Rabiguet

Goyee ro ná índice xtuny contenidos

 CAPÍTULO 2

La Biblia sieedni de Dios

La Biblia sieedni de Dios

1, 2. ¿Xigony labúu guinino que la Biblia nacni toib galrrascad sacróyen?

¿XIMOD rasaclo órni ximiglo noʼ ni rascad looy? Sigory maca nainy looy guibiʼlo láani. Nigolú nakit rioʼlo portín ximiglo bisetnaladx looy, né radudylo guixquix láabu.

2 La Biblia nacni toib galrrascad sacróyen ni bidudy Dios lóono. Napni información ni diti labúu guidzelno stoib lagary. Por ejemplo, raibyni lóono que Dios bisaʼ guibá né Gudxlio, né láaca bisaʼbu primer buñguieeu né primer buñgonaʼ. La Biblia sitnéni litz ni racné lóono órni radudyno ló galnagan. Láaca raibyni lóono que Dios raniiny que Gudxlio gacni toib lagary sacró né rabexani ximod gonybu láani.

3. ¿Xí guienlo órni guisuidylo la Biblia?

3 Órni guisuidylo la Biblia sienlo que Dios rioladx gaclo ximigbu. Laʼga más guimbulo láabu, más sabigaxlo láabu.

4. Goniʼ xi más radziguiaʼlo de la Biblia.

4 La Biblia ma góc traducirni ló más de tzón mil diitz, né xidal millón ma bireʼ ló guiich. Xidal millón de buñ labúu roʼol la Biblia ló xtiitz. Né guirá xomal ragaisy más de tip millón biblias. Riendxichni que diti noʼ stoib libro xomod la Biblia.

5. ¿Xí radudy diitz que la Biblia «sieedni de Dios»?

5 La Biblia «sieedni de Dios» (bíil 2 Timoteo 3:16). Per sigory noʼ buñ ni raniʼ: «¿Ximod sieedni de Dios janlo buñgudxlio bicaʼ láani la?». La Biblia racapy  galrranabdiitz reʼ órni rasetlani: «Buñ goniʼ ni ná Dios portín espíritu santo bichiin layibu» (2 Pedro 1:21). ¿Ximod golonés Dios layibu? Guislooyno láani xomod órni toib buñguieeu ranab xiin guicaʼ toib guiich. ¿Chú xpensary caa ló guiichcu? Xpensary bixiosbu, diti xpensary xiimbu. Scúca, la Biblia napni xpensary Dios, diti xpensary buñgudxlio. Dios golonés layibu par nacaʼyibu la Biblia. Por ngú ranino que la Biblia nacni «xtiitz Dios» (1 Tesalonicenses 2:13). (Bibiʼ ni ná nota 2, «La Biblia sieedni de Dios»).

TOIB LIBRO NI DITI RACHÉ

6, 7. ¿Xigony ranino que la Biblia radzaktzay saʼni?

6 Desde dzú gosaló bicaʼyibu la Biblia dada dzú biloxni,  godudy más de tipmil xhoopgayoʼ íz. Láaca, diti toibsi tiemp bibany buñ ni bicaʼ láani. Tipnésyibu gocyibu buñnan né stipnés yaca. Por ejemplo, toibtica de layibu góc doctor. Stipnésyibu buny dxiin ló layoo, gonás beel, goytap xiil, góc profetas, jueces o reyes. Ná gadzé clas buñ bicaʼ la Biblia, guirá libros ni sitnéni radzaktzay saʼni dada ro rasalóni né dada ro raloxni. *

7 Ló primer capítulos ni sieed ló Génesis rabexani ximod gosaló galnagan ló Gudxlio. Né últimos capítulos ni sieed ló Apocalipsis raibyni lóono ximod sabeʼ Dios guirá galnagan né ximod gonybu Gudxlio toib lagary móz. La Biblia rasetlaa ni góc ló xidal mil íz né raslooyni que Dios guirá ór rony cumplir xtiitz.

8. ¿Xigony la Biblia diti rachéni órni raniʼni de ciencia?

8 La Biblia diti cuáni par guisuidyni lóono de ciencia nili par guisuidyni mbiox scuel. Per diti rachéni órni rasetlani de ciencia. Ndeʼ ni rabésno de toib libro ni sieed de Dios. Por ejemplo, ló Levítico rabexani ni góoch Dios a israelitas xi non ñonyibu par diti natudyibu xcalguitzyibu stipnés. Guirá ndeʼ cuáni xidal íz antes ni ñan buñ ximod radal galguitz. La Biblia láaca diti rachéni órni náni que Gudxlio noʼni labu (Job 26:7). Órni xidal buñ biluladx que guidopy Gudxlio nacni toib láach, la Biblia maca goniʼni que narikni (Isaías 40:22).

