Rabiguet

Goyee ro ná índice xtuny contenidos

 CAPÍTULO 4

¿Chú láabu ngú Jesucristo?

¿Chú láabu ngú Jesucristo?

1, 2. a) ¿Xigony diti labúu guiniʼlo que rimbutzaaylo toib buñ ni xidal buñ rimbu pal nosi nanlo ximod laabu? b) ¿Xí láani ná tipnés buñ de Jesús?

NOʼ XIDAL buñguieeu ni xidalguixo buñ rimbu ló Gudxlio. Looy sigory nanlo laa toibticayibu. Per ¿labúu guiniʼlo que rimbutzaaylo buñcu pal nosi nanlo ximod laabu la? Yaca. ¿Xigony? Portín diti rimbulo ximodpa nacbu né diti nanlo xi clas buñ nacbu.

2 Ná ma godudy chop mil íz de goló bieed Jesucristo ló Gudxlio, sigory ma bicadiaglo de láabu. Per xidalguixo buñ diti nanyibu xi clas buñ góc Jesús. Tipnés buñ ná que gócbu toib buñtzay. Stipnés ná que gócbu toib profeta, né tipnés raluladx que Jesús nac Dios. Looy, ¿xí nálo? (Bibiʼ ni ná nota 12, «Jesucristo»).

3. ¿Xigony rasac guimbulo chú ngú Jehová né chú ngú Jesucristo?

3 Nigolú rasac guimbulo chú ngú Jesús. ¿Xigony? Portín la Biblia ná: «Ndeʼ radudy diitz guibany buñ tipzó: que guimbuyibu looy, toibguielot Dios ni nigolú, né guimbuyibu xiinlo Jesucristo ni bixelo» (Juan 17:3). Pal rasuidylo chú ngú Jehová né chú ngú Jesús, labúu sabanylo tipzó ló Gudxlio móz (Juan 14:6). Pal rimbulo Jesús labúu gacnéni looy nigoreʼ, portín láabu bisuidybu lóono ximod guibanyno né ximod guidzakno stipnés buñ (Juan 13:34, 35). Ló capítulo 1 bisuidyno ni nigolú de Dios. Ló capítulo reʼ guienno xi rasuidy la Biblia de Jesús.

 «MA BIDZELDO MESÍAS»

4. ¿Xí radudy diitz Mesías Cristo?

4 Xidzú íz dzú yása gál Jesús, ló la Biblia Jehová goniʼ que saxelbu Mesías o Cristo. Diitz Mesías bireʼni ló diitz hebreo né diitz Cristo bireʼni ló diitz griego. Guiropca títulos reʼ radudyni diitz que Dios golúbu Jesús par gony toib dxiin ni rasac. Láaca, ló dzú ni sietra, Mesías sony cumplirbu guirá ni ma goniʼ Dios gony.

5. ¿Biluladx xpiin Jesús que láabu ngú Mesías la?

5 Xpiin Jesús gondxichyibu que Jesús ngú Mesías ni Dios goniʼ guieed (Juan 1:41). Por ejemplo, apóstol Pedro gochbu Jesús: «Looy ngú Cristo» (Mateo 16:16). Nigoreʼ guisuidyno xigony láaca labúu gapno confianz que Jesús ngú Mesías.

6. ¿Xí buny Jehová par gacnébu lóono guidudyno cuent chú ngú Mesías?

6 Xidal íz antes de ñal Jesús, profetas xtuny Dios goniʼyibu xidal cós ni ñacné buñ nadudy cuent chú ngú Mesías. ¿Ximod ñacné ndeʼ layibu? Guisetlano toib ejemplo par guientzaayno láani. Buny pensary que toib buñ raxel looy ro radxin camión ro dxee xidal buñ, par tzacaʼlo toib buñ ni diti rimbulo. Pal raibybu looy ximodpa nac buñcu né xi lairy nócbu, labúu simbulo buñcu. Scúca, Jehová biquiin profetas par ñaiby lóono xi ñony Mesías né xi nasaclobu. Buñ ni natzaay xcalnabany radudy cuent que Jesús ngú Mesías o Cristo órni rabiʼyibu ximod góc cumplir guirá profecíascu.

