Rabiguet

Goyee ro ná índice xtuny contenidos

 CAPÍTULO 17

Labúu guininéno Dios

Labúu guininéno Dios

«Ni bisaʼ guibá né gudxlio» raniiny guicadiag lóono (Salmo 115:15).

1, 2. a) ¿Xigony ronylo pensary que oración nacni toib galrrascad rodann? b) ¿Xigony rasac ganno mod ná la Biblia guininéno Dios?

ÓRNI rabiʼno guirá vitzón ni noʼ guibá, radudyno cuent que Gudxlio nigolú mitienni. Par Jehová guirá buñ ni noʼ ló Gudxlio nacyibu xomod tibiniʼ nís (Salmo 115:15; Isaías 40:15). Ná nacno mitien cueʼ guirá vitzón ni noʼ guibá, la Biblia ná: «Jehová noʼ gax de guirá ni ranab lóbu, ni ranab xcalrracnébu né guidopy xcalnabany. Láabu radudybu ni canab xcalnabany buñ ni radzuiby láabu; racadiagbu órni racaʼyibu rudx, né ralaabu buñreʼ» (Salmo 145:18, 19). Napno toib privilegio rodann. Jehová ngú ni Bisaʼ guirá ni noʼ né napbu xiroʼ galnadip, né raniiny láabu gacno ximigbu né racadiagbu lóono órni raninéno láabu. Oración nacni toib galrrascad ni ma bidudy Jehová lóono.

2 Jehová nosi sacadiagbu lóono pal raninéno láabu mod nainy láabu. ¿Ximod labúu gonyno láani? Guisuidyno ximod ná la Biblia guininéno Dios.

XIGONY RASAC GUININÉNO JEHOVÁ

3. ¿Xigony rasac guininélo Jehová?

3 Jehová raniiny que looy guininélo láabu. ¿Ximod nanno láani? Buny pensary ló diitz ni raiby Jehová looy ló Filipenses 4:6, 7 (bíil láani). Dios ni Bisaʼ guibá né Gudxlio nigolú rioʼ galrrasaʼ por looy né rioladxbu gaibylo láabu ximod rasaclo né xi galnagan cacalólo.

4. Pal guirá ór raninéno Jehová, ¿ximod racnéni lóono?

 4 Órni raninéno Jehová racnéni lóono guidzakno láabu más. Órni chop buñ ni radzak saʼ raniʼyibu guirá ór xi ronyibu pensary, xi rasacyibu né xi galrrasaʼ noʼyibu ló, más radzakyibu saʼyibu. Modcuca Jehová ma gochbu looy ló la Biblia ni ronybu pensary né mod rasacbu, né ma gochbu looy xi ni gonybu ló dzú ni sietra. Labúu gaibylo láabu guirá ni noʼ lainy xcalnabanylo órni guininélo láabu. Pal guirá ór raninélo láabu, sadzaklo láabu más (Santiago 4:8).

¿XÍ NON GONYNO PAR GUICADIAG DIOS LÓONO?

5. ¿Ximod nanno que Jehová diti racadiag guirá buñ ni raniné láabu?

5 ¿Racadiag Jehová guirá buñ ni raniné láabu la? Yaca. Ló dzú ni bibany profeta Isaías, Jehová gochbu israelitas: «Ná guininéto naʼ guirá ór, diti racadiaga lóoto; ñato bidzani de runy» (Isaías 1:15). Pal diti rapno cuidad, labúu ñonyno cós ni labúu gony que  galsitno de Jehová né ma diti sagoʼbu cuent lóono órni guininéno láabu.

6. a) ¿Xigony rasac gapno fe? b) ¿Ximod raslooyno que napno fe?

6 Non gapno fe lóo Jehová par labúu guicadiagbu lóono órni raninéno láabu (Marcos 11:24). Apóstol Pablo rabexa: «Pal diti napno fe, Dios diti sioladx ni gonyno, portín ni rabigax ronoʼ Dios non guiluladx que láabu nabanybu né radudybu galnasác a guirá buñ ni rayopy láabu né guidopy xcalnabany» (Hebreos 11:6). Per diti nosi guinino que napno fe, non guisobdiitzno Jehová dzúna dzú (bíil Santiago 2:26).