9. ¿Xí prueby napno que buñ ni bicaʼ la Biblia goniʼyibu ni merpa góc?

9 Órni la Biblia raniʼ de historias, diti rachéni. Per  xidal libros de historias diti scú nacni, portín buñ ni bicaʼ láani, diti bicaʼyibu ni merpa góc. Por ejemplo, diti guirá ór goniʼyibu pal xcudxyibu diti buny gan ló guerr. Per buñ ni bicaʼ la Biblia diti bicachyibu órni xcudxyibu diti buny gan ló guerr. Láaca bicaʼyibu ro bichéyibu. Por ejemplo, ló Salmo 51, rey David bisetbu que bunybu galkié rodann. Buñ ni bicaʼ la Biblia goniʼyibu ni merpa góc, diti bicachyibu xitcal, ngú raslooy que la Biblia sieedni de Dios né labúu gapno confianz láani.

TOIB LIBRO NI RALITZ LÓONO

10. ¿Xigony dada ló naareʼ raquiinrano xilitz la Biblia?

10 La Biblia «sieedni de Dios né raquiinni par guisuidyni, par gony corregirni, par conésni» (2 Timoteo 3:16). Xilitz la Biblia dada ló naareʼ nigolú racnéni lóono portín sieedni de Jehová. Láabu bisaʼbu lóono, por ngú rientzaaybu ni ronyno pensary né ni rasacno. Más rimbubu lóono que lóocano, né raniiny láabu guibanyno nakit. Nanbu xi sacné lóono né xi yaca.

11, 12. a) ¿Xí litz galán goniʼ Jesús ló Mateo 5 a 7? b) ¿Xí stipnés litz sieed ló la Biblia?

11 Ló Mateo 5 a 7 radzelno litz galán. Cú Jesús raiby lóono ximod labúu guibanyno nakit, ximod guidzakno buñ, ximod guininéno Dios né ximod tzoʼno conforme né ni napno. Ná ma de goló chop mil íz goniʼ Jesús guirá ndeʼ, racnésani lóono dada ló xtzúno.

12 Ló la Biblia, láaca radzelno litz ni racné lóono guibanyno sacró né xfamilno, gonyno dxiin nadip né diti tíilno né stipnés. Xilitz la Biblia guirá ór labúu gacnéni lóono, nac nitisi nacno, nac rotísi rabésno né ná cacalóno  nitisi galnagan (bíil Isaías 48:17). (Bibiʼ ni ná nota 3, «Litz»).

PROFECÍAS XTUNY LA BIBLIA GUIRÁ ÓR RAC CUMPLIRNI

Ni bicaʼ libro xtuny Isaías goniʼ que Babilonia sanitlóni.

13. ¿Xí goniʼ Isaías nasaclóo gudx Babilonia?

13 Xidal profecías ni sieed ló la Biblia ma góc cumplirni. Por ejemplo, profeta Isaías goniʼ que gudx Babilonia sanitlóni né golexabu xipa mod gacni (Isaías 13:19). Gudx Babilonia gop tipnés puert né toib guʼuc ni bigoo láani né nagan par ñony gan stipnés gudxrop láani. Per Isaías goniʼ que guʼuc reʼ nabichni né que xpuertni ñaʼanni xobialsaa. Láaca goniʼbu que xi enemig Babilonia nacaʼyibu gudxcu né diti ñoʼ chú nacaló layibu. Isaías dada goniʼ que buñguieeu ni ñony gan layibu ngú, Ciro (bíil Isaías 44:27–45:2). (Bibiʼ ni ná nota 4, «Profecías»).

14, 15. ¿Ximod góc cumplir profecía xtuny Isaías?

14 Midid chopgayoʼ íz después ni bicaʼ Isaías profecíacu, xidalguixo soldad bidxin lainy gudx Babilonia par ñonyibu gan láani. ¿Chú láabu gosanir nisló guirá soldadcu? Rey xtuny Persia. Né ¿ximod góc laabu? Ciro, xomodpa bisetlaa profecía láani. Per ¿labúu ñoʼyibu gudx Babilonia né nanitlóyibu láani xomod goniʼ profeta Isaías la?

