Rabiguet

Goyee ro ná índice xtuny contenidos

 CAPÍTULO 5

Xcalgoity Jesús, galrrascad ni más rasac ni bidudy Dios lóono

Xcalgoity Jesús, galrrascad ni más rasac ni bidudy Dios lóono

1, 2. a) ¿Xigony rasac toib galrrascad par looy? b) ¿Xigony xcalgoity Jesús nacni toib galrrascad rodann ni bidudy Dios lóono?

¿XÍ GALRRASCAD sacróyen ma cuaʼlo? Toib galrrascad diti fuerspa gacni car par guisacni par looy. Sadudylo guixquix pal ragoʼ nakitni xcalnabanylo o pal nigolúpa caquiinlo láani.

2 Lad guirá galrrascad ni ma bidudy Dios lóono, noʼ toib ni más raquiinno. Nacni toib galrrascad rodann xtuny Dios. Bidudybu láani órni bixelbu Xiimbu goity por lóono. Por galrrascad reʼ labúu sabanyno tipzó ló Gudxlio (bíil Mateo 20:28). Órni Jehová bixel Jesús ló Gudxlio, Jehová bislooy que nigolú nadxiʼbu lóono. Ló capítulo reʼ sasuidyno xidal cós de galrrascad reʼ.

¿XIMOD BILAA DIOS LÓONO?

3. ¿Xigony raityno?

3 Jehová biquiimbu xcalgoity Jesús par bilaabu lóono de galkié né galgoity (Efesios 1:7). Par guienno xigony biquiin ñaity Jesús, raquiin ganno xi buny Adán né Eva lainy Lagary móz ni góc laa Edén ló dzú ni see. Layibu bunyibu galkié, né goityibu. Adán né Eva bitudyibu xcalkiéyibu lóono, por ngú guiráno raityno. (Bibiʼ ni ná nota 9, «Galkié»).

4. ¿Chú láabu góc Adán, né xí bidudy Dios láabu órni goyaʼbu?

 4 Adán góc primerdiguieʼ buñgudxlio ni bisaʼ Dios. Órni bisaʼ Dios láabu cuaʼbu toib galrrascad sacróyen: diti gopbu galkié. Guidopyzobu né xpensarybu nasacdxiich gocni. Ndeʼ radudy diitz que dipa naxoʼbu, ñoʼxbu né diti ñaitybu. Jehová góc suusi ñac bixios Adán, portín láabu bisaʼbu Adán (Lucas 3:38). Dios guirá ór goninébu Adán né gochbu Adán xi ñony. Láaca, bidudybu toib dxiin natzatz Adán (Génesis 1:28-30; 2:16, 17).

5. ¿Xí radudy diitz que Adán goyaʼ «xomod nac Dios»?

5 Adán goyaʼ «xomod nac Dios» (Génesis 1:27). Ndeʼ radudy diitz que Jehová bisaʼbu Adán né cualidades ni napbu, xomod galnadxiʼ, galnan, justicia né galnadip. Láaca, Adán diti gócbu xomod toib máquina. Dios bisaʼ Adán par stipláacabu ñanbu xi ñonybu. Labúu nabúbu pal ñonybu xinésni o yaca. Pal Adán nasobdiitzbu Jehová, labúu nabanybu tipzó ló Gudxlio móz.

6. ¿Xí gosaclóo Adán órni diti bisobbu Dios?

6 Adán nigolú car godixbu ni diti bisobbu Dios. Dios goniʼ que saitybu né ma diti labúu bidzakbu Jehová. Gócbu buñ galkié né Dios bilaʼk láabu de Lagary mózcu (Génesis 3:17-19). Xcalnayaʼ Adán golaani guirácano.

7, 8. ¿Ximod galkié ni buny Adán bunyni mal lóono?

7 Xtolbu, «galkié goyoʼni ló gudxlio né por galkié goyoʼ galgoity, né modreʼ galgoity golaani guirá buñgudxlio, portín guiráyibu bichéyibu» (Romanos 5:12). Órni Adán buny galkié tanli láabu né guiráno goyoʼno xan xomandary galkié né galgoity  (Romanos 7:14). Par Adán né Eva cuti biloxni, portín góc nayaʼyibu nisló Dios, per ¿xí nasaclóo buñgudxlio? Jehová biyopy mod par labúu nalaa buñ.

8 Ni toib buñ galkié labúu naguiix galkié rodann ni buny Adán órni goloʼbu lóono xan xomandary galgoity. Per Jehová biyopy mod par labúu nabeʼbu lóono xan xomandary galkié né galgoity. Nigoreʼ guisuidyno xi buny Dios né ximod racnéni lóono.