7. a) ¿Xigony raquiin gapno más respet né gacno buñdxo órni guininéno Jehová? b) Órni raninéno Jehová, ¿ximod raslooyno que ni cayaibyno láabu rareʼni lainy xcalnabanyno?

7 Órni raninéno Jehová, non gacno buñdxo né gapno respet láabu. ¿Xigony? Pal naninéno toib rey o toib president, non ñonyno láani né respet. Jehová nac Dios ni nap Xiroʼgolu galnadip, por ngú raquiin gapno más respet né gacno buñdxo órni guininéno láabu (Génesis 17:1; Salmo 138:6). Láaca guirá ni gaibyno láabu guireʼni lainy xcalnabanyno, diti non guinino ngúca ngúca (Mateo 6:7, 8).

8. ¿Xí non gonyno órni noʼ ni canabno lóo Jehová?

8 Por último, órni noʼ ni ranabno Jehová raquiin gonyno mod canabno lóbu. Guinabno lóo Dios gacnébu lóono per diti gacno buñ gotzaʼab né cuésno que Jehová guidudy guirá ni canabno láabu. Pal labúu gonyno dxiin par gapno ni caquiinno, gonyno dxiin nadip né guicacuentno nitisi dxiin ni labúu gonyno (Mateo 6:11; 2 Tesalonicenses 3:10). Pal ranabno Jehová gacné lóono par diti guiabno ló cós mal, non  gapno lóono par diti tzoʼno lagary ni labúu gony que tzaguiabno ló cós yox (Colosenses 3:5). Nigoreʼ guisuidyno tipnés galrranabdiitz ni rony buñ órni ná guininé Dios.

TIPNÉS GALRRANABDIITZ NI RONY BUÑ ÓRNI NÁ GUININÉ DIOS

9. a) ¿Chú láabu non guininéno? b) ¿Ximod ná Juan 14:6 guininéno Dios?

9 ¿Chú láabu non guininéno? Jesús bisuidy buñ ni cuanal láabu mod guininéyibu Dios: «Bixiosdo ni noʼ guibá, gac nayaa laalo» (Mateo 6:9). Por ngú nosi Jehová non guininéno. Jesús láaca goniʼ: «Naʼ ngú néz né ni nigolú né vida. Ni toib labúu guidxin ronoʼ Bixiosa pal diti nacni por naʼ» (Juan 14:6). Ndeʼ rasuidy lóono que órni guininéno Dios gonyno láani ló laa Jesús. ¿Xí radudy diitz ndeʼ? Pal nainy lóono guicacuent Jehová ni canabno láabu, non gapno respet dxiin ni ma bunycuentbu Xiimbu. Xomod ma bisuidyno, Jesús bieed ló Gudxlio par guilaabu lóono de galkié né galgoity (Juan 3:16; Romanos 5:12). Láaca, Jehová ma golúbu Jesús par gac Sumo Sacerdote né Juez (Juan 5:22; Hebreos 6:20).

Labúu guininéno Dios guirá ór.

10. ¿Noʼpa toib mod ni gonyno par guininéno Dios la? Golexa láani.

10 ¿Noʼpa toib mod ni gonyno par guininéno Dios la? Yaca. Jehová diti raiby lóono guixixipno, cuuno o guisagaʼno órni guininéno láabu. La Biblia rasuidy que labúu guininéno Dios nitisi mod, per gonyno láani né respet (1 Crónicas 17:16; Nehemías 8:6; Daniel 6:10; Marcos 11:25). Par Jehová más rasac gaibyno láabu ni noʼ lainy xcalnabanyno, diti mod gonyno láani. Labúu guininéno láabu fuers o dzudiguieʼ, nitisi lagary né  nitisi ór, rodzu o gueʼel. Órni raninéno láabu, napno confianz que Jehová sacadiag lóono ná diti noʼ stoib ni cayen ni canino (Nehemías 2:1-6).

