xidal buñ raluladx galrrascú reʼ né radzuibyibu gueʼet. Por ngú, rasanadxyibu o rony adoraryibu gueʼet xalagary gony adoraryibu Jehová. Per bisetnaladx que buñ ni ma goity diti noʼ xi rasacyibu né diti noʼ xi ronyibu. Diti noʼ xi portín guidzuibyno layibu. Jehová nac Dios ni nigolú né ni Bisaʼ lóono. Nosi láabu non gony adorarno (Apocalipsis 4:11).

19. ¿Ximod racné lóono ni ma nanno xí rasaclóo gueʼet?

19 Órni ma nanno xi rasaclóo gueʼet ma diti raluladxno galrrascú ni rasuidy religión falz. Láaca racnéni lóono guientzaayno xi galnasác sacróyen guitné Jehová ló dzú ni sietra.

20. ¿Xí galrranabdiitz guicapyno ló capítulo ni sieed?

20 Ma xidzú íz, toib xpiin Dios ni góc laa Job gonabdiitz: «Pal toib buñ raity, ¿labúu sabanybu stoib la?» (Job 14:14). Ló capítulo ni sieed sasuidyno ximod rabexa la Biblia galrranabdiitz reʼ.

^ Párrafo. 5 Tipnés buñ rony pensary que napno toib alma o espíritu ni rareʼ laidyno órni raityno. Pal nainy looy ganlo más, bibiʼ ni ná nota 17, «Alma», né ni ná nota 18, «Espíritu».