JEHOVÁ BIXEL XIIN PAR NALAA LÓONO

9. ¿Ximod labúu ñax ni bisnit Adán?

9 Ni toib buñ labúu naguiix ni bisnit Adán. ¿Xigony yaca? Portín guiráno nacno buñ galkié (Salmo 49:7, 8). Toib buñ ni diti nap galkié non naguiix láani. Por ngú, la Biblia ná que Jesús goitybu par labúu nalaabu guirá buñ (1 Timoteo 2:6). Vida ni bidudy Cristo gosacni xomod ni bisnit Adán.

10. ¿Xí buny Jehová par labúu bilaabu lóono?

10 ¿Xí buny Jehová par labúu bilaabu lóono? Bixelbu Jesús ló Gudxlio, Xiimbu ni más ronladxbu (1 Juan 4:9, 10). Jesús gosaguelbu bisiambu Bixiosbu né mod bibanybu lainy guibá (Filipenses 2:7). Jehová biquiimbu toib mbioxhlas ni góc laa María par nasann Xiimbu. Modreʼ, Jesús golbu ló Gudxlio xomod toib buñ ni diti gop galkié (Lucas 1:35).

Jehová bunycuentbu xiimbu ni más nadxiʼbu par guilaabu lóono.

11. ¿Ximod nanno que toibsi buñguieeu labúu nalaabu guiránac buñgudxlio?

11 Xomod ma bisuidyno, primer buñguieeu ni goyoʼ diti bisobdiitzbu Jehová né xtolbu nacno buñ galkié. ¿Toibsi buñguieeu labúu nalaabu guiránac buñgudxlio la? Scú. (Bíil Romanos 5:19). ¿Ximod  nanno ndeʼ? Jesús dipa buny galkié, por ngú labúu goitybu por buñ né goleʼbu guirá xiin Adán xan xomandary galgoity (1 Corintios 15:21, 22, 45).

12. ¿Xigony nigolú godudy Jesús ló galrrioʼob?

12 La Biblia rabexa guirá galrrioʼob ni godudy Jesús antes de ñaity. Buñ nigolú bunynaa láabu, bigalxigaʼ láabu ló toib yac nadop, né nigolú godudybu ló galrrioʼob dada goitybu (Juan 19:1, 16-18, 30). ¿Xigony nigolú godudy Jesús ló galrrioʼob? Portín Buñdzab goniʼ que ni toib buñ labúu ñony ni ná Dios pal nadudybu ló xiroʼ galnagan. Per Jesús ni diti gop galkié bunybu ni ná Dios ná godudybu ló xiroʼ galnagan. ¡Balaati bibaladx Jehová órni bibiʼbu Xiimbu buny guantary! (Proverbios 27:11). (Bibiʼ ni ná nota 15, «Crois»).

13. ¿Ximod biax xcalkiéno?

13 ¿Ximod biax xcalkiéno? Dzú 14 de nisán íz 33, Jehová bidudy lagary que buñ ni bianladx Xiimbu nagaityibu Jesús (Hebreos 10:10). Tzón govitz después, Jehová buny que Jesús nabany stoib. Jehová golís Jesús lad gueʼet xomod toib espíritu, diti xomod toib buñgudxlio. Par ñax xcalkiéno, Jesús bibiguetbu guibá né bunycuentbu Bixiosbu midid gosac xcalgoitybu (Hebreos 9:24). Órni bilox biaxni, ma napno oportunida par guireʼno xan xomandary galkié né galgoity (bíil Romanos 3:23, 24).

MOD RACNÉ XCALGOITY JESÚS LÓONO

14, 15. ¿Xí raquiin gonyno par guitudy Jehová xcalkiéno scásiʼ?

14 Xcalgoity Jesús racnéni lóono de xidal mod. Guisuidyno ximod galrrascad sacróyen ni bidudy  Dios lóono racnéni lóono nigoreʼ, né ximod sacnéni lóono ló dzú ni sietra.

15 Labúu tudy xcalkiéno scásiʼ. Guirá ór rasac nagan buñ gony xinésni. Guiráno rachéno, rioʼ ór ronyno né ranino cós ni diti galán nac. ¿Ximod labúu tudy xcalkiéno scásiʼ? Non gac arrepentirno né guidopy galnabany por cós ni ma bunyno né guinabno lóo Jehová guitudy xcalkiéno scásiʼ. Pal ronyno láani modreʼ, labúu sapno confianz que Dios satudy xcalkiéno scásiʼ (Colosenses 1:13, 14; 1 Juan 1:8, 9).

16. ¿Xí non gonyno par gapno toib galrrien nayaa?

