Rabiguet

Goyee ro ná índice xtuny contenidos

 CAPÍTULO 16

Buny adorar Dios xomod nainy láabu

Buny adorar Dios xomod nainy láabu

1, 2. ¿Xí non coʼno guicno gonyno?

NI MA casuidylo la Biblia, ma bidudylo cuent que xidal buñ ná que cayony adoraryibu Dios, per diti nigolúni portín ronyibu o rasuidyibu cós ni Dios rianladx (2 Corintios 6:17). Por ngú, Jehová rony mandary guireʼno lad religión falz, «Babilonia la Grande» (Apocalipsis 18:2, 4). Guiráno non coʼno guicno pal gony adorarno Dios xomod nainy láabu o xomod nainy lóono.

2 Pal ma bireʼlo lad religión falz o ma bisianlo láani, xinésni bunylo. Per sigory lainy xcalnabanylo noʼsa tipnés costumbres ni radzak né religión falz ni yása guisianlo. Guisuidyno tipnés costumbres né guienno xigony rasac guibiʼno láani xomod rabiʼ Jehová láani.

ÓRNI BUÑ RONY ADORAR DIOXH NÉ GUEʼET

3. a) ¿Xigony tipnés buñ labúu guisac nagan gony adorar Dios sin xcalrracné dioxh? b) ¿Rasuidy la Biblia guiquiinno dioxh par gony adorarno Jehová la?

3 Xidal buñ por xidal íz gopyibu dioxh né bidaʼ laniolidxyibu par buny adoraryibu Dios. Pal ronylo modreʼ, sigory rasaclo que diti xinésni cayony adorarlo Dios sin xcalrracné guirá dioxh reʼ. Per bisetnaladx que Jehová rasuidy lóono ximod nainy láabu gony adorarno láabu. Né la Biblia nayadit rasetlaa órni  náni que Jehová diti nainy láabu guiquiinno dioxh par gony adorarno láabu (bíil Éxodo 20:4, 5; Salmo 115:4-8; Isaías 42:8; 1 Juan 5:21).

4. a) ¿Xigony diti non gony adorarno xfamilno ni ma goity? b) ¿Xigony buny mandary Jehová buñ israelitas que diti nayopyibu mod naninéyibu gueʼet?

4 Sigory tipnés buñ rabeʼyibu xiroʼ tiemp par gonyibu cós ni rioladx xfamilyibu ni ma goity. Sigory dada rony adoraryibu xfamilyibu. Per ma bisuidyno que diti non gonyno ngú, portín gueʼet diti labúu gacnéyibu né diti labúu gonyibu xitcal lóono. Láaca diti nabanyibu stoib lagary. Nacni toib riesga pal rayopyno mod guininéno layibu, portín nitisi rudx ni sieed de toib xfamilno diti nacni xirudxbu nacni xirudx demony. Por ngú, Jehová buny mandarybu israelitas diti nayopyibu mod naninéyibu gueʼet né nabeʼyibu tiplad nitisi costumbres ni radzak né demony (Deuteronomio 18:10-12). (Bibiʼ ni ná nota 26, «Galchiser né galbruj», né ni ná nota 31, «Demony»).

5. ¿Xí láani labúu gacné looy par ma diti gony adorarlo gueʼet né ma diti guiquiinlo dioxh?

5 Pal looy rony adorarlo gueʼet o raquiinlo dioxh par gony adorarlo Dios, ¿xí labúu gacné looy par ma diti gonylo láani? Bíil la Biblia né buny pensary ximod rabiʼ Jehová guirá cós reʼ. Guirá cós reʼ Jehová nigolú rianladx láani (Deuteronomio 27:15). Guirá dzú gonab lóo Jehová gacné looy par guibiʼlo costumbres reʼ xomod rabiʼbu láani né gony adorarlo láabu xomod náapabu (Isaías 55:9). Jehová sadudy fuers looy par guinitlólo guirá cós ni radzak né religión falz.

 ¿NON GONYNO LANININ LA?

6. ¿Xigony golúyibu 25 de diciembre par ñonyibu lanii dzú gool Jesús?

6 Laninin nacni toibtica lanii ni más rony buñ ló Gudxlio, né casi guirá buñ rony pensary que nacni dzú gool Jesús. Per laninin reʼ radzakni né religión falz. Toib enciclopedia rabexa que buñ pagan de gudx Roma bunyibu xilanii Govitz 25 de diciembre. Buñ ni gosanir ló religión, goniiny layibu que más buñ pagan ñac cristianos. Por ngú bunyibu xilanii Jesús dzúcu, ná Jesús diti golbu 25 de diciembre (Lucas 2:8-12). Xpiin Jesús diti bunyibu Laninin. Mod ná libro Los orígenes sagrados de las cosas profundas, chopgayoʼ íz después ni gool Jesús «ni toib buñ gon né diti goloʼyibu cuent pu dzú merpa gool Jesús». Scú láani, Laninin gosalóni tzongayoʼ íz después de xcalgoity Jesús.