15 Gueʼel ni goyoʼyibu lainy gudx Babilonia, buñ babilonios cayonyibu toib lanii. Diti goyoʼyibu ló galrrasaʼ portín guʼuc né muros bigoo gudxcu. Laʼga cayonyibu xilaniiyibu, Ciro né soldad xtuny goleʼyibu toib biaas par ñaʼach ló guʼuc. Órni biaʼach ló nís reʼ, soldad labúu godudyibu stiplad guʼuc. Per ¿ximod labúu nadudyibu stiplad muroscu? Mod sieed ló profecía, xpuert gudxcu  biaʼanni xobialsaa. Por ngú, soldad labúu bunyibu gan sin nadíilyibu.

16. a) ¿Xí goniʼ Isaías nasaclóo gudx Babilonia? b) ¿Xigony nanno que profecía xtuny Isaías góc cumplirni?

16 Isaías goniʼ que después diti ñoʼ chú nabés gudx Babilonia. Láabu bicaʼbu: «Dipa sabés buñ lagarycu né,  por guirá generación ni guieed diti sioʼ dzú sabany buñ lagarycu» (Isaías 13:20). ¿Góc cumplir diitzreʼ la? Scú, gudx Babilonia goyoʼni midid ochent kilómetros niis lad sur de gudx Bagdad (Irak). Per ló xtzúno lagary reʼ nosi noʼ yoʼ balaʼ xtuny gudxcu. Ni toib buñ rabés lagarycu. Xomod ná la Biblia, Jehová binitló gudx Babilonia (Isaías 14:22, 23). *

Yoʼ balaʼ xtuny Babilonia.

17. ¿Xigony labúu gapno confianz ló guirá ni ma goniʼ Dios gony?

17 Xidal profecías ni sieed ló la Biblia ma góc cumplirni. Por ngú, labúu gapno confianz que guirá ni raniʼ la Biblia sac cumplirni. Jehová ma goniʼbu gonybu Gudxlio toib lagary móz né nandxichno que sony cumplirbu ni ma goniʼbu (bíil Números 23:19). Dios  radudy esperanza lóono par guibanyno tipzó, né Dios «diti labúu rascú» (Tito 1:2). *

LA BIBLIA LABÚU GUITZAʼ MOD NACLO

18. ¿Xí goniʼ apóstol Pablo de «xtiitz Dios»?

18 Dada reʼ ma bisuidylo que diti noʼ stoib libro xomod la Biblia. Guidopycani radzak saʼni né órni rasetlani de ciencia o historia diti rachéni. Láaca ralitzni lóono né napni xidal profecías ni ma góc cumplir. Per diti ngúsi. Apóstol Pablo bicaʼ: «Xtiitz Dios nabanyni né napni galnadip». ¿Xí radudy diitz ndeʼ? (Bíil Hebreos 4:12).

19, 20. a) ¿Ximod labúu gacné la Biblia looy guimbulo looyca? b) ¿Ximod labúu guislooylo que radudylo guixquix por ni naplo la Biblia?

19 La Biblia labúu guitzaʼ mod naclo. Labúu gacnéni looy guimbulo looyca. ¿Ximod? La Biblia labúu gacnéni looy guidudylo cuent xi noʼ ló xpensarylo né xi rasaclo. Por ejemplo, sigory ronyno pensary que nadxiʼno Dios. Per órni rasuidyno la Biblia, radudyno cuent que non guislooyno galnadxiʼcu por mod ronyno né guisobno ni ná la Biblia.

20 Nandxichno que la Biblia sieedni de Dios. Raniiny láabu goʼol lo láani, guisuidylo né gandxiʼlo ni náni. Bidudy guixquix Dios por galrrascad reʼ. ¿Ximod labúu guislooylo láani? Diti guiañ guisuidylo la Biblia. Modreʼ sienlo xi canab Dios lóono. Ló capítulo ni sieed, sasuidyno más xi raniiny Dios par buñgudxlio.

^ Párrafo. 6 Tipnés buñ ná que la Biblia diti radzak saʼni, per diti nigolúni. Pal nainy ganlo más, bibiʼ capítulo 7 ni sieed ló libro La Biblia... ¿la Palabra de Dios, o palabra del hombre?, ni rabeʼ testigos xtuny Jehová.

^ Párrafo. 16 Pal nainy looy ganlo más de profecías ni sieed ló la Biblia, bibiʼ artículo «La Biblia, un libro de profecías exactas. Parte 2», ni sieed ló revista ¡Despertad! de juny íz 2012, páginas 12 a 14, ni rabeʼ testigos xtuny Jehová.

^ Párrafo. 17 Mod binitló Babilonia nacni toib profecía ni rasetlaa la Biblia ni ma góc cumplir. Sadzelo más información de stipnés profecías ló nota 5, «Profecías ni raniʼ de mesías».