7. Bisetlaa chop profecías ni racné lóono guidudyno cuent que Jesús ngú Mesías.

7 Nigoreʼ guisuidyno chop profecías reʼ. Primer  profecía, cuáni midid gatzgayoʼ íz antes de ñal Jesús. Profeta Miqueas goniʼ que Mesías gál lainy toib gudx mitien ni laa Belén (Miqueas 5:2). Né lagarycu gool Jesús (Mateo 2:1, 3-9). Ni rarop profecía, profeta Daniel bicaʼ láani, goniʼbu que Mesías nadxin ló íz 29 (Daniel 9:25). Profecía reʼ láaca góc cumplirni. * Nigoreʼ nosi bisetlano chopsi profecías de guirá profecías ni racné lóono guidudyno cuent que Jesús ngú Mesías ni Dios goniʼ guieed.

Jesús bidxin góc Mesías o Cristo órni goyonis.

8, 9. Órni goyonis Jesús, ¿ximod bislooy Jehová que Jesús ngú Mesías?

8 Jehová nayadit goniʼ que Jesús ngú Mesías. Dios gochbu Juan ni Ragonis que sadudybu toib señal par nadudy Juan cuent que Jesús ngú Mesías. Ló íz 29, Jesús goyee guʼuc Jordán par golonis Juan láabu. Ór cú Juan bibiʼ toib señal. La Biblia rabexa xi ni góc: «Suusipa bilox goyonis Jesús, bireʼbu lainy nís, né ór cú bixal guibá né bibiʼbu espíritu xtuny Dios sietj xomod toib palom né cadxinni ronoʼ Jesús. Né ór cú goyoʼ ni goniʼ desde lainy guibá: Ndeʼ Xiinna ni nadxiʼya; naʼ ma cuacuenta láabu» (Mateo 3:16, 17). Órni Juan bibiʼ né bicadiag ndeʼ, ngú gocné láabu ñonybu crer que Jesús ngú Mesías (Juan 1:32-34). Dzúcu, Jehová bidudy  espíritu santo a Jesús. Ór cú, Jesús bidxin góc Mesías o Cristo. Láabu ngú ni golú Dios par Guisanir né gac Rey (Salmo 2:6; Isaías 55:4).

9 Profecías ni sieed ló la Biblia, né guirá cós ni  Jehová buny né goniʼ dzú goyonis Xiimbu raslooyni que Jesús ngú Mesías. Per ¿pu lagary goyoʼbu antes de ñeedbu ló Gudxlio? ¿Xí clas buñ gócbu? Guisuidyno ni ná la Biblia.

¿PU LAGARY GOYOʼ JESÚS ANTES DE ÑEED LÓ GUDXLIO?

10. ¿Xí rasuidy la Biblia mod bibany Jesús antes de ñeed ló Gudxlio?

10 La Biblia rasuidy que Jesús bibany lainy guibá xidal íz antes de ñeedbu ló Gudxlio. Por ejemplo, profeta Miqueas goniʼ que Mesías «ma xidzú tiemp noʼbu» lainy guibá (Miqueas 5:2). Jesús goniʼ xidal buelt que bibanybu lainy guibá antes de ñalbu xomod buñgudxlio (bíil Juan 3:13; 6:38, 62; 17:4, 5). Lainy guibá, Jesús bidzaktzaybu Jehová.

11. ¿Xigony nigolú nadxiʼ Jehová a Jesús?

11 Jehová nigolú nadxiʼbu Jesús. ¿Xigony? Portín Jesús «lagolbu ló guirá ni goyaʼ». Ndeʼ radudy diitz que láabu ngú primerdiguieʼ ni bisaʼ Jehová (Colosenses 1:15). * Jesús láaca nigolú rasacbu par Jehová, portín Jesús ngú «toibguielot Xiimbu». Ndeʼ radudy diitz que Jehová bisaʼbu Jesús sin xcalrracné stoib (Juan 3:16). Láaca, nosi Jesús gocnébu Jehová par bisaʼ guirá cós ni noʼ ló Gudxlio (Colosenses 1:16). Né nosi Jesús rareʼ laabu «Diitz», portín Jehová biquiimbu Jesús par bidudy instrucciones né mensajes a ángeles né a buñgudxlio (Juan 1:14).

12. ¿Xigony nanno que Jesús né Dios diti toibsi layibu?