7. ¿Xigony cristianos ni rasuidy xinésni diti ronyibu Laninin?

7 Xidal buñ nanyibu pu golainy Laninin né costumbre xtunyni, xomod órni radopyibu par guáyibu né xfamilyibu né láaca par guidudyibu galrrascad. Por ejemplo, lainy gudx Inglaterra né tipnés lagary de Norteamérica ma diti gopyibu permís ñonyibu Laninin portín nacni lanii pagan. Guirá ni buny lanii reʼ goyoʼ ni buny castigar layibu. Per después buñ gosaló buny Laninin stoib. ¿Xigony cristianos ni rasuidy xinésni diti ronyibu Laninin? Portín nainy gony adoraryibu Dios ló guiráxadit cós ni ronyibu.

¿NON GONY BUÑ LANII DZÚ RASAʼ ÍZ LA?

8, 9. ¿Xigony cristianos ni bibany ló siglo primero diti bunyibu lanii cumpleany?

8 Stoib lanii ni más rony buñ nacni órni buñ rasaʼ  íz. ¿Non gony cristianos lanii reʼ la? Ló la Biblia nosi ritlaa xilanii cumpleany de buñ ni diti buny adorar a Jehová (Génesis 40:20; Marcos 6:21). Ló cumpleany ni góc bisanadxyibu dioxh falz. Por ngú, cristianos ni goyoʼ ló siglo primero «bibiʼyibu lanii reʼ xomod costumbres xtuny buñ pagan» (Las cosas nuestras de cada día).

9 Buñ romanos né griegos ni bibany ló dzú ni see biluladxyibu que toib espíritu goyoʼ dzú rál tigaaga buñ né espíritucu san láabu laʼga nabanybu. Buñ pagan biluladx que par diti ñoʼ xi ñacyibu non ñonyibu cumpleany.

10. ¿Xigony cristianos ni noʼ ló naareʼ diti rony lanii cumpleany?

10 ¿Ronylo pensary que Jehová racacuent lanii ni radzak né religión falz la? (Isaías 65:11, 12). Yaca. Por ngú, diti ronyno lanii cumpleany nili stipnés lanii ni radzak né religión falz.

¿NIGOLÚ RASAC GANNO PU RALAINY TIPNÉS COSTUMBRES LA?

11. a) ¿Xigony tipnés buñ rony lanii pagan? b) ¿Xí láani non guisac más par looy?

11 Ná tipnés buñ nan pu golainy Laninin né pu golainy stipnés lanii, ronysayibu láani. Ronyibu pensary que lanii reʼ nacni par guiguaʼyibu né xfamilyibu. ¿Ronylo pensary modreʼ la? Diti mal láani guiguaʼno né xfamilno. Jehová ni bisaʼ famil nainy láabu tzoʼno sacró né xfamilno (Efesios 3:14, 15). Per mod radzakno Jehová non guisacni más par lóono xalagary gonyno cós ni rioladx xfamilno xomod lanii ni radzak né religión falz. Por ngú, apóstol Pablo goniʼ: «Colguicaatzay cuidad xi láani ngú ni rioladx Señor» (Efesios 5:10).

12. ¿Xí clas lanii diti racacuent Jehová?

 12 Xidal buñ rony pensary que diti noʼ pu rasac gan buñ ro ralainy lanii. Per Jehová diti rony pensary modreʼ. Láabu diti racacuentbu lanii ni rony mextra par mbiox scuel, nili lanii ni sieed de religión falz nili lanii ro buñ rasanadx buñgudxlio. Por ejemplo, buñ egipcios bunyibu xidal lanii ro bisanadxyibu dioxh falz. Después ni bireʼyibu gudx Egipto, israelitas bunyibu toib lanii pagan xtuny egipcios né goniʼyibu que nacni «lanii par Jehová». Per Jehová buny castigar layibu por ni bunyibu ndeʼ (Éxodo 32:2-10). Lóono non gonyno ni goniʼ profeta Isaías: «Diti cannto cós buidy» (bíil Isaías 52:11).

BIYOPY MOD GUINIʼLO XI RONYLO CRER

13. ¿Xí labúu guinabdiitzlo pal ragoʼlo guiclo guisianlo lanii pagan?

13 Órni ma goloʼlo guiclo guisianlo lanii pagan, sigory naplo xidal galrranabdiitz. Por ejemplo: «¿Xí raquiin goni pal xcompañera ni ronynéya dxiin ranabdiitz naʼ xigony diti roni Laninin? ¿Xí raquiin goni pal toib buñ noʼ ni rascad naʼ ló Laninin? ¿Né pal tzeʼela raiby naʼ goni toib lanii ni Dios diti racacuent ga? ¿Ximod labúu gacnéya xiinna par diti guisac nabanyibu por ni diti ronydo lanii o cumpleany?».

