Rabiguet

Goyee ro ná índice xtuny contenidos

 CAPÍTULO 15

¿Ximod labúu ganno xí religión rasuidy xinésni?

¿Ximod labúu ganno xí religión rasuidy xinésni?

1. ¿Chú labúu gaiby lóono ximod gony adorarno Dios?

XIDALGUIXO religión ná que rasuidy ni nigolú de Dios. Per diti nigolúni, portín diti rasuidyni chú láabu ngú Dios né ximod labúu gony adorarno láabu. Per ¿ximod labúu ganno xí religión rasuidy xinésni? Nosi Jehová labúu gaiby lóono ximod labúu gony adorarno láabu.

2. ¿Xí raquiin gonylo par ganlo ximod gony adorarlo Dios?

2 Jehová ma bidudy la Biblia lóono par ganno ximod gony adorarno láabu. Por ngú bíil láani. Dios sacné looy guienlo né guisoblo ni casuidylo, portín nigolú rioʼbu galrrasaʼ por looy (Isaías 48:17).

3. ¿Xí ranab Dios lóono?

3 Tipnés buñ ná que Dios racacuent guirá religión, per diti ngú ni bisuidy Jesús. Láabu goniʼbu: «Diti guirá buñ ni raiby naʼ: Señor, Señor, sioʼ lainy Gobierno ni noʼ guibá. Nosi sioʼ buñ ni rony ni ná Bixiosa». Por ngú Dios ranab guisuidyno ni nábu né guisobdiitzno láabu. Ditini galrraguit, portín Jesús goniʼ que buñ ni diti rasob ni ná Dios nacyibu buñ ni «diti rony cumplir ni ná ley» (Mateo 7:21-23).

4. ¿Xí goniʼ Jesús sasaclono pal ronyno ni ná Dios?

4 Jesús goniʼ, pal nainy gonyno ni ná Dios, sadudyno ló galnagan. Goniʼbu que vida xtuny toib cristiano nacni xomod toib néz nabé ro goxeʼsi buñ rasaa. Láabu  goniʼbu: «Coltzoʼ niis roʼ puert nabé, portín xilag nac puert né xilag nac néz ni riné ro ranitló buñ, né xidal buñ rioʼ niis roʼ puertcu; per puert nabé né néz nabé rinéni buñ ro guibany, né goxeʼsi buñ radzel láani» (Mateo 7:13, 14). Néz nabé radudyni diitz religión ni rasuidy xinésni ni riné buñ par guibany tipzó. Néz xilag radudyni diitz religión falz ni riné buñ ro guinitló. Per Jehová diti rioladx que ni toib buñ gaity, por ngú radudybu oportunida guiráxadit buñ guimbu láabu (2 Pedro 3:9).

¿XIMOD GANNO XÍ RELIGIÓN RASUIDY XINÉSNI?

5. ¿Ximod labúu ganlo chú layibu nap religión ni rasuidy xinésni?

5 Jesús goniʼ que labúu guidudyno cuent chú layibu nap religión ni rasuidy xinésni. Par labúu ganno láani raquiin guisuidyno ni raluladxyibu né ni ronyibu. Jesús goniʼ: «Por xcaayibu simbuto layibu [...]. Toib yac nasac racaa xcaani nasac» (Mateo 7:16, 17). Ndeʼ diti radudy diitz que guirá buñ ni rony adorar Dios diti raché. Per xpiin Dios guirá ór ronyibu xtem par gonyibu xinésni. Nigoreʼ guisuidyno ximod labúu ganno xi religión rasuidy xinésni.

6, 7. a) ¿Xigony religión ni rasuidy xinésni rasuidy ni ná la Biblia? b) ¿Xí rasuidyno de ejemplo xtuny Jesús?

6 Religión ni rasuidy xinésni, guirá ni rasuidyibu rabeʼyibu láani ló la Biblia. La Biblia ná: «Guirá Escritura sieedni de Dios né raquiinni par guisuidyni, par gony corregirni, par conésni né par guisuidyni buñ guieen xi ngú cós tzaay, modreʼ buñ ni rony ni ná Dios gantzay né tzoʼ puext par gony guirá clas dxiin galán» (2 Timoteo 3:16, 17). Apóstol Pablo gochbu cristianos: «Órni lóoto cuacuento xtiitz Dios, ni bicadiagto de  lóodo, diti cuacuento láani xomod xtiitz buñgudxlio, xalagary ngú cuacuento láani xomodpa xtiitz Dios» (1 Tesalonicenses 2:13). Religión ni rasuidy xinésni rasuidyibu ni ná la Biblia, portín nacni Xtiitz Dios. Diti rasuidyibu xcalnan buñ nili costumbres.

