Rabiguet

Goyee ro ná índice xtuny contenidos

Guiich ni raxel Tidxó Buñ ni nap xiroʼ Galnann ni Rasanir

Guiich ni raxel Tidxó Buñ ni nap xiroʼ Galnann ni Rasanir

Par xhermando ni nadxiʼgoludo:

Lóono ni rienno Dios, nigolú nadxiʼno Xtiitzbu la Biblia. Nandxichno que guirá historias ni napni nigolúni, diti rachéni né litz ni sitnéni racnéni lóono guibanyno sacró. Láaca nantzayno que ló libro reʼ Jehová raslooy balaati nadxiʼbu buñgudxlio (Salmo 119:105; Lucas 1:3; 1 Juan 4:19). Raniiny lóono gacnéno stipnés guisuidyibu cós sacróyen ni sieed ló Xtiitz Dios. Por ngú, nigolú rabaladxdo guicaʼto libro reʼ ni laa, «Ni labúu guisudi ló la Biblia». Nigoreʼ guislooydo ximod nac libro reʼ.

Libro reʼ cuáni par mbioxien. Per láaca labúu gacnéni a nitisi buñ ni ná guisuidy más de la Biblia. Xomod ma nanno la Biblia nacni par guiráxadit buñ, né nandxichno que guirá ni caa loni sacnéni lóono par guibanyno goxtiguie.

Raniʼni de xidal historias, xomod ni gosaclóo primerdiguieʼ family ni goyoʼ ló Gudxlio. Bunydo rutirigaʼlni lóodo par que guirá historias ni sieed ló reʼ nacáni nayadit par guieen buñ láani né láaca bunydo xtem par nacáni conforma gocni.

Per libro reʼ diti nosi rasetlani ni gosaclóo buñ ni bibany nírcu. Láaca biyopydo tipnés textos né dibuj ni gacné lóono guisacno mod gosac guirá buñ ni rasetlaa la Biblia.

Libro reʼ racnéni lóono guiduidyno cuent que la Biblia nacni toib libro ni rasetlaa xí gosaclóo buñ ni bisob ni ná Dios né xí gosaclóo buñ ni diti bisob láabu. Láaca racnéni lóono par guiduidyno cuent xi raquiin gonyno (Romanos 15:4; 1 Corintios 10:6). Libro reʼ radzoni ló 14 midid. Ro rasaló tigaaga midid rasetlani xí rasuidyni lóono.

 Pal ma noʼ xiinlo, labúu golnélo láabu toibtica lesiony né guinabdiitzlo láabu xi rabiʼbu ló dibuj ni napni. Después labúu goʼolto texto ni rasetlaa lesionycu. Gocné xiinlo guiembu ximod radzak texto ni sieed ló la Biblia né xi rasuidyni layibu. Láaca labúu gonylo scúca né toib buñ par guiembu ni rasetlaa la Biblia.

Nigolú raniiny lóodo que libro reʼ gacnéni mbioxhlas né buñgol ni natzaay xcalnabany par guisuidyibu ni ná Xtiitz Dios né guisobyibu láani. Modreʼ guienyibu Dios né guidxin gacyibu xfamily Dios.

Xhermanto,

Tidxó Buñ ni nap xiroʼ Galnann ni Rasanir nisló testigos xtuny Jehová