14, 15. ¿Xí labúu gonylo pal toib buñ raiby looy goyoʼ nakit ló xilaniilo o radudybu toib galrrascad looy?

14 Nigolú rasac coʼno xcalrrienlo xi guinino né xigonyno. Por ejemplo, pal toibtica buñ raiby looy goyoʼ nakit ló xilaniilo, labúu guicapylo láabu «guixquixi looy». Per pal toib buñ raniiny gan más, labúu gaibylo láabu xigony diti ronylo laniicu. Per biyopy  mod guiniʼlo né goniʼ né respet. La Biblia ná: «Diitz ni guiniʼto guirá ór gacni né mod, gapni suudy, par ganto ximod guicapyto tigaaga buñ» (Colosenses 4:6). Sigory labúu gaibylo láabu que rioladxlo tzoʼlo né stipnés buñ né guidudylo galrrascad, per diti ronylo láani órni radzakni né lanii pagan.

15 ¿Xí raquiin gonylo pal toib buñ noʼ ni rascad looy? La Biblia diti raibyni lóono xipa lanii diti gonyno, per raibyni lóono que gapno toib galrrien nayaa (1 Timoteo 1:18, 19). Sigory buñ ni ná guidudy toib galrrascad looy diti nanbu pal diti ronylo laniicu. O dada labúu gaibybu looy: «Naana que diti ronylo láani reʼ per ná scú nainyna guidudi galrrascad reʼ looy». Ma looy nanlo pal guicacuentlo galrrascadcu o yaca. Gondxich que guirá ni gonylo diti gonynudyni xcalrrienlo. Diti nainy gonyno cós ni gony que galsitno de Jehová.

¿XIMOD NON GUICAPYLO XFAMILO?

Xpiin Jehová rioʼ nakit.

16. ¿Xí raquiin gonylo pal xfamilo ná gony toib lanii pagan?

16 ¿Xí raquiin gonylo pal xfamilo ná gony toib lanii pagan? Diti tíildiitzlo né layibu. Bisetnaladx que labúu gonyibu ni nainy layibu. Biyopy mod guininélo layibu né gop respet ni ronyibu pensary, xomod nainy looy gony respetaryibu ni ronylo crer (bíil Mateo 7:12). Per ¿pal xfamilo raiby looy tzoʼlo né layibu ló xilaniiyibu ga? Antes de coʼlo guiclo xi láani gonylo, gonab lóo Jehová gacné looy gonylo xinésni. Buny pensary ló galnagancu né biyopy información ni raniʼ de temacu. Diti guialadxlo que guirá ór nainy looy gonylo ni ná Jehová.

17. ¿Xí raquiin gonylo par labúu gacnélo xiinlo órni rabiʼyibu stipnés rony lanii pagan?

 17 ¿Xí raquiin gonylo par labúu gacnélo xiinlo órni rabiʼyibu stipnés rony lanii pagan? Bunytzaay xis cosien par layibu. Láaca labúu guidudylo toib galrrascadien layibu. Toibtica galrrascad ni más rasac láani ngú cueʼ buñ tiemp né gonladx xiin.

BUNY ADORAR DIOS XOMOD NAINY LÁABU

18. ¿Xigony non tzoʼno reunión guirá xomal?

18 Pal nainy lóono gonyno cós ni rioladx Jehová non guireʼno lad religión falz, non guisianno costumbres né lanii ni diti rioladx Dios. Láaca, non guisobno ni rasuidy religión ni rony xinésni. ¿Ximod? Toib mod ni labúu gonyno láani ngú tzoʼno reunión guirá xomal (bíil Hebreos 10:24, 25). Reunión nigolú rasacni par gony adorarno Dios (Salmo 22:22; 122:1). Ló reunión rony animarno saʼno (Romanos 1:12).

19. ¿Xigony rasac gaibylo stipnés ni casuidylo ló la Biblia?

19 Par gonylo ni rony religión ni rasuidy xinésni, láaca non gaibylo stipnés buñ ni casuidylo ló la Biblia. Xidal buñ rioʼ ló galrrasaʼ por cós mal ni cayac ló Gudxlio. Sigory rimbulo tipnés buñ ni rasac modreʼ. Pal scú nacni, góoch layibu cós sacróyen ni guicaʼno ló dzú ni sietra. Órni ma rieelo reunión né ma raibylo stipnés ni ná la Biblia, sadudylo cuent que ma diti saniiny looy tzoʼlo lad religión falz nili gonylo costumbres ni ronyibu. Labúu gaplo confianz que sabanylo nakit né que Jehová sadudy galnasác looy por ni cayonylo xtem cayony adorarlo láabu mod rioladxbu (Malaquías 3:10).