7 Guirá ni bisuidy Jesús goleʼbu láani ló Xtiitz Dios (bíil Juan 17:17). Guirága ór bisetlabu ni sieed ló la Biblia (Mateo 4:4, 7, 10). Buñ ni nigolú rony ni ná Dios racanal ejemplo xtuny Jesús, né guirá ni rasuidyibu rabeʼyibu láani ló la Biblia.

8. ¿Ximod bisuidy Jesús gony adorarno Jehová?

8 Nosi Jehová non gony adorarno. Salmo 83:18 ná: «Par gan buñ que laalo ngú Jehová, nosi looy ngú ni noʼ más Guiaʼ ló guidopynac gudxlio». Jesús goniiny que buñ ñentzaay chú ngú Dios ni nigolú. Por ngú bisuidybu buñ laa Dios (bíil Juan 17:6). Jesús goniʼ: «Scá sieed ló xtiitz Dios: Buny adorar a Jehová Dios xtunylo né nosi ni nábu non gonylo» (Mateo 4:10). Por ngú lóono ni nacno xpiin Dios rasuʼno mod buny Jesús. Nosi Jehová rony adorarno, raquiinno laabu né rasuidyno láani stipnés buñ. Né láaca rasuidyno ni gony Dios por lóono.

9, 10. ¿Ximod raslooyno que nadxiʼno saʼno?

9 Non guislooyno que nigolú nadxiʼno stipnés. Jesús bisuidy xpiin gonladxyibu saʼyibu (bíil Juan 13:35). Galnadxiʼ non gacnéni lóono guidzakno saʼno xomod herman, nac nitisi nac lagary ro rabésno, xcudxno, pal nacno buñ pobre o buñ ric (Colosenses 3:14). Por ngú, diti rioʼno guerr nili ragaityno buñ. La Biblia ná: «Noʼ toib mod ganno chú ngú guirá xiin Dios né chú ngú guirá xiin Buñdzab: nitisi buñ ni diti rony xinésni  diti sieed de Dios, nili buñ ni diti nadxiʼ buch». Né láaca náni: «Non gandxiʼno saʼno; diti xomod Caín, ni bieed de Buñdzab né bigaity buch» (1 Juan 3:10-12; 4:20, 21).

10 Raquiintzayno xtiempno, xfuersno né cós ni napno par gacnéno né gony animarno saʼno (Hebreos 10:24, 25). Racnéno «guirá buñ» (Gálatas 6:10).

11. ¿Xigony rasobno Jesús?

11 Non guisobno Jesús, portín por láasibu labúu guibigaxno Dios. La Biblia ná: «Diti noʼ stoib mod ni labúu guilaa buñ, portín Dios diti ma bidzel ni toib buñ ló gudxlio ni labúu guilaa lóono» (Hechos 4:12). Ló capítulo 5 ni sieed ló libro reʼ, bisuidyno que Jehová bixelbu Jesús par ñaity né nalaa guirá buñ ni nasob láabu (Mateo 20:28). Jehová ma golúbu Jesús par gony mandary Gudxlio ló dzú ni sietra. Por guirá ndeʼ, la Biblia ná que non guisobdiitzno Jesús pal nainy guibanyno tipzó (bíil Juan 3:36).

12. ¿Xigony diti rioʼno lad partid?

12 Diti non tzoʼno lad partid. Jesús diti goyoʼbu lad partid. Órni cayac juzgarbu, gochbu Pilato ni buny mandary Roma: «Gobierno xtuni diti nacni de gudxliogoxreʼ» (bíil Juan 18:36). Xomodca Jesús, raniiny lóono que nosi Gobierno xtuny Dios gony mandary. Por ngú diti rioʼno lad partid, nac rotísi lagary ro rabésno. Per la Biblia rony mandary lóono guisobno «buñchiin» (Romanos 13:1). Rasobno leyes ni nap gudx ro rabésno. Per órni toib ley diti noʼni de acuerdo né ley xtuny Dios, rasuʼno apóstoles. Layibu goniʼyibu: «Non guisobdo Dios xomod ni rony mandary xalagary guisobdo buñgudxlio» (Hechos 5:29; Marcos 12:17).

13. ¿Xí rasuidyno buñ gony Gobierno xtuny Dios?

 13 Non guisuidyno stipnés buñ que nosi Gobierno xtuny Dios sabeʼ guirá galnagan ni noʼ ló Gudxlio. Jesús goniʼ que «diitz sacró xtuny Gobierno» reʼ san buñ láani ló guidopynac Gudxlio (bíil Mateo 24:14). Ni toib gobierno ni noʼ ló Gudxlio sabeʼ guirá galnagan ni noʼ, nosi Gobierno xtuny Dios sony láani (Salmo 146:3). Jesús bisuidy guinabno lóo Dios scareʼ: «Guieed Gobierno xtunylo. Gac ni nálo, xomod lainy guibá, láaca ló gudxlio» (Mateo 6:10). La Biblia raiby lóono que Gobierno xtuny Dios sanitlóni guirá gobiernos ni noʼ né «nosi láani sioʼni por tipzó» (Daniel 2:44).

