Rabiguet

Goyee ro ná índice xtuny contenidos

 LESIONY 52

Xidalguixo mainy né camión de guii

Xidalguixo mainy né camión de guii

Rey Ben-Hadad ni goyoʼ Siria xidal buelt cualóbu gudx Israel. Per profeta Eliseo guirága ór bixelbu abís ló rey de Israel par labúu nalaabu. Por ngú Ben-Hadad, biyopybu mod nanásbu Eliseo. Cuaʼbu cuent noʼ Eliseo lainy gudx Dotán né bixelbu soldad xtuny Siria par nanás láabu.

Buñ sirios bidxinyibu Dotán ma gueʼel. Stoib dzúcu xomós Eliseo bireʼbu fuer né bibiʼbu que xidalguixo soldad nagoo gudxcú. Láabu nigolú bidzuibybu né bicaʼbu rudx: «Eliseo, ¿xí gooyno?». Eliseo cuapy láabu: «Noʼ más soldad né lóono que ni noʼ né layibu». Órcuca Jehová buny que xomós Eliseo nabiʼbu que laidy dainy ni nagoo gudxcú, bidza xidalguixo mainy xtuny Jehová né camión de guii.

Órni soldad sirios náyibu nanásyibu Eliseo, láabu gonabbu lóo Dios: «Jehová ranába looy, buny que layibu diti guibiʼyibu». Tiptisi guirá soldadcu ma diti biduidyibu cuent pu noʼyibu, ná naní lóoyibu. Órcuca góoch Eliseo layibu: «Bidxinto stoib gudx. Colguicanal naʼ  tzanéya lóoto ronoʼ buñguieeu ni cayopyto». Né cuanalyibu Eliseo dada bidxinyibu gudx Samaria, ro golés rey de Israel.

Sirios biduidyibu cuent que ma noʼyibu gudx Samaria, per ma diti goyoʼ tiemp par naxonyibu. Rey xtuny Israel gonabdiitzbu Eliseo: «¿Guigati layibu la?». Guirá sirioscu goniiny nanásyibu Eliseo nírcu. Per órni biabyibu ladxña Eliseo, ¿bigaity Eliseo layibu la? Yaca. Láabu gochbu rey: «Diti guigaitylo layibu. Biduidy ni guáyibu né biduidy lagary guibiguetyibu lidxyibu». Por ngú rey de Israel bunytzaay galrro par ñooyibu né de ngú biduidybu lagary que guirá buñreʼ nabiguet lidx.

«Né ndeʼ confianz ni napno láabu, que nitisi cós ni ranabno ni noʼ de acuerdo mod ni nábu, láabu racadiagbu lóono» (1 Juan 5:14).