12 Noʼ buñ ni raluladx que Dios né Jesús toibsi layibu,  per la Biblia diti rasuidy ngú. La Biblia rasuidy que Jesús noʼ ni bisaʼ láabu, ndeʼ radudy diitz que nírcu diti goyoʼbu. Per Jehová dada nírcu maca noʼbu. Láabu ngú ni bisaʼ guirá ni noʼ (Salmo 90:2). La Biblia nayadit rasetlaa que Jehová lagol lóo Jesús. Láaca Jesús dipa goniiny ñacbu suusi Bixiosbu (bíil Juan 14:28; 1 Corintios 11:3). Né nosi Jehová nac «Dios ni nap Xiroʼgolu galnadip» (Génesis 17:1). Láabu más rasacbu né más nadipbu. (Bibiʼ ni ná nota 14, «Tzón buñ toibsi Dios, nacni galrrasuidy falz»).

13. ¿Xigony ná la Biblia que Jesús «nacbu xomod nac Dios ni diti labúu rabiʼ buñ»?

13 Antes de ñaʼ guibá né Gudxlio, Jehová né Jesús bunyibu dxiin toibsi por xidal millón de íz. Por ngú, nandxichno que nigolú binladxyibu saʼyibu (Juan 3:35; 14:31). La Biblia ná que Jesús «nacbu xomod nac Dios ni diti labúu rabiʼ buñ». ¿Xigony? Portín Jesús bisuʼtzaybu cualidades xtuny Bixiosbu (Colosenses 1:15).

14. ¿Ximod gool Jesús xomod buñgudxlio?

14 Jesús gosaguel bisian guibá né bieed ló Gudxlio. Per ¿ximod golbu xomod buñgudxlio? Jehová buny toib galrradziguiaʼ. Biquiimbu toib mbioxhlas ni góc laa María par nasann Xiimbu. Por ngú, bixios Jesús diti góc toib buñgudxlio. Modreʼ María gosann toib badaʼ ni diti gop galkié ni góc laa Jesús (Lucas 1:30-35).

¿XÍ CLAS BUÑ GÓC JESÚS?

15. ¿Ximod labúu guimbutzaaylo Jehová?

15 Jesús goniʼ: «Ni ma bibiʼ naʼ láaca ma bibiʼ  Bixiosa» (Juan 14:9). Jesús nac xomodpa Jehová, por ngú pal rasuidylo de Jesús simbutzaaylo Jehová. Labúu guimbutzaaylo mod nac Jesús pal roʼol lo Evangelios xtuny Mateo, Marcos, Lucas né Juan.

16. a) ¿Xí bisuidy Jesús? b) ¿Chú bisuidy a Jesús guirá ndeʼ?

16 Xidal buñ bimbuyibu Jesús xomod «Mextra» (Juan 1:38; 13:13). Tipnés cós ni más rasac ni bisuidy Jesús láani ngú «diitz sacró de Gobierno». ¿De xí «Gobierno»? De Gobierno xtuny Dios, ni gony mandary Gudxlio desde lainy guibá né sasiábni galnasác ronoʼ buñ ni rasob ni ná Dios (Mateo 4:23). ¿Chú bisuidy a Jesús guirá ndeʼ? Jehová bisuidy láabu. Jesús goniʼ: «Ni rasudi diti nacni xtuni, nacni xtuny ni bixel naʼ» (Juan 7:16). Jesús gon que Dios raniiny que buñ guicadiag diitz sacró de Gobierno xtuny Dios ni gony mandary Gudxlio.

17. a) ¿Pu lagary bisuidy Jesús buñ? b) ¿Xigony Jesús nigolú buny xtem par bisuidybu buñ?

17 ¿Pu lagary bisuidy Jesús buñ? Rotísi lagary. Bisuidybu buñ laidy dainy, lainy gudxrop, lainy gudx, lainy mercad, lainy templo né lidx buñ. Diti golésbu que buñ ñee ronoʼbu, láabu biyopybu buñ (Marcos 6:56; Lucas 19:5, 6). Jesús goleʼbu xiroʼ tiemp né bunybu xtem par bisuidybu buñ. ¿Xigony? Portín gonbu que ngú ni raniiny Dios, né guirá ór bisobdiitzbu Bixiosbu (Juan 8:28, 29). Láaca bisuidybu portín binladxbu buñ (bíil Mateo 9:35, 36). Bibiʼbu que buñ ni gosanir ló religión diti bisuidyibu ni nigolú de Dios né de Gobierno xtuny Dios. Por ngú, bisuidybu guiráxadit buñ diitz sacró de Gobierno reʼ.

18. ¿Xí más rioladxlo mod góc Jesús?