14. Xpensarylo, ¿xí religión rasuidy xinésni?

14 Nigoreʼ ni ma bisuidyno guirá ndeʼ, gonabdiitz looyca: «¿Chú layibu rasuidy ni merpa sieed ló la Biblia? ¿Chú layibu rasuidy laa Dios? ¿Chú layibu nigolú nadxiʼ saʼ? ¿Chú layibu raluladx que Dios bixel Jesús par guilaa lóono? ¿Chú layibu diti rioʼ lad partid? ¿Chú layibu rasuidy stipnés que nosi Gobierno xtuny Dios sabeʼ guirá galnagan ni noʼ?». Nosi testigos xtuny Jehová rony guirá ndeʼ (Isaías 43:10-12).

¿XÍ LÁANI GONYLO NIGOREʼ?

15. ¿Xí non gonyno pal nainy lóono guicacuent Dios mod rony adorarno láabu?

15 Diti nosi guinino que raluladxno que noʼ Dios. Dada demony raluladx que noʼbu, per diti rasobyibu Dios (Santiago 2:19). Pal nainy lóono guicacuent Dios mod rony adorarno láabu non gonyno ni canabbu lóono, diti nosi guiluladxno que nabanybu.

16. ¿Xigony non guireʼno lad religión falz?

 16 Par labúu guicacuent Dios mod rony adorarno láabu, láaca non guireʼno lad religión falz. Profeta Isaías bicaʼ: «Colguireʼ ronoʼbu, colgac nayaa» (Isaías 52:11; 2 Corintios 6:17). Por ngú non cueʼno tiplad guirá cós ni radzak né religión falz.

17, 18. a) ¿Xí ngú «Babilonia la Grande»? b) ¿Xigony nimaca raquiin guireʼlo ladni?

17 ¿Xí ngú religión falz? Nitisi religión ni diti rasuidy lóono gony adorarno Dios mod ná la Biblia. La Biblia rabeʼ laa guirá religión falz reʼ «Babilonia la Grande» (Apocalipsis 17:5). ¿Xigony? Después ni góc Guiérodann, gosaló goyoʼ xidal religión falz lainy gudx Babilonia. Guirá ni bisuidyibu biretzni ló guidopynac Gudxlio. Por ejemplo, buñ ni goyoʼ Babilonia bienyibu grupos de tzón dioxh. Ló naareʼ xidal religión rasuidyibu que Dios nac tzón buñ toibsi dioxh, per la Biblia nayadit raniʼ que nosi Jehová nac Dios ni nigolú né que Jesús ngú Xiimbu (Juan 17:3). Buñ babilonios láaca biluladxyibu que órni buñ raity noʼ ni rareʼ laidyibu né riee ló guii. Per diti nigolúni. (Bibiʼ ni ná nota 14, «Tzón buñ toibsi dios, nacni galrrasuidy falz», nota 17, «Alma», láaca ni ná nota 18, «Espíritu»).

18 Dios ma goniʼ que guirá religión falz mápa mer sanitlóni (Apocalipsis 18:8). ¿Rienlo xigony non gac naguelo guireʼlo lad religión falz la? Jehová raniiny gonylo láani nimaca, antes de tudy oportunida reʼ (Apocalipsis 18:4).

Pal rony adorarlo Jehová toibsi né xcudxbu, sadudybu looy toib famil rodann.

19. ¿Ximod san Dios looy pal ronylo ni nábu?

19 Pal ragoʼlo guiclo guisianlo religión falz né gonylo  ni ná Jehová, sigory tipnés xfamilo o ximiglo diti sienyibu looy né sacalóyibu looy. Per Jehová san looy. Sadudybu looy toib famil ni noʼ ló guidopynac Gudxlio, xidalguixo buñ ni nigolú nadxiʼ saʼ, né ló dzú ni sietra labúu sabanylo tipzó ló toib Gudxlio móz (Marcos 10:28-30). Sigory tipnés xfamilo o ximiglo ni diti rioladx gonylo ni ná Jehová nigoreʼ, después saniiny layibu guisuidyibu la Biblia.

20. ¿Xigony rasac tzoʼlo lad religión ni rasuidy xinésni?

20 Mápa mer, Dios sabeʼ guirá cós mal, né Gobierno xtunybu sony mandary guidopynac Gudxlio (2 Pedro 3:9, 13). Mózdiguieʼ sácni ór cú. Guirá buñ sony adoraryibu Jehová mod raniiny láabu. Por ngú rasac que nimaca guitzaʼlo mod naclo par labúu tzoʼlo lad religión ni rasuidy xinésni.