11. ¿Xí cós labúu guinabno Jehová?

11 ¿Xí cós labúu guinabno Jehová? Nitisi cós ni noʼ de acuerdo né ni nábu. La Biblia ná: «Labúu guinabno nitisi cós ni noʼ de acuerdo mod ni nábu né láabu racadiagbu lóono» (1 Juan 5:14). ¿Labúu guinabno cós ni caquiinno la? Scú. Órni raninéno Jehová nacni suusi caninéno toib ximigdxinno. Labúu gaibyno láabu guirá ni ronyno pensary né ni rasacno (Salmo 62:8). Labúu guinabno láabu guidudybu espíritu santo lóono par gonyno xinésni (Lucas 11:13). Láaca labúu guinabno láabu guidudybu galnan par gonyno xinésni né guinabno fuers par guicalóno galnagan (Santiago 1:5). Non guinabno Jehová guitudybu xcalkiéno scásiʼ (Efesios 1:3, 7). Láaca non guinabno por stipnés buñ, ladni noʼ xfamilno né xhermanno ni noʼ lainy congregación (Hechos 12:5; Colosenses 4:12).

12. ¿Xí más rasac guinabno Jehová?

12 ¿Xí más rasac guinabno Jehová? Ni más rasac ngú laa Jehová né ni nainy láabu gonybu. Non guidudyno guixquix né guidopy xcalnabanyno por guirá ni ma bunybu por lóono (1 Crónicas 29:10-13). Órni Jesús bisuidy xpiin naniné Dios, bislooybu xi ngú ni más guisac órni guininéno Dios (bíil Mateo 6:9-13). Láabu goniʼbu que primer raquiin guinabno gac nayaa laa Jehová. Después, Jesús bislooy que non guinabno guieed Gobierno xtuny Dios né guinabno gac ni ná Dios ló guidopynac Gudxlio. Goniʼbu que órni ma gonabno guirá ndeʼ, labúu guinabno cós ni caquiinno.  Órni primer rasetlano Jehová né ni raniiny gonybu raslooyno que ngú ni más rasac par lóono.

13. ¿Balac non gaclano guininéno Dios?

13 ¿Balac non gaclano guininéno Dios? La Biblia diti rasetlaa balac gaclano. Rioʼ ór labúu gonyno láani dop o sioʼol. Por ejemplo, labúu gonyno toib oración dop antes de guáno, per labúu gonyno láani sioʼol órni radudyno guixquix Jehová o órni raibyno láabu toib  galnagan ni cacalóno (1 Samuel 1:12, 15). Diti nainy lóono gaclano guininéno Dios par guidziguiaʼ stipnés lóono, xomod buny tipnés buñ ni bibany ló xtzú Jesús (Lucas 20:46, 47). Jehová diti radziguiaʼbu órni raninéno láabu modreʼ. Jehová rioladx gaibyno láabu ni noʼ lainy xcalnabanyno.

14. a) ¿Non guininéno Dios guirá ór la? b) ¿Xí rasuidyni lóono de Jehová?

14 ¿Non guininéno Dios guirá ór la? Jehová raiby lóono guininéno láabu guirá ór. La Biblia ná: «Colguinab lóo Dios guirási ór» né «colguininé Dios guirá dzú» (Mateo 26:41; 1 Tesalonicenses 5:17; Romanos 12:12). Jehová guirá ór puextca noʼbu guicadiagbu lóono. Guirá dzú labúu guidudyno guixquix láabu por xcalnadxiʼbu né por cós ni radudybu lóono. Láaca labúu  guinabno láabu guisanésbu lóono né guidudybu fuers né guisialdóbu xcalnabanyno. Pal oración rasac par lóono, saninéno láabu guirá ór.

15. ¿Xigony non guinino «amén» órni ralox raninéno Dios?