16 Labúu gapno toib galrrien nayaa. Pal xcalrrienno raibyni lóono que ma bunyno toib cós mal, rasioʼobni lóono. Sigory dada rareʼganno né rasacno que ma cuti biloxni. Per diti non guireʼganno. Pal ranabno lóo Jehová guitudy xcalkiéno scásiʼ, sapno confianz que sacadiagbu lóono né satudybu xcalkiéno scásiʼ (Hebreos 9:13, 14). Jehová rioladx gaibyno láabu nitisi galnagan ni racalóno (Hebreos 4:14-16). Modreʼ labúu gapno toib galrrien nayaa nisló Dios.

17. ¿Xí galnasác labúu guicaʼno por ni goity Jesús?

17 Labúu sabanyno tipzó. «Galkié riaxni né galgoity, per galrrascad ni Dios radudy láani ngú galnabany tipzó por Cristo Jesús Señor xtunyno» (Romanos 6:23). Por xcalgoity Jesús, labúu sabanyno tipzó ló Gudxlio né ma diti sanás galguitz lóono (Apocalipsis 21:3, 4). ¿Xí raquiin gonyno par guicaʼno guirá galnasác reʼ?

 BIDUDY GUIXQUIX POR XCALGOITY JESÚS

18. ¿Xigony nandxichno que Jehová né Jesús nadxiʼyibu lóono?

18 Bunysi pensary balaati nakit rioʼ buñ órni racaʼ toib galrrascad sacróyen. Xcalgoity Jesús nacni toib galrrascad ni más rasac, né raquiin guidudyno guixquix Jehová por galrrascad reʼ. Juan 3:16 náni que «Dios nigolú gondxiʼbu buñgudxlio por ngú bunycuentbu toibguielot Xiimbu». Scú láani, Jehová nigolú nadxiʼ lóono portín bixelbu Xiimbu ni más nadxiʼbu goity por lóono. Né nandxichno que Jesús láaca nadxiʼbu lóono, portín gosaguelbu goitybu por lóono (Juan 15:13). Xcalgoitybu raslooyni lóono que láabu né Jehová nigolú nadxiʼyibu tigaagano (Gálatas 2:20).

Pal rasuidylo ni ná Jehová saclo ximigbu né sandxiʼlo láabu más.

19. ¿Xí raquiin gonylo par gaclo ximig Jehová?

19 Nigoreʼ ni ma nanlo que Jehová nadxiʼ lóono, ¿xí raquiin gonylo par gaclo ximigbu? Bimbu Jehová. Nigolú nagan gandxiʼno toib buñ ni diti rimbuno. Por ngú Juan 17:3 rony animar lóono guimbuno Jehová. Pal ronylo láani, sonladxlo láabu más, saniiny looy guidudylo guixquix láabu né saclo ximigbu. Por ngú diti guiañ guisuidylo de Jehová ló la Biblia (1 Juan 5:3).

20. ¿Ximod labúu guislooylo que naplo fe ló xcalgoity Jesús?

20 Gop fe ló xcalgoity Jesús. La Biblia ná que «ni nap fe lóo Xiimbu sabany tipzó» (Juan 3:36). ¿Xí radudy diitz gapno fe? Radudyni diitz guisobno ni bisuidy Jesús (Juan 13:15). Diti nosi guinino que ronyno crer lóo Jesús, noʼra más ni raquiin gonyno. Mod nabanyno non guislooyni que napno fe ló xcalgoity  Jesús. Santiago 2:26 náni que «fe pal diti noʼ ni ronyni ma goityni».

21, 22. a) ¿Xigony non tzoʼno Memorial de xcalgoity Jesús guirá íz? b) ¿Xí sasuidyno ló capítulos 6 né 7?

21 Goyee Memorial de xcalgoity Cristo. Goxin antes de ñaity Jesús, goniʼbu que non guisetnaladxno xcalgoitybu. Ronyno láani órni guirá íz rioʼno Memorial o «Cena del Señor» (1 Corintios 11:20; Mateo 26:26-28). Jesús raniiny guisetnaladxno que goitybu par guilaabu lóono. Láabu goniʼbu: «Colgony ndeʼ par guisetnaladxto naʼ» (bíil Lucas 22:19). Órni rioʼno Memorial rasetnaladxno ni buny Jesús por lóono né láaca rasetnaladxno balaati nadxiʼ Jehová né Jesús lóono. (Bibiʼ ni ná nota 16, «Memorial»).

22 Diti noʼ stoib galrrascad ni más rasac que xcalgoity Jesús (2 Corintios 9:14, 15). Ló capítulos 6 né 7 sasuidyno ximod xcalgoity Jesús láaca sacnéni xidalguixo buñ ni ma goity.