 18 Jesús binladx né goyoʼ galrrasaʼ por buñ. Godabiobu buñ, né buñ bibignoo láabu. Dada mbioxien goyoʼ goxt né láabu (Marcos 10:13-16). Jesús guirá ór buny xinésni. Bianladxbu cós mal né bianladxbu órni diti góc xinésni (Mateo 21:12, 13). Bibanybu ló toib tiemp ro buñ bibixladx né diti gop respet buñgonaʼ. Per Jesús guirá ór godabiobu né gopbu respet buñgonaʼ (Juan 4:9, 27). Láaca, Jesús nigolúpa góc buñdxo. Toibtica buelt dada godipbu ñeʼ xpiimbu, bunybu dxiin ni rony toib mós (Juan 13:2-5, 12-17).

Jesús goniʼ xtiitz Dios rotísi lagary ro goyoʼ buñ.

19. ¿Xí ejemplo raslooy que Jesús gon xi ni caquiin buñ né goniiny ñacnébu buñ?

19 Jesús gon xi ni caquiin buñ né goniiny láabu ñacnébu buñ. Bislooybu láani órni biquiimbu galnadip ni Dios bidudy láabu par bisialbu buñ (Mateo 14:14). Por ejemplo, toib buñguieeu ni gop lepra bibigax ronoʼ Jesús né goniʼbu: «Naʼ naana que pal nainy looy labúu sasialo naʼ». Galrrioʼob ni bisac buñguieeucu bidxinni lainy xcalnabany Jesús. Por ngú, Jesús binladx né gocné láabu. Biscaʼbu ñabu godanbu buñguitz reʼ, né gochbu buñreʼ: «Nainy naʼ. Góc nayaa». ¡Né buñguitzcu bial! (Marcos 1:40-42). ¿Xpensarylo ximod gosac buñguieeucu?

DIPA BISIAMBU BIXIOSBU

20, 21. ¿Xigony Jesús bisiambu toib mod galán par guisobno ni ná Dios?

20 Jesús bisiambu toib mod galán par guisobno ni ná Dios. ¿Xigony? Portín dipa bisiambu Bixiosbu ná godudybu ló bisaʼ clas galnagan né bianladx buñ  láabu. Por ejemplo, Jesús diti biabbu ló xtoʼ Buñdzab (Mateo 4:1-11). Láaca tipnés xfamilbu diti biluladx que láabu nacbu Mesías né goniʼyibu que Jesús cacaa yoʼob. Ná scú, Jesús guirá ór bisobdiitzbu Jehová (Marcos 3:21). Dada órni xi enemigbu nigolú bunynaa láabu, dipa bisiambu Dios né diti bidxiguetbu mal buñcu (1 Pedro 2:21-23).

21 Jesús dipa bisiambu Jehová ná nigolú godudybu ló galrrioʼob dzú goitybu (bíil Filipenses 2:8). Bunysi pensary ló guirá ni buny guantary Jesús dzú goity: gonás buñ láabu, tipnés buñ goniʼ que goniʼbu mal de Dios, jueces goniʼ que non ñaitybu, buñ bixiich láabu, né tipnés soldad bunynaa né bicaʼ láabu ló yac nadop.  Órni Jesús ma yaaca gaity, bicaʼbu rudx: «¡Ma góc cumplirni!» (Juan 19:30). Tzón govitz de goló goitybu, Jehová golís láabu lad gueʼet xomod toib espíritu (1 Pedro 3:18). Ló chop tzón xomal después, Jesús bibiguet lainy guibá, «gorúbu niis ladbuʼ Dios» né golésbu que Bixiosbu ñony láabu Rey (Hebreos 10:12, 13).

22. ¿Xí galnasác sacaʼno por ni dipa bisian Jesús Bixios?

22 Raxquixpano Jesús por ni dipa bisiambu Bixiosbu, modreʼ labúu sabanyno tipzó ló Gudxlio móz. Ndeʼ ni goniiny Dios nírcu. Ló capítulo ni sieed sasuidyno ximod por xcalgoity Jesús labúu sabanyno tipzó ló dzú ni sietra.

^ Párrafo. 7 Pal nainy looy ganlo ximod góc cumplir profecía reʼ, bibiʼ ni ná nota 13, «Profecía ro ritlaa 70 xomal».

^ Párrafo. 11 Jehová nacbu Bixiosno portín láabu bisaʼbu guirá ni noʼ (Isaías 64:8). Jesús nacbu Xiin Dios portín Jehová bisaʼ láabu. Ángeles né Adán láaca nacyibu xiin Dios (Job 1:6; Lucas 3:38).