15 ¿Xigony non guinino «amén» órni ralox raninéno Dios? Diitz amén radudyni diitz «scú gacni». Órni ranino láani, raslooyno que canino ni noʼ lainy xcalnabanyno (Salmo 41:13). Láaca, la Biblia rasuidy lóono que órni guilox oración ni rac nisló xidal buñ non guinino «amén», labúu guinino láani fuers o lainy xcalnabanyno. Modreʼ, raslooyno que noʼno de acuerdo né ni gonabyibu Dios (1 Crónicas 16:36; 1 Corintios 14:16).

¿XIMOD RACAPY DIOS ÓRNI RANINÉNO LÁABU?

16. ¿Xigony nanno que Dios racapy lóono órni raninéno láabu?

16 ¿Nigolúpa racapy Dios órni raninéno láabu la? Scú. La Biblia ná que Dios «racadiag oración» né que láabu sacapybu lóono (Salmo 65:2; Isaías 30:19). Jehová racadiag xidalguixo buñ ni raniné láabu né guidop xcalnabany né racapybu láani de xidal mod.

17. ¿Ximod raquiin Jehová ángeles né buñ ni rony ni nábu par guicapybu lóono órni raninéno láabu?

17 Jehová raquiin ángeles né buñ ni rony ni nábu par guicapybu lóono órni raninéno láabu (Hebreos 1:13, 14). Xidal buñ ma gonab lóo Dios guienyibu la Biblia, né después Testigos goyguen layibu. Ndeʼ raslooy que ángeles rasanir ló xchiin Jehová par gan buñ «diitz sacró» ló guidopy Gudxlio (bíil Apocalipsis 14:6). Láaca, xidalno ma gonabno lóo Jehová portín gopno toib galnagan o goyoʼ ni biquiinno, né cuaʼno xcalrracné toib herman (Proverbios 12:25; Santiago 2:16).

Jehová raquiimbu herman par guicapybu oración xtunyno.

18. ¿Ximod raquiin Jehová espíritu santo né la Biblia par guicapybu lóono órni raninéno láabu?

 18 Jehová láaca raquiimbu espíritu santo par guicapybu oración xtunyno. Órni ranabno láabu gacnébu lóono par guicalóno toib galnagan, sigory saquiimbu espíritu santo par guisanésbu né guidudybu galnadip lóono (2 Corintios 4:7). Láaca, Jehová raquiimbu la Biblia par guicapybu lóono órni raninéno láabu né racnébu lóono par gonyno xinésni. Sigory órni rolno la Biblia radzelno tipnés textos ni racné lóono. Jehová láaca labúu gony que toib ni gony comentar ló reunión guiniʼ ni merpa caquiinno. Né labúu guiquimbu toib anciano de congregación par guislooybu lóono ni ná Biblia (Gálatas 6:1).

19. ¿Xigony rioʼ ór Jehová diti racapy lóono órni raninéno láabu?

19 Pal toibtica buelt ma gonabdiitzlo looyca xigony Jehová diti racapy looy, bisetnaladx que láabu nanbu pu dzú né ximod guicapybu lóono. Jehová nantzay xi ni caquiinno. Per sigory raquiin guinabno láani xidal buelt par guislooyno Jehová que nigolú rasacni par lóono né que napno fe lóbu (Lucas 11:5-10). Rioʼ ór Jehová diti racapy lóono mod nainy lóono. Por ejemplo, sigory raninéno láabu portín napno toib galnagandaʼ, per Jehová diti rabeʼbu galnagancu ronoʼno, xalagary ngú radudybu fuers lóono par gony guantaryno (bíil Filipenses 4:13).

20. ¿Xigony non guininéno Dios guirá ór?

20 Nandxichno que oración nacni toib galrrascad ni ma bidudy Jehová lóono. Napno confianz que racadiagbu lóono (Salmo 145:18). Né, laʼga más raninéno láabu né guidopy xcalnabanyno, sadzakno láabu más.